‘ശബരിമലയിൽ തീർഥാടക വാഹനം തടയാൻ കാരണമുണ്ട്; നിർമാണം മുടക്കുന്നത് വനംവകുപ്പ്; പമ്പയിൽ ജർമൻ പന്തൽ അടുത്ത വർഷം’

പലപ്പോഴും നിലയ്ക്കലിൽ പാർക്കിങ് സൗകര്യം കുറയുമ്പോൾ മറ്റു ഭാഗങ്ങളിൽ വാഹനങ്ങൾ പിടിച്ചിടേണ്ട സാഹചര്യമുണ്ടാകുന്നുണ്ട്. ഹിൽടോപ്പ് അനുവദിച്ചു കിട്ടിയാൽ നിലയ്ക്കലിൽ 2000 വലിയ വാഹനങ്ങൾ പാർക്ക് ചെയ്യാൻ കഴിയും. പുല്ലുമേട്ടിൽ കൂടുതൽ ജാഗ്രത പുലർത്തണമെന്ന് വനംവകുപ്പിനും പൊലീസിനും സർക്കാർ നിർദേശം നൽകിയിട്ടുണ്ടെന്നാണു മനസ്സിലാക്കുന്നത്. തീർഥാടകർക്ക് വെള്ളം കൊടുക്കുന്നതിനും ലഘുഭക്ഷണം നൽകുന്നതിനുമുള്ള സൗകര്യം ഒരുക്കുക, കാര്യക്ഷമമായ ശുചീകരണം ഉറപ്പു വരുത്തുക എന്നിവയും പരിഗണനയിലാണ്. ഇവ ഉറപ്പാക്കുന്നതിനായി കൃത്യമായ അവലോകന യോഗങ്ങൾ ചേരുന്നുണ്ട്.

? ശബരിമലയിലെ ഇത്തവണത്തെ നടവരവിന്റെ സ്ഥിതി എന്താണ്.

ശബരിമല നടവരവിൽ ഈ സീസണിൽ 18 കോടി രൂപയുടെ കുറവാണുണ്ടായിട്ടുള്ളത്. 2020–21 കോവിഡ് കാലത്ത് ക്ഷേത്രത്തിലേക്ക് തീർഥാടകർ എത്തിയിരുന്നില്ല. തമിഴ്നാട്, ആന്ധ്ര പ്രദേശ്, കർണാടക സംസ്ഥാനങ്ങളിൽ നിന്നുള്ള ഭക്തജനങ്ങൾ ശബരിമലയിലേക്ക് എത്തുന്നത് വരുമാനത്തിന്റെ ഒരു ഭാഗവുമായാണ്. ഓരോ വർഷവും അവർ കൃത്യമായ ഒരു തുക അയ്യപ്പന്റെ പേരിൽ നീക്കി വയ്ക്കാറുണ്ട്. കോവിഡിന്റെ ഇടവേള കഴിഞ്ഞ സീസണിൽ നടതുറന്നപ്പോൾ അയൽ സംസ്ഥാനങ്ങളിൽനിന്ന് വൻതോതിൽ തീർഥാടക പ്രവാഹമുണ്ടായെന്നു മാത്രമല്ല, നടവരവ് റെക്കോർഡിലേക്കെത്തുകയും ചെയ്തു. 

ഒന്നര ലക്ഷത്തോളം കൂടുതൽ തീർഥാടകരാണ് അന്ന് എത്തിയത്. ഇത്തവണ ചെന്നൈയിലെ പ്രളയം, തെലങ്കാന തിരഞ്ഞെടുപ്പ് എന്നിവ കാരണം ആദ്യ ദിവസങ്ങളിൽ തീർഥാടകരുടെ എണ്ണം പൊതുവേ കുറവായിരുന്നു. എന്നാൽ 28 ദിവസം കഴിഞ്ഞപ്പോൾ സ്ഥിതി മാറി. 40 ലക്ഷം രൂപയുടെ അധിക വരുമാനം ഉണ്ടായി. അരവണയുടെ വിൽപനയാണ് ദേവസ്വം ബോർഡിന്റെ പ്രധാന വരുമാന സ്രോതസ്സുകളിലൊന്ന്. അതിലൂടെയുള്ള വരുമാനം  ആദ്യ 25 ദിവസങ്ങളിൽ ശരാശരി രണ്ടേകാൽ ലക്ഷം രൂപയായിരുന്നു. പിന്നീട് അത് നാലു ലക്ഷം വരെ പോയി. 2020ലെ വരുമാനം 200 കോടിയിൽ താഴെയായിരുന്നു. കഴിഞ്ഞ തവണയാണ് അത് 400 കോടിയോളമായത്. ഇത്തവണ ഒന്നരക്കോടി തീർഥാടകർ കുറഞ്ഞിട്ടും 20 കോടിയുടെ കുറവാണുള്ളത്. എന്തായാലും കഴിഞ്ഞ വർഷത്തോടൊപ്പം എത്തിച്ചേരുമെന്നാണ് പ്രതീക്ഷ.

