വർഷം 70 പേരുടെ ജീവനെടുക്കുന്ന കൊലയാളി! തുലാമാസം സൂക്ഷിക്കുക; ‌ആ ‘കുന്തം’ തട്ടിപ്പ്, വീടിനു ചുറ്റിലും വേണം രക്ഷ

കൊല്ലം ജില്ലയിലെ കടയ്ക്കലിൽ കൂടുതൽ ഇടിമിന്നൽ ഏൽക്കുന്നു എന്നുപറഞ്ഞാൽ അതിന് അർഥം അവിടെ ക്യുമിലോനിംബസ് കൂടുതലായി എത്തുന്നുവെന്നാണ്, ഏകദേശം അവിടെ എത്തുമ്പോഴേക്കും മേഘങ്ങളുടെയുള്ളിൽ നടക്കുന്ന പ്രവർത്തനം സ്ഫോടനാത്മകമാവുന്ന സമയമാവുന്നുണ്ടാവാം. അതുപോലെ തൃശൂർ ജില്ലയിൽ ഇടിമിന്നലേൽക്കുന്നത് കുറവാണ്. ഇതിന് കാരണം പാലക്കാട് ചുരത്തിന്റെ പടിഞ്ഞാറ് ഭാഗത്ത് സ്ഥിതിചെയ്യുന്നതിനാലാണ്. ഇവിടെ ഇടിമിന്നൽ മേഘങ്ങൾ കാര്യമായി ഉണ്ടാകുന്നില്ല. മറ്റിടങ്ങളിൽ നിന്നും കാറ്റിന്റെ ദിശയ്ക്ക് അനുസരിച്ച് എത്തുന്ന മേഘങ്ങളാണ് തൃശൂരിലെ ഇടിമിന്നലിന് കാരണമാവുന്നത്. 

∙ തെങ്ങ് ഏറ്റുവാങ്ങും; എർത്തിങ്ങ് 'നാശത്തെ' വീട്ടിലേക്ക് ക്ഷണിക്കും

മിക്കപ്പോഴും വീടിനു മുകളിലായി സ്ഥാപിക്കുന്ന മിന്നൽ രക്ഷാചാലകത്തെക്കാളും ഉയരത്തിൽ തൊട്ടടുത്തു തന്നെ മരങ്ങളുണ്ടാവും. ഇതോടെ മിന്നൽ രക്ഷാചാലകത്തിന്റെ ജോലിഭാരം കുറയും. മരത്തിൽ നേരിട്ട് ഇടി വീഴുകയും ചെയ്യും. കേരളത്തിലെ വീടുകൾക്ക് നാശമുണ്ടാക്കുന്ന ഇടിമിന്നലുകൾ ശ്രദ്ധിച്ചാൽ ഒരു കാര്യം മനസ്സിലാക്കാൻ കഴിയും. ഫാൻ, ഫ്രിജ്, ടിവി തുടങ്ങി വീട്ടിലെ ഇലക്ട്രിക് ഉപകരണങ്ങൾ വ്യാപകമായി ഇടിമിന്നലിൽ നശിക്കുന്നു. ഇത്തരം സംഭവങ്ങളിൽ നാം കരുതുന്നത് വീടിനെ ലക്ഷ്യമാക്കി ഇടിമിന്നൽ വീണത് കൊണ്ടാണ് എന്നാണ്.

എന്നാൽ ഇതു തെറ്റാണ്. വീടിന് സമീപം ഉയർന്ന നിലയിൽ കാണപ്പെടുന്ന ഏതെങ്കിലും മരത്തിനാവും ഇടിമിന്നൽ നേരിട്ട് ഏറ്റിട്ടുണ്ടാവുക. മിക്കവാറും അത് തെങ്ങോ ആഞ്ഞിലിയോ ആവും. കേരളത്തിൽ ഉയർന്ന മരങ്ങൾ ഏറെയുണ്ട്. ഒറ്റത്തടിയായി ഉയർന്ന് വളരുന്ന തെങ്ങിൽ ഇടിമിന്നൽ കൂടുതൽ ഏൽക്കുന്നത് കണ്ടിട്ടില്ലേ. സസ്യസാന്ദ്രത കൂടുതലുള്ളതും കേരളത്തിന്റെ പ്രത്യേകതയാണ്.

