ഓൺലൈൻ ഗെയിം ജയിച്ച കാശിന് ‘മൂന്നാറിൽ പോയാലും’ കുടുങ്ങുമോ? ഇനി കളി കേന്ദ്രത്തിന്റെ കോർട്ടിൽ

ഓൺലൈൻ ഗെയിമിങ്ങിൽ പണം നഷ്ടമായവരുടെയും ആത്മഹത്യയിലേക്ക് നീങ്ങിയവരുടെയും കഥകൾ കേരളത്തിന് അപരിചിതമല്ല. പലരുടെയും ആത്മഹത്യയ്ക്കു പിന്നാലെ നടത്തിയ അന്വേഷണത്തിലാണ് അവർ ലക്ഷക്കണക്കിനു രൂപ കടം വാങ്ങി വരെ ഓൺലൈൻ ഗെയിം കളിച്ചിട്ടുണ്ടെന്നു മനസ്സിലാകുന്നത്. ഗെയിം കളിക്കുന്നതിന് ഏതുവിധേനയും പണമുണ്ടാക്കാന്‍ ശ്രമിച്ചവരിൽ കുട്ടികളും യുവജനങ്ങളും വനിതകളുമെല്ലാമുണ്ട്. ഇത്തരത്തിൽ, പണം ഉൾപ്പെട്ട ഗെയിമുകളെ നിയന്ത്രിക്കാനുള്ള സുപ്രധാന ചട്ടഭേദഗതിയാണ് കഴിഞ്ഞ ദിവസം കേന്ദ്രസർക്കാർ പൊതുജനാഭിപ്രായത്തിനായി മുന്നോട്ടുവച്ചത്. പണം ഉൾപ്പെടാത്ത ഗെയിമുകൾ ഇതിന്റെ പരിധിയിൽ വരില്ലെങ്കിലും സർക്കാരിന് ആവശ്യമെന്നു തോന്നിയാൽ ഇവയെയും ചട്ടത്തിനു കീഴിൽ കൊണ്ടുവരാൻ വ്യവസ്ഥയുണ്ട്. ചട്ടം പ്രകാരം ഏതെല്ലാം ഗെയിമുകൾക്ക്, എങ്ങനെയായിരിക്കും നിയന്ത്രണം? ഇതു പ്രകാരം ബെറ്റിങ് ഇനിയും അനുവദിക്കുമോ? ചൂതാട്ടവുമായി ബന്ധപ്പെട്ട പരസ്യങ്ങൾക്കു വിലക്കുണ്ടാകുമോ? ഓൺലൈൻ ഗെയിമിലൂടെ ലഭിച്ച പണം ഉപയോഗിച്ച് മൂന്നാറില്‍ പോയി അടിച്ചുപൊളിച്ചെന്നു പരസ്യത്തിൽ പറഞ്ഞവർ കുടുങ്ങുമോ? കുട്ടികൾക്ക് എന്തെല്ലാം നിയന്ത്രണം വരും? ഗെയിം കമ്പനികൾ ഇനി എന്തെല്ലാം ശ്രദ്ധിക്കണം? കരട് ചട്ടത്തിൽ മറ്റെന്തൊക്കെ ഉൾപ്പെട്ടിട്ടുണ്ടെന്നും വിശദമായി പരിശോധിക്കാം...

∙ ഏതൊക്കെ ഗെയിമുകൾക്കാണ് നിയന്ത്രണം?

സമ്മാനം ലഭിക്കുമെന്ന പ്രതീക്ഷയോടെ പണം നിക്ഷേപിച്ച് ഓൺലൈനായി കളിക്കുന്ന ഏത് ഗെയിമുകളും പുതിയ ചട്ടത്തിന്റെ പരിധിയിൽ വരും. ഓഫ്‍ലൈനായി കളിക്കുന്ന ഗെയിമുകൾക്ക് ഇത് ബാധകമല്ല.

∙ പണം ഉൾപ്പെട്ട ഗെയിമുകൾക്ക് മാത്രമാണോ ചട്ടം?

അല്ല. പണം നിക്ഷേപിച്ചു കളിക്കുന്ന ഓൺലൈൻ ഗെയിമുകൾക്കാണ് നിയന്ത്രണങ്ങളെങ്കിലും പണം ഉൾപ്പെടാത്ത ഗെയിമുകളിലും നിയന്ത്രണം ഏർപ്പെടുത്താൻ സർക്കാരിനു കഴിയും. പണം വാങ്ങാത്ത ഒരു ഗെയിം ആസക്തിയുണ്ടാക്കുകയോ കുട്ടികൾക്ക് ദോഷമുണ്ടാക്കുകയോ ചെയ്താൽ പ്രത്യേക ഗസറ്റ് വിജ്ഞാപനത്തിലൂടെ ആ ഗെയിമിനെ പുതിയ ചട്ടത്തിൽ പരിധിയിലാക്കാം. രാജ്യത്തിന്റെ പരമാധികാരത്തിനും അഖണ്ഡതയ്ക്കും സുരക്ഷയ്ക്കും ഭീഷണിയുണ്ടാക്കുക, വിദേശരാജ്യങ്ങളുമായുള്ള ബന്ധത്തെ ബാധിക്കുക തുടങ്ങിയ സാഹചര്യങ്ങളിലും ഗെയിമുകളെ ചട്ടത്തിന്റെ പരിധിയിൽ കൊണ്ടുവരാം.

∙ ബെറ്റിങ് അനുവദിക്കുമോ?