? പന്തളം കൊട്ടാരവും ദേവസ്വം ബോർഡുമായുള്ള ബന്ധം പലപ്പോഴും വിവാദമാകാറുണ്ട്. ഏതു തരത്തിലുള്ള ബന്ധമായിരിക്കും കൊട്ടാരവുമായി നിലനിർത്തുക.

പന്തളം കൊട്ടാരവുമായി ബന്ധപ്പെട്ടാണല്ലോ ശബരിമലയുടെ ഐതിഹ്യം തന്നെ. ആ ആദരവോടെതന്നെയാണ് പന്തളം കൊട്ടാരത്തെ കാണുന്നത്. അതിൽ രാഷ്ട്രീയമോ മറ്റു പരിഗണനയോ വേണമെന്നു കരുതുന്നില്ല. ഞാൻ ചുമതലയേറ്റ ശേഷം കൊട്ടാരം സന്ദർശിച്ചിരുന്നു. അവരുമായി നല്ല ബന്ധം നിലനിർത്താനാണ് ആഗ്രഹിക്കുന്നത്. ആചാരപരമായ കാര്യങ്ങളിൽ പന്തളം കൊട്ടാരത്തിന് അർഹമായ പരിഗണന നൽകും.

? ശബരിമലയുമായി ബന്ധപ്പെട്ട ദൈനംദിന കാര്യങ്ങളുടെ മേൽനോട്ടത്തിന് ദേവസ്വം ബോർഡ് എന്തുതരം ക്രമീകരണങ്ങളാണ് ഒരുക്കിയിട്ടുള്ളത്.

1257 ക്ഷേത്രങ്ങളാണ് തിരുവിതാംകൂർ ദേവസ്വം ബോർഡിനു കീഴിലുള്ളത്. ശബരിമലയുടെ കാര്യങ്ങൾ നടത്തുന്നതിനോടൊപ്പം ഈ ക്ഷേത്രങ്ങളുടെ കാര്യങ്ങളും ശ്രദ്ധിക്കേണ്ടതുണ്ട്. അതിനു പുറമേ 7 കോളജുകളുണ്ട്. ഇവയുടെ കാര്യങ്ങളൊക്കെ കാര്യക്ഷമമായി നടത്തുന്നതിനായി ദേവസ്വം ബോർഡ് യോഗങ്ങൾ ആഴ്ചയിൽ രണ്ടു ദിവസമെങ്കിലും ചേരുന്നുണ്ട്. ദേവസ്വം ബോർഡ് ആസ്ഥാനത്ത് യോഗം ചേരുന്നതാണ് പ്രായോഗികം. എങ്കിലും ശബരിമലയിൽ വച്ചു യോഗം ചേർന്നിരുന്നു. ദേവസ്വം ബോർഡ് പ്രസിഡന്റ് എന്ന നിലയിൽ വെള്ളി, ശനി, ഞായർ ദിവസങ്ങളിൽ ഞാൻ‌ ശബരിമലയിലുണ്ടാകും. തിങ്കളാഴ്ച ഒരു ബോർഡ് അംഗമുണ്ടാകും. ചൊവ്വ, ബുധൻ ദിവസങ്ങളിൽ ബോർഡ് യോഗമാണ്. വ്യാഴം , വെള്ളി ദിവസങ്ങളിൽ ദേവസ്വം ബോർഡ് കമ്മിഷണർ അവിടെയുണ്ടാകും. ഇപ്രകാരമാണ് മേൽനോട്ട ചുമതല വിഭജിച്ചിരിക്കുന്നത്.

? ഇതുവരെയുള്ള അനുഭവത്തിന്റെ അടിസ്ഥാനത്തിൽ ശബരിമലയുമായി ബന്ധപ്പെട്ടുള്ള ഭാവി സങ്കൽപങ്ങൾ എന്തൊക്കെയാണ്.

നിലയ്ക്കലിലും പമ്പയിലും എത്തുന്ന അയ്യപ്പ ഭക്തന്മാർക്ക് മഴയും വെയിലും കൊള്ളാതെ വിരിവയ്ക്കാനുള്ള സംവിധാനം വളരെ അത്യാവശ്യമാണ്. അടുത്ത വർഷം മുതൽ സീസൺ തുടങ്ങുമ്പോൾതന്നെ അതിനുള്ള ക്രമീകരണം ഒുക്കണമെന്നാണ് അഗ്രഹിക്കുന്നത്. മറ്റൊന്ന് ശുചീകരണമാണ്. ഇപ്പോൾ മൂന്നരകോടിയോളം രൂപ ദേവസ്വം ബോർഡ് ശുചീകരണത്തിനു ചെലവിടുന്നുണ്ട്. എന്നാൽ ലക്ഷോപലക്ഷം തീർഥാടകർ എത്തുന്നതിനനുസരിച്ചുള്ള കാര്യക്ഷമമായ ശുചീകരണം നടക്കുന്നുണ്ടോയെന്ന കാര്യത്തിൽ സംശയമുണ്ട്. ഇപ്പോഴത്തെ സംവിധാനങ്ങളുടെ പരിമിതിയാണ് അതിനു കാരണം. പ്രഫഷനലായ ശുചീകരണ സംവിധാനങ്ങൾ ഇപ്പോൾ ലഭ്യമാണ്. അത് പ്രയോജനപ്പെടുത്തുന്ന കാര്യം പരിഗണനയിലാണ്.

