പഴയിടം പറയുന്നു: ‘വിശക്കുന്ന മനുഷ്യർ ഭക്ഷണം വെജ് ആണോ നോൺ വെജ് ആണോയെന്നു നോക്കാറില്ല; പച്ചവെള്ളം മാത്രം കുടിച്ചും ഞാൻ കിടന്നിട്ടുണ്ട്’

പിന്നീട് ലേഖത്തമ്പുരാട്ടിയെ കൃഷ്ണപുരം കൊട്ടാരത്തിൽനിന്ന് ദത്തെടുത്ത് വിവാഹം ചെയ്യുന്ന ചടങ്ങുണ്ടായിരുന്നു. അതിനു മുൻപ് കുറച്ചു പേർക്കു മാത്രമായി അവർ ഒരു വിരുന്നു നടത്തി. ഞാനുണ്ടാക്കിയ ഭക്ഷണം ഇഷ്ടപ്പെട്ടിരുന്നതിനാൽ അത് തയാറാക്കാൻ എന്നെയാണ് വിളിച്ചത്. മുന്നൂറോളം പേരുണ്ടായിരുന്നു. അവർക്ക് അത് ഇഷ്ടപ്പെട്ടു. അങ്ങനെ തിരുവനന്തപുരത്തെ രാജകുടുംബത്തിലുള്ളവർക്ക് കോട്ടയത്തുള്ള ആൾ പോയി ഭക്ഷണം തയാറാക്കുകയും അവർക്കത് ഇഷ്ടപ്പെടുകയും ചെയ്തു. അതോടെ എന്റെ പാചകം വളർച്ചയുടെ പാതയിലായി. പത്രങ്ങളിലൊക്കെ അന്ന് അതിന്റെ വാർത്തകൾ വന്നിരുന്നു. അതോടെ ആളുകൾ ശ്രദ്ധിക്കാൻ തുടങ്ങി. പിന്നെ കലോത്സവങ്ങൾ, മേളകൾ... ചെറുതും വലുതുമായിട്ടുള്ളതൊക്കെ ചെയ്തു. അറിയാതെ എങ്ങനെയോ രൂപപ്പെട്ട ഒരു ബ്രാൻഡ് ആണ് പഴയിടം. നമ്മുടെ ഭക്ഷണം പൊതുവേ എല്ലാവർക്കും ഇഷ്ടമായിരുന്നു. ആളുകൾക്ക് അതിനെപ്പറ്റി അറിയാമായിരുന്നു. പ്രത്യേകിച്ച് കഴി​ഞ്ഞ തവണത്തെ വിവാദം കൂടി കഴിഞ്ഞതോടെ അറിയാത്തവർ കൂടി അറിയുകയും ചെയ്തു. 

? ജീവിതത്തിൽ നിരാശ ബാധിച്ച് ഇനി മുന്നോട്ടു പോകാൻ കഴിയില്ല എന്നു തോന്നിയപ്പോഴാണ് യാദൃശ്ചികമായി എംടിയുടെ ‘രണ്ടാമൂഴ’ത്തിന്റെ ആദ്യ അധ്യായം ലഭിച്ചത് എന്ന് മുൻപ് പറഞ്ഞിട്ടുണ്ടല്ലോ. ആ നോവൽ ഖണ്ഡശഃയായി പ്രസിദ്ധീകരിച്ചു തുടങ്ങിയപ്പോൾ ബാക്കിയുള്ളതു കൂടി വായിക്കാനുള്ള കാത്തിരിപ്പാണ് മുന്നോട്ടു കൊണ്ടുപോയിട്ടുള്ളത് എന്നാണ് പറഞ്ഞത്...

