‘മുസ്‌ലിം ലീഗ് വർഗീയ പാർട്ടിയല്ല, വ്യക്തിപൂജ ഞങ്ങൾ അംഗീകരിക്കില്ല, രാഹുൽഗാന്ധിയെ എനിക്കിഷ്ടമാണ്’

എത്രമാത്രം എൽഡിഎഫ് സിപിഎമ്മിന്റേതാണോ, അത്രമാത്രം സിപിഐയുടേതുമാണ്. ഇടതുപക്ഷ ഐക്യത്തിനു വേണ്ടി മുഖ്യമന്ത്രിപദം പുല്ലുപോലെ വലിച്ചെറിഞ്ഞ പാർട്ടിയാണ് സിപിഐ എന്നതു വിസ്മരിക്കരുത്. ഇടതുപക്ഷത്തെ  ശക്തിപ്പെടുത്താനുള്ള അഭിപ്രായങ്ങളും വിമർശനങ്ങളും ഉന്നയിക്കുന്നതിന് ഒരു തടസ്സവും ഞങ്ങളുടെ മുന്നിൽ ഇല്ല. എപ്പോൾ വേണമെങ്കിലും സിപിഐ സെക്രട്ടറിക്ക് സിപിഎമ്മിന്റെ സെക്രട്ടറിയെ കണ്ടു സംസാരിക്കാം, ഒരു ഫോൺ വിളിയുടെ ആവശ്യമേ ഉള്ളൂ. എൽഡിഎഫ് യോഗത്തിൽ വിഷയങ്ങൾ ഉന്നയിക്കാം. ഇവിടെ എല്ലാം പറഞ്ഞിട്ടും പരിഹാരം കാണാത്ത വിഷയമാണെങ്കിൽ ഉചിതമായ ഭാഷയിൽ അഭിപ്രായം പുറത്തു പറയും, അങ്ങനെ പറഞ്ഞിട്ടുണ്ട്. അനിവാര്യമായ സാഹചര്യങ്ങളിൽ അതു ഭാവിയിലും ഉണ്ടാകാം. 

? ലോക്സഭാ തിരഞ്ഞെടുപ്പിൽ നിലവിലെ നാലു സീറ്റുകളിൽ തന്നെയാണോ മൽസരിക്കുക.

∙ അതെ. 

?ഏതെങ്കിലും സീറ്റുകൾ സിപിഎമ്മുമായി വച്ചു മാറുന്നതിന് സിപിഐ സന്നദ്ധമാണോ.

∙ ഇതുവരെ അങ്ങനെ ഒരു കാര്യം ഞങ്ങൾ ചർച്ച ചെയ്തിട്ടില്ല. ഞങ്ങളുടെ മുന്നിലും ഇല്ല. അങ്ങനെ ഒരു നിർദേശം ചർച്ചകളിൽ വന്നാൽ പരിഗണിക്കും. സിപിഐക്ക് അതിനായി ഒരു  തിടുക്കമില്ല. മുന്നണിയുടെ പൊതുവായ ചർച്ചയുടെ ഭാഗമായി വന്നാൽ പരിശോധിക്കും. 

? നിലവിലുള്ള നാലു സീറ്റും കഠിനമാണെന്ന പ്രതീതി നിലനിൽക്കുന്നുണ്ടല്ലോ.

∙ഒരു തോൽവിയും ഒന്നിന്റെയും അവസാനമല്ല. പലതിന്റെയും ആരംഭമാണ്. ജീവിതത്തിലും രാഷ്ട്രീയത്തിലും തിരഞ്ഞെടുപ്പിലും എല്ലാം ഈ തത്വം  ബാധകമാണ്. ഒരു സീറ്റിലും കേരളത്തിൽ ആരും എളുപ്പത്തിൽ ജയിക്കാറില്ലല്ലോ. സിപിഐയുടെ നാല് സീറ്റ് എന്ന നിലയിൽ അല്ല ഞങ്ങൾ കാണുന്നത്. 20 സീറ്റും സിപിഐയുടേതു കൂടിയാണ്. ജയിച്ചു വന്നാൽ സംഘപരിവാറിന് കീഴ്പ്പെടുത്താൻ പറ്റില്ല എന്ന് അക്കൂട്ടർ  കരുതുന്ന ഒരേ ഒരു വിഭാഗം ഇന്ന് രാജ്യത്ത് ഇടതുപക്ഷമാണ്. ഞങ്ങളാരും ബിജെപിക്കായി  കൈ പൊക്കില്ല. കേരളത്തിൽനിന്ന് ജയിക്കുന്ന ഏതു  കോൺഗ്രസുകാരനും നാളെ ബിജെപിയുടെ  കൂടെ ചേരില്ലെന്ന്  ആരു കണ്ടു! 

