സാഹചര്യം അതിസങ്കീർണം; ജൂലൈയിലെ ആ കണക്കുകൾ പറയും ലോകം മാന്ദ്യത്തിലേക്കോ?

എന്നാൽ മോർഗൻ സ്റ്റാൻലി സിഇഒ ജയിംസ് ഗോർമാൻ പറയുന്നത് ഇപ്പോഴുള്ളത് ചെറിയ മാന്ദ്യം (മൈനർ റിസഷൻ) മാത്രമാണെന്നാണ്. ബാങ്ക് ഓഫ് അമേരിക്കയുടെ വിലയിരുത്തൽ പ്രകാരം, വലിയ മാന്ദ്യത്തെ പ്രതിരോധിക്കാനാവുന്ന സ്ഥിതിയിലാണ് ലോകം. സാമ്പത്തിക ശാസ്ത്രത്തിൽ നൊബേൽ സമ്മാനം നേടിയ പോൾ ക്രൂഗ്‌മാൻ, പണപ്പെരുപ്പത്തെ പ്രതിരോധിക്കാൻ കഴിയുന്ന തരത്തിലേക്ക് വളർച്ചാ നിരക്ക് കുറയുന്നതാണെന്നും ഇതൊരു മാന്ദ്യമായി കണക്കാക്കേണ്ടതില്ലെന്നും പറയുന്നു. 2008ലെ ആഗോള മാന്ദ്യത്തെ കൃത്യമായി പ്രവചിച്ചയാളാണ് പോൾ ക്രൂഗ്‌മാൻ. അമേരിക്കൻ ഫെഡറൽ റിസർവും പലിശ നിരക്കുകൾ ഉയർത്തിക്കൊണ്ട് ഇതേ അഭിപ്രായമാണു പങ്കുവയ്ക്കുന്നത്.

വിലപ്പെരുപ്പവും പെട്ടെന്നുണ്ടായ വളർച്ചാ മുരടിപ്പും പലിശ ഉയർത്തലും വർഷാവസാനത്തോടെ ലോക സമ്പദ്‌വ്യവസ്ഥ ചെറിയ തോതിലുള്ള മാന്ദ്യത്തിലേക്കു കടക്കുമെന്നതിന്റെ സൂചനയാണെന്ന് സാമ്പത്തികകാര്യ കമ്പനി നൊമൂറയും മുന്നറിയിപ്പു നൽകുന്നു. ഒരു വർഷത്തിനുള്ളിൽ അമേരിക്ക മാന്ദ്യത്തിലേക്കു കടക്കുമെന്നുള്ള സാധ്യത 30 ശതമാനമെന്നാണ് ഗോൾഡ്മാൻ സാക്സ് പറയുന്നത്. കുറച്ചുനാൾ മുൻപു വരെ 15 ശതമാനം മാത്രമായിരുന്നു ഈ സാധ്യത. മോർഗൻ സ്റ്റാൻലിയുടെ പ്രവചനമനുസരിച്ച് മാന്ദ്യത്തിനുള്ള സാധ്യത 50 ശതമാനമാണ്. ഡ്യൂഷേ ബാങ്ക് 2023ൽ വലിയ മാന്ദ്യം പ്രവചിക്കുന്നുണ്ട്. അമേരിക്കയുടെ വളർച്ചയിൽ അര ശതമാനം ഇടിവ് 2023ൽ സംഭവിക്കുമെന്നും തൊഴിലില്ലായ്മ നിരക്ക് 2024ൽ 5.5 ശതമാനം കടക്കുമെന്നും ബാങ്ക് പ്രവചിക്കുന്നു.

∙ ഐഎംഎഫ് പറയുന്നത്...

