‘മോദിപ്രഭാവവും ഹിന്ദുത്വയും ഇനി രക്ഷിക്കില്ല’: ആ പ്രവചനം പാളി; ‘മധ്യേ’യിങ്ങനെ മഹാവിജയവുമായി ബിജെപി

കഴിക്കാൻ ഏറ്റവും ഇഷ്ടമുള്ള വിഭവമാണെങ്കിൽപ്പോലും ഹൃദയത്തിലൊരു ‘ബ്ലോക്കിനു’ കാരണമായാൽ നാം അതുപേക്ഷിക്കും. ഇന്ത്യയുടെ ഹൃദയമെന്നറിയപ്പെടുന്ന മധ്യപ്രദേശിലും ബിജെപി ചെയ്തത് അതാണ്. ഇന്ത്യയിലെ ബിജെപി മുഖ്യമന്ത്രിമാരിൽ നരേന്ദ്രമോദിയേക്കാളും കൂടുതൽ കാലം മുഖ്യമന്ത്രിയായിരുന്നിട്ടും ഇത്തവണത്തെ നിയമസഭാ തിരഞ്ഞെടുപ്പിൽ ശിവ്‌രാജ് സിങ് ചൗഹാനെ പാർട്ടി ‘കൈവിട്ടു’. ഭരണത്തുടർച്ച പ്രതീക്ഷിച്ച് രണ്ടുംകൽപിച്ചുള്ള ഒരു നീക്കമായിരുന്നു അത്. മധ്യപ്രദേശിൽ ഏറ്റവും കൂടുതൽ കാലം ഭരണത്തിലിരുന്ന മുഖ്യമന്ത്രി കൂടിയായിരുന്നു ചൗഹാൻ. എന്നിട്ടും കൈവിട്ട കളിക്കു മുതിർന്ന ബിജെപിയുടെ തന്ത്രങ്ങളെല്ലാം പക്ഷേ, വെന്നിക്കൊടി പാറിച്ചു. മധ്യപ്രദേശിൽ കോൺഗ്രസിനേക്കാളും ഇരട്ടിയിലേറെ സീറ്റ് നേടി മഹാവിജയം. ഒപ്പം, കഴിഞ്ഞ 25 വർഷത്തിനിടയിലെ ഏറ്റവും ഉയർന്ന വോട്ടു ശതമാനവും.

സംസ്ഥാനത്ത് ഭരണവിരുദ്ധ വികാരമാണന്നു തിരിച്ചറിഞ്ഞ നിമിഷം ഹൃദയത്തിന് അടിയന്തര ‘സിപിആർ’ നൽകി വീണ്ടും അഞ്ചു വർഷത്തേക്കു ഭരണം നേടിയെടുക്കുകയായിരുന്നു ബിജെപി. 2003ൽ കോൺഗ്രസിൽനിന്നു തട്ടിയെടുത്ത വിജയം 20 വർഷത്തിനിപ്പുറവും ബിജെപിയുടെ കൈയിൽ ഭദ്രം (ഇടയ്ക്ക് 2018ൽ 15 മാസത്തേക്കു ഭരണം കയ്യിൽനിന്നു പോയത് മാറ്റി നിർത്തിയാൽ). എന്നാൽ ഇത്തവണ അട്ടിമറികൾക്കോ എംഎൽഎമാരെ ചാക്കിട്ടു പിടിക്കാനോ റിസോർട്ട് രാഷ്ട്രീയത്തിനോ ഒന്നും ബിജെപിക്കു മെനക്കെടേണ്ടി വന്നില്ല. ആകെയുള്ള 230 സീറ്റിൽ ഭൂരിപക്ഷത്തിനു വേണ്ടത് 116 സീറ്റ്. ഫലം വന്ന ഡിസംബർ 3 ഉച്ചയ്ക്ക് മൂന്നു വരെയുള്ള കണക്ക് പ്രകാരം, മധ്യപ്രദേശിൽ 162 സീറ്റും ബിജെപിക്ക് സ്വന്തം. എക്സിറ്റ് പോളുകൾ പ്രവചിച്ചതു പോലെത്തന്നെ സംഭവിച്ചു; കോൺഗ്രസിനേക്കാളും 96 സീറ്റ് അധികം നേടി അധികാരത്തിൽ. കോൺഗ്രസ് നേടിയത് 66 സീറ്റ് മാത്രം. 48 ശതമാനത്തിലേറെയാണ് ബിജെപി വോട്ടു ശതമാനം, കോൺഗ്രസ് 40 ശതമാനത്തിലും.

