മഞ്ഞുകാലം തളര്‍ത്തില്ല; മുടിയിഴകള്‍ക്ക് കരുത്തേകി കൊഴിച്ചിലും പൊട്ടലും തടയാം

മഞ്ഞുകാലത്ത് മുടികൊഴിച്ചിലും ശിരോചര്‍മ പ്രശ്നങ്ങളും കൂടുന്നവർ നിരവധിയാണ്. മുടിയുടെയും ശിരോചർമത്തിന്റെയും വരൾച്ചയാണ് ഇതിനു കാരണം. അഗ്രം പിളരുക, മുടി പൊട്ടുക, താരൻ എന്നിങ്ങനെ ആ പ്രശ്നങ്ങളുടെ നിരനീളും. പരിചരണത്തിന് കൂടുതൽ പ്രാധാന്യം നൽകിയാൽ മാത്രമമേ ഈ പ്രതിസന്ധി പരിഹരിക്കാനാകൂ. ഇതിനായി ചെയ്യേണ്ട കാര്യങ്ങൾ ഇതാ.

∙ മോയിസ്ച്വറൈസിങ്

മോയിസ്ച്വറൈസിങ് ഗുണങ്ങളുള്ള ഷാംപൂ, കണ്ടിഷണർ എന്നിവ ഉപയോഗിക്കുക എന്നതാണ് ചെയ്യാനാകുന്ന ഏറ്റവും എളുപ്പമുള്ള കാര്യം. തലയിൽ ഉപയോഗിക്കുന്ന എല്ലാ വസ്തുക്കളുടെ കാര്യത്തിലും ഇത് ബാധകമാണ്. മഞ്ഞുകാലത്തിന് അനുയോജ്യമായ സ്പെഷൽ ഉത്പന്നങ്ങൾ തിരഞ്ഞെടുക്കാൻ ശ്രദ്ധിക്കാം.

∙ കുളി കുറയ്ക്കാം

മഞ്ഞുകാലത്ത് ശിരോചർമം വിയർക്കാനുള്ള സാധ്യത കുറവാണ്. അതുകൊണ്ട് തന്നെ തലകുളി വല്ലപ്പോഴും മാത്രം മതി. കാരണം കുളിക്കുമ്പോൾ ശിരോചർമത്തിലെ നാച്വറൽ ഓയിൽ നഷ്ടമാകുന്നു. ഇത് വരൾച്ച കൂടാനും താരൻ ഉണ്ടാകാനുമുള്ള സാഹചര്യം ഒരുക്കുന്നു.

∙ ഹെയർ മാസ്ക്

എല്ലാ ആഴ്ചയും ഡീപ് കണ്ടീഷനിങ് ഹെയർ മാസ്ക് ചെയ്യാം. അർഗൻ ഓയിൽ പോലുള്ളവ ഉൾപ്പെടുന്ന മാസ്ക്കുകൾ തിരഞ്ഞെടുക്കുന്നതാണ് മുടിക്ക് കൂടുതൽ നല്ലത്.

∙ എണ്ണ തേയ്ക്കാം 

മഞ്ഞുകാലത്ത് തലയിൽ എണ്ണ തേച്ച് മസാജ് ചെയ്യുന്നതിന്റെ എണ്ണം കൂട്ടാം. മുടിക്കും ശിരോചർമത്തിനും മോയിസ്ച്വറൈസേഷൻ നൽകാൻ ഇത് സഹായകരമാണ്. ശിരോചർമത്തിന്റെ ഉത്തേജനത്തിനും രക്തയോട്ടം വർധിക്കാനും ഇത് സഹായിക്കുന്നു. ഇതും വരൾച്ചയെ പ്രതിരോധിക്കും. 

∙ ഉപകരണങ്ങൾ സൂക്ഷിച്ച്

മുടി ചൂടാക്കുന്ന ഉപകരണങ്ങളുടെ ഉപയോഗം പരമാവധി കുറയ്ക്കാം. ഇവയുടെ ഉപയോഗം കൂടിയാൽ മുടി കൂടുതൽ വരളാനും പെട്ടെന്ന് പൊട്ടിപ്പോകാനും സാധ്യതയുണ്ട്. അത്യാവശ്യ സാഹചര്യങ്ങളിൽ മിതമായ ചൂടിൽ ഉപകരണങ്ങൾ പ്രവർത്തിപ്പിക്കുന്നതാണ് നല്ലത്.

English Summary : how to repair your hair during wintertime