വനിതാ താരങ്ങളുടെ ശാക്തീകരണം: കൈകോർത്ത് കൊക്ക-കോളയും അഞ്ജു ബോബി സ്‌പോര്‍ട്‌സ് ഫൗണ്ടേഷനും

കൊച്ചി ∙ വനിതാ കായിക താരങ്ങളുടെ ശാക്തീകരണം ലക്ഷ്യമിട്ട് അഞ്ജു ബോബി സ്‌പോർട്‌സ് ഫൗണ്ടേഷനും കൊക്ക-കോള ഇന്ത്യയും 3 വർഷത്തെ പങ്കാളിത്തം പ്രഖ്യാപിച്ചു. ലോകോത്തര പരിശീലന സൗകര്യങ്ങൾ, ഉയർന്ന നിലവാരമുള്ള ട്രാക്ക് ആൻഡ് ഫീൽഡ് ഉപകരണങ്ങൾ, ജിം ഉപകരണങ്ങൾ എന്നിവ നൽകി കൊക്ക-കോള അഞ്ജു ബോബി സ്‌പോർട്‌സ് ഫൗണ്ടേഷനെ പിന്തുണയ്ക്കും.

ഒളിംപിക് താരം അഞ്ജു ബോബി ജോർജ്ജിന്റെ നേതൃത്വത്തിലുള്ള ഈ ഫൗണ്ടേഷൻ അടുത്ത തലമുറയിലെ വനിതാ കായിക താരങ്ങളെ വളർത്തിയെടുക്കുക എന്ന ലക്ഷ്യത്തോടെയാണ്  പ്രവർത്തിക്കുന്നത്. ജൂനിയർ നാഷണൽ ലോങ് ജംപ് ചാമ്പ്യൻ ഷൈലി സിങ്ങും ഫൗണ്ടേഷന്റെ ഭാഗമാണ്. കൊക്ക-കോള ഇന്ത്യയുടെ #ഷീദിഡിഫറൻസ് എന്ന കാംപയിനുമായി സഹകരിച്ചാണ് പദ്ധതി നടപ്പാക്കുന്നത്.

4 ഷിപ്പിങ് കണ്ടെയ്‌നറുകളെ ഫിസിയോതെറ‌പ്പി മുറിയും സ്‌റ്റോറേജ് സൗകര്യവും പാന്‍ട്രിയും റസ്റ്റ് റൂമുമാക്കി മാറ്റി. ഇതിനുപുറമെ, അത്യാധുനിക ജിം ഉപകരണങ്ങള്‍ ലഭ്യമാക്കുകയും മഴവെള്ള സംഭരണിയോടു കൂടിയ വിശാലമായ പരിശീലന ഗ്രൗണ്ട് രുപപ്പെടുത്തി എടുക്കുകയും ചെയ്തിട്ടുണ്ട്. അടിസ്ഥാന സൗകര്യ വികസനത്തിനു പുറമെ, അക്കാദമിയുടെ 3 വർഷത്തെ പാട്ടവാടകയും കൊക്ക-കോള ഏറ്റെടുത്തു.