‘തൃശൂരിൽ മുരളി വരാൻ കാരണമുണ്ട്; കണ്ണൂർ തീരുമാനം സുധാകരന്റേത്; പത്തനംതിട്ടയിൽ ആന്റണി വരുമോയെന്ന് ചോദിച്ചില്ല’

∙ കോൺഗ്രസ് പ്രചാരണസമിതിയുടെ തലപ്പത്തേയ്ക്കു താങ്കൾ വന്നല്ലോ. കെപിസിസി പ്രസിഡന്റും പ്രതിപക്ഷനേതാവുമായിരുന്ന പ്രവർത്തകസമിതി അംഗം കൂടിയായ ഒരു നേതാവിന് ഇതു വലിയ പദവിയല്ല. ഏറ്റെടുക്കുമ്പോൾ എന്താണ് മനസ്സിൽ?

പദവിയല്ല ഇവിടെ പ്രശ്നം. പ്രവർത്തനങ്ങൾ ഏകോപിപ്പിക്കാനും പ്രചാരണപരിപാടികൾ ശക്തിപ്പെടുത്താനും ഉള്ള ഒരു ഇടക്കാല ദൗത്യമാണ് ഇത്. അതു പാർട്ടി ഏൽപ്പിച്ചപ്പോൾ ഉത്തരവാദപ്പെട്ട പാർട്ടി പ്രവർത്തകൻ എന്ന നിലയിൽ ഏറ്റെടുത്തു. എല്ലാവരെയും യോജിപ്പിച്ചുള്ള പ്രവർത്തനത്തിലൂടെ മികച്ച വിജയം കൈവരിച്ച ശേഷം ഈ ഉത്തരവാദിത്തത്തിൽനിന്നു സന്തോഷത്തോടെ ഒഴിയാനാണ് ആഗ്രഹിക്കുന്നത്.

∙ പ്രചാരണ രീതികൾ വലിയ തോതിൽ മാറുകയാണല്ലോ. പുതുമ എങ്ങനെ കൊണ്ടുവരാൻ കഴിയും? എന്തെങ്കിലും പദ്ധതിയായോ?

ആധുനിക കാലഘട്ടത്തിനു വേണ്ട എല്ലാ പ്രചാരണരീതികളും അവലംബിക്കും. കെപിസിസി വാർ റൂം തുടങ്ങി. സോഷ്യൽ മീഡിയയ്ക്കും ഡിജിറ്റൽ മീഡിയയ്ക്കും വലിയ റോളാണല്ലോ ഇപ്പോൾ തിരഞ്ഞെടുപ്പിൽ. പ്രചാരണരംഗത്ത് ഊന്നൽ കൊടുക്കേണ്ട കാര്യങ്ങൾ ആലോചിക്കും. സമിതിയിലെ മറ്റംഗങ്ങളെ വൈകാതെ പ്രഖ്യാപിക്കും. ഓരോരുത്തർക്കും പ്രത്യേക ചുമതല നൽകും. പ്രതിപക്ഷനേതാവും കെപിസിസി പ്രസിഡന്റും പ്രവർത്തകസമിതി അംഗങ്ങളും ഉൾപ്പെടെ എല്ലാവരുടെയും അഭിപ്രായങ്ങൾ കണക്കിലെടുത്തും യോജിച്ചും മുന്നോട്ടു പോകാനാണ് ആഗ്രഹിക്കുന്നത്.

∙ എന്താണ് തിരഞ്ഞെടുപ്പിൽ യുഡിഎഫ് പ്രതീക്ഷ?

