ആ തീരുമാനം ഇന്ത്യൻ വിപണിയെ വിറപ്പിച്ചില്ല; അവസാനിക്കുന്നോ അമേരിക്കൻ ‘പലിശപ്പേടി?’

ഫെഡറൽ റിസർവിന്റെയോ, അമേരിക്കയുടെയോ മറ്റു രാജ്യങ്ങളുടെയോ സാമ്പത്തിക നയങ്ങൾക്കൊണ്ടു മാത്രമല്ല, ക്രിപ്റ്റോ കറൻസികൾ വലിയ തോതിൽ ഇടിയുന്നത്. മാന്ദ്യത്തിന്റെ പശ്ചാത്തലത്തിൽ നിക്ഷേപങ്ങളുടെ സുരക്ഷിതത്വം ഇപ്പോൾ കൂടുതൽ ചർച്ചയാകുന്നുണ്ട്. വലിയ തോതിലുള്ള പലിശ വർധന ഒറ്റയടിക്കുണ്ടാവില്ലെന്ന പ്രസ്താവന ഫെഡറൽ റിസർവ് ചെയർമാൻ ജെറോം പവൽ നടത്തിയതോടെ ബിറ്റ്കോയിന്റെ മൂല്യം ഇന്നലെ (ജൂലൈ 27) നേരിയ തോതിൽ ഉയർന്നു.

∙ ഓഹരി വിപണികളിൽ വലിയ കുതിപ്പ്

ഒരു ശതമാനം പലിശ ഉയർത്തൽ അമേരിക്കയിൽ നിന്നുണ്ടാകുമെന്നായിരുന്നു വിപണികൾ പ്രതീക്ഷിച്ചത്. എന്നാൽ മുക്കാൽ ശതമാനം വർധനയേ ഇത്തവണ ഉണ്ടായുള്ളൂ. മാത്രമല്ല, പലിശ ഉയർത്തൽ വിപണികൾ പ്രതീക്ഷിച്ചതുമായിരുന്നു. പലിശ ഉയർത്തിയതിന്റെ തൊട്ടടുത്ത ദിവസം വിപണിയിലുണ്ടാകുന്ന നേട്ടത്തിന്റെ പ്രധാന കാരണങ്ങൾ ഇവയൊക്കെയാണ്. അമേരിക്കൻ ഓഹരി വിപണിയും നേട്ടത്തോടെയാണ് ഫെഡറൽ റിസർവ് തീരുമാനത്തെ വരവേറ്റത്. ഓസ്ട്രേലിയ, ജപ്പാൻ, സൗത്ത് കൊറിയ, ഇന്ത്യ തുടങ്ങിയ രാജ്യങ്ങളുടെ ഓഹരി സൂചികകളും നേട്ടമുണ്ടാക്കി. അമേരിക്കയുടെ എസ്ആൻഡ്പി500 സൂചിക 2.6 ശതമാനമാണ് നേട്ടമുണ്ടാക്കിയത്. നാസ്ഡാക്–10,0 2020 നു ശേഷമുള്ള ഏറ്റവും മികച്ച ഏകദിന നേട്ടം കൊയ്തു.

അടിക്കടി, അതിവേഗം പലിശ ഉയർത്തൽ അല്ല ഫെഡറൽ റിസർവ് നയമെന്ന് ഇന്നലെ ഫെഡ് ചെയർമാൻ ജെറോം പവൽ വ്യക്തമാക്കിയിരുന്നു. പെട്ടെന്നുള്ള പലിശ വർധന സമ്പദ്‌വ്യവസ്ഥയ്ക്കുണ്ടാക്കിയേക്കാവുന്ന ആഘാതം കൂടി മുന്നിൽക്കണ്ടാണ് അദ്ദേഹം ഇങ്ങനെ പറഞ്ഞത്. ചെറിയ തോതിലുള്ള വർധനയാകും വരും തവണകളിലുണ്ടാവുകയെന്നും തുടർച്ചയായ ചർച്ചകളിലൂടെ കൃത്യമായ പണനയം ഫെഡറൽ റിസർവ് കൈക്കൊള്ളുമെന്നും അദ്ദേഹം വ്യക്തമാക്കി. ഓഹരി വിപണികൾ ഉയരത്തിലെത്താൻ ഫെഡ് ചെയർമാന്റെ ഈ പ്രഖ്യാപനവും കാരണമായി. പലിശ നിരക്ക് ഉയർത്തുന്നതുവഴി മറ്റൊരു തലത്തിൽ മാന്ദ്യത്തെ പ്രതിരോധിക്കാനുള്ള ശ്രമങ്ങളാണ് അമേരിക്ക നടത്തുന്നത്. ഇതും ഓഹരി വിപണികളെ പോസിറ്റീവായി സ്വാധീനിക്കുന്നുണ്ട്. അമേരിക്കൻ വിപണികളിലും ഏഷ്യൻ വിപണികളിലുമുണ്ടായ നേട്ടത്തിന്റെ തുടർച്ചയാണ് ഇന്ത്യൻ വിപണിയിലുണ്ടായത്.

