ആ കൊലപാതകം സിപിഎമ്മിന്റെ ശൈലി; തിരുത്തിയില്ലെങ്കില്‍ ജനം തിരുത്തിക്കും; വീണയെ സംരക്ഷിക്കേണ്ട ബാധ്യത പാർട്ടിക്കുണ്ടോ?

മോഹനന്റെ വായിൽ നിന്ന് ഒരക്ഷരം മൊഴിയായി വരരുതെന്ന് സിപിഎമ്മിനു നിർബന്ധമായിരുന്നു. അന്നാണ് പാർട്ടി പ്രഖ്യാപിക്കുന്നത് ‘തിരുവഞ്ചൂരെ, ഇങ്ങനെ പോകുകയാണെങ്കിൽ പാർട്ടി ഒരു തീഗോളമായി മാറു’മെന്ന്. പാർട്ടി ഗ്രാമങ്ങളിൽ ഒളിച്ചുതാമസിപ്പിച്ച പ്രതികൾക്ക് കാവലായ നേതാക്കന്മാർ തോക്കുകൾ സഹിതമാണ് പിടിക്കപ്പെടുന്നത്. അത്രയും വലിയ സന്നാഹമായിരുന്നു. ഇതൊക്കെ അതിജീവിച്ചുകൊണ്ട് ഇത്രയും പേർ ശിക്ഷിക്കപ്പെട്ടു എന്നുപറയുമ്പോൾ സിപിഎമ്മിന്റെ ചരിത്രത്തിൽ രാഷ്ട്രീയമായി അവർക്ക് ലഭിച്ച ഏറ്റവും ശക്തമായ പ്രഹരം തന്നെയാണ് ഇതെന്ന കാര്യത്തിൽ തർക്കമില്ല.

∙ ഈ കോടതി വിധി സിപിഎമ്മിനെ രാഷ്ട്രീയമായി എങ്ങനെ ബാധിക്കും?

ജീവിതത്തിന്റെ പ്രധാനപ്പെട്ട സമയം മുഴുവൻ സിപിഎമ്മിന്റെ ഭാഗമായിരുന്നയാളാണ്. പാർട്ടിയുടെ കാര്യങ്ങളിൽ വരുന്ന മാറ്റം ബോധ്യപ്പെട്ടതോടെയാണ് ഞങ്ങൾക്ക് ഇറങ്ങേണ്ടി വരുന്നത്. ഈ കേസ് ന്യായീകരിക്കാൻ പാർട്ടി സെക്രട്ടറി മുതൽ ഇങ്ങോട്ടുള്ള ആളുകൾ തയാറായിക്കൊണ്ടിരിക്കുകയാണ്. സിപിഎം പോലുള്ള വലിയ പാർട്ടിക്ക് ഈ 11 ക്രിമിനലുകളെ തള്ളിപ്പറഞ്ഞാൽ എന്താണ് പ്രശ്നം? സിപിഎം ഒരിക്കലും ഈ പതിനൊന്നു പേരെ തള്ളിപ്പറഞ്ഞിട്ടില്ല. ആകെ നടപടിയെടുത്തത് കെ.സി.രാമചന്ദ്രനെതിരെയാണ്. രാമചന്ദ്രനു വേണ്ടി കേസ് നടത്തുന്നതും രാമൻ പിള്ള തന്നെയാണ്. സ്വാഭാവികമായും ഇതുപോലെ സിപിഎമ്മിന്റെ മേൽത്തട്ടു മുതൽ അടിത്തട്ടുവരെ പങ്കുള്ള ഒരു കൊലപാതകം നടന്നിട്ടില്ല എന്നുപറയാം.

ഗൂഢാലോചന മുതൽ പ്രതികളുടെ സംരക്ഷണം വരെ സിപിഎം സംസ്ഥാന നേതൃത്വത്തിന്റ ഒത്താശയോടെയാണ്, ആശീർവാദത്തോടെയാണ് നടന്നുകൊണ്ടിരുന്നത്. അക്രമി സംഘവും സിപിഎമ്മും തമ്മിലുള്ള ബന്ധം അത്ര രൂ‌ഢമൂലമായി കെട്ടുപിണഞ്ഞുകിടക്കുകയാണ്. ബംഗാളിൽ ഉണ്ടായത് ഇതുതന്നെയാണ്. ഒരു ഘട്ടമെത്തുമ്പോൾ സിപിഎം അനുഭാവികളായ ആളുകൾക്ക് തന്നെ കാര്യങ്ങൾ ബോധ്യപ്പെടും. ജനങ്ങൾക്ക് സ്വതന്ത്രമായ ജീവിതത്തെ മുന്നോട്ടുകൊണ്ടുപോകാൻ കഴിയാത്ത രീതിയിലേക്ക് സിപിഎം നേതൃത്വം മാറിക്കൊണ്ടിരിക്കുകയാണ്. ജനങ്ങൾ വെറുത്താൽ തകർന്നുകൊണ്ടിരിക്കുന്ന സിപിഎം സംവിധാനത്തിന്റെ, കേരളത്തിലെ പാർട്ടിയുടെ അസ്ഥിവാരം കോരുന്നതിലേക്കുള്ള സ്ഥിതിയിലേക്ക് കാര്യങ്ങൾ എത്തും.

