അവരുടെ വീഴ്ച എന്റെ തലയിൽ കെട്ടിവയ്ക്കുന്നു; ആരോഗ്യമന്ത്രി ഫോണെടുത്തില്ല: പോരാട്ടം തുടരുമെന്ന് അനിത

? താങ്കളെ തിരിച്ച് ജോലിയിൽ പ്രവേശിപ്പിക്കുന്നതിനുള്ള തടസ്സമായി ഉദ്യോഗസ്ഥർ പറയുന്നതെന്താണ്

∙ ഹൈക്കോടതി ഉത്തരവുമായെത്തിയപ്പോൾ പ്രിൻസിപ്പൽ ഓഫിസിൽനിന്ന് പറയുന്നത് അവർക്ക് ഡിഎംഇയുടെ ഉത്തരവ് ലഭിച്ചാലേ ജോലിയിൽ തിരികെ പ്രവേശിപ്പിക്കാനാകൂവെന്നാണ്. ഡിഎംഇയോട് ചോദിച്ചപ്പോൾ സർക്കാരിൽനിന്ന് ഉത്തരവ് കിട്ടാതെ തനിക്ക് നടപടിയെടുക്കാനാവില്ലെന്ന് പറയുന്നു. എനിക്ക് സ്ഥലംമാറ്റ ഉത്തരവ് വന്നശേഷം പെട്ടെന്നുതന്നെ എന്റെ ഒഴിവിലേക്ക് ആളുവന്ന് ജോയിൻ ചെയ്തുകഴിഞ്ഞു. തിരുവനന്തപുരത്ത് നിന്നുള്ള ആളായിരുന്നു അത്. നാടകീയമായ സംഭവങ്ങളാണിതൊക്കെ. ജനുവരി 18നാണ് സ്ഥലംമാറ്റ ഉത്തരവ് വരുന്നത്. അന്ന് ഞാൻ ജോലി കഴിഞ്ഞ് ഉച്ചയ്ക്ക് വീട്ടിലെത്തിയപ്പോൾ നഴ്‌സിങ് സൂപ്രണ്ട് ഓഫിസർ ഫോണിൽ വിളിച്ചു പറയുകയായിരുന്നു, എന്റെ സ്ഥലംമാറ്റ ഉത്തരവെത്തിയിട്ടുണ്ടെന്ന്.

മാഡം ഉത്തരവ് വായിച്ച് പകുതിയെത്തുമ്പോൾ തന്നെ ജോയിൻ ചെയ്യാനുള്ള വ്യക്തി ഓഫിസിലെത്തിയിരുന്നു. എന്നോടൊപ്പം സ്ഥലംമാറ്റം കിട്ടിയവരുടെ ഒഴിവിലേക്ക് നിയമനം നടത്താൻ ഇത്ര തിടുക്കമുണ്ടായിട്ടില്ല. ഇപ്പോൾ ആരോഗ്യമന്ത്രി പറയുന്നത് ഞാൻ ഇടുക്കിയിൽ ജോലിയിൽ പ്രവേശിച്ചില്ലെന്നാണ്. ആരോഗ്യപ്രശ്നങ്ങളുള്ള ആളാണ് ഞാൻ. അതിനിടെ ഫെബ്രുവരിയിൽ എന്റെ അമ്മ കാൻസർ ബാധിതയാണെന്നറിഞ്ഞു. മകളാണെങ്കിൽ പൂർണഗർഭിണിയും. അത്രയും ദൂരെ പോയി ജോലിചെയ്യാനുള്ള സാഹചര്യമുണ്ടായിരുന്നില്ല. അതുകൊണ്ട് ഞാൻ ലീവിന് അപേക്ഷിച്ചു.

സ്പാർക്സ് ഓൺ മൊബൈൽ പ്ലാറ്റ്ഫോമിലൂടെയാണ് അപേക്ഷിച്ചത്. പക്ഷേ അപേക്ഷ ആരും സ്വീകരിച്ചില്ല. തുടർന്ന് അപേക്ഷയുമായി പ്രിൻസിപ്പൽ ഓഫിസിൽ ചെന്നു. എന്നിട്ടും അപേക്ഷ കൈയ്യിൽ വാങ്ങാൻ പ്രിൻസിപ്പൽ ഓഫിസറോ സൂപ്രണ്ടോ ചീഫ് നഴ്‌സിങ് ഓഫിസറോ തയാറായില്ല. പിന്നീട് അവരുടെ നിർദേശപ്രകാരം പ്രിൻസിപ്പൽ ഓഫിസിലെ തപാൽപ്പെട്ടിയിൽ അപേക്ഷ ഇട്ട് മടങ്ങുകയായിരുന്നു. ഈ അപേക്ഷ പിന്നീടെനിക്ക് റജിസ്റ്റേഡ് പോസ്റ്റിൽ അവർ തിരിച്ചയച്ചു. പക്ഷേ ഞാൻ കൈപ്പറ്റിയില്ല.