വളരെ അനുകൂലമായ സ്ഥിതിയാണ് കേരളത്തിൽ. പിണറായി സർക്കാരിന്റെ പരാജയം മറച്ചുവയ്ക്കാനായി മുഖ്യമന്ത്രി നടത്തിയ എല്ലാ ശ്രമവും പരാജയപ്പെട്ടു. നവകേരള സദസ്സുകളും മുഖാമുഖങ്ങളും ഏശിയതേയില്ല. സദസ്സിൽ കിട്ടിയ കൊട്ടക്കണക്കിനു പരാതികളുടെ സ്ഥിതി എന്താണ്? എന്തിനെങ്കിലും പരിഹാരം ഉണ്ടായോ? അപേക്ഷ നൽകിയവർ തന്നെ ഈ സർക്കാരിനെതിരെ വോട്ടു ചെയ്യും. സർക്കാരിന്റെ എല്ലാ പ്രവർത്തനവും നിലച്ചു. അഴിമതിയും കെടുകാര്യസ്ഥതയും ധൂർത്തും എല്ലാം നശിപ്പിച്ചു.

∙ തിരഞ്ഞെടുപ്പിനെ ഏറ്റവും സ്വാധീനിക്കുന്ന രണ്ടു കാര്യങ്ങൾ പറയാൻ പറഞ്ഞാൽ?

കേന്ദ്രസർക്കാരിനെതിരെയുള്ള അതിശക്തമായ ജന വികാരം, കേരളത്തിലെ പിണറായി സർക്കാരിനോടുള്ള വെറുപ്പും രോഷവും. ഇതു രണ്ടും കൂടി ചേരുമ്പോൾ യുഡിഎഫിനു വൻ വിജയം ലഭിക്കും. ഞങ്ങളുടേത് എറ്റവും മികച്ച  സ്ഥാനാർഥിപട്ടികയാണ്. കോൺഗ്രസിലോ യുഡിഎഫിലോ കാര്യമായ തർക്കങ്ങൾ ഒന്നുമുണ്ടായില്ല. അങ്ങനെ രൂപപ്പെട്ട പട്ടികയ്ക്ക് പ്രവർത്തകർ നല്ല അംഗീകാരം നൽകും.

∙ അവസാന മണിക്കൂറുകളിൽ പട്ടികയിൽ ഉണ്ടായ മാറ്റങ്ങളുമായി ബന്ധപ്പെട്ട ഡൽഹി ചർച്ചകളിൽ താങ്കളും പങ്കാളിയായിരുന്നല്ലോ. എങ്ങനെയാണ് ആ തീരുമാനങ്ങൾ ഉരുത്തിരിഞ്ഞത്?

കൂട്ടായ തീരുമാനമായിരുന്നു. എഐസിസി ജനറൽ സെക്രട്ടറി കെ.സി.വേണുഗോപാൽ, പ്രതിപക്ഷനേതാവ് വി.ഡി.സതീശൻ, കെപിസിസി പ്രസിഡന്റ് കെ.സുധാകരൻ എന്നിവരും ഞാനും ആ കൂടിയാലോചനകൾക്കു നേതൃത്വം നൽകി. മറ്റുള്ളവരുമായി ഫോണിൽ സംസാരിച്ചു. കൂട്ടായ ആലോചനകളാണ് ആ മാറ്റങ്ങളിലേക്കു നയിച്ചത്.

∙ തൃശൂരിൽ കെ.മുരളീധരൻ വരുമ്പോഴുള്ള മാറ്റത്തെ എങ്ങനെയാണ് കാണുന്നത്?

തൃശൂരിൽ മുരളി വന്നതോടെ അവിടുത്തെ ചിത്രം മാറി. യുഡിഎഫിന് വളരെ അനുകൂലമായ സാഹചര്യമായി. ടി.എൻ.പ്രതാപൻ മോശക്കാരനാണെന്നു പറയുന്നില്ല. പക്ഷേ പത്മജ വേണുഗോപാലും മറ്റും പാർട്ടി വിട്ട് ബിജെപിക്കു വേണ്ടി പ്രവർത്തിക്കുന്ന സാഹചര്യം വന്നപ്പോൾ നേരിടാൻ മുരളീധരനാകും നല്ലത് എന്ന വിലയിരുത്തലാണ് ഉണ്ടായത്. ആ തീരുമാനത്തിന് ഇതിനകം വലിയ അംഗീകാരം കിട്ടിയെന്നാണ് തൃശൂരിൽ നിന്നുളള വാർത്തകൾ വ്യക്തമാക്കുന്നത്.