എൽഡിഎഫും കോൺഗ്രസും തമ്മിലെ ഈ വ്യത്യാസം ജനങ്ങൾക്കു മുന്നിൽ  നിശ്ചയമായും ഉണ്ടാകും. അയോധ്യയുടെ കാര്യത്തിൽ  ഒരു തീരുമാനം എടുക്കാൻ  കോൺഗ്രസ് എത്ര വൈകി? മഹാത്മാഗാന്ധിയുടെ പാർട്ടിക്ക് ഗോഡ്സെയുടെ പാ‍ർട്ടി ഒരു ക്ഷണക്കത്ത് അയച്ചാൽ അതു സ്വീകരിക്കില്ലെന്നു പറയാൻ എന്തിനാണ് ഇത്രയും ചർച്ച! സിപിഎമ്മും സിപിഐയും എടുത്ത തത്വാധിഷ്ഠിത തീരുമാനത്തിന്റെ സ്വാധീനംകൊണ്ടു മാത്രമാണ് ഒടുവിൽ അയോധ്യയിലേക്കു  പോകേണ്ടതില്ലെന്ന തീരുമാനത്തിലേക്ക് അവരെത്തിയത്. 

? സിപിഐക്കെതിരെ വയനാട്ടിൽ രാഹുൽ ഗാന്ധി മൽസരിക്കുന്നതിനെതിരെ താങ്കൾ ഒരു പരസ്യ  നിലപാടെടുത്തല്ലോ. അത് ഒഴിവാക്കണമെന്ന് ഇടതുകക്ഷികളുടെ പൊതു ആവശ്യമായി  കോൺഗ്രസിനും ഇന്ത്യാ മുന്നണിക്കും മുന്നിൽ ഔദ്യോഗികമായി വയ്ക്കുമോ.

∙ ആ ചർച്ച വന്നാൽ പറയും. കോൺഗ്രസിന്റെ രാഷ്ട്രീയ വിവേകമാണ് ഇവിടെ ചോദ്യം ചെയ്യപ്പെടുന്നത്. ബിജെപിക്കെതിരെയുള്ള പോരാട്ടത്തിന്റെ രംഗഭൂമി കേരളമല്ല, അത് ഉത്തരേന്ത്യയാണ്. ആ യുദ്ധക്കളം ഉപേക്ഷിച്ച്  കോൺഗ്രസിന്റെ പടനായകൻ കേരളത്തിലേക്ക് ഓടിവന്നാൽ അതു പ്രതിപക്ഷ ചേരിക്കു തികച്ചും തെറ്റായ സന്ദേശമാണ് നൽകുന്നത്. ഉത്തരേന്ത്യയിൽ ബിജെപിക്കെതിരെ മൽസരിക്കാനുള്ള ശക്തി കോൺഗ്രസിനില്ലെന്ന സന്ദേശമാണ് കൈമാറ്റപ്പെടുന്നത്. ഇന്ത്യ സഖ്യത്തിനു നേതൃത്വം നൽകുന്ന കോൺഗ്രസ് തന്നെ പരാജയം സമ്മതിച്ച് ഓടിപ്പോയാൽ  മുന്നണിക്കുതന്നെ അതു ദോഷം ചെയ്യും. കോൺഗ്രസിന്റെ ബുദ്ധി ഉണർന്നു പ്രവർത്തിക്കേണ്ടത് ഇക്കാര്യത്തിലാണ്. ആരാണ് കോൺഗ്രസിന്റെ മുഖ്യ എതിരാളി? ആർഎസ്എസും ബിജെപിയുമാണോ? അതോ സംഘപരിവാറിനെതിരെ ഏറ്റവും ശക്തമായ നിലപാട് എടുക്കുന്ന ഇടതുപക്ഷമാണോ? 

? ഇന്ത്യ മുന്നണിയിൽതന്നെ ഈ വിഷയം ഉന്നയിക്കേണ്ടതല്ലേ എന്നാണ് ചോദ്യം.