അതേസമയം ഇന്റർനാഷനൽ മോണിറ്ററി ഫണ്ട് (ഐഎംഎഫ്) പങ്കുവയ്ക്കുന്നത് വ്യത്യസ്തമായ അഭിപ്രായമാണ്. അമേരിക്കയുടെ സാമ്പത്തിക വളർച്ച മുരടിക്കുമെന്നും പക്ഷേ, 2022ലും 2023ലും ആഗോള സാമ്പത്തിക മാന്ദ്യത്തിനുള്ള സാഹചര്യമില്ലെന്നും ഐഎംഎഫ് വിലയിരുത്തുന്നു. മാന്ദ്യത്തിലേക്കു പോകാതിരിക്കാനുള്ള കടമ്പകൾ അത്ര എളുപ്പമല്ലെന്നും ഐഎംഎഫ് പറയുന്നുണ്ട്. അടിസ്ഥാന നിരക്ക് 3.5 മുതൽ 4 വരെ ഉടനടി എത്തിക്കാനുള്ള ലക്ഷ്യത്തിലാണ് അമേരിക്കൻ ഫെഡറൽ റിസർവ്. പണലഭ്യത പരമാവധി കുറച്ച് പണപ്പെരുപ്പത്തെ മാസങ്ങൾക്കുള്ളിൽ വരുതിയിൽ കൊണ്ടുവരാനാണ് ഈ ശ്രമങ്ങൾ. 2022, 2023 വർഷങ്ങൾ അതീവ നിർണായകമാണെങ്കിലും മാന്ദ്യത്തെ പിടിച്ചുകെട്ടാനുള്ള നീക്കങ്ങൾ അത്ര ശക്തമായിത്തന്നെ മറുവശത്തു നടക്കുന്നുണ്ടെന്നും ഐഎംഎഫ് മാനേജിങ് ഡയറക്ടർ ക്രിസ്റ്റലിന ജോർജീവ പറയുന്നു.

∙ ഗൂഗിളിനോട് ചോദിക്കുന്നവർ

റിസഷൻ (സാമ്പത്തിക മാന്ദ്യം) എന്ന വാക്ക് ഇപ്പോൾ ഗൂഗിളിൽ തിരയുന്നവരുടെ എണ്ണം കുത്തനെ കൂടിയിട്ടുണ്ട്. അമേരിക്കയിൽ തുടങ്ങി ലോകത്താകെമാനം പടർന്നു പിടിക്കുന്ന മാന്ദ്യത്തെ പേടിയോടെ കാത്തിരിക്കുന്നവർ നിക്ഷേപകർ മാത്രമല്ല, സാധാരണക്കാരുമുണ്ട്. 2008ൽ അമേരിക്കൻ സമ്പദ്‌വ്യവസ്ഥ മൂക്കുംകുത്തി വീണ മാന്ദ്യത്തിന്റെ സമയത്തേതിനേക്കാൾ മാന്ദ്യവുമായി ബന്ധപ്പെട്ട വാർത്തകൾക്കും വിവരങ്ങൾക്കുമായി ആളുകൾ ഗൂഗിളിനെ ഇപ്പോൾ ആശ്രയിക്കുന്നുണ്ടെന്ന് കണക്കുകൾ വ്യക്തമാക്കുന്നു. സാധാരണക്കാരുടെ മനസ്സിൽ മാന്ദ്യം എന്ന ചിന്തയുണ്ടാക്കുന്നത് ഫെഡറൽ റിസർവിന്റെ നടപടികളാണ്. ഇത്രയും വേഗത്തിൽ അമേരിക്ക പലിശ നിരക്ക് കൂട്ടുന്നത് 1981നു ശേഷം ഇതാദ്യമാണ്.1994നു ശേഷമുള്ള ഏറ്റവും വലിയ ഏകദിന പലിശ ഉയർത്തലാണ് ഫെഡ് കഴിഞ്ഞ ദിവസം നടത്തിയത്. മുക്കാൽ ശതമാനമാണ് ഒറ്റയടിക്കു കൂട്ടിയത്.

∙ അമേരിക്ക തുടക്കക്കാരാകുന്നതെങ്ങനെ?