∙ കെ.സി.വേണുഗോപാൽ ആലപ്പുഴയിൽ വരുന്നതോടെ കഴിഞ്ഞ തവണ നഷ്ടപ്പെട്ട ആ സീറ്റ് തിരിച്ചു പിടിക്കാമെന്നാണോ?

കെ.സി.വേണുഗോപാൽ ആലപ്പുഴയിൽ മത്സരിക്കണമെന്ന അഭിപ്രായം തുടക്കം മുതൽ എനിക്കുണ്ടായിരുന്നു. രണ്ടുതവണ എംപിയും മൂന്നു തവണ എംഎൽഎയും ആയിരുന്നതിന്റെ ബന്ധം അദ്ദേഹത്തിന് ആലപ്പുഴയോടുണ്ട്. ഇരുപതിൽ 19 കിട്ടിയിട്ടും ആലപ്പുഴ തോറ്റത് ഞങ്ങൾക്കെല്ലാം വലിയ നിരാശ ഉണ്ടാക്കിയിരുന്നു. തിരിച്ചു പിടിക്കണമെന്ന വാശിയോടെയാണ് കെസിയെ മത്സരിപ്പിക്കണമെന്ന നിർദേശം ഞാൻ വച്ചത്. നല്ല ഭൂരിപക്ഷത്തോടെ അദ്ദേഹം ജയിക്കും.

∙ പക്ഷേ രാജസ്ഥാനിൽ നിന്ന് നിലവിൽ രാജ്യസഭാംഗമായ അദ്ദേഹം ലോക്സഭയിലേയ്ക്കു മത്സരിച്ചു ജയിച്ചാൽ ആ രാജ്യസഭാ സീറ്റ് കോൺഗ്രസിനു നഷ്ടപ്പെടുമെന്ന വിമർശനം ഉയരുന്നുണ്ടല്ലോ?

അത് ആലപ്പുഴയിൽ തോറ്റു പോകുമെന്ന നിരാശയിൽ സിപിഎം ആരോപിക്കുന്നതാണ്. ലോക്സഭയിൽ ഭൂരിപക്ഷം എംപിമാർ ഉണ്ടെങ്കിലെ സർക്കാർ ഉണ്ടാക്കാൻ കഴിയൂ. രാജ്യസഭയിൽ കൂടുതൽ സീറ്റുണ്ട് എന്നു പറഞ്ഞിട്ടു കാര്യമില്ല. നരേന്ദ്രമോദി സർക്കാരിനെ താഴെയിറക്കി സർക്കാർ ഉണ്ടാക്കാനുള്ള അവകാശവാദം കോൺഗ്രസിന് ഉന്നയിക്കണമെങ്കിൽ കോൺഗ്രസിന് ലോക്സഭയിൽ കൂടുതൽ അംഗങ്ങൾ വേണം. അതുകൊണ്ട് ഓരോ സീറ്റും ഞങ്ങൾക്കു പ്രധാനമാണ്.

ജയസാധ്യതയും അംഗീകാരവും ഉള്ള സ്ഥാനാർഥികളെ ഞങ്ങൾ നിർത്തും. മുതിർന്ന നേതാവായ ഭൂപേഷ് ബാഗൽ ഇപ്പോൾ എംഎൽഎ ആണ്. അദ്ദേഹം മത്സരിക്കുന്നുണ്ട്. രാജ്യസഭയുടെ കാര്യം പിന്നീട് നോക്കാം. ഇപ്പോൾ ലോക്സഭാ തിരഞ്ഞെടുപ്പാണ് മുന്നിൽ. കേരളത്തിലെ മുഖ്യമന്ത്രി വരെ അതിന്റെ പേരിൽ കെ.സി.വേണുഗോപാലിനെതിരെ തിരിയുന്നതിൽ നിഴലിക്കുന്നത് അദ്ദേഹത്തിന്റെ സ്ഥാനാർഥിത്വം ഉണ്ടാക്കിയ സ്വാധീനമാണ്. അവരുടെ പരിഭ്രാന്തിയാണ് അതിൽ തെളിയുന്നത്.

