കൊറിയൻ യുദ്ധത്തിലെ ധീരൻ പൈലറ്റ്, നാലാം ഹണി'മൂൺ'; ആംസ്ട്രോങ്ങിന്റെ നിഴലായ രണ്ടാമൻ

ധർമചിന്തയിൽ ജ്യേഷ്ഠൻ യുധിഷ്ഠിരനോടും പ്രശസ്തിയിൽ ഇളയ സഹോദരൻ അർജുനനോടും എന്നും രണ്ടാമനാകാൻ വിധിക്കപ്പെട്ട ഭീമൻ; വൃകോദരൻ എന്ന ഇരട്ടപ്പേരിട്ട് ഉറ്റവർ മാറ്റി നിർത്തിയ ഭീമനാണ് കുരുക്ഷേത്ര ഭൂമിയിൽ പാണ്ഡവരെ ജയിപ്പിക്കുന്നതെന്ന് മഹാഭാരത വരികൾക്കിടയിൽനിന്ന് വായിച്ചെടുത്തത് എം.ടി. വാസുദേവൻ നായരാണ്. മറ്റുള്ളവരുടെ നിഴലിൽ നായകത്വം നഷ്ടപ്പെട്ട ഭീമൻ ഭാരതത്തിന്റെ ഇതിഹാസ കഥാപാത്രമാണെങ്കിൽ മറ്റൊരു ലോക ഇതിഹാസം എന്നും രണ്ടാമനായി പോയവന്റെ വേദന കടിച്ചമർത്തി ജീവിക്കുകയാണിപ്പോഴും. ‘മനുഷ്യനൊരു കാൽവയ്പ്; മാനവരാശിക്കൊരു കുതിച്ചുചാട്ട’മെന്ന വാക്കുകൾ ചന്ദ്രന്റെ ഉപരിതലത്തിൽ ആദ്യമായി മുഴങ്ങിക്കേട്ട മനുഷ്യ ശബ്ദമായപ്പോൾ അതിന്റെ അലയൊലികൾ കഠിനമായി മുറിവേൽപിച്ചൊരു മനുഷ്യനുണ്ട്. രണ്ടാമൂഴത്തിനായി കാത്തിരിക്കേണ്ടി വന്ന സാക്ഷാൽ എഡ്വിൻ യൂജിൻ ആൽഡ്രിൻ എന്ന ബസ്സ് ആൽഡ്രിൻ.

ചരിത്രമെപ്പോഴും രണ്ടാമനാക്കിയപ്പോൾ നാൽപത്തിയൊന്നാം വയസ്സിൽ ഡിപ്രഷനു ചികിത്സ തേടേണ്ടി വന്ന ആൽഡ്രിൻ; അമേരിക്കൻ വ്യോമസേനയിൽ പൈലറ്റായിരുന്ന് കൊറിയൻ യുദ്ധകാലത്തെ സേവന മികവിന് ഫ്ലയിങ് ക്രോസ് ബഹുമതി നേടിയ ആൽഡ്രിൻ; തൊണ്ണൂറ്റിമൂന്നാമത്തെ വയസ്സിൽ വീണ്ടുമൊരു വിവാഹം കഴിച്ച് നാലാം ഹണി‘മൂൺ’ ആഘോഷിച്ച ആൽഡ്രിൻ. 1969 ജൂലൈ 21ന്, നൂറു കോടി മനുഷ്യരെ സാക്ഷി നിർത്തി ചന്ദ്രനിലിറങ്ങി നടന്ന രണ്ടാമന് ഭൂമിയിലെ നടപ്പു ജീവിതവും എന്നും പ്രതികൂലമായിരുന്നു. ആ ജീവിതത്തിലൂടെ ഒരു യാത്ര.

∙ യുദ്ധവും പൈലറ്റും ഡോക്ടറേറ്റും

1930 ജനുവരി 20ന് അമേരിക്കയിലെ ന്യൂജഴ്സിയിൽ ജനനം. അമേരിക്കൻ വ്യോമസേനയിലെ കേണലായിരുന്നു പിതാവ്. അമ്മ മാരിയൺ മൂണിന്റെ പിതാവും സൈന്യത്തിലായിരുന്നു. (അമ്മയുടെ പേരിലെ ‘മൂൺ’ കൊച്ചു ബസ്സിനെ അന്നേ സ്വാധീനിച്ചിരിക്കാം) മോണ്ട് ക്ലെയർ ഹൈസ്കൂളിലെ പഠനശേഷം 1947ൽ ന്യൂയോർക്കിലെ വെസ്റ്റ് പോയിന്റ് മിലിട്ടറി അക്കാദമിയിൽ ചേർന്ന ആൽഡ്രിൻ പലപ്പോഴും ക്ലാസിലെ ഒന്നാമനായിരുന്നു. 1951ൽ പഠനം അവസാനിക്കുമ്പോൾ മൂന്നാം സ്ഥാനത്തോടെ മെക്കാനിക്കൽ എൻജിനീയറിങ് ബിരുദവും നേടി. ഫൈറ്റർ പൈലറ്റാകണമെന്ന മോഹം സാധ്യമാക്കാൻ ആ വർഷം തന്നെ അമേരിക്കൻ വ്യോമസേനയിൽ ചേർന്നു. അവിടെയും ടോപ് സ്കോറർ. കൊറിയൻ യുദ്ധത്തിൽ ആൽഡ്രിന്റെ വിങ് (വിങ് 51) ശത്രുവിന്റെ 61 മിഗ് വിമാനങ്ങൾ വെടിവച്ചിട്ടു. (2 മിഗ് വിമാനങ്ങൾ സ്വന്തമായി വെടിവച്ചു വീഴ്ത്തിയതിന്റെ ഖ്യാതിയുമുണ്ട്). പിന്നാലെ, വിശിഷ്ട സേവനത്തിനുള്ള അംഗീകാരവും ലഭിച്ചു. 

