കഷ്ടിച്ചു 10 മിനിറ്റ് മാത്രം നീണ്ടുനിന്നൊരു പ്രസംഗം, നാലു മിനിറ്റ് വരുന്നൊരു പാട്ട്. അത്ര തന്നെ. തമിഴ് സിനിമയിലെ നിലവിലെ ഏറ്റവും വലിയ താരം രാഷ്ട്രീയപ്രവേശം വ്യക്തമാക്കിക്കഴിഞ്ഞു. ദളപതി വിജയ് രാഷ്ട്രീയത്തിലിറങ്ങുമോ എന്ന ചോദ്യത്തിന് ഇനി പ്രസക്തിയില്ല. അത് എപ്പോൾ സംഭവിക്കും എന്ന ചോദ്യത്തിനും ജൂൺ 17ലെ ആ പ്രസംഗത്തോടെ ഏറെക്കുറെ ഉത്തരമായിക്കഴിഞ്ഞു. തന്റെ രാഷ്ട്രീയത്തിന്റെ ഉള്ളടക്കത്തെക്കുറിച്ചും വിജയ് സൂചന നൽകിയിട്ടുണ്ട്. ജൂൺ 22ന് 49–ാം പിറന്നാളിന് പുതിയ പടത്തിലെ പാട്ട് പുറത്തിറങ്ങിയതോടെ വിജയ്‌യുടെ രാഷ്ട്രീയ പ്രവേശം സംബന്ധിച്ച് അനൗദ്യോഗിക പ്രഖ്യാപനമായി എന്നുതന്നെ കരുതുന്നവരുമുണ്ട്.

∙ ‘അണ്ണൻ ഇറങ്ങി വരട്ടേ’?

‘ഞാൻ റെഡി; വരട്ടേ? അണ്ണൻ ഇറങ്ങി വരട്ടേ?’ എന്ന ആ പാട്ടിന്റെ വരികൾക്കിടയിലെ അർഥം ചികയുകയാണു തമിഴ് മാധ്യമങ്ങൾ. വിജയ് ആരാധകരുടെ ഔദ്യോഗിക സംഘടനയായ വിജയ് മക്കൾ ഇയക്കം ജൂൺ 17ന് ചെന്നൈ നീലാങ്കരയിൽ നടത്തിയ വിദ്യാഭ്യാസ പുരസ്‌കാര വിതരണ സമ്മേളനത്തിൽ ആയിരത്തിയഞ്ഞൂറോളം വിദ്യാർഥികൾ പങ്കെടുത്തിരുന്നു. തമിഴ്നാട്ടിലെ ഓരോ നിയമസഭാ നിയോജക മണ്ഡലത്തിൽനിന്നും 6 പേർ വീതം. 10, പ്ലസ്ടു ക്ലാസില്‍ മണ്ഡലത്തിൽ ഏറ്റവുമധികം മാർക്ക് വാങ്ങിയ 3 പേരെ വീതമാണ് ഇതിനായി തിരഞ്ഞെടുത്തിരുന്നത്.

‘നാളത്തെ വോട്ടർമാർ’ എന്നാണു വിജയ് പ്രസംഗത്തിൽ ആ കുട്ടികളെ വിശേഷിപ്പിച്ചത്. ‘ഒന്നോ രണ്ടോ വർഷം കഴിഞ്ഞ് കന്നിവോട്ടർമാരായി പോളിങ് ബൂത്തുകളിലേക്ക് പോകുന്നവരാണ് നിങ്ങൾ. അടുത്തടുത്തായി നല്ല പുതിയ നേതാക്കളെ നിങ്ങളാണ് തിരഞ്ഞെടുക്കേണ്ടത്’-വിജയ് അവരോടു പറഞ്ഞു. നിറഞ്ഞ കയ്യടിയോടെയാണ് സദസ്സ് ഈ വാക്കുകളെ ഏറ്റെടുത്തത്. ‘പണം വാങ്ങി വോട്ട് ചെയ്യരുതെന്ന് നിങ്ങൾ നിങ്ങളുടെ അച്ഛനോടും അമ്മയോടും പറയണം’ - വിജയ് ഓർമിപ്പിച്ചു. പാഠപുസ്തകത്തിന് അപ്പുറത്തുനിന്നും കാര്യങ്ങൾ പഠിക്കണമെന്നും വിജയ് കുട്ടികളെ ഉപദേശിച്ചു. ‘വലിയ വലിയ നേതാക്കളെക്കുറിച്ചു നിങ്ങൾ അറിഞ്ഞിരിക്കണം. അംബേദ്കറെക്കുറിച്ച് അറിയണം. പെരിയാറിനെക്കുറിച്ച് അറിയണം. കാമരാജറെക്കുറിച്ച് അറിയണം’. ആ ഉപദേശത്തിൽ ദളപതിയുടെ രാഷ്ട്രീയത്തിന്റെ ഉള്ളടക്കമുണ്ടെന്നു തമിഴ് രാഷ്ട്രീയ ലോകത്തിനു ബോധ്യപ്പെട്ടിട്ടുണ്ട്.

