ശൈലജയുടെ ‘ഹമാസ്’ പ്രസ്താവന ബിജെപി വോട്ടു ലക്ഷ്യമിട്ട്; സുധാകരനും സതീശനും സൗഹൃദമത്സരത്തിലെന്നും മുരളി

ലോക്സഭാ തിരഞ്ഞെടുപ്പിൽ കേരളം ഉറ്റുനോക്കുന്ന പോരാട്ടത്തിനാണ് വടകര വേദിയാകുന്നത്. കോൺഗ്രസിന്റെ കരുത്തനായ സ്ഥാനാർഥി കെപിസിസി മുൻ പ്രസിഡന്റ് കെ.മുരളീധരനെതിരെ സിപിഎം അവിടെ രംഗത്തിറക്കിയിരിക്കുന്നത് മുൻമന്ത്രിയും കേന്ദ്ര കമ്മിറ്റി അംഗവുമായ കെ.കെ.ശൈലജയെ. സിറ്റിങ് സീറ്റ് നിലനിർത്തുമെന്ന ആത്മവിശ്വാസത്തോടെ മുരളി കളത്തിലിറങ്ങിക്കഴിഞ്ഞു. സ്ഥാനാർഥിത്വം ഔദ്യോഗികമായി പ്രഖ്യാപിക്കാത്തത് മുരളിക്ക് ഒരു തടസ്സമല്ല. സംസ്ഥാനത്തെ കോൺഗ്രസിനെ നയിക്കുന്ന നേതാക്കളിൽ ഒരാളായ കെ.മുരളീധരൻ വടകരയിലെയും കേരളത്തിലെയും യുഡിഎഫ് സാധ്യതകൾ വിശകലനം ചെയ്യുന്നു. മലയാള മനോരമ തിരുവനന്തപുരം ചീഫ് ഓഫ് ബ്യൂറോ സുജിത് നായരുമായി ‘ക്രോസ് ഫയറിൽ’ മുരളീധരൻ സംസാരിക്കുന്നു. 

∙ ലോക്സഭാ തിരഞ്ഞെടുപ്പ് പടിവാതിൽക്കലാണ്. എന്താണ് കോൺഗ്രസിനു പറയാനുള്ളത്? 

ബിജെപിക്കെതിരെ ‘ഇന്ത്യാസഖ്യത്തിന്റെ’ മുന്നേറ്റത്തിന് ഏറ്റവും കൂടുതൽ സംഭാവന ചെയ്യാൻ കഴിയുന്നതു കോൺഗ്രസിനാണ്. സിപിഎം അവകാശപ്പെടുന്നതു പോലെ കേരളത്തിലെ ഇടതുപക്ഷം ഒരു ദേശീയ ബദൽ അല്ല. ഇതേ സിപിഎം തമിഴ്നാട് ഉൾപ്പെടെ പല സംസ്ഥാനങ്ങളിലും കോൺഗ്രസുമായി സഖ്യത്തിലുമാണ്. കേരളത്തിൽ സിപിഎമ്മിനുള്ള ശക്തി കേരളത്തിന് പുറത്ത് ഒരു സംസ്ഥാനത്തും ഇല്ല. മത്സരിക്കാൻ സീറ്റു കിട്ടിയാൽ തന്നെ വലിയ കാര്യം. 

ഇന്ത്യ മുന്നണിക്ക് കുതിക്കണമെങ്കിൽ കോൺഗ്രസ് ജയിക്കുന്ന സീറ്റുകളുടെ എണ്ണം കൂടണം. വടകര ഉൾപ്പെടെയുള്ള കേരളത്തിലെ സീറ്റുകളിൽ കോൺഗ്രസും യുഡിഎഫും ജയിച്ചു വരേണ്ടതിന്റെ ആവശ്യകതയെക്കുറിച്ചു ജനങ്ങൾക്കു നല്ല ബോധ്യമുണ്ട്. അവർ സിപിഎമ്മിനെ തഴയുകയും ബിജെപിയെ എതിർക്കുകയും ചെയ്യും. 

∙ കെ.കെ.ശൈലജയാണല്ലോ വടകരയിൽ താങ്കൾക്ക് എതിരാളി? 

എതിരാളി ആരുമാകട്ടെ, ദേശീയ രാഷ്ട്രീയത്തിനൊപ്പം വടകര വിധിയെഴുതുന്നത് കൊലപാതക രാഷ്ട്രീയത്തിന് എതിരെയാകും. ടി.പി.ചന്ദ്രശേഖരൻ കേസിൽ ഒടുവിൽ വന്ന ഹൈക്കോടതി വിധി ജനങ്ങൾക്കു മുന്നിലുണ്ട്. കീഴ്ക്കോടതി വിധിക്കെതിരെ പ്രതികൾ നൽകിയ അപ്പീൽ തള്ളിയെന്നു മാത്രമല്ല, രണ്ടു സിപിഎമ്മുകാരെ കൂടി ഹൈക്കോടതി പ്രതികളാക്കി. ഇതു സാധാരണ സംഭവിക്കാത്തതാണ്. കീഴ്ക്കോടതി വെറുതെ വിട്ട രണ്ടുപേരെ ഹൈക്കോടതി ശിക്ഷിച്ചതോടെ സിപിഎമ്മിന്റെ പങ്ക് കൂടുതൽ വ്യക്തമായി. 

