ഒരു ഡോളറിന് 82 രൂപയില്ല!! യഥാർഥമൂല്യം 24 രൂപ മാത്രമോ? അപ്പോൾ മൂല്യം ‘ഇടിയുന്നില്ലേ’?

രൂപയുടെ വിനിമയ നിരക്ക് അനുസരിച്ചുള്ള ജിഡിപി പ്രകാരം ലോക രാജ്യങ്ങൾക്കിടയിൽ അഞ്ചാം സ്ഥാനത്താണ് ഇന്ത്യ ഇപ്പോൾ. പക്ഷേ അതേ രൂപയുടെ യഥാർഥ വാങ്ങൽശേഷി (പർച്ചേസിങ് പവർ പാരിറ്റി–പിപിപി) വച്ചു നോക്കിയാൽ  ജിഡിപിയിൽ 2017ഏപ്രിലിൽ തന്നെ  ഇന്ത്യ മൂന്നാം സ്ഥാനത്തെത്തിക്കഴിഞ്ഞു. പറയുന്നത് ഐഎംഎഫ് അഥവാ രാജ്യാന്തര നാണയനിധിയും ലോകബാങ്കും.  ഇതു പ്രകാരം ഡോളറിന്റെ  യഥാർത്ഥമൂല്യം 24 രൂപയോളം മാത്രം. തീർന്നില്ല, കറൻസികളുടെ പർച്ചേസിങ് പവർ പാരിറ്റിയുടെ അടിസ്ഥാനമാക്കി  യൂറോപ്പിൽ നിന്നു പ്രസിദ്ധീകരിക്കുന്ന ‘ദ് ഇക്കണോമിസ്റ്റ്’ പത്രം നടത്തിയ പഠനം  വെളിപ്പെടുത്തുന്നത് ഒരു ഡോളർ = 37.09 രൂപയാണെന്നാണ്. 2022 ജൂലൈ 21ന് ഒരു ഡോളറിന്റെ വിനിമയനിരക്ക് 79.95 രൂപയായിരിക്കുന്ന സമയത്താണിത്. ആഗോളതലത്തിൽ മുൻനിര സ്ഥാപനങ്ങളുടെ പഠനങ്ങൾ ഇങ്ങനെ പറയുമ്പോൾ മറുവശത്ത് 82 രൂപയിൽ അധികം കൊടുത്താലെ ഒരു അമേരിക്കൻ ഡോളർ കിട്ടൂ എന്നതാണ് അവസ്ഥ. എന്തുകൊണ്ടാണിത്? രൂപ അനുദിനം ഇടിഞ്ഞു താണുകൊണ്ടിരിക്കുന്നു. 2022 ഒക്ടോബർ 11ന്  ഒരു ഡോളറിനു 82.288 രൂപയാണ് മൂല്യം. 1980ൽ ഇത് 7.86 രൂപയും 2017 ഓഗസ്റ്റ് 7ന് 63.876 രൂപയുമായിരുന്നു. 5 വർഷം കൊണ്ട് 29% ഇടിവാണ് രൂപയ്ക്കുണ്ടായത്. കഴിഞ്ഞ 42 വർഷംകൊണ്ട് ഡോളർ രൂപയെ അപേക്ഷിച്ച് ഏതാണ്ട് 9.5 ഇരട്ടി ശക്തമായി. എന്തുകൊണ്ടാണ് വിനിമയനിരക്ക് ഇങ്ങനെ ഉയരുന്നത്? ഒപ്പം ഡോളറിന്റെ യാഥാർഥ്യ മൂല്യം എത്ര രൂപയാണെന്നും പരിശോധിക്കാനാണ് ഇവിടെ ശ്രമിക്കുന്നത്. 

