ക്രിസ്മസിന് ആകാശത്തൊരു അദ്ഭുത ‘താരം’; എന്തിനാണ് ആർഎൻ35 നമ്മെ തേടി വന്നത്?

∙ എന്താണു ഛിന്നഗ്രഹം?

നാസയുടെ വെബ്സൈറ്റിലെ കണക്കുകൾ പ്രകാരം നിലവിൽ 1,113,527 ഛിന്നഗ്രഹങ്ങളെ കണ്ടെത്തിയിട്ടുണ്ട്. ഈ സംഖ്യ ദിനംപ്രതി കൂടിക്കൊണ്ടിരിക്കുകയുമാണ്. സൗരയൂഥത്തിൽ, ചൊവ്വയുടെയും വ്യാഴത്തിന്റെയും ഭ്രമണപഥങ്ങൾക്കിടയിൽ സൂര്യനെ ചുറ്റുന്ന ചെറിയ ആകാശവസ്തുക്കളാണ് ഛിന്നഗ്രഹങ്ങൾ. ഏകദേശം 460 കോടി വർഷങ്ങൾക്ക് മുൻപ് സൗരയൂഥം രൂപപ്പെട്ടപ്പോൾ അവശേഷിച്ച പാറക്കഷ്ണങ്ങളാണ് ഇവ. അൽപഗ്രഹങ്ങൾ എന്നും ക്ഷുദ്രഗ്രഹങ്ങൾ എന്നും ഇവയ്ക്ക് വിളിപ്പേരുണ്ട്. 

ചൊവ്വയ്ക്കും വ്യാഴത്തിനും ഇടയിലായി ഒരു ഗ്രഹം ഉണ്ടാകാനുള്ള സാധ്യത 1800കളുടെ തുടക്കത്തിൽത്തന്നെ ശാസ്ത്രലോകം മുന്നോട്ടുവച്ചിരുന്നു. 1801ൽ ഇറ്റാലിയൻ ജ്യോതിശാസ്ത്രജ്ഞനായ ഗിയുസെപ്പെ പിയാസി ഗ്രഹങ്ങളേക്കാൾ ചെറിയ ഒരു ആകാശഗോളത്തെ കണ്ടെത്തി. സിറസ് എന്ന ഛിന്നഗ്രഹമായിരുന്നു അത്. ഇത്തരം ആകാശവസ്തുക്കളെ ആസ്റ്ററോയ്ഡ് എന്നു വിളിച്ചത് ജ്യോതിശാസ്ത്രജ്ഞനായ വില്യം ഹെർഷൽ ആണ്. നക്ഷത്രത്തെപ്പോലെയുള്ളത് എന്നാണ് ഗ്രീക്ക് ഭാഷയിൽ ഈ വാക്കിന്റെ അർഥം. ലക്ഷക്കണക്കിന് ഛിന്നഗ്രഹങ്ങളാണ് പിന്നീടങ്ങോട്ട് കണ്ടുപിടിക്കപ്പെട്ടത്. ചെറുഗ്രഹങ്ങൾ എന്ന് ഇവ പിന്നീട് അറിയപ്പെട്ടു. സൗരയൂഥം രൂപപ്പെട്ട സമയത്ത് ഗ്രഹമാകാൻ കഴിയാതെപോയ വസ്തുക്കളാണ് ഇവയെന്നാണ് കരുതുന്നത്. ഇവയുള്ള മേഖലയെ ഛിന്നഗ്രഹ മേഖല അഥവാ ആസ്റ്ററോയ്ഡ് ബെൽറ്റ് എന്നു വിളിക്കുന്നു. 