∙ വർഷങ്ങൾക്ക് മുൻപ് ടിപി എന്താണോ ചൂണ്ടിക്കാണിക്കാൻ ശ്രമിച്ചത് ആ മാറ്റം ഇന്ന് പ്രകടമായിത്തുടങ്ങി‌യിട്ടുണ്ടെന്നാണോ?

പാർട്ടിയുടെ നീക്കം കുറച്ചുകൂടി മുൻപേ ടിപിക്കും സഹപ്രവർത്തകർക്കും കാണാൻ സാധിച്ചു. പാർട്ടിയുടെ എല്ലാ നിലപാടുകളിലും, അത് സാമൂഹിക– സാംസ്കാരിക–സാമ്പത്തിക രംഗത്തെ നിലപാടുകളാകട്ടെ, കമ്യൂണിസ്റ്റ് പാർട്ടി അനുവർത്തിച്ച അച്ചടക്കം നഷ്ടപ്പെട്ട് ആർക്കും എന്തും ചെയ്യാം എന്ന രീതിയിലെത്തി. എം.എൻ. വിജയനെ പോലുള്ള ധിഷണാശാലികളൊക്കെ പറഞ്ഞല്ലോ പാർട്ടി ഓഫിസ് ഉണ്ടാകും പാർട്ടി ഉണ്ടാകില്ലെന്ന്. വിഎസിനെപ്പോലുള്ള, സിപിയെപ്പോലുള്ള പ്രഗത്ഭരായ നിരവധി ആളുകൾ അപകടമാണ് ഈ പോക്ക് എന്ന് ശാസിച്ചു. പക്ഷേ തിരുത്താൻ തയാറായില്ല. എല്ലാവരും സ്വന്തം കാര്യം നോക്കുന്നു എന്നല്ലാതെ നിലവിലുള്ള നേതൃത്വത്തെ ചോദ്യം ചെയ്യാൻ ആളുകൾക്ക് ഭയമാണ്. ഇതാണ് പ്രധാനപ്പെട്ട വെല്ലുവിളി.

ഇതാണ് പാർട്ടി ഫാഷിസ്റ്റ് സ്വഭാവം എന്നുപറയുന്നത്. ഒരു വ്യക്തിയെ അല്ലെങ്കിൽ വ്യക്തികളെ ചോദ്യംചെയ്യാൻ കഴിയുന്നില്ല. അനായാസകരമായ ചർച്ച, സ്വയം വിമർശനം ഇതൊന്നും പാർട്ടിക്കുള്ളിൽ നടക്കുന്നില്ല. റഷ്യൻ കമ്യൂണിസ്റ്റ് പാർട്ടി തകർന്നപ്പോൾ പറഞ്ഞതുപോലെ ഏകാധിപതികളുടെ നേതൃത്വത്തെ ചോദ്യം ചെയ്യാൻ കെൽപില്ലാത്ത കമ്മിറ്റികൾ രൂപപ്പെട്ടുവരികയാണ്. ഉദാഹരണത്തിന് വീണാ വിജയനെ സംരക്ഷിക്കേണ്ട എന്തു ബാധ്യതയാണ് പാർട്ടി സെക്രട്ടേറിയറ്റിന്? വീണാ വിജയൻ ഇക്കാര്യത്തിൽ അഭിപ്രായം പറയുന്നില്ല. സിപിഎം സെക്രട്ടേറിയറ്റാണ് അഭിപ്രായം പറയുന്നത്. നേതൃത്വവുമായി ചുറ്റപ്പെട്ട് ചുരുങ്ങുകയും ബഹുഭൂരിപക്ഷത്തിനും പുല്ലുവില കൊടുക്കുകയും ചെയ്യുന്ന അവസ്ഥയിലേക്ക് ഈ സമ്പ്രദായം നീങ്ങിക്കഴിഞ്ഞു. സിപിഎം നേരിടുന്ന പ്രധാനപ്രശ്നം ഇതാണ്. ജനാധിപത്യപരമായ അവസരങ്ങളും ചർച്ചകളും ഇല്ലാതായിക്കഴിഞ്ഞു.

∙ ടിപി കേസ് അന്വേഷണം നടത്തിയ പൊലീസ് ഉദ്യോഗസ്ഥരിൽ പലരും തഴയപ്പെട്ടു. ആ കേസ് അന്വേഷിച്ചതിന്റെ പേരിൽ പലരെയും മാറ്റി നിർത്തി. നിഷ്പക്ഷമായി കേസ് അന്വേഷിച്ചതിന്റെ പേരിൽ അന്നത്തെ അന്വേഷണ ഉദ്യോഗസ്ഥനായിരുന്ന അനൂപ് കുരുവിള ജോൺ ശിക്ഷിക്കപ്പെടുകയാണെന്ന് മുൻ ഡിജിപി വിൻസൻ എം.പോൾ പ്രതികരിച്ചിരുന്നു?