2020ൽ 22 എംഎൽഎമാരുമായി ബിജെപി പാളയത്തിലേക്കു പോയ ഗ്വാളിയർ–ചമ്പൽ മേഖലാ ‘രാജാവ്’ ജ്യോതിരാദിത്യ സിന്ധ്യയുടെ രാഷ്ട്രീയഭാവി ബിജെപിയിൽ കൂടുതൽ തിളക്കമുള്ളതാക്കുന്നതു കൂടിയായി തിര‍ഞ്ഞെടുപ്പു ഫലം. ഗ്വാളിയർ– ചമ്പൽ മേഖലയിലെ നിർണായക സീറ്റുകളെല്ലാം ഇത്തവണയും സിന്ധ്യയ്ക്കൊപ്പം നിന്നു. ആ സീറ്റുകളുടെ കൂടി ബലത്തിലാണ് ഇത്തവണത്തെ ബിജെപിയുടെ അനായാസ ജയവും. അതേസമയം, മോദി–ഷാ സഖ്യത്തിന് അനഭിമതനായ ശിവ്‌രാജ് സിങ് ചൗഹാന്റെ രാഷ്ട്രീയ ഭാവി എന്തായിരിക്കും എന്നാണ് എല്ലാവരും ഉറ്റുനോക്കുന്നത്. ഇത്രയും വലിയ വിജയത്തിനു കാരണക്കാരിലൊരാളായ ചൗഹാനെ മുഖ്യമന്ത്രിസ്ഥാനത്തു തുടരാൻ അനുവദിക്കുമോ, അതോ കേന്ദ്രത്തിൽനിന്ന് പ്രത്യേകമായിറക്കിയ നേതാക്കൾക്കായിരിക്കുമോ മുന്തിയ പരിഗണന?

ഒട്ടേറെ ‘മുഖ്യമന്ത്രി സ്ഥാനാർഥികളെ’യാണ് ബിജെപി ഇത്തവണ ചൗഹാനു പകരം ഇറക്കിയത് എന്നതാണ് ഇത്തരമൊരു സംശയത്തിനു കാരണം. അതിൽ കേന്ദ്രത്തിൽനിന്നു നേരിട്ടു കെട്ടിയിറക്കിയവർ വരെയുണ്ട്. ഇത്തരത്തിൽ മോദി– ഷാ സഖ്യത്തിന്റെ നേരിട്ടുള്ള ഇടപെടൽ കൂടിയായതോടെ തിരഞ്ഞെടുപ്പിൽ കോൺഗ്രസിന്റെ സീറ്റുകൾ അറുപത്തി ഏഴിലേക്കു ചുരുങ്ങി. അഭിപ്രായ സർവേകളിൽ അപകടം മണത്തതു മുതൽ തിരഞ്ഞെടുപ്പു തന്ത്രങ്ങളൊന്നാകെ മാറ്റിയാണ് ബിജെപി മധ്യപ്രദേശിനെ തിരികെ പിടിച്ചത്. പ്രിയങ്ക ഗാന്ധിയുടെ താരപ്രചാരണം സൂപ്പർ ഹിറ്റായിട്ടും, രാഹുൽ ഗാന്ധിയുടെ ഭാരത് ജോഡോ യാത്ര പുതുഊർജം പകർന്നിട്ടും എന്തുകൊണ്ടാണ് കോൺഗ്രസിനൊപ്പം മധ്യപ്രദേശ് നിൽക്കാതിരുന്നത്. ബിജെപിയുടെ പ്രചാരണതന്ത്രങ്ങൾതന്നെ അതിനു കാരണം. എങ്ങനെയാണ് മോദി–ഷാ സഖ്യം മധ്യപ്രദേശ് പിടിച്ചെടുത്തത്?

∙ ‘ഇന്ത്യ’യെ കോൺഗ്രസ് കൈവിടരുതായിരുന്നു!

