മലിനജലം ഓവുചാലിലേക്ക് തുറന്നു വിടുന്നു; പരിഹാരം തേടി നാട്ടുകാർ

സീതാംഗോളി ∙ മലിനജലം ഓവുചാലിലേക്ക് തുറന്നു വിടുന്നതായി പരാതി. സീതാംഗോളി ടൗണിലെ ഓവുചാലിലേക്കാണ് മലിന ജലം തുറന്നു വിടുന്നതെന്ന് പരാതിയുയർന്നിട്ടുള്ളത്. കുമ്പള മുള്ളേരിയ കെഎസ്ടിപി റോഡ് നവീകരിക്കുന്നതിന്റെ ഭാഗമായി നിർമിച്ച ഓവുചാലിലേക്കാണ് സമീപത്തെ ഹോട്ടലുകളിൽ നിന്നും മലിനജലം തുറന്നു വിടുന്നത്.

വർഷങ്ങൾക്ക് മുൻപുണ്ടായിരുന്ന ഓവുചാൽ നീക്കിയാണ് പുതിയത് സ്ഥാപിച്ചത്. ഇതിനു വേണ്ടി സ്ഥലം ഇളക്കിമാറ്റിയപ്പോൾ തന്നെ ഇവിടെ മലിന ജലം കെട്ടിനിൽക്കുന്ന സ്ഥിതിയായിരുന്നു.പുതിയ ഓവുചാലിന്റെ പണി പൂർത്തിയായതോടെ ഇതിലൂടെയും മലിനജലം ഒഴുകിയെത്തി അകത്തും പുറത്തും കെട്ടിക്കിടക്കുന്നു.ഹോട്ടലുകൾ പൂട്ടി കിടന്ന 1മാസം ഓവുചാലിൽ മലിന ജലം നിറഞ്ഞിരുന്നില്ല. ഹോട്ടലുകൾ തുറന്നതോടെ വീണ്ടും മലിന ജലം ഒഴുകിയെത്താൻ തുടങ്ങിയത്.പരിസരത്തെ വീട്ടുകാരും ദുരിതത്തിലായിരിക്കുകയാണ്.

ടൗണിലെ യാത്രക്കാർക്ക്  ബസ് കാത്തിരിക്കുന്നതിനും വിശ്രമിക്കുന്നതിനും പണിത ടേക്ക് എ ബ്രേക്ക് പദ്ധതിയിൽ പണിത  വഴിയോര വിശ്രമകേന്ദ്രത്തിനു സമീപത്താണ് മലിന ജലം കെട്ടി കിടക്കുന്നത്. ആരോഗ്യവകുപ്പും പഞ്ചായത്ത് അധികൃതരും ഹോട്ടലുകൾക്ക് നോട്ടിസ് നൽകിയിട്ടും പരിഹാരമായിട്ടില്ലെന്ന് സീതാംഗോളി ടൗൺ വാർഡ് അംഗം കാവ്യശ്രീ പറഞ്ഞു.