അണ്ണാദുരൈയെയും കരുണാനിധിയെയും എംജിആറിനെയും ജയലളിതയെയുമെല്ലാം മറന്ന്, അധഃസ്ഥിതരുടെ നായകൻ, ഭരണഘടനാ ശിൽപി ഡോ.ബി.ആർ.അംബേദ്കറെയും, ബ്രാഹ്‌മണാധിപത്യത്തിൽ നിന്ന് ദ്രാവിഡ ജനതയെ മോചിപ്പിക്കാൻ ജനകീയ പ്രസ്ഥാനത്തിനു തുടക്കമിട്ട, തമിഴകത്തിൽ യുക്തിചിന്തയ്ക്ക് അടിത്തറയിട്ട തന്തൈപെരിയാർ ഇ.വി.രാമസ്വാമി നായ്ക്കരെയും, രണ്ടുതവണ അഖിലേന്ത്യാ കോൺഗ്രസ് കമ്മിറ്റി അധ്യക്ഷനായ, രണ്ടു തവണ ഇന്ത്യൻ പ്രധാനമന്ത്രിമാരെ നിശ്ച്ചയിച്ച, ‘എനിക്ക് തമിഴ് മാത്രമേ അറിയൂ, അതിനാൽ എനിക്ക് വേണ്ട’ എന്നും പറഞ്ഞ് പ്രധാനമന്ത്രിപദം നിരസിച്ച, 120 രൂപയും 4 ജോഡി മുണ്ടും ഷർട്ടും മാത്രം സമ്പാദ്യമായി അവശേഷിപ്പിച്ച് വാടകവീട്ടിൽ കിടന്ന് മരിച്ച മുൻമുഖ്യമന്ത്രി പെരുന്തലൈവർ കാമരാജിനെയും മാത്രം ഓർത്തെടുത്തതിൽ കണിശമായ രാഷ്ട്രീയമുണ്ടെന്നു തമിഴകം തിരിച്ചറിയുന്നുണ്ട്.

നീലാങ്കരയിലെ വിദ്യാഭ്യാസ അവാർഡ് വിതരണച്ചടങ്ങ് 12 മണിക്കൂറിലേറെ നീണ്ടു നിന്നിരുന്നു. രാവിലെ തുടങ്ങി രാത്രി വൈകി പരിപാടി തീരുന്നതുവരെയും വിജയ് സ്റ്റേജിലുണ്ടായിരുന്നു. ഇടയ്ക്ക് 2 മിനിറ്റ് മാത്രമാണ്- അതും കുട്ടികളോട് അനുമതി വാങ്ങി - മാറി നിന്നത്. വിജയ് നേരിട്ടാണ് ഓരോ കുട്ടിയെയും പൊന്നാടയണിയിച്ചതും സർട്ടിഫിക്കറ്റും കാഷ് അവാർഡും സമ്മാനിച്ചതും (ഒന്നാം സ്ഥാനത്തിന് 25,000 രൂപ, രണ്ടാമിടത്തിന് 15,000, മൂന്നാം സ്ഥാനക്കാർക്ക് 10,000 എന്ന ക്രമത്തിലായിരുന്നു സമ്മാനം).