ഒരു മീറ്റർ മുതൽ ഏതാനും കിലോമീറ്ററുകൾ വരെ വലുപ്പമുള്ള ‍ഛിന്നഗ്രഹങ്ങളുണ്ട്. ഭൂമിയിൽ വൻകരകളുണ്ടായതു ഛിന്നഗ്രഹങ്ങൾ ഇടിച്ചതുമൂലമാണെന്ന് പഠനങ്ങളുണ്ട്. ഇടി മൂലം ഭൂമിയിലെ താപനില ഉയരുകയും പാറകൾ ദ്രാവകരൂപത്തിലാകുകയും പിന്നീടു തണുത്തുറഞ്ഞു ഖരരൂപത്തിലുള്ള വൻകരകളായി മാറുകയുമായിരുന്നുവെന്നു ദക്ഷിണാഫ്രിക്കയിലെ വിറ്റ്‌വാട്ടർസ്റ്റാൻഡ് സർവകലാശാല നടത്തിയ ഒരു പഠനത്തിൽ പറയുന്നു. ഒരു ഛിന്നഗ്രഹം എപ്പോഴാണ് ഭൂമിക്ക് അടുത്തെത്തി എന്നു വിലയിരുത്തുക? അഥവാ എപ്പോഴാണ് അവയെ ‘നിയർ ഏർത്ത് ഒബ്ജക്ട് (എൻഇഒ) ആയി കണക്കാക്കുക? ഭൂമിയും സൂര്യനും തമ്മിലുള്ള ദൂരം വച്ചാണ് അതിനെ ഗവേഷകർ അളക്കുന്നത്. ഭൂമിയും സൂര്യനും തമ്മിൽ ഏകദേശം 15 കോടി കിലോമീറ്റർ ദൂരമുണ്ട്. ഇതിന്റെ 1.3 മടങ്ങ് ദൂരത്തേക്കാൾ കുറഞ്ഞ ദൂരത്തിൽ ഒരു വസ്തു ഭൂമിക്കടുത്തെത്തിയാൽ അതിനെ എൻഇഒ ആയി കണക്കാക്കാം. ഭൂമിക്ക് 6.86 ലക്ഷം കിലോമീറ്റർ അടുത്തുവരെ എത്തിയ ക്രിസ്മസ് ആസ്റ്ററോയ്ഡ് സ്വാഭാവികമായും എൻഇഒ ആയി മാറുകയും ചെയ്തു.

∙ ഛിന്നഗ്രഹദിനം

2016 മുതൽ, ഐക്യരാഷ്ട്ര സംഘടന പൊതുസഭയുടെ നിർദേശപ്രകാരം ജൂൺ 30 രാജ്യാന്തര ഛിന്നഗ്രഹ ദിനമായി ആചരിക്കുന്നു. 1908ൽ സൈബീരിയിലെ തുൻഗസ്കയിൽ ഛിന്നഗ്രഹം വീണതിന്റെ വാർഷികമാണിത്. മധ്യ സൈബീരിയയിലെ തുൻഗസ്ക വനപ്രദേശത്ത് ഛിന്നഗ്രഹം പൊട്ടിത്തെറിച്ചത് ഭൂമിയിൽ ഇതുവരെ നടന്ന വലിയ സ്ഫോടനങ്ങളിൽ ഒന്നാണ്. ജനവാസ മേഖലയയിൽ അല്ലാത്തതിനാൽ അന്ന് ഒഴിവായപ്പോയത് വൻ ദുരന്തമായിരുന്നു. ഛിന്നഗ്രഹ ആഘാതങ്ങളുണ്ടാക്കുന്ന അപകടങ്ങളെക്കുറിച്ച് അവബോധം വളർത്താനും ഛിന്നഗ്രഹ  ഭീഷണികളുണ്ടായാൽ ആഗോളതലത്തിൽ പ്രതിസന്ധികൾക്ക് പരിഹാരം കണ്ടെത്തനുമാണ് എല്ലാ വർഷവും ജൂൺ 30 ഛിന്നഗ്രഹ ദിനമായി ആചരിക്കുന്നത്. ഛിന്നഗ്രഹങ്ങളുടെയും ഉൽക്കകളുടെയുമൊക്കെ ആഗമനം ലോകാവസാനത്തിന്റെയും മറ്റ് ആപത്തുകളുടെയുമൊക്കെ മുന്നോടിയാണെന്ന്  പണ്ടു ജനം ഭയന്നിരുന്നു. ഇന്നും ഇവയുമായി ബന്ധപ്പെട്ട അന്ധവിശ്വാസങ്ങൾ പൂർണമായും തുടച്ചുനീക്കപ്പെട്ടിട്ടില്ല. ഇത്തരം വിശ്വാസങ്ങളെ തിരുത്തി ശാസ്ത്രസത്യത്തിന്റെ വെളിച്ചം തെളിക്കുകയെന്ന ലക്ഷ്യവും ഛിന്നഗ്രഹദിനത്തിനുണ്ട്.

