ആർത്തവ കാലത്ത് ചെയ്തു കൂടാത്ത കാര്യങ്ങളുടെ ഒരു വലിയ ലിസ്റ്റ് എപ്പോഴും സ്ത്രീകളുടെ മുന്നിലുണ്ട്. ഇതിൽ ചിലത് സഹായകരണമാണെങ്കിലും പലതും വെറും അന്ധവിശ്വാസങ്ങൾ മാത്രമാണ്. വൈകാരികമായ പിരിമുറുക്കം കൂടി ഉള്ള സമയമായതിനാൽ ചില മുന്നറിയിപ്പുകൾ അവഗണിച്ചു കൂടാത്തതും ആകുന്നു.
ആർത്തവ കാലത്ത് നീന്തുന്നതു കൊണ്ട് കുഴപ്പമുണ്ടോ എന്ന ചോദ്യം ചിലരെങ്കിലും ചോദിക്കാറുണ്ട്. ഇൻഫക്ഷൻ വരികയോ പേശികൾ കോച്ചിവലിക്കുകയോ ചെയ്യുമോ?
സ്ഥിരം നീന്തുന്നവർ ആർത്തവകാലത്ത് അത് നിർത്തേണ്ട ആവശ്യമില്ല. വേണ്ടത്ര മുൻകരുതലുകൾ എടുക്കുകയാണെങ്കിൽ – ‘‘ഷി കപ്പ്’ പോലുള്ള പ്രതിരോധ മാർഗങ്ങൾ. – വെള്ളം വൃത്തികേടാക്കും എന്ന ഭയം വേണ്ട. നീന്തുമ്പോൾ പൊതുവെ രക്തത്തിന്റെ ഒഴുക്ക് കുറയുകയാണ് ചെയ്യുന്നത്. പക്ഷേ ചിരിക്കുകയോ, തുമ്മുകയോ ചുമയ്ക്കുകയോ ചെയ്യുമ്പോൾ ഒരല്പം രക്തം പൊടിഞ്ഞെന്നു വരാം. എല്ലാ നീന്തൽകുളങ്ങളിലും അല്പം വിയർപ്പും മൂത്രവുമൊക്കെ കലരുന്നുണ്ട്. വെള്ളത്തിൽ അടങ്ങിയിരിക്കുന്ന ക്ലോറിൻ ഇതിനെ ശുദ്ധമാക്കുന്നു.
നീന്തൽ പോലുള്ള ലഘു വ്യായാമങ്ങൾ ആർത്തവകാലത്തുണ്ടാകുന്ന കോച്ചിപ്പിടുത്തം സുഖപ്പെടുത്തുകയാണ് ചെയ്യുന്നത്. വ്യായാമ സമയത്ത് ശരീരത്തിൽ ഉണ്ടാകുന്ന എൻഡോർഫിൻ ഹോര്‍മോൺ പ്രകൃതിദത്തമായ വേദനാസംഹാരിയാണ്.
