റെഡ്മി 13സി വിപണിയിലേക്കെത്തുന്നു; ഓഫറുകൾ അറിയാം

ബജറ്റ് സ്മാർട്ട്‌ഫോൺ സെഗ്‌മെന്റിൽ ഉയർന്ന പ്രകടനമുള്ള മീഡിയടെക് ഹീലിയോ ജി85 ചിപ്‌സെറ്റുമായി പുതിയ റെഡ്മി 13സി എന്ന 4G സ്മാർട്ട്‌ഫോൺ വിപണിയിലേക്കെത്തുന്നു. 10,000 രൂപയിൽ താഴെയുള്ള ബജറ്റ് സ്മാർട്ട്‌ഫോണുകളുമായി മത്സരിക്കാനാണ് പോകോ ബ്രാൻഡിങിലെ രാജ്യാന്തര ലോഞ്ചിങിനുശേഷം ഇന്ത്യൻ വിപണിയിലവതരിച്ചിരിക്കുന്നത്. 

റെഡ്​മി 13C-ന് 600 x 720 പിക്സൽ റെസല്യൂഷനോട് കൂടിയ 6.74 ഇഞ്ച് എച്ച്‍ഡി പ്ലസ് ഡിസ്‌പ്ലേയും 90Hzറിഫ്രഷ് റേറ്റും 450 നിറ്റ്സ് പീക്ക് തെളിച്ചവും ഉണ്ട്. MP2 GPU-G57-മായി ജോടിയാക്കിയ ഒക്ടാ-കോർ മീഡിയടെക് ഹീലിയോ G85 ചിപ്‌സെറ്റാണ് സ്മാർട്ട്‌ഫോണിന് കരുത്ത് പകരുന്നത്. സ്മാർട്ട്‌ഫോണിന് 8 ജിബി വരെ റാമും 8 ജിബി വെർച്വൽ റാമും 256 ജിബി വരെ യുഎഫ്എസ് 2.2 സ്റ്റോറേജും ഉണ്ട്, ഇത് മൈക്രോ എസ്ഡി കാർഡ് സ്ലോട്ട് വഴി 1 ടിബി വരെ വികസിപ്പിക്കാം

50 എംപി പ്രൈമറി സെൻസർ, 2 എംപി മാക്രോ ലെൻസ്, മറ്റൊരു 2 എംപി ലെൻസ് എന്നിവയുള്ള ട്രിപ്പിൾ ക്യാമറ സജ്ജീകരണത്തോടെയാണ് റെഡ്മി 13 സി വരുന്നത്. ഉപയോക്താക്കളുടെ സെൽഫി, വിഡിയോ കോളിങ് ആവശ്യങ്ങൾ നിറവേറ്റുന്നതിനായി 5 എംപി ഫ്രണ്ട് ഫേസിംഗ് ക്യാമറയും ഈ സ്മാർട്ട്‌ഫോണിൽ ഉണ്ട്.

18W ചാർജർ വഴി വേഗത്തിൽ ചാർജ് ചെയ്യാൻ കഴിയുന്ന 5,000 എംഎഎച്ച് ബാറ്ററിയാണ് ബജറ്റ് സ്മാർട്ട്‌ഫോണിൽ വരുന്നത്. പക്ഷേ 10W പവർ അഡാപ്റ്ററാണ് ബോക്സിൽ ഉൾപ്പെടുത്തിയിരിക്കുന്നത്. 

Redmi 13C: എപ്പോൾ, എവിടെ നിന്ന് വാങ്ങണം? 

ഇന്ത്യൻ വിപണിയിൽ ഡിസംബർ 12ന്  12 മണിക്ക് വിൽപ്പനയ്‌ക്കെത്തും, എംഐ.കോം, ഷഓമി റിടെയ്​ൽ, ആമസോൺ എന്നിവ വഴി വാങ്ങാം. Redmi 13C യുടെ 4GB റാം/128GB സ്റ്റോറേജ് വേരിയന്റിന് 7,999 രൂപയും 6GB RAM/128GB സ്റ്റോറേജ് വേരിയന്റിന് 8,999 രൂപയും 8GB RAM/256GB സ്റ്റോറേജ് വേരിയന്റിന് 10,499 രൂപയുമാണ് വില. കൂടാതെ, ഉപയോക്താക്കൾക്ക് ഐസിഐസിഐ, എച്ച്ഡിഎഫ്​സി, എസ്ബിഐ ബാങ്ക് ക്രെഡിറ്റ് കാർഡ് അല്ലെങ്കിൽ ഇഎംഐ ഇടപാടുകൾ ഉപയോഗിച്ച് 1,000രൂപ വരെ കിഴിവ് ലഭിക്കും .