ജാതി സെൻസസ്, ജനസംഖ്യാനുപാതിക സംവരണം: കോൺഗ്രസിനെ അവഗണിച്ച് ബിജെപി; ഇന്ത്യാ സഖ്യത്തിലും മുറുമുറുപ്പ്

ഒന്നാംഘട്ട വോട്ടെടുപ്പു തുടങ്ങാൻ നാലു ദിവസം മാത്രം ശേഷിക്കെ, നിലവിൽ അധികാരത്തിലുള്ള ഭാരതീയ ജനതാ പാർട്ടി (ബിജെപി) ഏപ്രിൽ 15ന് പുറത്തിറക്കിയ പ്രകടനപത്രിക ശ്രദ്ധേയമാകുന്നത് ബോധപൂർവമുള്ള മറവിയുടെ പേരിലാണ്. അതിന് 10 ദിവസം മുൻപ് ഏപ്രിൽ 5ന് മുഖ്യ പ്രതിപക്ഷ പാർട്ടിയായ കോൺഗ്രസ് പ്രകടനപത്രിക പ്രസിദ്ധീകരിച്ചിരുന്നു. യുവാക്കൾക്കും വനിതകൾക്കും സാമൂഹികമായി പിന്നാക്കം നിൽക്കുന്ന വിഭാഗങ്ങൾക്കും നിരവധി വാഗ്ദാനങ്ങൾ ലോഭംകൂടാതെ നൽകിയ കോൺഗ്രസിനുള്ള മറുപടിയാവും ബിജെപിയുടെ പ്രഖ്യാപനം എന്നു കരുതിയവർ നിരാശരായി. 

2019ൽ നടന്ന ലോക്സഭാ തിരഞ്ഞെടുപ്പിൽ, ഫ്രഞ്ച് സാമ്പത്തിക വിദഗ്ധൻ തോമസ് പിക്കറ്റിയുമായി ചർച്ച ചെയ്ത് കോൺഗ്രസ് മുന്നോട്ടുവച്ച ‘മിനിമം വരുമാനം ഉറപ്പു നൽകുന്ന പദ്ധതി’ ഉൾപ്പെടെ പിന്നീട് ബിജെപി പ്രസിദ്ധീകരിച്ച പത്രികയിലെ വാഗ്ദാന പ്രഭയിൽ മങ്ങിപ്പോയിരുന്നു. ഇത്തവണ ബിജെപി വിട്ടുകളഞ്ഞതോ അവഗണിച്ചതോ ആയ വിഷയങ്ങളിൽ പ്രധാനം ജാതി സെൻസസും അതിന്റെ അടിസ്ഥാനത്തിലുള്ള ജനസംഖ്യാനുപാതിക സംവരണവുമാണ്. 2023 അവസാനം 5 സംസ്ഥാന നിയമസഭകളിലേക്കു നടന്ന തിരഞ്ഞെടുപ്പിൽത്തന്നെ ജാതി സെൻസസ് മുഖ്യ അജൻഡയാക്കാൻ രാഹുൽ ഗാന്ധി ശ്രമിച്ചിരുന്നു. 

അന്നും തുടക്കത്തിൽ അതിനെ അവഗണിക്കാൻ ശ്രമിച്ച ബിജെപി പക്ഷേ, അവസാന ഘട്ടമായപ്പോൾ ജാതി സെൻസസിന് പാർട്ടി എതിരല്ലെന്ന നിലപാടിലേക്ക് എത്തി. രാഹുൽ ഗാന്ധി അത് പ്രചാരണത്തിന്റെ കേന്ദ്രബിന്ദുവാക്കാൻ ശ്രമിച്ചപ്പോൾ അവർ മറ്റു വിഷയങ്ങളിലേക്ക് ശ്രദ്ധതിരിച്ചു. ആ വഴുതിമാറൽ ഗുണംചെയ്തുവെന്നാണ് തിരഞ്ഞെടുപ്പു ഫലം വ്യക്തമാക്കിയത്. മധ്യപ്രദേശിൽ പ്രതീക്ഷിച്ചിരുന്ന വിജയം കൈവിട്ടുപോയതിലും രാജസ്ഥാനിൽ ഭരണം നഷ്ടമായതിലും ജാതി സെൻസസിനെ മുറുകെപ്പിടിക്കാൻ കോൺഗ്രസ് കാട്ടിയ അത്യുൽസാഹം ഒരു ഘടകമായെന്നാണ് പിന്നീട് വിലയിരുത്തപ്പെട്ടത്. പരമ്പരാഗതമായി കോൺഗ്രസിനെ പിന്തുണച്ചിരുന്ന ഒരു വിഭാഗം പാർട്ടിയെ പൂർണമായി കയ്യൊഴിഞ്ഞു.

∙ ജനസംഖ്യാനുപാതിക സംവരണം എന്ന കൈവിട്ട കളി

എന്നാൽ, ജാതി സെൻസസിനും ജനസംഖ്യാനുപാതിക സംവരണം എന്ന ആശയത്തിനും ഇപ്പോൾ ബിജെപിയുടെ കൂടെയുള്ള വോട്ടർമാരെ ഭിന്നിപ്പിക്കാൻ കഴിയുമെന്നാണ് രാഹുലിന്റെയും കോൺഗ്രസിന്റെയും കണക്കുകൂട്ടൽ. അത് എത്രത്തോളം സാധ്യമാകുമെന്നറിയാൻ ജൂൺ 4ന് വോട്ടെണ്ണുംവരെ കാത്തിരിക്കുകതന്നെ വേണം. ഫലം എന്തുതന്നെയായാലും ജനസംഖ്യാനുപാതിക സംവരണം എന്ന കൈവിട്ട കളിക്ക് ഇല്ലെന്നാണ് പ്രകടനപത്രികയിലെ മൗനത്തിലൂടെ ബിജെപി വ്യക്തമാക്കുന്നത്. 15 ശതമാനത്തോളം വരുന്ന മുന്നാക്ക വോട്ട് ബാങ്ക് എന്ന ‘കക്ഷത്തിലുള്ളത്’ കളഞ്ഞുകൊണ്ട് കൂടുതൽ പ്രഖ്യാപനത്തിനു മുതിരുന്നത് ബുദ്ധിയാവില്ലെന്ന് അവർ കരുതുന്നു.