ടിപിയെ കൊന്ന ശക്തികളെ പരാജയപ്പെടുത്തുക വടകര കടമയായി ഏറ്റെടുക്കും. സ്ഥാനാർഥി ആരാണ് എന്നത് അവർക്കു പ്രശ്നമല്ല. ആരായാലും സിപിഎമ്മിന്റെ സ്ഥാനാർഥി ആണല്ലോ. ഞങ്ങളുടെ പാർട്ടി വിട്ട് മറ്റു പാർട്ടികളിലേയ്ക്കു പലരും പോയിട്ടുണ്ടല്ലോ. കെ.വി.തോമസ് കേരളത്തിന്റെ ഡൽഹിയിലെ പ്രതിനിധിയായി. പി.എസ്.പ്രശാന്ത് ദേവസ്വം ബോർഡ് പ്രസിഡന്റായി. ആരോടെങ്കിലും വൈരനിര്യാതന സമീപനം കോൺഗ്രസ് എടുത്തിട്ടുണ്ടോ? ഒരു കോൺഗ്രസുകാരും ഇവർക്കാർക്കുമെതിരെ ഒന്നും ചെയ്തിട്ടില്ല. പക്ഷേ സിപിഎം വിട്ട ചന്ദ്രശേഖരനെയോ? 51 വെട്ടുവെട്ടി കൊലപ്പെടുത്തി. ഈ വ്യത്യാസം ജനങ്ങൾക്കു ബോധ്യമുണ്ട്. 

∙ ആരോഗ്യമന്ത്രി എന്ന നിലയിൽ കെ.കെ.ശൈലജയുടെ ട്രാക്ക് റെക്കോർഡ് താങ്കൾക്കറിയാം. മട്ടന്നൂരിൽ റെക്കോർഡ് ഭൂരിപക്ഷത്തോടെയാണ് അവർ വിജയിച്ചത്. അങ്ങനെ ഒരു എതിരാളി വടകരയിൽ മത്സരിക്കുന്നതിന്റെ ആശങ്ക താങ്കൾക്കുണ്ടോ? 

ഒരു ആശങ്കയുമില്ല. യുഡിഎഫിനെ സംബന്ധിച്ച് വടകരയിലെ സിപിഎം സ്ഥാനാർഥി കൊലപാതക രാഷ്ട്രീയത്തിന്റെ പ്രതീകമാണ്. ആ വിപത്തിന്റെ വക്താക്കളെ ജയിക്കാൻ അനുവദിക്കരുതെന്നാണ് ഞങ്ങൾക്ക് ജനങ്ങളോടു പറയാനുള്ളത്. 

∙ എംഎൽഎ ആയ ടീച്ചറെ താങ്കളെ പോലെ ശക്തനായ ഒരു സിറ്റിങ് എംപിക്കെതിരെ നിർത്തുന്നതിന്റെ പിന്നിൽ മറ്റെന്തെങ്കിലും ലക്ഷ്യമുണ്ടോ? 

പല സന്ദർഭങ്ങളിലും തിരഞ്ഞെടുപ്പിൽ ശൈലജ ടീച്ചറെ ബിജെപിക്കാർ സഹായിച്ചിട്ടുണ്ട്. 1996 ൽ പേരാവൂരിൽനിന്ന് അവർ ജയിച്ചത് ബിജെപി വോട്ടു കിട്ടിയാണ്. ഹമാസിനെ ഭീകര സംഘടനയായി അവർ തള്ളിപ്പറഞ്ഞതും ബിജെപിക്കാരെ സന്തോഷിപ്പിക്കാനായിരിക്കുമല്ലോ. നേമത്തെ സിറ്റിങ് സീറ്റ് കഴിഞ്ഞ തിരഞ്ഞെടുപ്പിൽ ബിജെപിക്കു നഷ്ടപ്പെട്ടത് ഞാൻ അവിടെ മത്സരിക്കാൻ നിന്നതുകൊണ്ടാണെന്ന വൈരാഗ്യം ആർഎസ്എസിന് എന്നോടു കാണും. എൽഡിഎഫ് സ്ഥാനാർഥിയാണ് അവിടെ ജയിച്ചതെങ്കിലും എന്റെ സ്ഥാനാർഥിത്വമാണ് നിർണായകമായതെന്ന വിലയിരുത്തൽ പൊതുവിൽ ഉണ്ടായിട്ടുണ്ടല്ലോ.