അഭിനയത്തിന് പുറമെ ബിസിനസ് രംഗത്ത് ഒരുകൈനോക്കാന്‍ ഇറങ്ങുകയാണ് ലെന. സൗന്ദര്യസംരക്ഷണം മുന്‍നിര്‍ത്തി ആരോഗ്യരംഗത്തേക്കാണ് ലെന ചുവടുവെക്കുന്നത്. ചേവായൂരിൽ ആകൃതി എന്ന പേരിൽ ആരംഭിച്ച സ്ലിമ്മിങ് സെന്റർ ആസിഫ് അലി ഉദ്ഘാടനം ചെയ്തു.
ഈയിടെ കാവ്യ മാധവനും വസ്ത്രവ്യാപാരരംഗത്തേക്ക് തിരിഞ്ഞിരുന്നു. പുതുതലമുറയിലെ വ്യാപാരങ്ങളില്‍ ഏറ്റവുമധികം മുന്നേറിയ ഓണ്‍ലൈന്‍ ഷോപ്പിങ് രംഗത്തേക്കായിരുന്നു കാവ്യയുടെ രംഗപ്രവേശം.
ആരോഗ്യകരവും സുരക്ഷിതവുമായ മാർഗ്ഗങ്ങളിലൂടെ താൻ വണ്ണം കുറച്ച അതേ വിദ്യ മറ്റുള്ളവരോടും പങ്കിടാനുള്ള പുതിയ പദ്ധതിയാണ് ലെനയും രണ്ടു സുഹൃത്തുക്കളും ചേർന്ന് കോഴിക്കോട് ഒരുക്കുന്നത്. ആകൃതിയുടെ ഒരു ശാഖ തൃശൂരും ഉണ്ടാകും.
കുറഞ്ഞ ചെലവിൽ ഫലപ്രദമായ തരത്തിൽ എങ്ങനെ മെലിയാം എന്നതിനുള്ള ഉത്തരം ആകൃതി നൽകുമെന്നാണു ലെനയുടെ വാഗ്ദാനം. ഇഷ്ടഭക്ഷണം കഴിച്ചു കൊണ്ടു തന്നെ വണ്ണം കുറയ്ക്കാനുള്ള മാർഗങ്ങളാകും ആകൃതി പറ‍ഞ്ഞു തരികയെന്നും ലെന പറയുന്നു. ലൂയീസ, വൃന്ദ എന്നീ സുഹൃത്തുക്കളും ആശയത്തിനു പിന്നിലുണ്ട്.