വാഹന പാർക്കിങ്ങുമായി ബന്ധപ്പെട്ട പ്രശ്നങ്ങളും പരിഹരിക്കണം.  നിലയ്ക്കലിൽ ടോളുമായി ബന്ധപ്പെട്ട് ധാരാളം പരാതികൾ ഉയർന്നിരുന്നു. അമിതമായ തുക ഈടാക്കുന്നതിനു പുറമേ വാഹനങ്ങൾ കടത്തി വിടുന്നതിൽ വല്ലാത്ത കാലതാമസവുമുണ്ടാകുന്നതായാണു പരാതി. അതു പരിഹരിക്കുന്നതിനായി ഫാസ്ടാഗ് സംവിധാനം ഏർപ്പെടുത്തിയിരിക്കുകയാണ്. വാഹന പാർക്കിങ് ക്രമീകരിക്കാൻ ദേവസ്വം ബോർഡിന്റെ 34 സുരക്ഷാ ഉദ്യോഗസ്ഥരെ 17 പാർക്കിങ് കേന്ദ്രങ്ങളിലായി വിന്യസിച്ചിട്ടുണ്ട്; ഒരു പാർക്കിങ് സ്ലോട്ടിൽ രണ്ടു പേർ എന്ന ക്രമത്തിൽ. അതുകാരണം നിലയ്ക്കലിലെ തിരക്ക് കുറയ്ക്കാൻ കഴിഞ്ഞിട്ടുണ്ടെന്നാണു കരുതുന്നത്. അതു കൂടുതൽ ഫലപ്രദമായി നടപ്പിലാക്കണമെന്നാണ് ആഗ്രഹം.

ശബരിമല തീർഥാടനം ഒട്ടേറെ ത്യാഗങ്ങൾ സഹിച്ചുള്ള യാത്രയാണ്. 13 ഏക്കർ ഭൂമിയിലാണ് ശബരിമല നിലകൊള്ളുന്നത്.‌ സുരക്ഷാ ജീവനക്കാരുൾപ്പെടെ എണ്ണായിരത്തോളം പേർക്ക് അവിടെ താമസ സൗകര്യം ഒരുക്കിയിരിക്കുകയാണ്. ഇത്തരം പരിമിതമായ സാഹചര്യത്തിൽ എത്തുന്ന ഭക്തർ സുഖവാസത്തിനു പോകുന്നതുപോലെ അവിടെ എത്തരുത്. ഇരുമുടിക്കെട്ടിലൂടെ വൻതോതിൽ പ്ലാസ്റ്റിക് സാധനങ്ങൾ ശബരിമലയിലെത്തുന്നുണ്ട്. അത് ഒഴിവാക്കണമെന്ന് തന്ത്രിയും മേൽശാന്തിയും നിർദേശിച്ചിട്ടുണ്ട്. 

പരമാവധി പ്രകൃതി സൗഹൃദ വസ്തുക്കൾ മാത്രം കൊണ്ടു വരാൻ ശ്രമിക്കണം. ശബരിമലയെ നമ്മൾ പൂങ്കാവനമെന്നാണല്ലോ വിശേഷിപ്പിക്കുന്നത്. അവിടം പ്ലാസ്റ്റിക് മുക്തമാക്കി സൂക്ഷിക്കേണ്ടതുണ്ട്. അതിനു ദേവസ്വം ബോർഡ് മാത്രം വിചാരിച്ചിട്ടു കാര്യമില്ല. ഭക്തജനങ്ങളുടെ കൂടി സഹകരണം അത്യാവശ്യമാണ്. കെട്ടു നിറയ്ക്കുള്ള സാധനങ്ങൾ വാങ്ങുന്നിടത്തുതന്നെ അത്തരം ഒരു ചിന്ത വേണം. ശബരിമലയെ കൂടുതൽ മനോഹരമാക്കിക്കൊണ്ട് തീർഥാടനം കൂടുതൽ സന്തോഷം നിറഞ്ഞ അനുഭവമാക്കി മാറ്റാനുള്ള സാഹചര്യം ഒരുക്കണമെന്നാണ് ആഗ്രഹം. വ്യക്തിപരമായി എനിക്ക് ഇതൊരു പഠന‌കാലം കൂടിയാണ്. ഇപ്പോഴത്തെ എല്ലാ അനുഭവങ്ങളും വലിയ പാഠങ്ങളായി ഉൾക്കൊള്ളാനാണ് ഇഷ്ടപ്പെടുന്നത്.