∙ അപകടക്കഥകൾ

തുൻഗസ്കയിൽ പുലർച്ചെ ആകാശത്ത് ആയിരം സൂര്യന്മാർ ഒന്നിച്ചുദിച്ചതു പോലെയൊരു വെളിച്ചം കണ്ടുവെന്നും ഏതാനും നിമിഷങ്ങൾക്കകം വലിയ ശബ്ദത്തോടെ പൊട്ടിത്തെറി കേട്ടു എന്നുമാണ് ദൃക്സാക്ഷി വിവരണങ്ങൾ. അന്ന് ലക്ഷക്കണക്കിന് മരങ്ങൾ കത്തിനശിച്ചു, ഏകദേശം 200 ചതുരശ്രകിലോമീറ്റർ വനമാണ് പുല്ലുപോലും അവശേഷിക്കാത്ത വിധം കരിഞ്ഞുണങ്ങിയത്. വനമേഖലയായതിനാൽ കാര്യമായ ആളപായം ഉണ്ടായില്ല.

ദക്ഷിണാഫ്രിക്കയിലെ കലഹാരി മരുഭൂമിക്കടുത്തുള്ള വലിയൊരു ഗർത്തമാണ് മൊറോക്ക്‌വെങ്ങ്. ഛിന്നഗ്രഹ പതനത്തിന്റെ ആഘാതത്തിലുണ്ടായ അടയാളങ്ങൾ ഇവിടെയുണ്ട്. 1990ൽ കണ്ടെത്തിയ ഗർത്തം ആഴത്തിൽ തുരന്നപ്പോൾ ഏകദേശം 770 മീറ്റർ താഴെ ഉൽക്കാശിലയുടെ ഭാഗം കണ്ടെത്തിയിരുന്നു. 2013ൽ റഷ്യയിലെ ചെല്യാബിൻസ്‌കിൽ സംഭവിച്ച ഉൽക്കാപതനവും വലിയ നാശനഷ്‌ടങ്ങളുണ്ടാക്കിയിരുന്നു.

∙ ഛിന്നഗ്രഹം തന്നെയാണോ ഉൽക്കയും?

ഛിന്നഗ്രഹങ്ങളിൽനിന്നും ധൂമകേതുക്കളിൽ നിന്നുമെല്ലാം അടർന്നുവീഴുന്ന വമ്പൻ പാറക്കഷ്ണങ്ങളാണ് ഉൽക്കകൾ എന്നു പറയാം. ചെറിയ ഉൽക്കകൾ പലതും ഭൗമാന്തരീക്ഷത്തിൽ കടക്കുമ്പോൾ എരിഞ്ഞുതീരുകയാണ് പതിവ്. ചിലപ്പോൾ ഉൽക്കകൾ പൂർണമായി കത്തിനശിക്കാതെയുമിരിക്കാം. അതിന്റെ ബാക്കിഭാഗം ഭൂമിയിൽ പതിക്കുന്നതാണ് ഉൽക്കാശിലകൾ (Meteorites) എന്നറിയപ്പെടുന്നത്. 

