സർക്കാരിനെതിരെയാണോ ആരോപണം? അതു പിന്നെ അന്വേഷിക്കാം, ഗൂഢാലോചന ആദ്യം!

∙ അന്നും വിവാദമായി അനിമോന്റെ ശബ്ദരേഖ

മുൻ മന്ത്രി കെ.എം.മാണിക്കെതിരെ 10 വർഷം മുൻപു ബിജു രമേശ് ഉന്നയിച്ച ബാർ കോഴ ആരോപണത്തിലും അനിമോന്റെ ശബ്ദരേഖ പുറത്തുവന്നിരുന്നു. യുഡിഎഫ് സർക്കാരിന്റെ മദ്യനയത്തിന്റെ ഭാഗമായി പൂട്ടിയ ബാറുകൾ തുറക്കുന്നതിന് 5 കോടി രൂപയുമായി കെ.എം.മാണിയുടെ വീട്ടിലെത്തിയെന്ന് അനിമോൻ പറയുന്ന സംഭാഷണം ബിജു രമേശ് തന്നെയാണ് അന്നു പുറത്തുവിട്ടത്. 

5 കോടി രൂപയുമായി കെ.എം.മാണിയുടെ വീട്ടിലെത്തി പെട്ടി തുറന്നു മാണിയെ പണം കാണിച്ചുവെന്നും എന്നാൽ ബാർ പൂട്ടിയത് ഇത്രയും വിവാദമായ സ്ഥിതിക്ക് ഇനി തുറക്കാൻ കഴിയില്ലെന്ന് അദ്ദേഹം നിലപാടെടുത്തെന്നുമായിരുന്നു അനിമോൻ പറഞ്ഞത്. കൊല്ലത്തുള്ള ഒരാളിൽനിന്നാണ് 5 കോടി രൂപ സംഘടിപ്പിച്ചത്. കയ്യിൽ പണമുണ്ടെന്നും തരാൻ ഒരുക്കമാണെന്നും ബോധ്യപ്പെടുത്തുകയായിരുന്നു ഉദ്ദേശ്യമെന്നും അനിമോൻ ഈ സംഭാഷണത്തിൽ പറഞ്ഞിരുന്നു.

കെ.എം.മാണിക്കു 3 ഗഡുവായി നൽകിയ ഒരു കോടി രൂപയിൽ രണ്ടാം ഗഡുവുമായി മാണിയുടെ വീട്ടിൽ പോയവരിൽ അനിമോനുമുണ്ടായിരുന്നെന്ന് അന്നു ബിജു രമേശ് വെളിപ്പെടുത്തിയിരുന്നു. വിജിലൻസ് അന്വേഷണത്തിൽ അനിമോൻ ഇതു ശരിവയ്ക്കുകയും ചെയ്തു. ഇതേസമയം,  ശബ്ദരേഖ പുറത്തായതോടെ, ഫെഡറേഷൻ ഓഫ് കേരള ഹോട്ടൽസ് അസോസിയേഷൻ സംസ്ഥാന നേതാവും ഇടുക്കി ജില്ലാ പ്രസിഡന്റുമായ അനിമോൻ തമിഴ്നാട്ടിലേക്കു പോയതായി സൂചനയുണ്ട്.

∙ മദ്യവിൽപനയും വരുമാനവും കുറഞ്ഞു മന്ത്രി

കേരളത്തെ മദ്യത്തിൽ മുക്കുന്നുവെന്ന പ്രതിപക്ഷ ആരോപണത്തിന്, സർക്കാരിന്റെ വരുമാനത്തിൽ മദ്യവരുമാനത്തിന്റെ പങ്കു കുറയുകയാണെന്നു മന്ത്രി എം.ബി.രാജേഷ് മറുപടി നൽകി. 2012–13 ൽ എക്സൈസ് തീരുവയും വിൽപന നികുതിയും ഉൾപ്പെടെ മദ്യത്തിൽനിന്നുള്ള വരുമാനം സർക്കാരിന്റെ ആകെ വരുമാനത്തിന്റെ 18.21 ശതമാനമായിരുന്നു. 2022–23 ൽ ഇതു 13.4 ശതമാനമാണ്– 4.8% കുറവ്.

മദ്യവിൽപനയും കുറഞ്ഞതായി മന്ത്രി പറയുന്നു. യുഡിഎഫ് സർക്കാരിന്റെ കാലത്ത് 2012–13 ൽ മദ്യവിൽപന 244.33 ലക്ഷം കെയ്സായിരുന്നു. 2022–23 ൽ ഇത് 224.34 ലക്ഷം കെയ്സായി കുറഞ്ഞു. 10 വർഷത്തിനിടെ വിൽപന 8.1 % കുറയുകയാണു ചെയ്തത്. യുഡിഎഫ് സർക്കാരിന്റെ കാലത്തു ബാറുകൾ പൂട്ടുമ്പോൾ 728 എണ്ണമുണ്ടായിരുന്നു. ഇതോടൊപ്പം 78 ബവ്കോ ഔട്‌ലെറ്റുകളും പൂട്ടി. ശാസ്ത്രീയമായ പഠനം നടത്തിയാണ് എൽഡിഎഫ് സർക്കാർ ബാറുകൾ തുറന്നതെന്നും മന്ത്രി വാദിക്കുന്നു.