ഉയരമുള്ള മരത്തിൽ വീണ ഇടിമിന്നൽ നേരെ താഴേക്ക് വന്ന് ഭൂമിയിലെത്തി സഞ്ചരിക്കുന്നു. ‘ഗ്രൗണ്ട് കണ്ടക്‌ഷൻ’ എന്നാണ് ഇത് അറിയപ്പെടുന്നത്. ഈ സഞ്ചാരത്തിലൂടെയാണ് ഇടിമിന്നൽ വീട്ടിലെ വൈദ്യുതി വയറിങ് ശൃംഖലയിലേക്ക് എത്തുന്നത്. ഇതിലേക്ക് പ്രവേശിക്കുന്നത് വീടുകളിൽ എർത്തിങ്ങ് ഏർപ്പെടുത്തിയിട്ടുള്ള ഭാഗത്തിലൂടെയാവും. ഭൂമിയിലൂടെ സഞ്ചരിക്കുന്ന ഇടിമിന്നൽ തരംഗങ്ങൾ ലോഹവസ്തുക്കളിൽ വേഗത്തിൽ ആകർഷിക്കപ്പെടുന്നതാണ് കാരണം.

മിക്കവാറും വീടുകളുടെ ‘എർത്തിങ്ങ്’ ശരിയായ രീതിയിലായിരിക്കില്ല. ശരിയായ രീതിയിലാണെങ്കിൽ അവിടെ വച്ചുതന്നെ ഇടിമിന്നൽ നിർവീര്യമാകും. എർത്തിങ്ങ് ശരിയായി ചെയ്തില്ലെങ്കിൽ വീടിനുള്ളിലേക്ക് വൈദ്യുത കേബിളുകളിലൂടെ ഇടിമിന്നൽ പ്രവേശിക്കും. വീട്ടുപകരണങ്ങളുടെ സുരക്ഷയ്ക്കുവേണ്ടി ചെയ്യുന്ന എർത്തിങ്ങിലെ പിഴവാണ് ഇടിമിന്നൽ വീട്ടിനുള്ളിലേക്ക് പ്രവേശിക്കാൻ കാരണമാവുന്നത്. 

∙ എന്താണ് ശരിക്കുള്ള എർത്തിങ്ങ്?

50 കിലോവാട്ടിന് മുകളിൽ വൈദ്യുതി ഉപയോഗിക്കുന്ന സ്ഥാപനങ്ങളിൽ ഇലക്ട്രിക്കൽ ഇൻസ്പെക്ടറേറ്റിൽ നിന്നുള്ള കൃത്യമായ പരിശോധന ഉണ്ടായിരിക്കും. ഇതിന് ശേഷമേ പ്രവർത്തിക്കുന്നതിനുള്ള ലൈസൻസ് അടക്കമുള്ള അനുമതികൾ ലഭിക്കുകയുള്ളു. ഇവിടെ എർത്തിങ്ങ് അടക്കം കൃത്യമായി പരിശോധിക്കപ്പെടുന്നു. ഗുണമേൻമയുള്ള സാധനങ്ങൾ, അവയുടെ കനം, നീളം തുടങ്ങിയവയെല്ലാം നിയമപ്രകാരം പാലിക്കപ്പെടുന്നു. എന്നാൽ വീടുകളെ സംബന്ധിച്ച് ഇത്തരം പരിശോധനകളൊന്നും നടക്കാറില്ല. കണക്‌ഷൻ നൽകാനെത്തുന്നവർ ഇതൊട്ട് ശ്രദ്ധിക്കാറുമില്ല. 

എർത്തിങ്ങ് ചെയ്യുമ്പോൾ ഇരുമ്പുദണ്ഡ് ഇറക്കുന്ന കുഴിയിൽ ഉപ്പ്, മരക്കരി തുടങ്ങിയവ ഇടാറുണ്ട്. ഇത് ശാസ്ത്രീയമല്ല. ഇത് ചെയ്യുന്നത് കണ്ടക്ടിവിറ്റി കൂട്ടുന്നതിന് വേണ്ടിയാണ്. എന്നാൽ ഉപ്പ് ഒരു മഴ കഴിയുന്നതോടെ അലിയും. എർത്തിങ്ങിന് വേണ്ടി ഇരുമ്പ് പൈപ്പായിരിക്കും താഴ്ത്തിയിട്ടുള്ളത്. അലിയുന്ന ഉപ്പ് ഇരുമ്പ് കുഴലിനെ തുരുമ്പിപ്പിക്കും, ദുർബലമാക്കും. ഇതിനാലാണ് എർത്തിങ്ങ് ശരിയായി പ്രവർത്തിക്കാത്തത്. ഉപ്പിന് പകരം വിപണിയിൽ ലഭിക്കുന്ന ബെന്റൊണേറ്റെന്ന എന്ന രാസവസ്തുവാണ് ഉപയോഗിക്കേണ്ടത്. മരക്കരി ഇടേണ്ട ആവശ്യവുമില്ല.