പണ്ട് വലിയൊരു ഉൽക്ക ഭൂമിയിൽ പതിച്ചതിനു ശേഷമാണ് ദിനോസറുകൾക്ക് കൂട്ടവംശനാശം സംഭവിച്ചതെന്ന് പഠനങ്ങളുണ്ട്. കലിഫോർണിയ സർവകലാശാലയിൽ പ്രഫസറായിരുന്ന വാൾട്ടർ അൽവാറെസ് ആണ് ആ വാദം ആദ്യമായി മുന്നോട്ടു വച്ചത്. ഭൂമിയിൽ കുറച്ചുമാത്രം കാണപ്പെടുന്ന ഇറിഡിയം എന്ന മൂലകത്തിന്റെ സാന്നിധ്യം ചില ദിനോസർ ഫോസിലുകളിൽ കണ്ടെത്തിയതിന്റെ അടിസ്ഥാനത്തിലായിരുന്നു ഇത്. അപകടങ്ങൾക്ക് പുറമെ ഭൂമിയിലെ കാലാവസ്ഥയിൽ ഗുരുതരമായ മാറ്റങ്ങൾ ഉൾപ്പെടെ ഉണ്ടാക്കുന്നവയാണ് ഛിന്നഗ്രഹ പതനങ്ങൾ. അതുകൊണ്ടാണ്, ഛിന്നഗ്രഹങ്ങളെ പറ്റി മുൻകൂട്ടി പഠിക്കേണ്ടതിന്റെ ആവശ്യകതയും പ്രധാനപ്പെട്ടതാകുന്നത്. ക്രിസ്മസിനു വിരുന്നെത്തിയ ഛിന്നഗ്രഹവും അത്തരത്തിലുള്ള നിരീക്ഷണങ്ങൾക്കും പഠനങ്ങൾക്കും ഗവേഷകരെ സംബന്ധിച്ചിടത്തോളം വലിയൊരു മാതൃകയാണ്.

∙ ചെറുതല്ല ഛിന്നഗ്രഹ ശാസ്ത്രം 

ഭീമൻ ഗ്രഹമായ വ്യാഴത്തിന്റെ വൻതോതിലുള്ള ഗുരുത്വാകർഷണം കാരണം രൂപം കൊള്ളാൻ കഴിയാതെ പോയ ഗ്രഹത്തിന്റെ അവശിഷ്‌ടങ്ങളാവാം ഛിന്നഗ്രഹങ്ങൾ എന്നാണ് ശാസ്ത്രീയമായി അനുമാനിക്കപ്പെടുന്നത്. പാറകൾ നിറഞ്ഞതും ഖരരൂപത്തിലുള്ളതും ക്രമരഹിത ആകൃതിയുള്ളതുമായ ആകാശ വസ്‌തുക്കളാണ് ഇവ. കാർബണും സിലിക്കേറ്റുകളും ബസാൾട്ടും നിക്കൽ, ഇരുമ്പ് പോലുള്ള ലോഹങ്ങളുമൊക്കെ അടങ്ങിയിട്ടുണ്ട് വിവിധ ഛിന്നഗ്രഹങ്ങളിൽ. ഭൂമിക്കു സമീപത്തുകൂടി കടന്നുപോവുന്ന സഞ്ചാരപാതയുള്ള ഛിന്നഗ്രഹങ്ങളെ നിയർ എർത്ത് ആസ്‌റ്ററോയ്‌ഡ് എന്നും വ്യാഴത്തിന്റെ ഭ്രമണപഥത്തോട് ചേർന്നുള്ളവയെ ട്രോജൻസ് എന്നും വിളിക്കുന്നു.

ഛിന്നഗ്രഹ ബെൽറ്റിലെ എറ്റവും വലുപ്പം കൂടിയ ആകാശ വസ്‌തു ഇപ്പോൾ കുള്ളൻഗ്രഹമായി കണക്കാക്കപ്പെടുന്ന സിറസാണ്. വലുപ്പത്തിന്റെ കാര്യത്തിൽ സിറസിനു താഴെ വരുന്നവയാണ് പല്ലാസ്, വെസ്‌റ്റ, ഹൈജിയ എന്നിവ. ചില ഛിന്നഗ്രഹങ്ങളെ ചുറ്റുന്ന ആകാശവസ്‌തുക്കളുമുണ്ട് . ഉദാഹരണത്തിന് ഐഡ എന്ന ഛിന്നഗ്രഹത്തെ ചുറ്റുന്ന ഡാക്‌റ്റിൽ എന്ന ആകാശവസ്‌തുവിനെ 1993 ലാണ് തിരിച്ചറിഞ്ഞത്. ചാരിക്ലോ എന്ന ഛിന്നഗ്രഹത്തിനാണെങ്കിൽ വീതി കുറഞ്ഞ രണ്ടു വലയങ്ങളുണ്ട്.

English Summary: An Unusual 'Guest' Came Close to Earth; Why Christmas Asteroid is Important?