അതെന്റെ ജീവിതത്തിലുണ്ടായ വലിയൊരു വഴിത്തിരിവായിരുന്നു. ചെറുപ്പകാലത്ത് നമുക്ക് പലതും തോന്നും. ബുദ്ധിജീവിയാണെന്ന് മറ്റ് ആളുകളെ ബോധ്യപ്പെടുത്താൻ ശ്രമിക്കുന്ന ചില കാലങ്ങളുണ്ടായിരുന്നു അപ്പോൾ. ചുള്ളിക്കാടിന്റെ കവിതയൊക്കെ ചൊല്ലി നടന്നാൽ ബുദ്ധിജീവിയായി എന്നൊരു സങ്കൽപമൊക്കെ ഉണ്ടായിരുന്നല്ലോ. പക്ഷേ ഞാൻ ജീവിക്കാൻ മറന്നു പോയിരുന്നു. ജീവിതം ഒന്നേയുള്ളു എന്ന് തിരിച്ചറിയാൻ പിന്നെയും ഒരുപാട് കാലം വേണ്ടി വന്നു. അന്നൊക്കെ പലതും തോന്നും, ഈ ജീവിതം വേണോ വേണ്ടേ എന്നൊക്കെ. പക്ഷേ അന്നും ഇന്നും വായനയുണ്ട്. അതാണ് എന്നെ രണ്ടാമൂഴത്തിൽ എത്തിച്ചത്. അതൊരു വലിയ കഥയാണ്. അത് ഞാൻ എംടിയോടുതന്നെ നേരിട്ടു പറ‍ഞ്ഞിട്ടുണ്ട്. പിന്നീട് അദ്ദേഹത്തിന്റെ ഒരു പിറന്നാളിന് തുഞ്ചൻ പറമ്പിലേക്ക് ക്ഷണിച്ചിരുന്നു. ഞാൻ അവിടെനിന്ന് കൊണ്ടു പോന്നത് 2600 പേജുള്ള എംടിയുടെ തിരഞ്ഞെടുത്ത കഥകളുടെ സമാഹാരം മാത്രമാണ്. ഒരുപാട് നല്ല അനുഭവങ്ങളും ഓർമകളും വായന തന്നിട്ടുണ്ട്. വായന തന്നതാണ് എന്റെ ജീവിതം. 

? കലോത്സവ പാചകം, കാറ്ററിങ് ഇതിൽനിന്നൊക്കെ വളർന്ന് പഴയിടം വലിയ ബ്രാൻഡ് ആയല്ലോ. പുതിയ റസ്റ്ററന്റുകൾ തുറക്കുന്നു...

രണ്ടു സ്ഥലത്താണ് ഇപ്പോൾ റസ്റ്ററന്റുകൾ ഉള്ളത്. പഴയിടം രുചി എന്നാണ് പേര്. ഒരെണ്ണം ചങ്ങനാശേരിക്കും തിരുവല്ലയ്ക്കും ഇടയിൽ ഇടിഞ്ഞില്ലത്ത്, രണ്ടാമത്തേത് മലപ്പുറത്ത് ദേശീയ പാതയിൽ ചങ്ങരംകുളത്ത്. തിരുവനന്തപുരത്ത് രണ്ടിടത്തു കൂടി വൈകാതെ റസ്റ്ററന്റുകൾ തുറക്കും. കോഴിക്കോടും എറണാകുളത്തും മാർച്ചിനു മുൻപായി തുടങ്ങാനാണ് ആലോചിക്കുന്നത്. ആറ് റസ്റ്ററന്റുകൾ കേരളത്തിൽ നടത്താനാണ് ആലോചന. അതുമതി എന്നാണ് ഇപ്പോൾ തീരുമാനം. മകൻ യദുവാണ് അതിന്റെ കാര്യങ്ങൾ നോക്കുന്നത്. കാറ്ററിങ് കാര്യത്തിൽ ഓണക്കാലത്ത് കഴിഞ്ഞ 15 കൊല്ലത്തോളമായി ഞാൻ വിദേശങ്ങളിലാണ്. ഓണത്തിന്റെ മൂന്നു ദിവസം നാട്ടിൽ. യാത്ര ചെയ്യുമ്പോൾ കൂടുതൽ ആളുകളെ പരിചയപ്പെടാനുമൊക്കെ സാധിക്കുന്നു. 5000 പേർക്കു മുകളിലുള്ള വെജിറ്റേറിയൻ ഭക്ഷണത്തിന്റെ കാര്യം വരുമ്പോഴൊക്കെ എന്നെ വിളിക്കാറുണ്ട്. അങ്ങനെയൊരു മുൻഗണന പൊതുസമൂഹം അനുവദിച്ചു തന്നിട്ടുണ്ട്. ഇത്രയും കാലത്തെ പ്രവർത്തനങ്ങളിൽനിന്ന് ‌നേടിയെടുത്തിട്ടുള്ളത് അതേയുള്ളൂ. ആളുകൾക്ക് വിശ്വാസം വരണമല്ലോ. കളിയാക്കലൊക്കെ ആയി ആളുകൾ പറയുമെങ്കിലും വിശ്വാസമുണ്ടാക്കുക വലിയൊരു കാര്യമാണ്. 