∙ തുടർച്ചയായി മൂല്യം ഇടിഞ്ഞ് രൂപ

രൂപയുടെ മൂല്യം തുടർച്ചയായി കുറയുന്നത് നമ്മളിലൊക്കെ ആശങ്ക ഉയർത്തിയിട്ടുണ്ട്.  ക്രൂഡോയിലിനടക്കം ഇറക്കുമതി ചെയ്യുന്നവയ്ക്കെല്ലാം കൂടുതൽ പണം കൊടുക്കേണ്ടി വരുന്നത് വിലക്കയറ്റം  ഇനിയും രൂക്ഷമാക്കും.  ഇറക്കുമതി ചെയ്യുന്നവയുടെ  വിലയ്ക്ക് തുലനം ചെയ്യാൻ കൂടുതൽ ഉത്പന്നങ്ങളും സേവനങ്ങളും കയറ്റി അയക്കണം. ഇല്ലെങ്കിൽ കറന്റ് അക്കൗണ്ട് കമ്മി കൂടും. കറന്റ് അക്കൗണ്ട് കമ്മി കൂടിയാൽ ഡോളറിന്റെ ഡിമാൻഡ് കൂടുകയും  രൂപയുടെ വില വീണ്ടും ഇടിയുകയും ചെയ്യും. ഈ  പ്രക്രിയ പതിറ്റാണ്ടുകളായി തുടരുന്നതാണ്. ഇനിയും തുടരും. ഇന്ത്യയുടെ സമ്പദ് വ്യവസ്‌ഥക്ക് രക്ഷപ്പെടാൻ കഴിയാത്ത ആഘാതം ഉണ്ടാക്കും.   

എല്ലാ രാജ്യങ്ങളും ഉൽപന്നങ്ങൾ മറ്റു രാജ്യങ്ങളിലേക്ക് കയറ്റി അയക്കുന്നുണ്ട്. തങ്ങൾക്കാവശ്യമായവ ഇറക്കുമതി ചെയ്യുന്നു. കയറ്റി അയക്കുന്നവയ്‌ക്ക് അവയുടെ വില കിട്ടും. ഇറക്കുമതി ചെയ്യുന്നവയ്‌ക്ക് അവയുടെ വില കൊടുക്കണം. പക്ഷേ രാജ്യന്തര തലത്തിലെ ഈ ക്രയവിക്രയങ്ങൾക്ക് ചില രാജ്യങ്ങളിലെ നാണയങ്ങൾ മാത്രമാണ് ഉപയോഗിക്കുന്നത്. സ്വതന്ത്രമായി പരിവർത്തനം ചെയ്യാവുന്ന നാണയങ്ങൾ (Freely Convertible Currencies) എന്നാണിവ  അറിയപ്പെടുന്നത്. ഇവ ഏതെല്ലാമെന്ന്,  രാജ്യങ്ങളും സെൻട്രൽ ബാങ്കുകളും ആയി ചർച്ച നടത്തി തീരുമാനിക്കുന്നത് ഇന്റർനാഷണൽ മോണിട്ടറി ഫണ്ട് (IMF) ആണ്. നിലവിൽ 18 രാജ്യങ്ങളിലെ കറൻസികളാണ് ഇതിൽ ഉൾപ്പെട്ടിട്ടുള്ളത്. 

പക്ഷേ യുഎസ് ഡോളർ ആണ് ലോകരാജ്യങ്ങൾ തമ്മിലുള്ള കൈമാറ്റത്തിന് ഏറ്റവും കൂടുതൽ  ഉപയോഗിക്കുന്നത്. രണ്ടാം സ്ഥാനത്ത് യൂറോയും  മൂന്നും, നാലും സ്ഥാനത്ത് യഥാക്രമം ജപ്പാന്റെ  യെന്നും ബ്രിട്ടിഷ് പൗണ്ടും ആണ്. ഇന്ത്യയും കയറ്റുമതിക്കും ഇറക്കുമതിക്കും പ്രധാനമായും യുഎസ് ഡോളർ ആണ് (81%) ഉപയോഗിക്കുന്നത്. ഇറക്കുമതി ചെയ്യുന്ന ഉൽപന്നങ്ങൾക്ക് എത്ര രൂപാ കൊടുക്കണം, കയറ്റുമതിചെയ്യുന്നവയ്ക്ക് എത്ര രൂപ ലഭിക്കും എന്നു നിശ്ചയിക്കുന്നത് അതാതു   ഉല്പന്നങ്ങളുടെ വില, രാജ്യവും, ക്രയവിക്രയത്തിന് ഉപയോഗിക്കുന്ന നാണയവും തമ്മിലുള്ള കമ്പോള വിനിമയ നിരക്ക് എന്നിവ അടിസ്ഥാനമാക്കിയാണ്. കറൻസിയുടെ കമ്പോള വിനിമയ നിരക്ക് കിട്ടുന്നതും കൊടുക്കേണ്ടതുമായ തുകകളിൽ നിർണായകമാകുന്നു എന്നർഥം.  രൂപയുടെ കമ്പോള വിനിമയ നിരക്കിന്റെ  ഗരിമ പരിശോധിക്കാൻ ആണ് ഇവിടെ ശ്രമിക്കുന്നത്.  