? വ്യക്തിജീവിതത്തിൽ ഈ പ്രശ്നം കാരണം ബുദ്ധിമുട്ടുകളുണ്ടായിട്ടില്ലേ

∙ 2024 ഫെബ്രുവരി 15നായിരുന്നു അമ്മയുടെ അർബുദ ശസ്ത്രക്രിയ. കോഴിക്കോട് മെഡിക്കൽ കോളജിൽത്തന്നെയാണ് ചെയ്തത്. ആ സമയത്ത് ചീഫ് നഴ്‌സിങ് ഓഫിസർ വന്നു പറഞ്ഞത്, ‘‘അനിത പുറത്തിറങ്ങി നടക്കരുത്. പ്രിൻസിപ്പൽ ഓഫിസിലെ ആരെങ്കിലും കണ്ടാൽ പ്രശ്നമാണ്’’ എന്നാണ്. ഞാനതിന് കൊലപാതകമൊന്നും ചെയ്തിട്ടില്ലല്ലോയെന്ന് ഞാൻ തിരിച്ചുചോദിച്ചു. ലീവിന്റെ അപേക്ഷ തിരിച്ചയച്ചത് ഞാൻ കൈപ്പറ്റാത്തതിനാൽ പ്രിൻസിപ്പൽ ഓഫിസിലെ ജീവനക്കാർ അപേക്ഷ ഇവിടെക്കൊണ്ട് തരുമെന്നായിരുന്നു അവരുടെ മറുപടി. പ്രിൻസിപ്പൽ കൊണ്ടുതന്നാലും ഞാൻ വാങ്ങില്ല അത് ഡിഎംഇയ്ക്ക് അയച്ചോട്ടെയെന്ന് ഞാൻ പറഞ്ഞു.

? അഞ്ചുദിവസമായല്ലോ സമരവുമായി. ഇനിയെങ്ങനെ മുന്നോട്ടുപോകാനാണ് തീരുമാനം

∙ അ‍ഞ്ച് ദിവസമായി കോടതി ഉത്തരവ് നടപ്പാക്കിക്കിട്ടാൻ കാത്തിരിക്കുന്നു. അഞ്ചാംദിവസമാണ് ആരോഗ്യമന്ത്രി ഇക്കാര്യത്തിൽ എന്തെങ്കിലും പ്രതികരിച്ചത്. ഡിഎംഇയുടെ കണ്ടെത്തലിൽ എന്റെ ഭാഗത്ത് വീഴ്ചയുണ്ടായിട്ടുണ്ടെന്നാണ് മന്ത്രി പറയുന്നത്. പക്ഷേ എന്റെ ഭാഗത്ത് വീഴ്‌ചയില്ലെന്ന് ഹൈക്കോടതി കണ്ടെത്തിയിട്ടുണ്ട്. അത് സർക്കാർ വക്കീലിനെക്കൊണ്ടുതന്നെ പറയിപ്പിക്കുകയും ചെയ്തു. ഇതുവരെ ആരോഗ്യമന്ത്രിയോ മറ്റ് മന്ത്രിമാരോ ഇതേക്കുറിച്ച് അന്വേഷിച്ചിട്ടില്ല. ആരോഗ്യമന്ത്രിയെ ഞാൻ അങ്ങോട്ട് വിളിച്ചപ്പോൾ ഫോണെടുത്തില്ല. പിന്നെ മറ്റാരോടും സഹായം ചോദിക്കാൻ നിന്നിട്ടില്ല. കാരണം ഞാൻ തെറ്റൊന്നും ചെയ്തിട്ടില്ല. അതിജീവിതയ്ക്കൊപ്പംനിന്ന് അവർക്കുനേരിട്ട അനീതിയെ എതിർക്കുക മാത്രമാണ് ചെയ്തത്.

സത്യം എന്റെ ഭാഗത്താണ്. എന്റെ ഭാഗത്തുണ്ടായ വീഴ്ചയെന്താണെന്ന് സർക്കാർ പറയണം. കോടതിവിധി പുനഃപരിശോധിക്കാൻ സർക്കാർ ഹർജി നൽകിയാൽ അതിനെതിരെ നിയമനടപടിയുമായി മുന്നോട്ടുപോകും. ഉത്തരവാദപ്പെട്ട സർക്കാർ അങ്ങനെയൊരു അനീതി ചെയ്യില്ലെന്നാണ് എന്റെ വിശ്വാസം. ഒരു വനിതയെ ഇങ്ങനെ ഉപദ്രവിക്കണമെന്നാണോ സർക്കാർ പൊതുസമൂഹത്തിന് കാണിച്ചുകൊടുക്കുന്നത് എന്നു മാത്രമേ ചോദിക്കാനുള്ളൂ. ഹൈക്കോടതി ഉത്തരവ് നടപ്പാക്കിക്കിട്ടാൻ നിയമനടപടിയുമായി മുന്നോട്ടുപോകാനാണ് തീരുമാനം.