∙ മുന്നണിയിൽ കോൺഗ്രസ് ഇക്കാര്യം ചർച്ചയ്ക്കു തയാറായാൽ ഞങ്ങൾ പറയും. അല്ലാതെ ഞങ്ങൾ മൽസരിക്കുന്ന വയനാട് സീറ്റുമായി  മാത്രം  ബന്ധപ്പെട്ട പ്രശ്നമല്ല. രാഹുൽഗാന്ധിയോട് എനിക്ക് വ്യക്തിപരമായി അടുപ്പവും സ്നേഹവും ഉണ്ട്. ദേശീയ രാഷ്ട്രീയത്തിൽ അദ്ദേഹം പ്രതീക്ഷ ജനിപ്പിക്കുന്നുണ്ട്. അദാനിയുടെയും അംബാനിയുടെയും കോർപറേറ്റ് താൽപര്യങ്ങൾക്കെതിരെ സംസാരിക്കാനുള്ള ആർജവം കാണിക്കുന്ന നേതാവാണ് രാഹുൽ ഗാന്ധി. നെഹ്റു പാരമ്പര്യത്തിന്റെ പിന്തുടർച്ചക്കാരനായി രാഹുൽഗാന്ധിയെ കാണാനാണ്  ഇഷ്ടം. ആ രാഹുൽ പ്രതിനിധാനം ചെയ്യുന്ന രാഷ്ട്രീയം ഇന്ന് ആവശ്യപ്പെടുന്നത് ഇടതുപക്ഷത്തിനെതിരെയുള്ള മൽസരമല്ല, ബിജെപിക്കെതിരേയുള്ള പോരാട്ടമാണ്. അദ്ദേഹത്തെ ഉപദേശിക്കുന്നവർ ഇക്കാര്യം ശ്രദ്ധയിൽ പെടുത്തണം. 

? രാഷ്ട്രീയനേതൃത്വം വ്യക്തിപൂജകൾക്കു വഴിപ്പെടുന്നെന്ന വിമർശനം അടുത്ത കാലത്ത് ശക്തമാണല്ലോ. ഇടതുപക്ഷത്തിന്റെ ഇക്കാര്യത്തിലെ നിലപാട് എന്താണ്? എന്തായിരിക്കണം.

ഇടതുപക്ഷം വ്യക്തി പൂജയെ അംഗീകരിക്കുന്നില്ല. അത് ഇടതുപക്ഷത്തിന്റെ രീതിയോ സ്വഭാവമോ അല്ല. 

? ഇക്കാര്യത്തിൽ എംടി നടത്തിയ പരാമർശങ്ങളിൽനിന്നു താങ്കൾ മനസ്സിലാക്കുന്നത് എന്താണ്.

∙എംടിയെ പോലെ കേരളീയ സമൂഹത്തിൽ സ്ഥാനം ഉള്ള ഒരാൾ മുന്നോട്ടുവയ്ക്കുന്നത് കേരളം ചർച്ച ചെയ്യേണ്ട ആശയങ്ങളാണ്. ഇടതുപക്ഷം ആ നിലയിൽ അദ്ദേഹത്തിന്റെ അഭിപ്രായങ്ങളെ കാണാൻ ബാധ്യതപ്പെടുന്നു. അദ്ദേഹത്തിന്റെ അഭിപ്രായങ്ങളെ വ്യക്തിപരമായി കാണേണ്ട കാര്യമില്ല. 

? എംടി  കേരളത്തിലെ സാഹചര്യങ്ങളെ ഉദ്ദേശിച്ചല്ലേ അങ്ങനെ പറഞ്ഞത്.

∙ കേരളത്തക്കുറിച്ചു കൂടിയാണ്. രാഷ്ട്രീയത്തിലെ മൂല്യച്യുതിയെക്കുറിച്ചു സമൂഹത്തിൽ ആകെ വിമർശനങ്ങളുണ്ട്. അതിൽ  ഏറ്റവും ഉൽകണ്ഠപ്പെടേണ്ടത് ഇടതുപക്ഷം തന്നെയല്ലേ? സിപിഎമ്മിന്റെയും സിപിഐയുടെയും പാർട്ടി കോൺഗ്രസുകൾ ചർച്ച ചെയ്യുന്ന  സംഘടനാരേഖകളിൽ എപ്പോഴും ചൂണ്ടിക്കാട്ടുന്ന അന്യവർഗപ്രവണതകളുണ്ട്. കമ്യൂണിസ്റ്റ് പാർട്ടികളിലേക്ക് നുഴഞ്ഞു കയറുന്ന ആ അന്യവർഗ വാസനകളിൽ ഒന്നാണ് വ്യക്തിയാരാധന. സിപിഎമ്മും സിപിഐയും അതു സ്വയംവിമർശനപരമായി തന്നെയാണ് വിലയിരുത്താറും പരിശോധിക്കാറും ഉള്ളത്. അവയെ ചെറുക്കേണ്ടത്  ഞങ്ങളുടെ ചുമതല തന്നെയാണ്.