ഇനി ഇതൊന്നും ഇട്ടില്ലെങ്കിൽ നീളത്തിൽ രണ്ട് മീറ്റർ വരെ താഴ്ചയിൽ ജിഐ പൈപ്പ് അടിച്ചു താഴ്ത്താൽ മതി. ഈ സ്ഥലത്ത് ജലസാന്നിധ്യം കൂടി ഉറപ്പാക്കിയാൽ എർത്തിങ്ങ് പൂർണമായി. ജലാംശത്തിനായി എർത്തിങ്ങിന് തൊട്ടടുത്തായി ചെടി നട്ട് പിടിപ്പിക്കുന്നത് നല്ലതാണ്. അപ്പോൾ ചെടിക്കായി വെള്ളമൊഴിക്കുമ്പോൾ അത് എർത്തിങ്ങിനും പ്രയോജനം ചെയ്യും. 

∙ ഗ്രൗണ്ട് കണ്ടക്‌ഷൻ തടയാൻ വേണം റിങ് കണ്ടക്ടർ

പലരും വിചാരിച്ചിരിക്കുന്നത് ഇടിമിന്നലിൽ നിന്നും രക്ഷനേടണമെങ്കിൽ മിന്നൽ രക്ഷാചാലകം വീടിന് മുകളിൽ സ്ഥാപിക്കണമെന്നാണ്. എന്നിട്ടും ഈ വീടുകളിൽ ഇടിവീഴുന്നു. ഇടിമിന്നലേറ്റ വീട് നിൽക്കുന്ന പറമ്പിലെ മരങ്ങൾ ശ്രദ്ധിച്ചാൽ മതി. ദിവസങ്ങൾ കഴിയുമ്പോൾ ഏതെങ്കിലും ഉയരത്തിലുള്ള മരം കരിഞ്ഞുണങ്ങി നിൽക്കുന്നത് കാണാനാവും. കാരണം ഈ മരത്തിൽ വീണ ഇടിയാവും ഗ്രൗണ്ട് കണ്ടക്‌ഷനിലൂടെ വീടിനുള്ളിലും എത്തിയിട്ടുണ്ടാവുക.

സാധാരണ കേരളത്തിലെ വീടുകളുടെ മുകളിൽ മിന്നൽ രക്ഷാചാലകം സ്ഥാപിച്ചതുകൊണ്ട് വിചാരിച്ച പ്രയോജനം ലഭിക്കണമെന്നില്ല. കാരണം സ്ഥാപിക്കുന്ന ഈ ഉപകരണത്തേക്കാളും ഉയരത്തിലാവും ആ പറമ്പിലെ മരങ്ങളുണ്ടാവുക. ചില സ്ഥലങ്ങളിലൊക്കെ വീടിന് മുകളിൽ മിന്നൽ രക്ഷാചാലകം വച്ചിട്ടുള്ളതിന് തൊട്ടരികെ തന്നെ വീടിനോട് ചേർന്ന ഉയരത്തിൽ തെങ്ങ് നിൽപ്പുണ്ടാവും. അപ്പോൾ സംഭവിക്കുന്നത് എന്താണ്? വീടിന് മുകളിൽ വച്ചിരിക്കുന്ന ഉപകരണത്തിന് ഇടിയില്‍ നിന്നും സംരക്ഷണം ഒരുക്കിയാവും തെങ്ങ് നിൽക്കുക. മിന്നൽ രക്ഷാചാലകവുമായി ബന്ധപ്പെട്ട് തട്ടിപ്പുകളും ഏറെയുണ്ട്. ഇടിമിന്നൽ ഉപകരണം പിടിച്ചെടുക്കുമെന്നുള്ള കഥകളാണ് ഇത്തരക്കാർ പ്രചരിപ്പിക്കുന്നത്. 

സ്വാഭാവികമായും ആദ്യം ഇടി വീഴുന്നത് തെങ്ങിലാവും. അത് തെങ്ങിലൂടെ ഭൂമിയിലേക്ക് എത്തുകയും എര്‍ത്തിങ്ങ് ശരിയായിട്ട് ചെയ്തില്ലെങ്കിൽ ആ വീട്ടിൽ തന്നെ നാശമുണ്ടാക്കുകയും ചെയ്യും. അത് മിന്നൽ രക്ഷാചാലകത്തിന്റെ കുഴപ്പം കൊണ്ടല്ല അതിനും മുകളിൽ വളരുന്ന മരങ്ങളുള്ളതിനാലാണ്. കൂടുതൽ നാശനഷ്ടമുണ്ടാക്കുന്നത് ഗ്രൗണ്ട് കണ്ടക്‌ഷനിലൂടെയായതിനാൽ ഇതിൽ നിന്നും രക്ഷ നേടുന്നതിനായി റിങ് കണ്ടക്ടറുകൾ സ്ഥാപിക്കുകയാണ് ചെയ്യേണ്ടത്.

