സ്വാദിഷ്ടം നവരാത്രി സ്പെഷൽ അവല്‍ വിളയിച്ചത്

എളുപ്പത്തില്‍ തയാറാക്കാവുന്ന ഈ നാടന്‍ പലഹാരം ബാക്കിയുണ്ടെങ്കില്‍ നന്നായി തണുത്ത ശേഷം വെള്ളമയമില്ലാത്ത വായു കടക്കാത്ത പാത്രത്തിലാക്കി സൂക്ഷിക്കാം. ഒരാഴ്ച വരെ ഫ്രിഡ്‌ജില്‍ വച്ചില്ലെങ്കിലും കേടാകില്ല.

ചേരുവകൾ:

• അവൽ - 250 ഗ്രാം
• തേങ്ങ ചിരവിയത് - 2 കപ്പ്
• ശർക്കര - 300-400 ഗ്രാം
• വെള്ളം - 1/2 കപ്പ്
• ഏലക്ക പൊടി - 1 ടീസ്പൂണ്‍
• അണ്ടിപ്പരിപ്പ് - 1/4 കപ്പ്
• പൊട്ടുകടല - 3 ടേബിള്‍സ്പൂണ്‍
• കറുത്ത എള്ള്- 1 ടേബിള്‍സ്പൂണ്‍
• നെയ്യ് - 2 ടേബിള്‍സ്പൂണ്‍

പാകം ചെയ്യുന്ന വിധം:

• അവൽ ചെറുതായി ചൂടാക്കിയെടുക്കുക.
• ശർക്കര വെള്ളം ഒഴിച്ച് ചെറിയ തീയില്‍ അലിയിച്ച് അരിച്ചെടുക്കുക. ശർക്കരപ്പാനി പാനിലൊഴിച്ച് തേങ്ങ ചേർത്തു 4-5 മിനിറ്റ് വരട്ടിയെടുക്കുക.
• ശേഷം തീ ഏറ്റവും കുറച്ച് വച്ച് ഇതിലേക്ക് ഏലക്ക പൊടിയും അവലും ചേര്‍ത്ത് നന്നായി യോജിപ്പിക്കുക. 
• പകുതി അവല്‍ യോജിപ്പിച്ച് കഴിഞ്ഞാല്‍ തീ ഓഫ് ചെയ്യാം.
• വേറൊരു പാനിൽ നെയ്യൊഴിച്ച്   അണ്ടിപ്പരിപ്പ്, പൊട്ടുകടല, എള്ള് എന്നിവ വറുത്ത് അതിലെ നെയ്യോടുകൂടി അവല്‍ വിളയിച്ചതിലേക്ക് ചേര്‍ത്ത് നന്നായി യോജിപ്പിക്കുക.
• സ്വാദിഷ്ടമായ അവല്‍ വിളയിച്ചത് റെഡി! കുറച്ചൊന്ന് ചൂടാറുമ്പോള്‍ കഴിച്ച് തുടങ്ങാം.

English Summary : Aval Vilayichathu, Kerala traditional recipe.