∙ പലിശപ്പേടി കഴിഞ്ഞോ?

ഇന്ത്യൻ ഓഹരി വിപണിയുടെ അമേരിക്കയുടെ പലിശ നിരക്കും തമ്മിൽ വലിയ ബന്ധമുണ്ട്. അമേരിക്കയുടെ സാമ്പത്തിക നയങ്ങളും പലിശ നിരക്കും ഇന്ത്യൻ സമ്പദ്‌വ്യവസ്ഥയെ ആഴത്തിൽ സ്വാധീനിക്കുമെന്നതു തന്നെയാണിതിന്റെ കാരണം. 2008 ലെ ആഗോള സാമ്പത്തിക മാന്ദ്യത്തിന്റെ സമയത്ത് ഇന്ത്യ അടക്കമുള്ള വികസ്വര രാജ്യങ്ങളിലേക്ക് വൻതോതിൽ നിക്ഷേപമെത്തിയിരുന്നു. അമേരിക്കയിൽ പലിശ പൂജ്യത്തിനടുത്തായതോടെയാണ് ഇന്ത്യയിലെ ഓഹരി വിപണിയിലേക്കും ബോണ്ട് വിപണിയിലേക്കുമുള്ള നിക്ഷേപം ഇത്തരത്തിൽ കൂടിയത്. പണമെത്തിയതോടെ ഇവിടത്തെ ഓഹരി വിപണികൾ വലിയ കുതിപ്പു നടത്തി.

എന്നാൽ തൊട്ടടുത്ത വർഷങ്ങളിൽ തന്നെ അമേരിക്ക പലിശ ഉയർത്തുമെന്നും പലിശ ഉയർത്തിയാൽ ഈ നിക്ഷേപമെല്ലാം ഒറ്റയടിക്ക് ഡോളറിൽ പിൻവലിക്കപ്പെടുമെന്നുമുള്ള അഭ്യൂഹങ്ങൾ വിപണിയിൽ പരന്നു. ഈ അഭ്യൂഹങ്ങളെല്ലാം വലിയ ഇടിവുകൾ വിപണിയിലുണ്ടാക്കുകയും ചെയ്തു. ഇതിനിടെ നിക്ഷേപം പിൻവലിക്കൽ പ്രക്രിയയും ആരംഭിച്ചു. അമേരിക്ക പലിശ ഉയർത്തിയേക്കുമെന്ന സൂചനകൾ വരുമ്പോൾ തന്നെ ഇത്തരത്തിലുള്ള പിന്മാറ്റം ഇന്ത്യൻ വിപണിയിൽ നിന്നുണ്ടാകാറുണ്ട്. കോവിഡ് മഹാമാരിയിലും തുടർന്നും ഇത്തരം വൻതോതിലുള്ള പിൻവാങ്ങൽ വിദേശ പോർട്ട്ഫോളിയോ നിക്ഷേപകരുടെ ഭാഗത്തുനിന്നുണ്ടായി.