അമേരിക്കൻ സമ്പദ്‌വ്യവസ്ഥയുടെ സ്ഥിതി പരിശോധിച്ചാൽ ലോകം മുഴുവൻ മാന്ദ്യത്തിലേക്കു പോകുകയാണെന്നു പറയാനാകുമോ? ആകുമെന്ന് ഒരു പരിധി വരെ പറയേണ്ടി വരും. ഇതിന്റെ പ്രധാന കാരണം അമേരിക്ക ലോകത്തിലെ ഏറ്റവും വലിയ സമ്പദ്‌വ്യവസ്ഥ ആണെന്നതു തന്നെയാണ്. ആഗോള ജിഡിപിയുടെ നാലിൽ ഒരു ഭാഗം അമേരിക്കയുടെ സംഭാവനയാണ്. മാത്രമല്ല, രാജ്യാന്തര ഇടപാടുകൾക്കും വ്യാപാരങ്ങൾക്കും ഏറ്റവും കൂടുതൽ ഉപയോഗിക്കുന്ന കറൻസി അമേരിക്കൻ ഡോളറാണ്. ലോകത്തെ ആകെ വിദേശ നിക്ഷേപത്തിന്റെ (എഫ്ഡിഐ) അഞ്ചിൽ ഒന്ന് അമേരിക്കയിൽ നിന്നാണ്.

∙ എന്താണ് മാന്ദ്യം...?

തൊട്ടടുത്തുള്ള രണ്ട് പാദങ്ങളിൽ (ത്രൈമാസം) സാമ്പത്തിക വളർച്ച കുറയുന്നതാണ് സാമ്പത്തിക മാന്ദ്യത്തിന്റെ ലക്ഷണം. അതായത് 6 മാസത്തെ നെഗറ്റീവ് വളർച്ച. സാമ്പത്തിക പ്രവർത്തനങ്ങളുടെ വേഗം കുറയലാണ് മാന്ദ്യം. ഈ മാന്ദ്യം മാസങ്ങളോളം തുടർന്നാൽ അത് ആഗോള സാമ്പത്തിക മാന്ദ്യമാകും. തൊഴിലവസരങ്ങളിലെ കുറവ്, ചെലവു ചുരുക്കലിന്റെ ഭാഗമായി കമ്പനികളിലെ കൂട്ടപ്പിരിച്ചുവിടൽ, ആളുകളുടെ പ്രതിശീർഷ വരുമാനത്തിലുണ്ടാകുന്ന ഇടിവ് ഇവയെല്ലാം മാന്ദ്യത്തിന്റെ അളവുകോൽ ആകാറുണ്ട്. തൊഴിൽ നഷ്ടവും തൊഴിലില്ലായ്മ നിരക്കിലെ വർധനയും മാന്ദ്യത്തിന്റെ ആദ്യ സൂചനകൾ നൽകുന്ന വിവരങ്ങളായി മാറാറുമുണ്ട്.

എന്തായാലും അമേരിക്കൻ ജനത ചെലവുകൾ ഇപ്പോൾ വല്ലാതെ കുറച്ചിട്ടുണ്ട്. കാറുകളും വീടുകളും ഇലക്ട്രോണിക്സ് ഉൽപന്നങ്ങളും വാങ്ങുന്നത് നന്നേകുറച്ചു. ഹോളിഡേ ആഘോഷങ്ങളെപ്പറ്റിയുള്ള ചിന്തകൾ പലർക്കുമില്ല. ഹോട്ടലിൽ പോയുള്ള ഭക്ഷണം കഴിക്കലുകളും എന്തിന് ആഘോഷമായി മുടിവെട്ടുന്നതുവരെ കുറച്ചിട്ടുണ്ട്. ഓഹരി വിപണികളിലൂടെ നിക്ഷേപകർക്ക് മാസങ്ങൾക്കൊണ്ട് നഷ്ടമായതു കോടികളാണ്. തൊഴിൽരഹിതരുടെ എണ്ണം കൂടുന്നു. ശമ്പള വർധനയെപ്പറ്റി സമീപഭാവിയിൽ വലിയ പ്രതീക്ഷകളില്ല. താമസത്തിനുള്ള ചെലവേറുന്നു. ഈ സാഹചര്യത്തിൽ വരുമാനം വളരെ ചുരുക്കി ചെലവഴിക്കുകയാണിവർ.