ആ ചടങ്ങു കഴിഞ്ഞ് രണ്ടാം ദിവസമാണ് ‘ലിയോ’ സിനിമയിലെ ‘നാ റെഡി താൻ വരവാ, അണ്ണൻ ഇറങ്ങി വരവാ’ (ഞാൻ റെഡിയാണ്, വരട്ടേ? അണ്ണൻ ഇറങ്ങി വരട്ടേ?) എന്ന പാട്ടിന്റെ അരമിനിറ്റ് പ്രൊമോ പുറത്തുവിട്ടത്. പിന്നെയും മൂന്നു ദിവസം കഴിഞ്ഞ് ജൂൺ 22ന് വൈകിട്ട് ആറരയ്ക്ക് ‘നാ റെഡി താൻ’ പാട്ടിന്റെ പൂർണമായ ലിറിക്‌സ് വീഡിയോ പുറത്തു വന്നു. പന്ത്രണ്ടു മണിക്കൂറിൽ ഒരു കോടി വ്യൂ പിന്നിട്ട ആ പാട്ടിന്റെ വരികളാണ് ഇപ്പോൾ തമിഴകമെങ്ങും ചർച്ച.

∙ നാളൈയ നൺപൻ

ഇന്നത്തെ വോട്ടർമാരെയല്ല, നാളത്തെ വോട്ടർമാരെയാണു വിജയ് അഭിസംബോധന ചെയ്യുന്നത് എന്ന യാഥാർഥ്യം എം.കെ.സ്റ്റാലിനെയും എടപ്പാടി പളനിസ്വാമിയെയുമല്ല, ഉദയനിധി സ്റ്റാലിനെയും ബിജെപി സംസ്ഥാന അധ്യക്ഷൻ അണ്ണാമലൈയെയുമാവും ഏറ്റവുമധികം അസ്വസ്ഥപ്പെടുത്തുന്നുണ്ടാവുക. ‘വന്നോട്ടെ, അതിനെന്താ, രാഷ്ട്രീയത്തിലിറങ്ങാൻ ആർക്കും അവകാശമുണ്ടല്ലോ, ആരെങ്കിലും രാഷ്ട്രീയത്തിൽ വരാൻ പാടില്ലെന്നു പറയാൻ മറ്റാർക്കും അവകാശമില്ലല്ലോ’ എന്ന് പറഞ്ഞ് ഉദയനിധി ചിരിച്ചൊഴിഞ്ഞെങ്കിലും. വിജയ്‌യെപ്പോലെ നല്ല മനസ്സും മനസ്സാക്ഷിയുമുള്ളവർ രാഷ്ട്രീയത്തിൽ വരുന്നതു നല്ലതുതന്നെ എന്ന് അണ്ണാമലൈ പ്രതികരിച്ചിട്ടുണ്ടെങ്കിലും വിജയ്‌യുടെ വരവിൽ ബിജെപിക്കു സന്തോഷിക്കാൻ നിലവിൽ വകുപ്പുകളൊന്നുമില്ല.

രാഷ്ട്രീയ പ്രവേശത്തിനുള്ള ഒരുക്കം വിജയ് ഇന്നോ ഇന്നലെയോ തുടങ്ങിയതല്ല. ‘സർക്കാർ’, ‘തലൈവാ’, ‘മെർസൽ’ തുടങ്ങിയ പടങ്ങളിലെല്ലാം വിജയ് അതിന്റെ സൂചനകൾ നൽകിയിരുന്നു. ‘മെർസ’ലിൽ കേന്ദ്ര സർക്കാരിനെ വിമർശിച്ചതിന്റെ പേരിൽ തമിഴ്‌നാട്ടിലെ ബിജെപി നേതാക്കൾ വിജയ്‌ക്കെതിരെ നടത്തിയ ആക്രമണങ്ങളും ആദായനികുതി റെയ്ഡുകളും അദ്ദേഹത്തിന്റെ വാശി കൂട്ടിയിട്ടുണ്ടാകുമെന്നും കരുതാം. വെറും വിജയ് അല്ല, ‘ജോസഫ് വിജയ്’ ആണെന്ന് അന്നു ബിജെപി നേതാക്കൾ ആവർത്തിച്ചാവർത്തിച്ചു പറഞ്ഞതും ദളപതിയെ പ്രകോപിപ്പിച്ചിരിക്കണം.