പണത്തിന്റെ മൂല്യം എന്നാൽ സാധനങ്ങളൂം സേവനങ്ങളും വാങ്ങാനുള്ള ശേഷിയാണ്.  അതുകൊണ്ട് വിവിധ കറൻസികളുടെ വാങ്ങൽ ശേഷിയുടെ സമത്വം (Purchasing Power Parity – PPP) ആയിരിക്കണം വിനിമയ നിരക്കുകൾക്ക് അടിസ്ഥാനം. വാങ്ങൽ ശേഷിയുടെ അടിസ്ഥാനത്തിൽ ഓരോ നാണയത്തേയും താരതമ്യം ചെയ്യലാണ് പിപിപി കൊണ്ട് ഉദ്ദേശിക്കുന്നത്. വാങ്ങൽ ശേഷിയുടെ അടിസ്ഥാനത്തിൽ വിനിമയ നിരക്കുകൾ നിർണയിക്കണമെന്ന പിപിപി സിദ്ധാന്തം  ദീർഘകാലമായി നിലവിലുണ്ട്. 

∙ നാണയങ്ങൾ ‘ശരിയായ നിലയിലോ’

യൂറോപ്പിൽ നിന്നും പ്രസിദ്ധീകരിക്കുന്ന ദ് ഇക്കണോമിസ്റ്റ് പത്രം (The Economist - വീക്കിലി പ്രസിദ്ധീകരണം) 1986 മുതൽ പ്രസിദ്ധീകരിക്കുന്ന ഒരു ഇൻഡെക്സ് അഥവാ സൂചികയാണ് ബിഗ് മാക് ഇൻഡക്സ്. നാണയങ്ങൾ അവയുടെ ശരിയായ നിലയിലാണോ എന്ന് പരിശോധിക്കാനുള്ള എളിയ വഴികാട്ടിയാണ് വാങ്ങൽ ശേഷിയുടെ സമത്വം  അടിസ്ഥാനമാക്കുന്ന ബിഗ് മാക് ഇൻഡെക്സ്. ഒരു കുട്ടയിലുള്ള സമാനമായ സാധനങ്ങളുടെയും സേവനങ്ങളുടെയും വില തുല്യമാക്കുന്ന രീതിയിൽ രണ്ട് രാജ്യങ്ങളുടെ നാണയങ്ങളുടെ വിനിമയ നിരക്ക് തുല്യമാകുമെന്നതാണ് ഇവിടെ സ്വീകരിക്കുന്ന  ആശയം. 

ലോകത്തെല്ലായിടത്തും മാക്ഡൊണാൾഡ്സിന്റെ ഔട്ട്ലെറ്റുകളിൽ വിൽക്കുന്ന ബിഗ് മാക് എന്ന ഒരു ബർഗറിന്റെ വിലയാണ് ഈ സൂചികയ്ക്ക് അടിസ്ഥാനം. ഈ ബർഗറിന്റെ അളവും ഘടകങ്ങളും  ഗുണവും വിൽക്കുന്ന പരിസരവും എല്ലാ ഔട്ട്ലെറ്റുകളിലും ഒന്നാണെന്നാണ് കരുതുന്നത്. 2022 ജൂലൈ 21ന് അമേരിക്കയിൽ ഒരു ബിഗ് മാക് ബർഗറിന്റെ വില 5.15 ഡോളറാണ്. ഇന്ത്യയിൽ 191 രൂപയും. അതായത് ഈ ബർഗറിന്റെ വിലയുടെ അടിസ്ഥാനത്തിൽ 5.15 അമേരിക്കൻ ഡോളർ സമം 191 ഇന്ത്യൻ രൂപ.ഒരു ഡോളർ സമം 37.09 രൂപ (191/5.15). 2022 ജൂലൈ 21ന് ഒരു ഡോളറിന്റെ വിനിമയനിരക്ക് 79.95 രൂപയാണ്. ഈ അടിസ്ഥാനത്തിൽ രൂപയുടെ വിനിമയ മൂല്യം 53.60 % കുറവാണെന്നു കാണാം. (79.95-37.09)/79.95). 

