അന്ന് അവർ ഇരുവരും ബിജെപിയോട് സന്ധി ചെയ്തില്ല; അനിലിനു പിന്നാലെ പദ്മജയും! ഈ സർജിക്കൽ സ്ട്രൈക്കിന്റെ ലക്ഷ്യം ഇത്

നിയമസഭയിലേക്കു രണ്ടു പ്രാവശ്യവും ലോക്സഭയിലേക്ക് ഒരു പ്രാവശ്യവും മത്സരിച്ചു, വിജയിച്ചില്ലെന്നു മാത്രം. യുഡിഎഫ് സർക്കാരിന്റെ കാലത്ത് കെടിഡിസി ചെയർപഴ്സണായി അഞ്ചുവർഷത്തോളം പ്രവർത്തിച്ചു. ഒരാഴ്ച മുൻപുവരെ തൃശൂരിൽ കോൺഗ്രസ് സ്ഥാനാർഥിക്കു വേണ്ടി വോട്ട് ചോദിച്ച് പൊതുയോഗത്തിൽ പ്രസംഗിച്ചിരുന്നുവത്രേ. ആ പത്മജയാണിപ്പോൾ ബിജെപിയിൽ ചേർന്നത്. പാർട്ടി ഹൈക്കമാൻഡിന്റെ അവഗണനയും മറ്റുമാണ് അവർ കാരണമായി പറയുന്നത്. സോണിയ ഗാന്ധിയെ കാണാനുള്ള അവസരം പോലും നിഷേധിച്ചെന്നും അവർ ആരോപിക്കുന്നു. ബിജെപി പദവികൾ വാഗ്ദാനം ചെയ്തിട്ടുണ്ടെന്ന് പുറത്ത് സംസാരമുണ്ട്. പുറമെ വയനാട്ടിൽ രാഹുൽ ഗാന്ധിക്കെതിരെ പത്മജയെ സ്ഥാനാർഥിയാക്കാനും ബിജെപി  നീക്കം നടത്തുന്നുണ്ടെന്നാണ് വിവരം.

∙ അനിലും പത്മജയും വന്നു, അടുത്തതാര് 

മക്കൾ രാഷ്ട്രീയത്തിന്റെ പേരിൽ ഏറെ പഴികേട്ട  നേതാവാണ് കെ. കരുണാകരൻ‍. മക്കളുടെ പാർട്ടി മാറ്റം എങ്ങനെ ബാധിക്കും. എന്തായാലും അനിലിനെക്കാൾ കോൺഗ്രസിനെ ബുദ്ധിമുട്ടിലാക്കുക പത്മജയുടെ ബിജെപി പ്രവേശമാണ്. ഏതു കോൺഗ്രസ് നേതാവും ഏതു നിമിഷവും ബിജെപിയിൽ ചേരാം എന്ന പ്രചാരണത്തിന് ഇത് അടിവരയിടും. കെ.കരുണാകരന്റെ രണ്ടു മക്കളും രണ്ടു കാലങ്ങളിലായി കോൺഗ്രസ് രാഷ്ട്രീയത്തിൽ സജീവമായി. മുരളീധരൻ സേവാദളിലൂടെ പ്രവർത്തിച്ചു തുടങ്ങി. സംസ്ഥാന മന്ത്രി, എം.പി, കെപിസിസി പ്രസിഡന്റ് തുടങ്ങിയ പദവികൾ വഹിച്ചു.

ലോക്സഭാ തിരഞ്ഞെടുപ്പിലും നിയമസഭാ തിരഞ്ഞെടുപ്പിലും തോൽവികളും നേരിട്ടു. കേരളത്തിൽ എംഎൽഎ അല്ലാതിരിക്കെ മന്ത്രിയായി ഉപതിരഞ്ഞെടുപ്പി‍ൽ പരാജയപ്പെട്ട ഏക വ്യക്തികൂടിയാണ് മുരളീധരൻ. ഇടക്കാലത്ത് കരുണാകരന്റെ സ്വന്തം പാർട്ടിയായ ഡിഐസികെ സംസ്ഥാന പ്രസിഡന്റ്, ശരദ് പവാറിന്റെ എൻസിപിയുടെ സംസ്ഥാന പ്രസിഡന്റ് എന്നീ നിലകളിലും പ്രവർത്തിച്ചു. അദ്ദേഹവും ഒരിക്കലും സംഘപരിവാറിനെ തൊട്ടുകൂട്ടിയില്ല. 

പെങ്ങൾക്കു പിന്നാലെ ആങ്ങളയും ബിജെപിയിൽ എത്തും എന്ന പ്രചാരണത്തിന് തടയിടാൻ കോൺഗ്രസ് ക്ലേശിക്കും. പ്രത്യേകിച്ച് വടകരയിൽ കെ.കെ.ശൈലജയെ പോലെ ശക്തയായ സ്ഥാനാർഥിയെ നേരിടാൻ ഒരുങ്ങുമ്പോൾ.എൽഡിഎഫ്  ഈ അവസരം ശരിക്കും മുതലെടുക്കാൻ രംഗത്തിറങ്ങിക്കഴിഞ്ഞു. പത്മജയ്ക്ക് ബിജെപി അംഗത്വം നൽകും മുൻപുതന്നെ മുഖ്യമന്ത്രിയടക്കമുള്ള പ്രമുഖ നേതാക്കളെല്ലാം പ്രതികരിച്ചുവെന്നതും ശ്രദ്ധിക്കണം.

കെ. മുരളീധരൻ മുൻപ് പല പാർട്ടികളിൽ പ്രവർത്തിച്ചിട്ടുണ്ട് എന്നതും ഓർക്കാം. ഇതുമായി ബന്ധപ്പെട്ട് ഒട്ടേറെ വിഴുപ്പലക്കലുകൾ ഇനി കാണേണ്ടിവരും. തൃശൂരിലെ കരുണാകരന്റെ സ്മൃതി മണ്ഡപം പോലും ഇനി തർക്ക വിഷയമായാൽ അത്ഭുതപ്പെടേണ്ട. ജീവിച്ചിരിക്കുന്നവർ മാത്രമല്ല കരുണാകരന്റെ ആത്മാവു പോലും നേതാക്കളുടെ പരാമർശവിഷയമാകുന്നു. എന്തായാലും പെട്ടെന്ന് പൊട്ടിവീണ പത്മജ പ്രതിഭാസം കേരളത്തിലെ രാഷ്ട്രീയ അജൻഡ മാറ്റിയെന്നതിൽ തർക്കമില്ല.

പത്മജ ബിജെപി പാളയത്തിലേക്ക് ചേക്കേറിയതോടെ കോൺഗ്രസും ബദൽ നടപടികളുമായി മുന്നോട്ട് പോകുന്നതിന്റെ സൂചനകളാണ് ലഭിക്കുന്നത്. കെ. മുരളീധരനെ തൃശൂരിലേക്ക് മാറ്റാനുള്ള നീക്കത്തിലൂടെ ഇതാണ് വ്യക്തമാകുന്നത്. ബിജെപി താര സ്ഥാനാർഥിയായ സുരേഷ് ഗോപി മത്സരിക്കുന്ന തൃശൂരിൽ ഏറ്റവും കരുത്തനായ സ്ഥാനാർഥിയെന്ന നിലയിലാണ് കെ. മുരളീധരനെ രംഗത്തിറക്കാൻ കോൺഗ്രസ് ഒരുങ്ങുന്നത്.