എത്ര പ്രവാസികൾ വിദേശത്തുണ്ട്? സർക്കാരിന് അറിയില്ല, കേരളസഭയിലെ വാക്കും പാലിച്ചില്ല!

തിരുവനന്തപുരം ∙ 351 ഡെലിഗേറ്റുകൾ. മൂന്നു ദിവസം നീണ്ടു നിന്ന വമ്പൻ പരിപാടികളും ചർച്ചകളും. പ്രവാസി വിഐപികളുടെ പട. നാലു കോടി രൂപ ചെലവ്. തലസ്ഥാനത്ത് മൂന്നാം ലോക കേരള സഭ എല്ലാ സൗകര്യങ്ങളോടെയും സജ്ജീകരണങ്ങളോടെയും സംഘടിപ്പിച്ച് അവസാനിച്ചപ്പോൾ സിംപിളായ ഒരു ചോദ്യം: കേരളത്തിൽനിന്ന് എത്ര പ്രവാസികൾ വിദേശ രാജ്യങ്ങളിലും സംസ്ഥാനങ്ങളിലുമുണ്ട്? കൃത്യമായി അറിയില്ല എന്നാണ് സർക്കാരിന്റെ ഉത്തരം. പ്രവാസികൾക്കായി മുഖ്യമന്ത്രിക്കു കീഴിൽ നോർക്ക എന്ന പ്രത്യേക വകുപ്പും പ്രവാസികളെ ഒരു കുടക്കീഴിൽ കൊണ്ടു വരാൻ ലോക കേരള സഭയും ഒക്കെ ഉണ്ടെങ്കിലും ഇപ്പോഴും സർക്കാരിന്റെ കയ്യിൽ പ്രവാസികളുടെ കൃത്യമായ കണക്കില്ലാത്തതിനു കാരണം പലതാണ്. ലോക കേരള സഭയുടെ ഉദ്ഘാടന യോഗത്തിൽ അധ്യക്ഷത വഹിച്ച് സ്പീക്കർ എം.ബി.രാജേഷ് നടത്തിയ പ്രസംഗത്തിലെ വരികൾ ശ്രദ്ധിക്കൂ: ‘‘കേരളത്തിൽ പത്തിലൊരാൾ പ്രവാസിയാണ് എന്നാണ് കണക്ക്. മൂന്നരക്കോടി മലയാളികളിൽ 35 ലക്ഷം പേരാണ് പ്രവാസികൾ. പ്രവാസികളുടെ കൃത്യമായ കണക്ക് ലഭ്യമല്ല. കേന്ദ്ര സർക്കാരിന്റെ കൈവശവും അങ്ങിനെ ഒരു കണക്കില്ല. 1.8 കോടി ഇന്ത്യക്കാർ പ്രവാസികളാണെന്നാണ് നിഗമനം. മൈഗ്രേഷൻ സർവേ പ്രകാരം 13 ലക്ഷം  പ്രവാസികൾ കോവിഡ് പ്രതിസന്ധിക്കു മുൻപ് കേരളത്തിലേയ്ക്കു തിരിച്ചെത്തി. കോവിഡിനു ശേഷം നോർക്ക റൂട്സിന്റെ ജാഗ്രതാ പോർട്ടലിൽ റജിസ്റ്റർ ചെയ്ത 17 ലക്ഷം പേരാണ് തിരിച്ചെത്തിയത്’’

ഇപ്പോൾ 40 മുതൽ 50 വയസ്സു വരെയുള്ളവരാണ് കേരളത്തിലേയ്ക്ക് ഏറ്റവുമധികം മടങ്ങിയെത്തുന്നതെങ്കിൽ സമീപ ഭാവിയിൽ 30 മുതൽ 40 വയസ്സിനിടയ്ക്കു പ്രായമുള്ള ഒട്ടേറെ പേർ തിരിച്ചെത്തുമെന്നും സംസ്ഥാന സർക്കാരിന്റെ കണക്കുകൾ ചൂണ്ടിക്കാട്ടുന്നു. ഫലത്തിൽ, പ്രവാസികളുടെ പ്രശ്നങ്ങൾ പരിഹരിക്കുന്നതിനേക്കാൾ ഫലപ്രദമായി സർക്കാർ ഇടപെടേണ്ടത് മടങ്ങിയെത്തുന്ന പ്രവാസികളുടെ കാര്യത്തിലാണ്. കുടിയേറ്റ പ്രഭവ കേന്ദ്രങ്ങളായ രാജ്യങ്ങളിൽ ഇന്ത്യയാണ് ലോകത്ത് ഒന്നാമത്. 1.79 കോടി ഇന്ത്യക്കാർ പ്രവാസികളെന്നാണ് ഒൗദ്യോഗിക രേഖകളെങ്കിലും യഥാർഥ കണക്ക് ഇതിനേക്കാൾ എത്രയോ അധികമാണ്. കാരണം, കേന്ദ്ര സർക്കാരിന്റെ പക്കൽ ഉണ്ടായിരുന്ന കണക്കിനേക്കാൾ ഇരട്ടി പേരാണ് യുക്രെയ്ൻ പ്രതിസന്ധി വന്നപ്പോൾ ഇന്ത്യയിലേയ്ക്കു തിരിച്ചെത്തിയത്. 

