മൗനമെന്നത് ഒരു സൂത്രമാവുന്നു...
ഞാനും നീയും മാത്രമാവുമ്പോൾ,
നിന്നിൽ നിന്നെന്നെ മറച്ചു പിടിക്കാൻ..
ഒഴിഞ്ഞു മാറുമ്പോൾ,
ഒഴുകിയെത്തുന്ന സ്നേഹം
കണ്ടില്ലെന്നു നടിക്കാൻ..
കാത്തു നിന്നു മഞ്ഞച്ച വൈകുന്നേരങ്ങൾ,
മറന്നുവെന്ന് മനസ്സു കൊണ്ടു പിറുപിറുക്കാൻ..
ചേർത്തണക്കാൻ വൈകിപ്പോയ,
നീളമേറുന്ന നിമിഷങ്ങളോടൊപ്പം-
ഞാനത് കൂട്ടികെട്ടുന്നു.
നിശബ്ദത നിന്നെത്തേടലാണെന്നു
നീ തിരിച്ചറിയും വരെ..
പിന്നെയും പുണർന്നു പുണർന്നു
അലിഞ്ഞില്ലാതാവും വരെ...
മുദ്ര വെക്കപ്പെട്ട ചുണ്ടുകൾ -
വാക്കുകൾ കൊണ്ട് മുറിപ്പെടുന്നത് വരെ..
ഞാനാ സൂത്രം പ്രയോഗിച്ചു കൊണ്ടിരിക്കും.
അറിഞ്ഞിട്ടും അറിയില്ലെന്ന്...
ഒരു പിണക്കത്തിനപ്പുറം
ഇണക്കത്തിലാവുന്നതു വരെ
മാത്രമുള്ള തന്ത്രമെന്ന്,
ചിരപരിചിതമായ എന്റെ മൗനത്തെ
നിസ്സംഗതയോടെ -
നീ തിരിച്ചയക്കുമായിരിക്കും,
അപ്പോഴും..
കോർത്തു പിടിക്കാൻ കൊതിച്ചു കൊണ്ട്,
എന്റെ വിരലുകൾ -
നിന്നെ തേടിക്കൊണ്ടിരിക്കും.
ഒടുവിൽ നേർത്തു നേർത്തു
സ്വയം ഉൾവലിഞ്ഞു..
ഞാനും നീയും നമ്മുടെ നിമിഷങ്ങളും..
അതെ,വെറുതെയെന്നറിഞ്ഞിട്ടും
പ്രയോഗിക്കപ്പെടുന്ന ഒരു സൂത്രം
മാത്രമാണെനിക്ക് മൗനം.