1953ൽ ഇരു കൊറിയകളും വെടിനിർത്തൽ പ്രഖ്യാപിച്ചപ്പോൾ അമേരിക്കയിലേക്ക് മടങ്ങിയ ആൽഡ്രിൻ മാസ്റ്റേഴ്സ് ഡിഗ്രി എടുത്തതിനു ശേഷം പൈലറ്റ് പരിശീലനത്തിന് അപേക്ഷിക്കാൻ തീരുമാനിച്ചിരുന്നു. എന്നാൽ, എയ്റോനോട്ടിക്സിൽ ഡോക്ടറേറ്റ് നേടിയാണ് മാസച്യുസിറ്റിസ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽനിന്ന് പടിയിറങ്ങിയത്. തീസിസിന്റെ വിഷയമോ, മനുഷ്യൻ നിയന്ത്രിക്കുന്ന ബഹിരാകാശ പേടകങ്ങള്‍ പരസ്പരം അടുത്തു വരുമ്പോൾ നേരിടേണ്ടത് എങ്ങനെയാണെന്നതു സംബന്ധിച്ചുള്ളതും. മനുഷ്യൻ ആദ്യമായി ചന്ദ്രനിൽ കാൽകുത്തുന്നതിനും ആറര വർഷം മുൻപ്, 1963ലായിരുന്നു ആൽഡ്രിന്റെ ഡോക്ടറേറ്റ് നേട്ടം. വരാനിരുന്ന വലിയ നിയോഗത്തിന്റെ ചെറിയ പടവുകളായിരുന്നു ആ നേട്ടമെന്നു ചുരുക്കം.

∙ ഒരുങ്ങുന്നു ആകാശയാത്രയ്ക്ക്

1963ൽ ബഹിരാകാശ യാത്രയ്ക്കായി നാസ തിരഞ്ഞെടുത്ത മൂന്നാമത്തെ ഗ്രൂപ്പിൽ ആൽഡ്രിനുമുണ്ടായിരുന്നു. പഠനകാലത്തെ തീസിസിൽ പറഞ്ഞതു പോലെ ബഹിരാകാശ പേടകം ലാൻഡു ചെയ്യുന്നതുമായി ബന്ധപ്പെട്ടും അവ പരസ്പരം അടുത്തുവരുമ്പോൾ ശ്രദ്ധിക്കേണ്ട കാര്യങ്ങളുമായിരുന്നു ആൽഡ്രിന്റെ ഉത്തരവാദിത്തങ്ങൾ. ഗുരുത്വാകർഷണം ഇല്ലാത്ത അവസ്ഥയിൽ ബഹിരാകാശത്തെ സാഹചര്യങ്ങളോടു പൊരുത്തപ്പെടാൻ വേണ്ടി വെള്ളത്തിനടിയിലെ പരിശീലനവും പൂർത്തിയാക്കി. 1966ൽ ആൽഡ്രിനും ജിം ലോവെൽ എന്ന മറ്റൊരു അസ്ട്രനോട്ടും ജെമിനി 12 എന്ന പേടകത്തിലേറിയുള്ള യാത്രയിലേക്കു നിയോഗിക്കപ്പെട്ടു. ആ വർഷം നവംബർ 11 മുതൽ 15 വരെ നീണ്ട ബഹിരാകാശ യാത്രയിൽ ആൽഡ്രിൻ കുറിച്ചത് മറ്റൊരു ചരിത്രമായിരുന്നു; അന്നേ വരെ ബഹിരാകാശത്തു നടന്ന സകല ആസ്ട്രനോട്ടുകളുടെയും റൊക്കോർഡ് തകർത്ത് 5 മണിക്കൂർ അദ്ദേഹം സ്പേസിൽ നടന്നു. മാനവരാശിയുടെ വലിയ കാൽവയ്പിനുള്ള ചെറിയ ചുവടുകൾ.