ഒരു ഗെയിം അഥവ ഇവന്റിന്റെ (ഉദാഹരണത്തിന് ക്രിക്കറ്റ്) ഫലത്തെ അധിഷ്ഠിതമായി നടത്തുന്ന വാതുവയ്പ്, ചൂതാട്ടം എന്നിവ ഓൺലൈനായി നടത്തുന്നത് വിലക്കാനാണ് കേന്ദ്രത്തിന്റെ നീക്കം. ഇതാണ് ലക്ഷ്യമായി കേന്ദ്രമന്ത്രി രാജീവ് ചന്ദ്രശേഖർ പറഞ്ഞിരിക്കുന്നതെങ്കിലും കരടുചട്ടത്തിൽ ഇതുസംബന്ധിച്ച് അവ്യക്തതയുണ്ട്. ബെറ്റിങ്, ചൂതാട്ടം സംബന്ധിച്ച് രാജ്യത്തു നിലനിൽക്കുന്ന നിയമങ്ങൾക്കു വിരുദ്ധമായുള്ള ഗെയിമുകൾ ഹോസ്റ്റ് ചെയ്യരുതെന്നാണ് കമ്പനികൾക്കുള്ള വ്യവസ്ഥ. പല സംസ്ഥാനങ്ങളിലും ഇതു സംബന്ധിച്ച് വിവിധ നിയമങ്ങൾ നിലനിൽക്കുന്നതിനാൽ ചട്ടം നടപ്പാക്കുന്നതെങ്ങനെയെന്ന അവ്യക്തതയുണ്ട്.

∙ ബെറ്റിങ് പരസ്യം വിലക്കുമോ?

വിലക്കുമെന്നാണ് സർക്കാർ പറയുന്നത്. ഗെയിം കമ്പനികൾക്കായി മനഃശാസ്ത്ര രംഗത്തു നിന്നുള്ള അംഗം ഉൾപ്പെട്ട സ്വയം നിയന്ത്രണ സമിതി (എസ്ആർഒ) നിലവിൽ വരും. ഈ എസ്ആർഒയുടെ റജിസ്ട്രേഷനുള്ള ഗെയിമുകൾ മാത്രമേ ഇന്ത്യയിൽ അനുവദിക്കൂ. വാതുവയ്പ്, ചൂതാട്ടം എന്നിവയില്ലാത്ത ഗെയിമുകൾക്കു മാത്രമേ എസ്ആർഒയ്ക്ക് റജിസ്ട്രേഷൻ നൽകാനാവൂ എന്നാണ് കേന്ദ്രം പറയുന്നത്. മുൻപ് പറഞ്ഞതുപോലെ ചട്ടത്തിൽ അവ്യക്തത ബാക്കിയാണ്. കേന്ദ്രനയം അതേപടി നടപ്പാക്കിയാൽ വിദേശ വാതുവയ്പ്, ചൂതാട്ട ഗെയിമുകൾ ഇന്ത്യയിൽ സമൂഹമാധ്യമങ്ങളിലും മറ്റും പരസ്യം ചെയ്യുന്നത് ചട്ടവിരുദ്ധമാകും. യുട്യൂബ്, ഇൻസ്റ്റഗ്രാം പോലെയുള്ള പ്ലാറ്റ്ഫോമുകൾക്ക് റജിസ്ട്രേഷനുള്ള ഗെയിമുകളുടെ പരസ്യം മാത്രമേ നൽകാൻ കഴിയൂ. റജിസ്ട്രേഷൻ വിവരം പരസ്യത്തിനൊപ്പം നൽകുകയും വേണം.

∙ ഓൺലൈൻ റമ്മി പോലെയുള്ള ഗെയിമുകളെ എങ്ങനെ ബാധിക്കും?

ഇതിൽ അവ്യക്തത തുടരുകയാണ്. ചൂതാട്ടം, ബെറ്റിങ് തുടങ്ങിയവ സംബന്ധിച്ച നിയമങ്ങൾ ഓരോ സംസ്ഥാനത്തും വ്യത്യസ്തമാണ്. ഉദാഹരണത്തിന് റമ്മികളി ചൂതാട്ടമാണെന്നാണ് തമിഴ്നാട് സർക്കാരിന്റെ നിരീക്ഷണം. കേരളം റമ്മി നിരോധിച്ചതും ഇതേ തത്വം അടിസ്ഥാനമാക്കിയാണ് (ഈ തീരുമാനം പിന്നീട് ഹൈക്കോടതി റദ്ദാക്കി). സുപ്രീം കോടതിയാകട്ടെ പല തവണ റമ്മികളി ‘ഗെയിം ഓഫ് സ്കിൽ’ ആണെന്ന് വ്യക്തമാക്കുകയും ചെയ്തിട്ടുണ്ട്. പുതിയ ചട്ടമനുസരിച്ച് രാജ്യത്ത് ബെറ്റിങ്, ചൂതാട്ടം തുടങ്ങിയവ സംബന്ധിച്ചുള്ള നിയമങ്ങൾ പാലിക്കണമെന്നു മാത്രമാണ് പറഞ്ഞിരിക്കുന്നത്. ഗെയിം ഓഫ് ചാൻസ്, ഗെയിം ഓഫ് സ്കിൽ എന്തൊക്കെയാണെന്നും അവയിൽ ഏതൊക്കെ അനുവദനീയമാണെന്നും ചട്ടം വ്യക്തമാക്കിയിട്ടില്ല.

∙ കുട്ടികൾക്ക് നിയന്ത്രണമുണ്ടാകുമോ?