∙ എംഎൽഎ ആയ ഭൂപേഷ് ബാഗൽ മത്സരിക്കുന്നു, എംഎൽഎ ആയ രമേശ് ചെന്നിത്തല മത്സരിക്കാനിടയുണ്ട് എന്നും ചിലർ പറഞ്ഞു കേട്ടിരുന്നല്ലോ?

‌ചിലരെല്ലാം അങ്ങനെ അഭിപ്രായപ്പെട്ടിരുന്നു. ഞാനില്ലെന്നു പറഞ്ഞപാടെത്തന്നെ മറുപടിയും നൽകി. എംഎൽഎ ആയ എനിക്ക് നിയമസഭാ മണ്ഡലം വിട്ടു പോകാൻ താൽപര്യമില്ല. തുടക്കത്തിൽ തന്നെ ഞാൻ നിരുത്സാഹപ്പെടുത്തിയതിനാൽ ഗൗരവമുളള ചർച്ചകൾ ഉണ്ടായില്ല.

∙ കോൺഗ്രസിൽ കൂടിയാലോചനകൾ, ചർച്ചകൾ എന്നിവ കുറയുന്നു എന്ന പരാതി താങ്കൾക്കും ഉണ്ടായിരുന്നല്ലോ. സ്ഥാനാർഥി നിർണയത്തിൽ അതിൽ മാറ്റം വന്നോ?

നല്ല മാറ്റം വന്നു. എല്ലാവരുമായി കൂടിയാലോചിച്ചാണ് പട്ടിക തീരുമാനിച്ചത്. അതു ശുഭകരമാണ്. തിരഞ്ഞെടുപ്പിൽ യുഡിഎഫ് ജയിക്കേണ്ടത് ഞങ്ങൾ എല്ലാവരുടെയും ആവശ്യമാണ്. ഒറ്റക്കെട്ടായി നിന്നാൽ ഇരുപതിൽ ഇരുപതും സീറ്റും നേടാൻ കഴിയും. തദ്ദേശ, നിയമസഭാ തിരഞ്ഞെടുപ്പുകളിലെ തോൽവിയിൽ നിന്നുള്ള മാറ്റമായിരിക്കും അത്.

∙ കെപിസിസിക്കു വർക്കിങ് പ്രസിഡന്റുമാരും വൈസ് പ്രസിഡന്റുമാരും ഉള്ളപ്പോൾ യുഡിഎഫ് കൺവീനറായ എം.എം. ഹസന് കെപിസിസി പ്രസിഡന്റിന്റെ ചുമതല നൽകിയത് എന്തുകൊണ്ടാണ്?

ഹസൻ നേരത്തേ ആക്ടിങ് പ്രസിഡന്റായി പ്രവർത്തിച്ചു പരിചയം ഉള്ള നേതാവാണ്. എല്ലാവർക്കും സ്വീകാര്യത ഉള്ള വ്യക്തിയാണ് അതുകൊണ്ട് ഐക്യം ഉറപ്പിച്ചുകൊണ്ടുപോകാൻ അദ്ദേഹത്തിനു കഴിയും എന്ന വിലയിരുത്തലാണ് ഉണ്ടായത്.

∙ കണ്ണൂരിൽ മത്സരിക്കാനുള്ള തീരുമാനം സിറ്റിങ് എംപി ആയ കെ.സുധാകരന്റേതായിരുന്നോ അതോ ഹൈക്കമാൻഡിന്റേതോ?