ഉത്തർപ്രദേശ്, മഹാരാഷ്ട്ര, ബിഹാർ, തമിഴ്‍നാട് എന്നീ സംസ്ഥാനങ്ങൾ കഴിഞ്ഞാൽ ഇന്ത്യയിൽ ഏറ്റവുമധികം മണ്ഡലങ്ങളുള്ള സംസ്ഥാനമാണ് മധ്യപ്രദേശ്– 230 എണ്ണം. എന്നാൽ ഇപ്പറഞ്ഞ നാലു സംസ്ഥാനങ്ങളിലും അടുത്ത നിയമസഭാ തിരഞ്ഞെടുപ്പ് വരുന്നതിനു മുൻപ് കേന്ദ്രത്തിന് വലിയൊരു അഗ്നിപരീക്ഷ കടക്കാനുണ്ടായിരുന്നു. 2024 മധ്യത്തോടെ നടക്കുമെന്നു പ്രതീക്ഷിക്കുന്ന ലോക്സഭാ തിരഞ്ഞെടുപ്പ്. ഇന്ത്യ ആരു ഭരിക്കുമെന്നു തീരുമാനിക്കുന്നതിന്റെ ലിറ്റ്മസ് ടെസ്റ്റായി പലരും, ഇപ്പോൾ അഞ്ചു സംസ്ഥാനങ്ങളിലേക്കു നടന്ന തിരഞ്ഞെടുപ്പിനെ കണ്ടിരുന്നു. ആ അഞ്ചിൽ ഏറ്റവും വലിയ സംസ്ഥാനമായിരുന്നു മധ്യപ്രദേശ്. ഹിന്ദി ഹൃദയഭൂമിയിലെ യഥാർഥ ഹൃദയം. രാജസ്ഥാനും ഛത്തീസ്‌ഗഢിനും പുറമേ ഇനി ആ ‘വലിയ’ സംസ്ഥാനവും ബിജെപിക്കു വേണ്ടിത്തന്നെ വീണ്ടും മിടിക്കും.

2018ൽ മധ്യപ്രദേശ് നിയമസഭാ തിരഞ്ഞെടുപ്പിൽ ബിജെപി രണ്ടാം സ്ഥാനത്തായെങ്കിലും അതിനു പിന്നാലെ നടന്ന ലോക്സഭാ തിരഞ്ഞെടുപ്പിൽ 29ൽ 28 സീറ്റും നേടി പാർട്ടി കരുത്തു തെളിയിച്ചിരുന്നു. അതുതന്നെ ഇത്തവണയും ആവർത്തിക്കുമെന്ന പ്രതീക്ഷയ്ക്കു കരുത്തു പകരുന്നതായി ഈ ഫലം. ലോക്സഭാ തിര‍ഞ്ഞെടുപ്പിൽ കാറ്റ് കോൺഗ്രസിന് അനുകൂലമായി മാറുമെന്നു വിശ്വസിക്കാനും സാഹചര്യങ്ങൾ സമ്മതിക്കുന്നില്ല. ‘ഇന്ത്യ’ മുന്നണിതന്നെ പ്രധാന കാരണം. ഒരുപക്ഷേ ഹിന്ദി ഹൃദയഭൂമിയിൽ മികച്ച വിജയം നേടിയിരുന്നെങ്കിൽ ‘ഇന്ത്യ’ മുന്നണിയുടെ തലപ്പത്തേക്കു സധൈര്യം കയറി വരാമായിരുന്നു കോൺഗ്രസിന്. എന്നാൽ മധ്യപ്രദേശിൽ ‘ഇന്ത്യ’ മുന്നണിയെ കൈവിട്ട് ഒറ്റയ്ക്കു മത്സരിക്കാനായിരുന്നു കോൺഗ്രസിന്റെ തീരുമാനം. അതിന്റെ പരിഹാസം സമാജ്‌വാദി പാർട്ടിയില്‍നിന്നുൾപ്പെടെ ഏറ്റുവാങ്ങേണ്ടിയും വന്നു. 