പ്രായപൂർത്തി വോട്ടവകാശത്തിന്റെ അടിസ്ഥാനത്തിൽ തിരഞ്ഞെടുപ്പ് നടത്താൻ തുടങ്ങിയകാലം മുതൽ ഇന്ത്യയിൽ ജാതി സംവരണം ചൂടേറിയ വിഷയമായിരുന്നു. ഗുജറാത്തിലും മറ്റും 1960–80 കാലയളവിൽ പല തവണ അതിന്റെ പേരിൽ ചോരചിന്തിയ കലാപങ്ങളുണ്ടായി. 1989ൽ രാജീവ് ഗാന്ധിയുടെ നേതൃത്വത്തിലുള്ള കോൺഗ്രസിനെ പുറത്താക്കി വിശ്വനാഥ് പ്രതാപ് സിങ്ങിന്റെ ദേശീയ മുന്നണി സർക്കാർ അധികാരത്തിൽ വന്നതോടെ, മുൻപ് ഇന്ദിരാ ഗാന്ധി അട്ടത്ത് വച്ചിരുന്ന മണ്ഡൽ കമ്മിഷൻ റിപ്പോർട്ട് നടപ്പാക്കണമെന്ന ആവശ്യം ശക്തമായി. പുറത്തുനിന്ന് പിന്തുണച്ചിരുന്ന ബിജെപിയുടെ എതിർപ്പ് അവഗണിച്ചുകൊണ്ടാണ് പിന്നാക്ക വിഭാഗങ്ങൾക്ക് ഉദ്യോഗസംവരണം വ്യവസ്ഥ ചെയ്യുന്ന മണ്ഡൽ കമ്മിഷൻ റിപ്പോർട്ട് നടപ്പാക്കാൻ 1990ൽ വി.പി.സിങ് തീരുമാനിച്ചത്. 

അതേത്തുടർന്ന് ഉത്തരേന്ത്യയിലെ പല സംസ്ഥാനങ്ങളിലും പൊട്ടിപ്പുറപ്പെട്ട കലാപം മാസങ്ങളോളം രാജ്യത്തെ സംഘർഷഭരിതമാക്കി. ബന്ദുകളും പൊതുമുതൽ നശിപ്പിക്കലുമായി മാസങ്ങൾ നീണ്ട പ്രക്ഷോഭത്തിനൊടുവിൽ സുപ്രീം കോടതി ഇടപെട്ടു. പിന്നാക്ക സംവരണത്തിന്റെ പരിധിയിൽനിന്ന് ഉയർന്ന വരുമാനക്കാരെ ഒഴിവാക്കാൻ കോടതി നിർദേശിച്ചു. പിന്നീട്, ആകെ സംവരണം 50 ശതമാനത്തിൽ കൂടുതലാകരുതെന്ന വിധിയിലൂടെ (ഇന്ദിര സാഹ്നി കേസ്) പൊതുവേ എല്ലാ വിഭാഗത്തിനും സ്വീകാര്യമായ പരിഹാരം കുറച്ചുകാലത്തേക്കെങ്കിലും നിർദേശിക്കാനും കോടതിക്കു കഴിഞ്ഞു.

∙ അപ്പോഴും അണയാതെ കനലുകൾ 

അതൃപ്തിയുടെ കനലുകൾ പക്ഷേ, അണയാതെ കിടന്നു. പൊതുമേൽവിലാസത്തിൽ ഒന്നിച്ചില്ലെങ്കിലും, ജാതി സംവരണത്തോട് എതിർപ്പുള്ളവർ വിവിധ പേരുകളിൽ മിക്ക വടക്കൻ സംസ്ഥാനങ്ങളിലും പ്രശ്നങ്ങൾ സൃഷ്ടിച്ചു തുടങ്ങി. അവരിൽ ഏതാണ്ട് എല്ലാവരും അന്നാടുകളിലെ പ്രബല വിഭാഗങ്ങളായിരുന്നു. ഗുജറാത്തിൽ പട്ടിദാർമാരും മഹാരാഷ്ട്രയിൽ മറാഠികളും ഹരിയാനയിലും രാജസ്ഥാനിലും ജാട്ടുകളും രാജസ്ഥാനിൽത്തന്നെ ഗുജ്ജറുകളും കർണാടകയിൽ വൊക്കലിഗ വിഭാഗക്കാരും സംവരണം വേണമെന്ന ആവശ്യവുമായി തെരുവിലിറങ്ങി.  സമരത്തിനൊന്നും ഞങ്ങളിലെങ്കിലും കിട്ടിയാൽ വേണ്ടില്ലെന്ന മട്ടിൽ കേരളത്തിലെ നായർ സമുദായത്തിന്റെ മനസ്സ് അവർക്കൊപ്പമായിരുന്നു.