ഇന്ത്യയിലും അമേരിക്കയിലും ഒാരോ ബിഗ് മാക് ബർഗർ ഉല്പാദിപ്പിച്ചു എന്ന് കരുതുക.  വിനിമയനിരക്കുവച്ച്  ഇന്ത്യയിലെ ബർഗറിനു  2.39 ഡോളറും അമേരിക്കയിലേതിന്  5.15 ഡോളറും ആണ് വിലയെന്നു (ബിഗ് മാക് ഇൻഡക്സിന്റെ അടിസ്ഥാനത്തിൽ) കരുതേണ്ടി വരും. പിപിപി അടിസ്ഥാനമാക്കുമ്പോൾ ഒരേ ഉൽപന്നത്തിന് രണ്ട് അളവുകോൽ അശാസ്ത്രീയമാണ്.  നാണയങ്ങൾ ശരിയായ നിലയിൽ ആണോ എന്ന് പരിശോധിക്കാനുള്ള ചെറിയ ശ്രമമാണ് ബിഗ് മാക് ഇൻഡക്സ് വഴി ദ് ഇക്കണോമിസ്റ്റ് പത്രം നടത്തുന്നത്. പക്ഷേ ഇവിടെ ചില പോരായ്മകളുണ്ട്. ഒരു ഉൽപന്നത്തിന്റെ വില മാത്രമാണ് വിനിമയ നിരക്കിന്റെ താരതമ്യത്തിന് ഉപയോഗിക്കുന്നത്. അതിനാൽ ഈ താരതമ്യം പൂർണമല്ല.

∙ കൂടുതൽ പഠനങ്ങൾ

ഇവിടെ ലോകബാങ്ക് ആഗോളതലത്തിലുള്ള മറ്റൊരു  പഠനം കൂടുതൽ പ്രസക്തമാണ്.  ലോകബാങ്ക്, യുണൈറ്റഡ് നേഷൻസ് സ്റ്റാറ്റിസ്റ്റിക്കൽ കമ്മിഷന്റെ  മാർഗനിർദ്ദേശത്തോടെ നടത്തുന്ന  ഇന്റർനാഷണൽ കംപാരിസൻ പ്രോഗ്രാം (ICP) എന്ന പഠനമാണിത്. വിവിധ നാണയങ്ങളുടെ വാങ്ങൽ ശേഷിയിലുള്ള സമത്വം (PPPs) നിർണയിക്കുകയും താരതമ്യം ചെയ്യാവുന്ന വിലനിലവാര സൂചികകൾക്കു രൂപം കൊടുക്കുകയുമാണ് ഐസിപിയുടെ ലക്ഷ്യങ്ങളിൽ ഒന്ന്.

ഓരോ രാജ്യത്തിന്റെയും ആകെ ഉൽപന്നങ്ങളും (ജിഡിപി), ആളോഹരി ജിഡിപിയും മറ്റും, പിപിപി (വാങ്ങൽ ശേഷിയുടെ സമത്വം) ഉപയോഗിച്ച് ഒരു പൊതു നാണയത്തിലേക്ക് മാറ്റുകയാണ് (Convert)  രണ്ടാമത്തെ ലക്ഷ്യം. 2017ലെ ഐസിപി റിപ്പോർട്ടാണ് ഇപ്പോൾ ലഭ്യമായതിൽ ഏറ്റവും ഒടുവിലത്തേത്. ഇതിൽ പിപിപി അടിസ്ഥാനമാക്കി ഡോളറുമായുള്ള രൂപയുടെ വിനിമയ നിരക്ക് മൂന്നു തരത്തിൽ വിലയിരുത്തിയിട്ടുണ്ട്.