സഹകരിക്കാമെന്ന് എസ്പി നേതാക്കൾ പറഞ്ഞിരുന്നെങ്കിലും കോൺഗ്രസ് തയാറായില്ല. 230 സീറ്റിലും കോൺഗ്രസ് ഒറ്റയ്ക്ക് മത്സരിക്കുകയായിരുന്നു. ബിജെപിയും അങ്ങനെത്തന്നെ. ബിഎസ്പിയും ജിജിപിയും സംയുക്തമായി 218 സീറ്റിൽ മത്സരിച്ചു. ശക്തികേന്ദ്രമായ 71 സീറ്റില്‍ എസ്പിയും മത്സരിച്ചു. നിർണായകമായ ആ മണ്ഡലങ്ങളിൽ പലതിലും ബിജെപിക്കു പിന്നിൽ കോൺഗ്രസ് രണ്ടാമതായിപ്പോയി. ഒരുപക്ഷേ ഇരുകൂട്ടരും ഒരുമിച്ചു മത്സരിച്ചിരുന്നെങ്കിൽ വിജയം കാണുമായിരുന്ന മണ്ഡലങ്ങളും അക്കൂട്ടത്തിലുണ്ടായിരുന്നു. എഎപി 66 സീറ്റില്‍ മത്സരിച്ചിരുന്നെങ്കിലും കാര്യമായ പ്രചാരണത്തിനു നിന്നില്ല. എസ്‌പി, എഎപി, ആസാദ് സമാജ് പാർട്ടി, എഐഎംഐഎം പാർട്ടി തുടങ്ങിയവയെല്ലാം ചേർന്നു പിടിക്കുന്ന വോട്ടുകൾ ഓരോ മണ്ഡലത്തിലും തങ്ങൾക്കു വിജയത്തിലേക്കുള്ള വഴിയൊരുക്കുമെന്നുള്ള ബിജെപി പ്രതീക്ഷയും തെറ്റിയില്ല. അത്തരത്തിൽ വോട്ടുകൾ പലതായി ചിതറിയപ്പോൾ ബിജെപിയും കോൺഗ്രസുമല്ലാതെ ആകെ സീറ്റ് നേടിയത് ബിഎസ്‌പിയും ഭാരത് ആദിവാസി പാർട്ടിയുും മാത്രം –  അതും ഓരോന്നു വീതം.

∙ ചൗഹാൻ ‘വിരുദ്ധ’ ബിജെപി; പക്ഷേ ഇനി...

കോൺഗ്രസിനു വേണമെങ്കിൽ വിജയിക്കാനുള്ള വിളനിലം ബിജെപിതന്നെ മധ്യപ്രദേശിൽ ഒരുക്കിയിട്ടിരുന്നുവെന്നതാണു സത്യം. അത് ഉഴുതുമറിക്കുന്നതരത്തിലുള്ള പ്രചാരണം മതിയായിരുന്നു ജയത്തിന്. അതിനുള്ള ശ്രമങ്ങളും കോൺഗ്രസ് നടത്തി. കർണാടകയിലെ ബിജെപി സർക്കാർ വിവിധ പദ്ധതികൾ നടപ്പാക്കാന്‍ 40 ശതമാനമാണ് കമ്മിഷൻ വാങ്ങുന്നതെങ്കില്‍ മധ്യപ്രദേശിൽ അത് ‘50% കമ്മിഷൻ സർക്കാർ’ ആണെന്നായിരുന്നു പ്രിയങ്ക ഗാന്ധി ആഞ്ഞടിച്ചത്. കാർഷികോൽപാദനത്തിൽ ഉൾപ്പെടെ മുന്നിട്ടു നിൽക്കുന്ന സംസ്ഥാനമായിട്ടും വിലക്കയറ്റം പിടിച്ചു നിർത്താനോ കർഷകർക്ക് അവരുടെ വിഭവങ്ങൾക്കു വേണ്ടത്ര വില ലഭ്യമാക്കാനോ ചൗഹാൻ സർക്കാരിനു കഴിഞ്ഞില്ലെന്നതും പ്രചാരണത്തിന്റെ ഭാഗമാക്കി കോൺഗ്രസ്. എന്നാല്‍ ഇതെല്ലാം ഫലത്തിൽ സഹായിച്ചത് ബിജെപിയെയാണെന്നു മാത്രം.