2.74 ട്രില്യൻ അമേരിക്കൻ ഡോളറാണ് കഴിഞ്ഞ സാമ്പത്തിക വർഷം വിദേശ നിക്ഷേപകർ ഇന്ത്യൻ ഓഹരി വിപണിയിൽ നിന്നു പിൻവലിച്ചത്. ഇത് റെക്കോർഡ് പിന്മാറ്റമാണ്. എന്നാൽ ഇപ്പോൾ ആഭ്യന്തര നിക്ഷേപകർ വിപണിയിൽ കൂടുതൽ സജീവമാകുന്നുണ്ട്. റീട്ടെയ്ൽ നിക്ഷേപകരുടെ എണ്ണവും ഉയർന്നു. പല ദിവസങ്ങളിലും വിദേശ നിക്ഷേപകരുടെ അറ്റ വിൽപനയേക്കാൾ ആഭ്യന്തര നിക്ഷേപകരുടെ അറ്റ വാങ്ങൽ വിപണിയിൽ ഉയർന്നു നിൽക്കുകയും സൂചികകൾ നേട്ടത്തിലാകുകയും ചെയ്യുന്നുണ്ട്. മാത്രമല്ല, അമേരിക്കൻ മാന്ദ്യം ഇന്ത്യൻ വിപണിയിലുണ്ടാക്കിയേ ക്കാവുന്ന ആഘാതം വളരെ ചെറുതായിരിക്കുമെന്ന റിപ്പോർട്ടുകളും കഴിഞ്ഞ ദിവസം പുറത്തുവന്നിരുന്നു. 2009 മുതൽ വിപണിയിൽ നിലനിന്നിരുന്ന പലിശ ഉയർത്തൽ ഭയത്തിന്റെ തീവ്രത ഇപ്പോൾ വളരെ കുറഞ്ഞുവെന്നു തന്നെ വേണം കരുതാൻ.

∙ സ്വർണവും നേട്ടത്തിൽ

ഫെഡറൽ റിസർവ് പലിശ ഉയർത്തിയാൽ സ്വർണവിലയിൽ സാധാരണ ഇടിവുണ്ടാകുകയായിരുന്നു പതിവ്. എന്നാൽ ഇന്നലെ (ജൂലൈ 27) പലിശ വർധനയെ തുടർന്ന് സ്വർണ വില അൽപം ഉയരുകയാണു ചെയ്തത്. പലിശ ഉയർത്തുന്നതോടെ ഡോളർ കൂടുതൽ ശക്തമാകുന്നതായിരുന്നു സ്വർണത്തിന്റെ തിളക്കം കുറച്ചിരുന്നത്. എന്നാൽ രാജ്യാന്തര വിപണിയിൽ ട്രോയ് ഔൺസിന് (31.1 ഗ്രാം സ്വർണം) രണ്ടു ഡോളറിന്റെ നേട്ടമുണ്ടായി. 1740 ഡോളർ നിലവാരത്തിലാണ് സ്വർണവില. കേരളത്തിൽ പവന് 280 രൂപ ഉയർന്നു. 37,440 രൂപയാണ് ഒരു പവന്റെ വില.

∙ രൂപ ഇനിയും തളരുമോ?

കഴിഞ്ഞ ജനുവരി മുതൽ ഡോളറിനെതിരെ രൂപ ദുർബലമാകുകയാണ്. ഡോളർ ശക്തമാകുന്നത് എല്ലാ രാജ്യങ്ങളുടെയും കറൻസികളുടെ മൂല്യമിടിക്കുന്നുണ്ട്. 74.25 ൽ നിന്ന് 80 കടന്നും ഡോളറിനെതിരെ രൂപ 6 മാസത്തിനുള്ളിൽ ഇടിഞ്ഞു. 25,752 കോടിയാണ് ജനുവരി മുതൽ ഇന്ത്യൻ ഓഹരി വിപണിയിലേക്കു വന്ന വിദേശ നിക്ഷേപം. 1.92 ലക്ഷം കോടി രൂപ ജനുവരി– മേയ് കാലയളവിൽ പിൻവലിക്കപ്പെട്ടു. പലിശ ഉയർത്തൽ മൂലം ഡോളർ കരുത്താർജിക്കുന്നതു രൂപയുടെ മൂല്യം ഇനിയും ഇടിച്ചേക്കും.