അരുംകൊല എല്ലും മാംസവും വേർപെടുത്തി; ബംഗ്ലാ എംപിയെ കൊല്ലാൻ എന്തിന് കൊൽക്കത്ത? വീണത് പെൺകെണിയിൽ?

സ്വർണം സുരക്ഷിതമായി അതിർത്തി കടത്തുന്നതിന് അനാർ കമ്മിഷൻ കൈപ്പറ്റിയിരുന്നതായും അടുത്തിടെയായി അനാർ കമ്മിഷൻ കൂട്ടിച്ചോദിക്കാൻ തുടങ്ങിയത് അക്തറുസ്മാനെ പ്രകോപിപ്പിച്ചിരുന്നുവെന്നും ഇതിനെത്തുടർന്നായിരിക്കാം കൊലപാതകമെന്നും അന്വേഷണ ഉദ്യോഗസ്ഥരെ ഉദ്ധരിച്ച് ബംഗ്ലദേശ് മാധ്യമങ്ങൾ റിപ്പോർട്ട് ചെയ്യുന്നു. അടുത്തിടെ ഇന്ത്യൻ അതിർത്തിയിൽ 200 കോടി ബംഗ്ലദേശ് ടാക്ക മൂല്യമുള്ള സ്വർണം പിടികൂടിയിരുന്നു. ഇതിൽ അക്തറുസ്മാൻ കടത്തിയ സ്വർണവും ഉൾപ്പെട്ടിരുന്നു. സ്വർണം പിടിക്കപ്പെട്ടതിൽ അനാറിന് പങ്കുണ്ടെന്നാരോപിച്ച് ഇവർ തമ്മിൽ തർക്കമുണ്ടാകുകയും ചെയ്തു. ഇതേത്തുടർന്ന് സുഹൃത്ത്  ശിലാസ്തി റഹ്മാനൊപ്പം അക്തറുസ്മാൻ ബംഗ്ലദേശിൽനിന്ന് ഏപ്രിൽ 30ന് കൊൽക്കത്തയിലെത്തിയിരുന്നതായി ബംഗ്ലദേശ് പൊലീസിന്റെ ഡിറ്റക്ടീവ് ബ്രാഞ്ച് കണ്ടെത്തിയിരുന്നു.

തുടർന്ന് ഇയാൾ മേയ് 10ന് ബംഗ്ലദേശിലേക്ക് തിരികെപ്പോയി. അവിടെനിന്ന് മേയ് 20ന് ഡൽഹി, കാഠ്മണ്ഡു വഴി യുഎസിലേക്ക് പോയെന്നും ഡിബി റിപ്പോർട്ട് പറയുന്നു. ഇവർ കൊൽക്കത്തയിലുണ്ടായിരുന്ന സമയത്താണ് കൊലപാതകം ആസൂത്രണം ചെയ്തതെന്നാണ് സൂചന. ചികിത്സയ്ക്കെന്നു പറഞ്ഞ് മേയ് 12നാണ് അൻവറുൽ അസിം അനാർ ബംഗ്ലദേശിൽനിന്ന് ഇന്ത്യയിലെത്തുന്നത്. സുഹൃത്ത് ഗോപാൽ ബിശ്വാസിന്റെ വസതിയിലാണ് ആദ്യദിവസം ഇദ്ദേഹം താമസിച്ചത്. എന്നാൽ മേയ് 13ന് പുറത്തുപോയ അദ്ദേഹം തിരിച്ചെത്താത്തതിനെത്തുടർന്ന് ബിശ്വാസ് പൊലീസിൽ പരാതി നൽകുകയായിരുന്നു.

ശിലാസ്തിയെ  ഉപയോഗപ്പെടുത്തി അനാറിനെ ഹണിട്രാപ്പിൽപ്പെടുത്തിയെന്നാണ് അന്വേഷണ ഉദ്യോഗസ്ഥരുടെ നിഗമനം. കൊൽക്കത്തയിലെ ന്യൂ ടൗൺ ഏരിയയിലെ ഫ്ലാറ്റിലാണ് അൻവറുലിനെ അവസാനമായി കാണുന്നത്. ഉടമയായ എക്സൈസ് ഉദ്യോഗസ്ഥൻ അക്തറുസ്മാന് ഫ്ലാറ്റ് വാടകയ്ക്ക് നൽകിയതാണെന്ന് അന്വേഷണ ഉദ്യോഗസ്ഥൻ പറയുന്നു. ഫ്ലാറ്റിലേക്ക് അൻവറുൽ അസിം വരുന്നതിന് ദൃശ്യങ്ങൾ തെളിവുണ്ട്. രണ്ട് ദിവസത്തിനു ശേഷം ഈ ഫ്ലാറ്റിൽനിന്ന് ഒരു സ്ത്രീയും 2 പുരുഷന്മാരും 2 വലിയ പെട്ടികളുമായി മടങ്ങുന്ന സിസിടിവി ദൃശ്യങ്ങളും പൊലീസ് കണ്ടെടുത്തിരുന്നു. അൻവറുൽ അസിം പിന്നീട് സിസിടിവി ദൃശ്യങ്ങളിൽ ഇല്ലാതിരുന്നതാണ് പ്രതികളിലേക്ക് എത്തിച്ചത്.

‘‘മാംസം കശാപ്പ് ചെയ്യുന്ന ആയുധങ്ങൾ ഉപയോഗിച്ച് അസിമിന്റെ മൃതദേഹം ചെറിയ കഷണങ്ങളാക്കി. മാംസവും എല്ലുകളും വേർതിരിച്ചു. തൊലി മൃതദേഹത്തിൽ നിന്ന് ഉരിച്ചുമാറ്റി. മുഖം ഉൾപ്പെടെ ഒരിക്കലും തിരിച്ചറിയാനാവാത്ത വിധത്തിലേക്ക് മാറ്റിയ ശേഷമാണ് മഞ്ഞൾപ്പൊടി ചേർത്ത ശരീരഭാഗങ്ങൾ പെട്ടികളിലാക്കിയത്. ശേഷം പ്രതികൾ രക്തക്കറ പലതവണ അണുനാശിനികൾ ഉപയോഗിച്ച് വൃത്തിയാക്കി. അതിനുശേഷം ഫ്ലാറ്റിലിരുന്ന് മദ്യപിക്കുകയും ചെയ്തു’’. സംഭവത്തെപ്പറ്റി അന്വേഷണ ഏജൻസികൾ പറയുന്നതിങ്ങനെ.