? കൂടുതൽ പേരും നോണ്‍ വെജിറ്റേറിയൻ ഭക്ഷണം കഴിക്കുന്ന സംസ്ഥാനമാണ് കേരളം. എന്നിട്ടും എന്തുകൊണ്ട് കുട്ടികൾക്ക് നോൺവെജ് കൊടുക്കുന്നില്ല തുടങ്ങിയ ചർച്ചകളും കഴിഞ്ഞ വിവാദ സമയത്ത് ഉയർന്നിരുന്നു. ഭക്ഷണവുമായി ബന്ധപ്പെട്ട് സാത്വികത, ശുദ്ധി തുടങ്ങിയ കാര്യങ്ങളും ചർച്ച ചെയ്യപ്പെട്ടിട്ടുണ്ട്. ഭക്ഷണത്തിന് അങ്ങനെ‌യുള്ള മാനങ്ങളുണ്ടോ?

സസ്യേതര ഭക്ഷണം കഴിക്കുന്ന ആൾക്കാരൊക്കെ ക്രൂരന്മാരാണെന്ന് പറയാൻ കഴിയുമോ? പറ്റില്ലല്ലോ. അതുപോലെ വെജിറ്റേറിയൻ ഭക്ഷണം കഴിക്കുന്ന മനുഷ്യർ മുഴുവൻ സാത്വികരാണെന്നും പറയാൻ പറ്റില്ല. അതിന്റെ ഏറ്റവും വലിയ ഉദാഹരണമാണെല്ലോ ഹിറ്റ്‍ലർ. അദ്ദേഹം വെജിറ്റേറിയനായിരുന്നു, ലോകത്തെ ഏറ്റവും ക്രൂരനായ ഭരണാധികാരിയായിരുന്നു. അപ്പോൾ മനുഷ്യരുടെ ഇത്തരം കാര്യങ്ങളെല്ലാം ജനനത്തോടൊപ്പം തന്നെ ഉണ്ടാകുന്നതാണ്. രണ്ടാമത്തേതാണ്, ജനിച്ച്, ജീവിച്ചു വളർന്ന സംസ്കാരവും സാഹചര്യവും പകർന്നു നൽകുന്നത്.

ഹിറ്റ്ലറുടെ പിതാവ് വളരെ ക്രൂരനും കുട്ടികളെ ക്രൂരമായി മർദിക്കുന്ന ആളുമായിരുന്നു എന്നൊക്കെ കേട്ടിട്ടുണ്ട്. അതൊക്കെ ആ കുട്ടികളിൽ ഉണ്ടാക്കാവുന്ന സമൂഹത്തോടുള്ള ഒരു കാഴ്ചപ്പാടുണ്ട്. ആ ഒരു കാഴ്ചപ്പാടു തന്നെയായിരിക്കാം ജീവിതത്തിലും പിന്നീട് പുറത്തെടുത്തിട്ടുണ്ടാവുക. അല്ലാതെ അവിടെ ഭക്ഷണത്തിന് എന്തു പ്രസക്തി? അത് ജീവൻ നിലനിർത്താൻ വേണ്ടി കഴിക്കുന്നതാണ്. ‌ഭക്ഷണം ദൈവമാണ്. മനുഷ്യന് കൊടുത്തു നന്നാക്കാവുന്ന, കൊടുത്തു തൃപ്തിപ്പെടുത്താവുന്ന ലോകത്തെ ഒരേയൊരു കാര്യം ഭക്ഷണമാണ്.