∙ കെന്നഡിയുടെ പ്രഖ്യാപനം; നാസയുടെ ചങ്കിടിപ്പ്

സോവിയറ്റ് യൂണിയനും (ഇന്നത്തെ റഷ്യ) അമേരിക്കയും തമ്മിലുള്ള ശീതയുദ്ധം ബഹിരാകാശത്തോളം എത്തിനിൽക്കുന്ന കാലം. ലോകത്തിലെ ആദ്യ കൃത്രിമോപഗ്രഹമായ സ്പുട്നിക് 1 വിജയമായതോടെ ഭൂമിയുടെ അതിർത്തി വിട്ട് ഉയർന്നിരുന്നു സോവിയറ്റ് യൂണിയന്റെ മേൽക്കോയ്മ. 1961ൽ യൂറി ഗഗാറിൻ എന്ന റഷ്യക്കാരൻ ബഹിരാകാശം കീഴടക്കിയതോടെ ആ അധീശശ്വം ഊട്ടിയുറപ്പിക്കപ്പെട്ടു. ഇതിൽപ്പരമൊരു നാണക്കേട് അമേരിക്കയ്ക്കുണ്ടോ? ലോകരാജ്യങ്ങൾ മുഴുവനും അമേരിക്കയെന്നും സോവിയറ്റ് യൂണിയനുമെന്ന 2 വൻശക്തികളുടെ അച്ചുതണ്ടിൽ കറങ്ങുമ്പോൾ അതിലൊന്ന് കഴിവുകെട്ടതെന്ന് പറയുന്ന അവസ്ഥ!. 1961 മേയ് 25ന് അമേരിക്കൻ പാർലമെന്റിന്റെ ജോയിന്റ് സെഷനു മുൻപ്, അന്ന് പ്രസിഡന്റായിരുന്ന ജോൺ എഫ്. കെന്നഡിയിൽനിന്ന് അസംഭവ്യം എന്ന് തോന്നാവുന്ന ഒരു പ്രഖ്യാപനം വന്നു. ‘വരുന്ന പത്തു വർഷത്തിനുള്ളിൽ സുരക്ഷിതമായി ഒരു അമേരിക്കക്കാരനെ ചന്ദ്രനിലിറക്കി തിരികെ കൊണ്ടുവന്നിരിക്കും’. വർഷം 1969. പ്രസിഡന്റ് കെന്നഡി പറഞ്ഞ പത്തുവർഷം അവസാനിക്കാറാകുന്നു. ഇതിനകം നാസ മനുഷ്യനെ ചന്ദ്രനിലെത്തിക്കാൻ സഹായകരമാകുന്ന ഒട്ടേറെ പ്രോജക്ടുകൾ ആവിഷ്ക്കരിച്ചു നടപ്പാക്കി. പ്രോജക്ട് മെർക്കുറി, ആൽഡ്രിൻ പറന്ന ജെമിനി, അപ്പോളോ സീരീസിലെ മറ്റു ദൗത്യങ്ങൾ എന്നിവയെല്ലാം അതിന്റെ ഭാഗമായിരുന്നു. 

∙ ഈഗിൾ പറന്നിറങ്ങുന്നു

16 ജൂലൈ 1969. കേപ് കെന്നഡിയിലെ ലോഞ്ച് പാഡിൽനിന്ന് അപ്പോളോ 11 കുതിച്ചുയർന്നു. അതിനകത്ത് മൂന്ന് അമേരിക്കക്കാർ. കമാൻഡർ നീൽ ആംസ്ട്രോങ്, കമാൻഡ് മൊഡ്യൂൾ (കൊളംബിയ) പൈലറ്റ് മൈക്കേൽ കോളിൻസ്, ലൂണാർ മൊഡ്യൂൾ (ഈഗിൾ) പൈലറ്റ് എഡ്‌വിൻ ബസ്സ് ആൽഡ്രിൻ. ജൂലൈ 20ന് ചന്ദ്രോപരിതലത്തിലെ ‘പ്രശാന്തതയുടെ സമുദ്രമെന്ന്’ വിളിക്കപ്പെടുന്ന (സീ ഓഫ് ട്രാൻക്വിലിറ്റി) ഭാഗത്ത് ഈഗിൾ ലാൻഡ് ചെയ്തു. കമാൻഡർ നീൽ ആംസ്ട്രോങ് ആദ്യം പുറത്തിറങ്ങി. 20 മിനിറ്റു കാത്തിരിക്കേണ്ടി വന്നു ആൽഡ്രിന്, ചന്ദ്രനെ ഒന്നു തൊടാൻ. കണ്ടറിഞ്ഞ ചന്ദ്രനെ മനോഹരമെന്ന് ഭംഗിവാക്കുപോലെ ആംസ്ട്രോങ് വിശേഷിപ്പിച്ചപ്പോൾ ‘അതിഗംഭീരമായ വിജനത’ (Magnificent Desolation) എന്നു വിളിക്കാനാണ് ആൽഡ്രിൻ ഇഷ്ടപ്പെട്ടത്. അതങ്ങനെയായിരുന്നു താനും.