വിജയ് മക്കൾ ഇയക്കത്തിന്റെ ജീവകാരുണ്യ പ്രവർത്തനങ്ങളും ജനസേവനങ്ങളും വിജയ്‌യുടെ രാഷ്ട്രീയ പ്രവേശനത്തിനു മുന്നോടിയായുള്ള പബ്ലിക് റിലേഷൻസ് പണികളാണെന്നു മറ്റു രാഷ്ട്രീയ കക്ഷികൾ പ്രചരിപ്പിക്കുന്നുണ്ട്. അംബേദ്കർ, ഖായിദെ മില്ലത്ത്, ആദിത്തനാർ തുടങ്ങിയ സമുദായ-സാമൂഹിക പരിഷ്‌കർത്താക്കളുടെ ജന്മദിനങ്ങളിൽ അനുസ്മരണം നടത്താനും, പ്രതിമകളിൽ പുഷ്പാർച്ചന നടത്താനും മറ്റും വിജയ് ആരാധകരോട് ആഹ്വാനം ചെയ്തതും രാഷ്ട്രീയ പ്രവേശത്തിന്റെ ആദ്യപടികളായി വിലയിരുത്തപ്പെട്ടു.

കഴിഞ്ഞ തദ്ദേശ ഭരണ തിരഞ്ഞെടുപ്പിൽ തമിഴ്‌നാട്ടിലെ നൂറ്റിഎഴുപതോളം വാർഡുകളിൽ വിജയ് മക്കൾ ഇയക്കം പ്രവർത്തകർ സ്വതന്ത്രരായി മത്സരിച്ചിരുന്നു. ചെന്നൈ കോർപറേഷനിലെ ഏതാനും ഡിവിഷനുകളിലടക്കം 115ല്‍ അധികം ഇടങ്ങളിൽ വിജയിക്കുകയും ചെയ്തു (കമലഹാസന്റെ മക്കൾ നീതി മയ്യം പാർട്ടിക്ക് ഒരു സീറ്റിൽ പോലും വിജയിക്കാൻ കഴിഞ്ഞിരുന്നില്ലെന്നും ഓർക്കണം). ഇടക്കാലത്ത് കോൺഗ്രസിനോടൊരു അടുപ്പം കാണിച്ചിരുന്നെങ്കിലും നിലവിൽ തമിഴകത്തെ ഒരു കക്ഷിയുമായും വിജയ്ക്ക് പ്രത്യേക സൗഹൃദമോ മമതയോ ഇല്ല. എങ്കിലും, കാമരാജിനെക്കുറിച്ചു പഠിക്കാൻ ‘നാളത്തെ വോട്ടർമാരോട്’ ആഹ്വാനം ചെയ്തതു കോൺഗ്രസുകാർക്കു പ്രതീക്ഷ നൽകുന്നുണ്ട്. അംബേദ്കറെയും പെരിയാറെയും അനുസ്മരിച്ചത് പുരോഗമന രാഷ്ട്രീയ വിശ്വാസികളെയും പുളകം കൊള്ളിക്കുന്നുണ്ടാവാം. എന്നാൽ ഡിഎംകെയോ അണ്ണാഡിഎംകെയോ കോൺഗ്രസോ വിജയ്‌യുടെ ഏറ്റവും പുതിയ നീക്കങ്ങളിൽ ഔദ്യോഗികമായി പ്രതികരിച്ചിട്ടില്ല.