റിങ് കണ്ടക്ടറെന്ന് പറഞ്ഞാൽ വീടിന് ചുറ്റും അംഗീകൃത മാനദണ്ഡമുള്ള ഇരുമ്പ് ദണ്ഡ് കൊണ്ട് ഒരു വലയം സ്ഥാപിക്കണം. ഇവ തമ്മിൽ ബന്ധിപ്പിക്കുകയും ചെയ്യണം. ഈ ഇരുമ്പ് വലയം ശരിയായ എർത്തിങ്ങുമായി കൂട്ടിച്ചേർക്കുന്നതോടെ ഗ്രൗണ്ട് കണ്ടക്‌ഷൻ വഴി വീട്ടിലേക്ക് ഇടിമിന്നലെത്തുന്നത് തടയാനാവും. റിങ് കണ്ടക്ടര്‍ മണ്ണിൽ താഴ്ത്തിയാണ് സ്ഥാപിക്കേണ്ടത്. ഒരു മീറ്ററിൽ താഴെ വച്ചാൽ മതി. 

∙ മൊബൈൽ ടവറുണ്ടെങ്കിൽ ഇടി വെട്ടില്ലേ?

മിക്കപ്പോഴും ഉയർന്ന പ്രദേശത്താവും മൊബൈൽ ടവറുകൾ സ്ഥാപിക്കുന്നത്. അനുമതിക്കായി പരിശോധനയുള്ളതിനാൽ ടവറിന്റെ കാര്യത്തിൽ കൃത്യമായി എർത്തിങ്ങ് ചെയ്തിട്ടുണ്ടാവും. ഉയരമുളളതിനാൽ മുകളിലും ഗ്രൗണ്ട് കണ്ടക്‌ഷൻ വഴിയുള്ള ഇടിമിന്നൽ ആഘാതം ഒഴിവാക്കാനുമുള്ള സംവിധാനങ്ങൾ ഒരുക്കിയിട്ടുണ്ടാവും. ഇതൊക്കെ കാരണം മൊബൈൽ ടവറിൽ ഇടിമിന്നൽ നാശനഷ്ടം ഉണ്ടാക്കാറില്ല. ടവറിൽ വീഴുന്ന ഇടിമിന്നൽ സുരക്ഷതമായി എർത്തിങ്ങിലൂടെ നിർവീര്യമാക്കുന്നുന്നതിലൂടെയാണ് ഇത് സാധ്യമാക്കുന്നത്.  അതല്ലാതെ മൊബൈൽ ടവറുണ്ടെങ്കിൽ ആ പ്രദേശം പൂർണമായും ഇടിമിന്നലിൽ നിന്നും സുരക്ഷിതമാണെന്ന് പറയാനാവില്ല. 

∙ ഈ ഇടിമിന്നൽ ഇല്ലാതിരുന്നെങ്കിലോ?

ഇടിമിന്നലുകൾ കൊണ്ട് പ്രകൃതിക്ക് ചില ഉപയോഗങ്ങളുമുണ്ട്. അന്തരീക്ഷത്തിലെ നൈട്രജൻ നൈട്രേറ്റാവുന്നതിൽ ഇടിമിന്നൽ പങ്കുവഹിക്കുന്നുണ്ട്. ഇത് ചെടികളുടെ വളർച്ചയ്ക്ക് ഏറെ സഹായകരമാവുന്നു. ഓസോണിന്റെ രൂപീകരണത്തിലും ഇടിമിന്നൽ പ്രധാന പങ്കുവഹിക്കുന്നു, സൂര്യനിൽ നിന്നുള്ള അൾട്രാ വയലറ്റ് രശ്മികളെ തടയാൻ ഓസോൺ സഹായിക്കുന്നു. എത്രയോ ഇടിമിന്നലുകൾ പാഴായി പോകുന്നു, ഇതിൽ നിന്നും വൈദ്യുതി ഉണ്ടാക്കിക്കൂടെ എന്ന് ചിന്തിച്ചിട്ടുണ്ടോ? എന്നാൽ അതൊരിക്കലും സാധ്യമല്ല. നമ്മൾ ഉദ്ദേശിക്കുന്നതിലും വലിയ ഊർജ്ജപ്രവാഹമാണ് ഇടിമിന്നലിലൂടെ ഉണ്ടാകുന്നത്. ഇനി കൃത്രിമമായി ഇടിമിന്നൽ ഉണ്ടാക്കാൻ കഴിയുമോ എന്ന് ചോദിച്ചാൽ കഴിയും എന്നാണ് ഉത്തരം.