കോവിഡ് പ്രതിസന്ധിയിൽപ്പെട്ട പ്രവാസികളെ തിരിച്ചെത്തിക്കാൻ നടത്തിയ വന്ദേ ഭാരത് ഉദ്യമത്തിലും കണക്കിന്റെ അഭാവം വെളിപ്പെട്ടു. സർക്കാരിന്റെ കണക്കിൽ ഉണ്ടായിരുന്നതിനേക്കാൾ പതിന്മടങ്ങ് പേരാണ് പല രാജ്യങ്ങളിലുംനിന്ന് ഇന്ത്യയിലേയ്ക്കു തിരിച്ചെത്തിയത്. ഐക്യരാഷ്ട്ര സംഘടനയുടെ ജനസംഖ്യാ വിഭാഗം 2020ൽ പ്രസിദ്ധീകരിച്ച കണക്കനുസരിച്ച് ഇന്ത്യയ്ക്കു പിന്നിലാണ് കുടിയേറ്റത്തിനു പേരു കേട്ട രാജ്യമായ മെക്സിക്കോ പോലും (1.12 കോടി). പിന്നാലെ റഷ്യ (1.08 കോടി), ചൈന (1.05 കോടി), സിറിയ (0.85 കോടി) എന്നീ രാജ്യങ്ങളാണ്. ലോകത്ത് ഏറ്റവുമധികം വിദേശ പണം സ്വീകരിക്കുന്ന രാജ്യവും ഇന്ത്യയാണ്. ലോകത്തിലെ മൂന്നാമത്തെ ഏറ്റവും വലിയ കുടിയേറ്റ ഇടനാഴിയാണ് ഇന്ത്യ–യുഎഇ. 35 ലക്ഷത്തിലേറെപ്പേരാണ് ഇന്ത്യയിൽ നിന്ന് യുഎഇയിലേക്ക് തൊഴിൽ തേടിപ്പോയി അവിടെ കഴിയുന്നത്. സംസ്ഥാന മൊത്ത ആഭ്യന്തര ഉൽപാദനത്തിന്റെ മൂന്നിലൊന്ന് പ്രവാസികളുടെ സംഭാവനയായി കണക്കാക്കുന്നു. 

∙ എവിടെ പ്രവാസികളുടെ ഉന്നമനത്തിനായുള്ള നിയമം? 

സംസ്ഥാനത്തിനു പുറത്ത് മറ്റ് ഇന്ത്യൻ സംസ്ഥാനങ്ങളിലും ലോകത്തിന്റെ വിവിധ ഭാഗങ്ങളിലുമുള്ള പ്രവാസി കേരളീയരുടെ കൂട്ടായ്മയും സഹകരണവും പ്രോൽസാഹിപ്പിക്കുന്നതിനും കേരളീയ സാമൂഹിക, സാംസ്‌കാരിക, സാമ്പത്തിക വികസനത്തിനായി പ്രവാസികളെ സംസ്ഥാനവുമായി സമന്വയിപ്പിക്കുന്നതിനുമുള്ള പൊതുവേദി എന്ന നിലയിലാണ് ഒന്നാം പിണറായി സർക്കാരിന്റെ കാലത്ത് ലോക കേരള സഭ രൂപീകരിച്ചത്. 351 അംഗ സഭയിൽ കേരളത്തിലെ എംഎൽഎമാർ, എംപിമാർ, സർക്കാർ നാമനിർദേശം ചെയ്ത ഇന്ത്യൻ പൗരത്വമുള്ള പ്രവാസി മലയാളികൾ, മടങ്ങിയെത്തിയ പ്രവാസി പ്രതിനിധികൾ എന്നിവരാണുള്ളത്. 

അംഗങ്ങളെ കൂടാതെ വിവിധ മേലഖലകളിൽ പ്രാഗൽഭ്യം നേടിയ പ്രവാസി കേരളീയരെക്കൂടി പ്രത്യേക ക്ഷണിതാക്കളായി പങ്കെടുപ്പിക്കുന്നുണ്ട്. മൂന്നാം ലോക കേരള സഭയിൽ കുറഞ്ഞത് 65 രാജ്യങ്ങളുടെയും 21 സംസ്ഥാനങ്ങളുടെയും പ്രാതിനിധ്യമുണ്ടായെന്ന് സംഘാടകർ അവകാശപ്പെടുന്നു. 20 ശതമാനത്തോളം വനിതാ പ്രാതിനിധ്യവും ഉറപ്പുവരുത്തിയിട്ടുണ്ട്. സഭാ നിയമപ്രകാരം മൂന്നിലൊന്ന് അംഗങ്ങളെ നിശ്ചിത കാലയളവു കഴിഞ്ഞ് ഒഴിവാക്കും. പകരം പുതിയ അംഗങ്ങൾ വരും. ലോകകേരള സഭയുടെ ആദ്യ സമ്മേളനം 2018 ജനുവരി 12, 13 തിയതികളിൽ തിരുവനന്തപുരം നിയമസഭാ മന്ദിരത്തില്‍ ചേർന്നു. രണ്ടാം ലോക കേരള സഭ 2020 ജനുവരി 1, 2, 3 തീയതികളിൽ നടന്നു. 