ഡിഎംകെയുടെ സഖ്യകക്ഷിയായ ദലിത് പാന്തേഴ്‌സിന്റെ നേതാവ് തൊൽ തിരുമാവളവൻ മാത്രമാണ് വിജയ്‌യുടെ രാഷ്ട്രീയ പ്രവേശ നീക്കത്തിനെതിരെ ഇപ്പോൾ പരസ്യമായി പ്രതികരിച്ചിരിക്കുന്നത്. സിനിമക്കാർ രാഷ്ട്രീയത്തിലിറങ്ങുന്നതു തമിഴ്‌നാടിന്റെ ശാപമാണ് എന്ന മട്ടിലായിരുന്നു അദ്ദേഹത്തിന്റെ പ്രതികരണം. വിജയ്‌യുടെ രാഷ്ട്രീയ പ്രവേശത്തെ ‘നാം തമിഴർ’ നേതാവ് സീമാൻ സ്വാഗതം ചെയ്തിട്ടുണ്ടെങ്കിലും, തീവ്ര തമിഴ് ദേശീയതയോടു വിജയ്ക്കു വലിയ മതിപ്പില്ലെന്നതിനാൽ വരവിൽ അത്ര സന്തുഷ്ടനല്ല. തമിഴകത്തെ ദലിത് യുവാക്കളിൽ വലിയൊരു വിഭാഗവും വിജയ് ആരാധകരാണെന്നതും ഇരുനേതാക്കളെയും ആശങ്കപ്പെടുത്തുന്നുണ്ടാകണം.

∙ ലക്ഷ്യം പുതിയ വോട്ടർമാർ

പുതിയ വോട്ടർമാരെയാണു വിജയ് ലക്ഷ്യമിടുന്നതെന്നതു സവിശേഷ ശ്രദ്ധയർഹിക്കുന്നുണ്ട്. പഴയ നേതാക്കളെപ്പോലെ ‘എന്നെ വാഴവെക്കും ദൈവങ്ങളാന തമിഴ് മക്കളേ’ എന്നോ, ‘എൻ ഉയിരിക്കും മേലാന ഉടൻപിറപ്പുകളേ’ എന്നോ, ‘എൻ രത്തത്തിൻ രത്തമാന രസികപ്പെരുമക്കളേ’ എന്നോ ‘തായ്മാർകളേ’ എന്നോ അല്ല വിജയ് ഈയിടെയായി ആരാധകരെ അഭിസംബോധന ചെയ്യുന്നത്. നൺപാ, നൺപീസ്, കുട്ടീസ് എന്നൊക്കെയാണ്. ആദ്യമെല്ലാം പതിവായി പ്രസംഗം തുടങ്ങിയിരുന്ന ‘എൻ നെഞ്ചിൽ കുടിയിരുക്കും..’ എന്ന പ്രയോഗം പോലും ഇപ്പോൾ പാതി തമാശയായാണു വിജയ് തന്നെ പറയുക.

ചെറുപ്പക്കാർക്കു വേണ്ടിയാണ്, അവർക്കു വേണ്ടി മാത്രമാണ്, വിജയ്‌യുടെ സമീപകാല സിനിമകളെല്ലാം. മറ്റെല്ലാ ഭാഷകളിലുമെന്നപോലെ തമിഴിലും തിയറ്ററിലെത്തുന്ന കാണികളിൽ 90 ശതമാനവും ചെറുപ്പക്കാരാണല്ലോ. പുതിയ കാണികളാണ് തന്റെ സിനിമകൾ വിജയിപ്പിക്കുന്നത് എന്നതു പോലെ, പുതിയ വോട്ടർമാരാണു തന്റെ രാഷ്ട്രീയവും വിജയിപ്പിക്കുക എന്നും വിജയ് തിരിച്ചറിഞ്ഞിട്ടുണ്ട്. ഇന്നു വിജയ്‌യുടെ പ്രസംഗം കേട്ടിരിക്കുന്ന കുട്ടികൾ 2026ലെ നിയമസഭാ തിരഞ്ഞെടുപ്പിൽ വോട്ടർമാരായിരിക്കും. അന്ന് അവരെ ആകർഷിക്കാൻ ദ്രാവിഡ രാഷ്ട്രീയത്തിന്റെ പരമ്പരാഗത സൂത്രവാക്യങ്ങളോ പഴകിപ്പതിഞ്ഞ ജാതിസമവാക്യങ്ങളോ തികയാതെ വരും.

