കുഞ്ഞിന് കൈനിറയെ സമ്മാനവുമായി ‘സഞ്ജു അങ്കിളും ചാരു ആന്റിയും’; ചിത്രം പങ്കുവച്ച് ബേസിൽ

കോട്ടയം ∙ നടനും സംവിധായകനുമായ പ്രിയ സുഹൃത്ത് ബേസിൽ ജോസഫിന്റെ കുഞ്ഞു മകൾക്ക് കൈനിറയെ സമ്മാനങ്ങളുമായി ക്രിക്കറ്റ് താരം സഞ്ജു സാംസണും ഭാര്യ ചാരുലതയും. ഇരുവരും ഒട്ടേറെ സമ്മാനങ്ങളുമായി കുഞ്ഞിനെ കാണാനെത്തിയ വിവരം ബേസിൽ തന്നെയാണ് സമൂഹമാധ്യമങ്ങളിലൂടെ പങ്കുവച്ചത്. സഞ്ജു, ചാരുലത എന്നിവർക്കൊപ്പം എലിസബത്തിനും മകൾ ഹോപ്പിനും മറ്റു കുടുംബാംഗങ്ങൾക്കുമൊപ്പം പകർത്തിയ സെൽഫി സഹിതമാണ് ഇവരുടെ സന്ദർശന വാർത്ത ബേസിൽ പങ്കുവച്ചത്.

‘‘ലോഡു കണക്കിന് സമ്മാനങ്ങളുമായി സഞ്ജു അങ്കിളും ചാരു ആന്റിയും വീട്ടിലെത്തി’ – ഇരുവരെയും ടാഗ് ചെയ്ത് ബേസിൽ കുറിച്ചു. കുഞ്ഞിന്റെ പിറവിയിൽ സന്തോഷമറിയിച്ച് ‘സഞ്‌ച’ എന്ന പേരിൽ ഇരുവരും മുൻപ് അയച്ച കാർഡും സെൽഫിക്കൊപ്പം ബേസിൽ പങ്കുവച്ചിട്ടുണ്ട്.

മകൾ പിറന്ന കാര്യം കഴിഞ്ഞ ദിവസമാണ് ബേസിൽ സമൂഹമാധ്യമങ്ങളിലൂടെ എല്ലാവരെയും അറിയിച്ചത്. കുഞ്ഞിനും എലിസബത്തിനുമൊപ്പമുള്ള ചിത്രം പങ്കുവച്ചായിരുന്നു ഇത്. 2017ലായിരുന്നു ബേസിലിന്റെയും എലിസബത്തിന്റെയും വിവാഹം. കോട്ടയം തോട്ടയ്ക്കാട് സാം സി. ജോണിന്റെയും സാറാമ്മയുടെയും മകളാണ് എലിസബത്ത്. ഫാ. ജോസഫ് പള്ളിപ്പാട്ടിന്റെയും റിട്ട. അധ്യാപിക തങ്കമ്മയുടെയും രണ്ട് മക്കളില്‍ ഇളയവനാണ് ബേസില്‍.

English Summary: Sanju Samson And Charulatha Visits Basil Joseph's Daughter