അതു സുധാകരന്റെ തീരുമാനമാണ്. ബന്ധപ്പെട്ട എല്ലാവരുമായും അദ്ദേഹം ആലോചിച്ചു. അദ്ദേഹം തന്നെ മത്സരിച്ചാൽ ജയസാധ്യത വർധിക്കും എന്ന നിഗമനം ഉണ്ടായി. ആ തീരുമാനത്തെ ഞങ്ങളെല്ലാം പിന്തുണച്ചു. കണ്ണൂർ മണ്ഡലത്തിന് ഏറ്റവും അനുയോജ്യനായ സ്ഥാനാർഥി സുധാകരനാണ്.

∙ കെ.സുധാകരന് ഉണ്ടാകുന്ന നാക്കുപിഴകൾ ഒരു താൽക്കാലിക പ്രസിഡന്റ് വേണമെന്ന തീരുമാനത്തെ സ്വാധീനിച്ചോ?

ഞാൻ കെപിസിസി പ്രസിഡന്റായിരിക്കെ തിരഞ്ഞെടുപ്പിൽ മത്സരിച്ചപ്പോഴും ഇതുപോലെ ചുമതല കൈമാറിയിരുന്നല്ലോ. തലേക്കുന്നിൽ ബഷീറാണ് ആ ഉത്തരവാദിത്വം നിർവഹിച്ചത്. തിരഞ്ഞെടുപ്പ് സമയത്തു കെപിസിസി പ്രസിഡന്റിന് ഭാരിച്ച ജോലി വരും. സ്ഥാനാർഥിയായിരിക്കുന്ന ആൾക്ക് അതു നിർവഹിക്കുക എളുപ്പമല്ല. അതുകൊണ്ടാണ് ഹസനെ പോലെ ഒരു മുതിർന്ന നേതാവിനെ ചുമതല ഏൽപിച്ചത്.

∙ കഴിഞ്ഞ 19–1 തോൽവിയിൽ നിന്ന് മാറ്റം വരുമെന്നാണല്ലോ പക്ഷേ എൽഡിഎഫിന്റെ പ്രതീക്ഷ?

കഴിഞ്ഞ തവണയും വലിയ പ്രതീക്ഷകളായിരുന്നല്ലോ അവർക്ക്. തിരഞ്ഞെടുപ്പുകളിൽ എല്ലാ പാർട്ടികൾക്കും പ്രതീക്ഷകളുണ്ടാകും. അതിലൊന്നും തെറ്റു പറയാൻ കഴിയില്ല. പക്ഷേ ഇന്നത്തെ ദേശീയ, സംസ്ഥാന സാഹചര്യം വിലയിരുത്തിയാൽ ഇടതുമുന്നണിക്ക് അങ്ങനെ ഒരു സ്വീകാര്യത ഇല്ലെന്നതു വളരെ വ്യക്തമാണ്. സ്ഥാനാർഥിപ്പട്ടികയിൽ പോലും വലിയ ചലനം സൃഷ്ടിക്കാൻ അവർക്കു കഴിഞ്ഞില്ല.

∙ പക്ഷേ ചില മണ്ഡലങ്ങളിൽ നല്ല മത്സരം, ശക്തമായ പോരാട്ടം അവർ കാഴ്ചവയ്ക്കുന്നില്ലേ?

കേരളത്തിൽ അല്ലെങ്കിലും എല്ലാ മണ്ഡലങ്ങളിലും മത്സരം നന്നായി നടക്കും. പക്ഷേ ജനങ്ങളുടെ പൾസ് യുഡിഎഫിനൊപ്പമാണ്. അത് എൽഡിഎഫിനു കനത്ത തോൽവി സമ്മാനിക്കും. ബിജെപിക്കെതിരെയുള്ള ഇന്ത്യ മുന്നണിക്കു നേതൃത്വം കൊടുക്കുന്നതു കോൺഗ്രസ് ആയതുകൊണ്ടുതന്നെ കേരളത്തിന്റെ മതേതര മനസ്സ് യുഡിഎഫിനൊപ്പമാണ്. കോൺഗ്രസ് സ്ഥാനാർഥികൾ കൂടുതൽ ജയിച്ചു വരണം എന്നത് സ്വാഭാവിക വികാരമാണ്.