സാധാരണഗതിയിൽ കണ്ണൂരിൽ രാഷ്ട്രീയ കൊലപാതകങ്ങൾ ഉണ്ടായാൽ പാർട്ടിയാണ് പ്രതികളെ കൊടുക്കുക. അതിൽ നിന്ന് വ്യത്യസ്തമായി പ്രതികളിലേക്ക് അന്വേഷണം എത്തിക്കാൻ കഴിഞ്ഞു. തിരുവഞ്ചൂരും ഉമ്മൻചാണ്ടിയും ഉൾപ്പെടുന്ന നേതാക്കൾ മിടുക്കരായ പൊലീസ് ഉദ്യോഗസ്ഥന്മാരുടെ സംഘത്തെ കണ്ടെത്തി അവരെ കേസ് ഏൽപിച്ചു. അനൂപ് കുരുവിള, വിൻസൻ എം.പോൾ, ഷൗക്കത്തലി തുടങ്ങിയവരെപ്പോലുള്ള ഉദ്യോഗസ്ഥരായിരുന്നു അതിന് നേതൃത്വം നൽകിയത്. പ്രതികളെ ഞങ്ങൾ ഹാജരാക്കാം നിങ്ങൾ കഷ്ടപ്പെടണ്ട എന്ന് സിപിഎം പറ‍ഞ്ഞപ്പോൾ ഇവർ പറഞ്ഞു നിങ്ങൾ ഹാജരാക്കണ്ട പ്രതികളെ ഞങ്ങൾ പിടിക്കുമെന്ന്.

അങ്ങനെയാണ് യഥാർഥ പ്രതികളെ ഒളിവുകേന്ദ്രത്തിൽ നിന്ന് പിടിക്കുന്നത്. ഇത് കേരളത്തിലെ അന്നുവരെയുള്ള രാഷ്ട്രീയ കൊലപാതകങ്ങളുടെ അന്വേഷണത്തിൽ വഴിത്തിരിവായിരുന്നു. ആ തീരുമാനമെടുത്ത പൊലീസ് ഉദ്യോഗസ്ഥന്മാർ നേരിട്ട ഭീഷണി ചില്ലറയായിരുന്നോ? നിങ്ങൾ കേരളത്തിലാണ് ജീവിക്കുന്നത് നിങ്ങളുടെ കുടുംബം അനാഥമാക്കും എന്ന തരത്തിൽ വലിയ ഭീഷണി ഉണ്ടായിട്ടുണ്ട്. പിന്നീട് സർക്കാർ മാറിയപ്പോൾ ഈ കേസ് അന്വേഷിച്ച താഴെ മുതൽ മേൽത്തട്ട് വരെയുളള ഉദ്യോഗസ്ഥന്മാരെ അപ്രധാനമായ തസ്തിക‌കളിലേക്ക് മാറ്റി നിയമിച്ചു. അത് പകൽപോലെ വ്യക്തമാണ്.

∙ കുഞ്ഞനന്തൻ ഒരു ഉറുമ്പിനെ പോലും നോവിക്കാത്ത ആളാണെന്നാണ് ഇ.പി.ജയരാജൻ അഭിപ്രായപ്പെട്ടത്. അതുപോലെ പി.മോഹനൻ ഉൾപ്പെടെയുള്ള സിപിഎം നേതാക്കളെ വേട്ടയാടാനുള്ള ശ്രമം നടന്നതായി എം.വി.ഗോവിന്ദനും അഭിപ്രായപ്പെട്ടിരുന്നല്ലോ?

കുഞ്ഞനന്തൻ പ്രതിയായി, ശിക്ഷിക്കപ്പെട്ടു. പക്ഷേ കുഞ്ഞനന്തനെ സിപിഎമ്മിന്റെ എല്ലാ നേതാക്കന്മാരും സംരക്ഷിച്ചു. അദ്ദേഹം ഒരു പാവമാണ് ഉറുമ്പിനെ പോലും നോവിച്ചിട്ടില്ലാത്ത ആളാണ് എന്നാണ് നേതാക്കന്മാർ പറഞ്ഞത്. കുഞ്ഞനന്തൻ മരണപ്പെട്ടപ്പോൾ അദ്ദേഹത്തെ കേസിൽ നിന്ന് ഒഴിവാക്കാനായി വക്കിലീനെ വച്ചു. പക്ഷേ അദ്ദേഹത്തെ പ്രതിപ്പട്ടികയിൽ നിന്ന് കോടതി ഒഴിവാക്കിയിട്ടില്ല. പി.മോഹനൻ സാങ്കേതികമായ കാര്യങ്ങളാൽ രണ്ടുകോടതികളിൽ നിന്നും രക്ഷപ്പെട്ടു എന്നത് ശരിയാണ്. സിബിഐ അന്വേഷണം വരുമ്പോൾ സ്വാഭാവികമായും അദ്ദേഹത്തിന്റെ പങ്ക് കണ്ടെത്താനാകും എന്നാണ് ഞങ്ങൾ പ്രതീക്ഷിക്കുന്നത്.