ആദ്യ ത്രൈമാസത്തിൽ (ജനുവരി–മാർച്ച്) അമേരിക്കയുടെ ജിഡിപി വളർച്ച കുറയുകയാണുണ്ടായത്. ജൂലൈ ആദ്യം രണ്ടാം പാദത്തിന്റെ കണക്കുകൾ പുറത്തുവരും. ഈ ത്രൈമാസത്തിലും വളർച്ച താഴേക്കാണെങ്കിൽ സാങ്കേതികമായി അമേരിക്കയും ലോകം തന്നെയും മാന്ദ്യത്തിലാണെന്നു പറയേണ്ടി വരും. നാഷനൽ ബ്യൂറോ ഓഫ് ഇക്കണോമിക് റിസർച്ചിന്റെ കണക്കു പ്രകാരം 11 മാസമാണ് ആധുനിക കാലത്തിലെ മാന്ദ്യം നീണ്ടുനിൽക്കുക. അതിനുള്ളിൽ പ്രതിരോധ നടപടികൾ ഫലം കണ്ടു തുടങ്ങിയേക്കും. കോവിഡ് മഹാമാരി മൂലമുണ്ടായ മാന്ദ്യം 2 മാസം മാത്രമായിരുന്നു നീണ്ടു നിന്നതെന്നും എൻബിഇആറിന്റെ റിപ്പോർട്ടിൽ പറയുന്നു. അതേസമയം 2008ലെ ആഗോള മാന്ദ്യം 18 മാസം നീണ്ടുനിന്നെന്നാണു കണക്ക്.

∙ പണപ്പെരുപ്പം കൂടാനുള്ള കാരണം

40 വർഷത്തെ ഏറ്റവും ഉയർന്ന പണപ്പെരുപ്പത്തിലേക്ക് അമേരിക്ക പോകാനുള്ള കാരണം ഉയർന്ന ചെലവഴിക്കൽ തന്നെയാണ്. കോവിഡിനു മുൻപുള്ള രണ്ടു വർഷം അമേരിക്ക സാമ്പത്തികമായി നേട്ടത്തിന്റെ പാതയിലായിരുന്നു. ദശലക്ഷക്കണക്കിനു പുതിയ തൊഴിലവസരങ്ങൾ സൃഷ്ടിക്കപ്പെട്ടു. ഇതിനൊപ്പം ശമ്പള വർധന കൂടിയാപ്പോൾ ആളുകളുടെ കയ്യിൽ കൂടുതൽ പണമെത്തി. പുതിയ വീടുകൾ, കാറുകൾ, ഇലക്ട്രോണിക്സ് ഉൽപന്നങ്ങൾ തുടങ്ങി വലിയ പർച്ചേസുകൾ അവർ ഇഷ്ടംപോലെ നടത്തി. ഈ ചെലവഴിക്കലിന്റെ സമയത്ത് എത്തിയ കോവിഡ് മഹാമാരി, ഉൽപാദനവും ഉൽപന്നങ്ങളുടെ വിതരണ വേഗവും വല്ലാതെ കുറച്ചു. ഈ അധികവാങ്ങലും പെട്ടെന്നുണ്ടായ ഉൽപാദനക്കുറവും വിതരണശൃംഖലയുടെ വേഗം കുറയലുമെല്ലാം ഉൽപന്ന ക്ഷാമമുണ്ടാക്കി. ഇത് വലിയ വിലക്കയറ്റത്തിലേക്ക് നയിച്ചു. ഈ വിലക്കയറ്റം വിലപ്പെരുപ്പമായി മാറി.