കേന്ദ്ര, സംസ്ഥാന സര്‍ക്കാരുകളുടെ പരിഗണയില്‍ വരേണ്ട 209 ശുപാര്‍ശകള്‍ ലോക കേരള സഭയിൽ ഉയർന്നിരുന്നു. പ്രായോഗികമല്ലാത്തതും ആവര്‍ത്തന സ്വഭാവമുള്ളതുമായ ശുപാര്‍ശകൾ ഒഴിവാക്കിയപ്പോൾ ബാക്കി 156 ആയി. ഇതിന്മേൽ തുടർ നടപടികൾ സർക്കാർ സ്വീകരിച്ചു വരുന്നതേയുള്ളൂ. രണ്ടാം കേരള സഭയിൽ ഏറ്റവുമധികം ചർച്ചയായതാണ് പ്രവാസികളുടെ ഉന്നമനത്തിനായി ഒരു നിയമം കൊണ്ടു വരാനുള്ള തീരുമാനം. നിയമസഭയിൽ അവതരിപ്പിക്കേണ്ട ബിൽ ലോക കേരള സഭയിൽ അവതരിപ്പിച്ചതാണ് എതിർപ്പുകൾക്കു കാരണമായത്. എന്നാൽ, തീരുമാനവുമായി സർക്കാർ മുന്നോട്ടു പോയെങ്കിലും വർഷം രണ്ടു കഴിഞ്ഞിട്ടും നിയമസഭയിൽ ബിൽ അവതരിപ്പിച്ചു പാസാക്കാൻ സർക്കാരിനു കഴിഞ്ഞിട്ടില്ല. 

∙ പ്രവാസികൾ പറയുന്നു: പ്രശ്നങ്ങളും പരിഹാരങ്ങളും 

ജൂൺ 18ന് അവസാനിച്ച മൂന്നാം ലോക കേരള സഭയിൽ ആദ്യ ദിവസം ഉയർന്നുപ്രധാന നിർദേശങ്ങൾ ഇവയാണ്: 

1) കെയർ ഹോം മേഖലയിലെ വ്യവസായ സാധ്യതകൾ കേരളം  ഉപയോഗപ്പെടുത്തണമെന്ന് കാനഡയിൽ നിന്നുള്ള പ്രതിനിധികൾ നിർദേശിച്ചു. വയോജനങ്ങൾക്ക് കരുതലും ഒപ്പം ഒട്ടേറെ തൊഴിലവസരങ്ങളും ഉറപ്പാക്കുന്ന മേഖലയാണിത്. 

2) ഗ്രീൻ ഹൈഡ്രജൻ പദ്ധതികൾക്ക് കൂടുതൽ പ്രാധാന്യം നൽകേണ്ടതുണ്ട്. സുസ്ഥിര വികസനത്തെ സാധ്യമാക്കുന്ന ഈ ആശയത്തിലാണ് ലോക രാജ്യങ്ങൾ ഇപ്പോൾ ശ്രദ്ധ കേന്ദ്രീകരിക്കുന്നത്. അതുകൊണ്ടുതന്നെ കേരളവും ഈ മേഖലയിലെ പുത്തൻ സാധ്യതകളിലേക്ക് വരേണ്ടതുണ്ട്. 

3) മിഡിൽ ഈസ്റ്റ് രാജ്യങ്ങളെ അടിസ്ഥാനമാക്കിയാണ് കേരളത്തിൽ നിലവിലുള്ള വ്യവസായങ്ങൾ മിക്കതും. എന്നാൽ സിംഗപ്പൂർ, മലേഷ്യ പോലുള്ള രാജ്യങ്ങളിൽനിന്ന് ധാരാളം കാര്യങ്ങൾ പഠിക്കാനുണ്ട്.

4) പ്രവാസി ക്ഷേമം ഉറപ്പു വരുത്തുന്നതിനായി ത്രിതല പഞ്ചായത്തുകളിൽ പ്രവാസികൾക്കു മാത്രമായി സ്റ്റാൻഡിങ് കമ്മിറ്റികൾ വേണം. 

5) ജോലിയിടങ്ങളിൽ തന്നെ പ്രവാസികൾക്കു സംസ്ഥാന സർക്കാരിന്റെ സേവനങ്ങൾ ഓൺലൈനായി ലഭ്യമാക്കുന്ന രീതി വേണം. തിരികെയെത്തുന്ന പ്രവാസികൾക്ക് സംരംഭങ്ങൾ ആരംഭിക്കുന്നതിനായുള്ള നടപടികൾ ലഘൂകരിക്കണം.