‘നമ്മൾ കപ്പടിക്കും’

2022ൽ ബാങ്കോക്കിൽ നടന്ന തോമസ് കപ്പിൽ ഇന്ത്യയുടെ കിരീട വിജയത്തിൽ നിർണായകമായത് മൂന്നാം സിംഗിൾസിലെ എച്ച്.എസ്.പ്രണോയിയുടെ അട്ടിമറി വിജയങ്ങളായിരുന്നു. 2 വർഷത്തിനുശേഷം കിരീടം നിലനിർത്താനിറങ്ങുന്ന ടീമിലെ സൂപ്പർ താരവും മുപ്പത്തൊന്നുകാരൻ പ്രണോയിയാണ്. തോമസ് കപ്പിലെ പ്രതീക്ഷകളെക്കുറിച്ച് പ്രണോയ് സംസാരിക്കുന്നു

∙ പോരാട്ടം കടുപ്പം

ഇത്തവണ തുടക്കം മുതൽ നമുക്ക് കടുത്ത മത്സരങ്ങളാണ്. കഴിഞ്ഞവർഷത്തെ ഫൈനലിസ്റ്റുകളായ ഇന്തൊനീഷ്യയ്ക്കൊപ്പം കരുത്തരായ തായ്‌ലൻ‌ഡും ഇംഗ്ലണ്ടുമാണ് നമ്മുടെ ഗ്രൂപ്പിൽ. ലോകത്തെ മുൻനിര താരങ്ങളിൽ പലരും ഈ ടീമുകളിലാണ്. പക്ഷേ കഴിഞ്ഞ തവണയും ഇത്തരം വമ്പൻ ടീമുകളെ അട്ടിമറിച്ചായിരുന്നു നമ്മുടെ മുന്നേറ്റം. ഇത്തവണയും അത് ആവർത്തിച്ച് കിരീട‌മുയർത്താനാകുമെന്നാണ് പ്രതീക്ഷ.

‌∙ ടീം ഫോർമേഷൻ

കഴിഞ്ഞ 3 വർഷമായി ഒരുമിച്ച് പരിശീലിക്കുകയും കളിക്കുകയും ചെയ്യുന്നവരാണ് ഇന്ത്യൻ ടീമംഗങ്ങൾ. പരിചയ സമ്പത്തും ടീമംഗങ്ങൾ തമ്മിലുള്ള ഒത്തിണക്കവുമാണ് നമ്മുടെ പ്രധാന കരുത്ത്. 2022ന് അപേക്ഷിച്ച് ടീം ലൈനപ്പിൽ മാത്രമാണ് മാറ്റങ്ങളുള്ളത്. അന്ന് ഞാൻ മൂന്നാം സിംഗിൾസാണ് കളിച്ചിരുന്നതെങ്കിൽ ഇത്തവണ ആദ്യ മത്സരത്തിനിറങ്ങും.

∙ പരുക്കിന്റെ ഭീഷണി

‌100 ശതമാനം ഫിറ്റ്നസോടെയല്ല ഈ ചാംപ്യൻഷിപ്പിന് ഇറങ്ങുന്നത്. കഴിഞ്ഞ 4 മാസമായി ആരോഗ്യ പ്രശ്നങ്ങൾ വെല്ലുവിളിയാകുന്നുണ്ട്. ശ്വാസനാളത്തിലെ രോഗാവസ്ഥ പരിശീലനത്തെ ബാധിച്ചു. എങ്കിലും മത്സരക്കളത്തിലേക്ക് എത്തുമ്പോൾ ഇതെല്ലാം മറികടന്ന് മികച്ച പ്രകടനം കാഴ്ചവയ്ക്കാനാകുമെന്നാണ് പ്രതീക്ഷ. ഏഷ്യൻ ഗെയിംസിലേത് അടക്കം പരുക്കിനെ അതിജീവിച്ച് നേടി വിജയങ്ങളാണ് ആത്മവിശ്വാസമുയർത്തുന്നത്.