പോസിറ്റിവിറ്റി നിറഞ്ഞ പുതിയൊരു രാഷ്ട്രീയ സമീപനത്തിലൂടെ അവരെ കയ്യിലെടുക്കാനാവും വിജയ്‌യുടെ ശ്രമം. അതുകൊണ്ടുതന്നെ, അടുത്ത നിയമസഭാ തിരഞ്ഞെടുപ്പിനു മുൻപായി വിജയ് മക്കൾ ഇയക്കം രാഷ്ട്രീയ പാർട്ടിയായി മാറും എന്ന കാര്യത്തിൽ ഇനി സംശയം വേണ്ട. വിജയ് എന്ന താരത്തിന്റെ വിനോദമൂല്യം മാത്രമാണ് ആ രാഷ്ട്രീയത്തിന്റെ അടിത്തറ. വിപണിമൂല്യം നിലനിൽക്കുന്ന കാലത്തോളം മാത്രമേ ആ അടിത്തറയും നിലനിൽക്കൂ എന്നും വിജയ് തിരിച്ചറിയുന്നുണ്ടാകും. രജനീകാന്തിന്റെയും കമലഹാസന്റെയും അനുഭവം വിജയ്‌യുടെ മുൻപിലുണ്ടല്ലോ.

∙ രജനി വേണ്ടെന്നു വച്ച കസേര

ഇത്തിരി- ഏതാണ്ട് കാൽനൂറ്റാണ്ട്- വൈകിപ്പോയതായിരുന്നു രജനിക്കു പറ്റിയ അബദ്ധം. ‘ബാഷ’ക്കാലത്ത് രാഷ്ട്രീയത്തിലിറങ്ങാൻ രജനിയെ മൂപ്പനാർ വരെ നിർബന്ധിച്ചതാണ്. ‘ഇനിയും ഈ സ്ത്രീ നമ്മുടെ മുഖ്യമന്ത്രിയായാൽ തമിഴ്നാടിനെ രക്ഷിക്കാൻ ദൈവത്തിനു പോലും കഴിയില്ല’ എന്ന രജനിയുടെ വാചകം 1996ൽ ഡിഎംകെ-തമിഴ് മാനില കോൺഗ്രസ് സഖ്യത്തെ അധികാരത്തിലേറ്റുന്നതിൽ വലിയ പങ്കു വഹിച്ചിട്ടുണ്ട്. അന്നു മുഖ്യമന്ത്രിക്കസേര വരെ രജനീകാന്തിന് ഓഫർ ചെയ്യപ്പെട്ടിരുന്നു. അക്കാലം രജനി പറഞ്ഞാൽ തമിഴ് മക്കൾ കേൾക്കുമായിരുന്നു. അന്ന് രജനി ചെറുപ്പമായിരുന്നു. ആരാധകരും ചെറുപ്പക്കാരായിരുന്നു.

അന്നു ജനിച്ചിട്ടു പോലുമില്ലാത്തവരാണ് പുതുകാല തമിഴ് മക്കൾ. രജനീകാന്തിന്റെ ഒരു പടം പോലും തിയറ്ററിൽ പോയി കണ്ടിരിക്കാനിടയില്ലാത്ത പശങ്കൾ. അവരാണ് വിജയ് നീലാങ്കരയിൽ പറഞ്ഞ ‘നാളത്തെ വോട്ടർമാർ’. അവർക്ക് രജനി ഒരപ്പൂപ്പനാണ്. ‘അണ്ണാമലൈ’യും ‘ബാഷ’യും കണ്ട് കോരിത്തരിച്ചവരല്ല അവർ. വിജയും അജിത്തും സൂര്യയും ശിവ കാർത്തികേയനും വിജയ് സേതുപതിയുമൊക്കെയാണ് അവരുടെ താരങ്ങൾ. ‘യഥാർഥ’ രജനിരസികർകളിൽ ഒട്ടുമിക്ക പേരും ഇപ്പോൾ പെൻഷൻ പ്രായത്തിലെത്തിയിരിക്കണം. അവരെല്ലാം ഡിഎംകെയുടെയോ അണ്ണാ ഡിഎംകെയുടെയോ കോൺഗ്രസിന്റെയോ ഒക്കെ വിശ്വാസികളുമായിരിക്കണം. പുതിയൊരു രാഷ്ട്രീയത്തുടക്കത്തിന് തനിക്കെന്ന പോലെ അവർക്കും ഇനിയും ബാല്യം അവശേഷിക്കുന്നില്ലെന്നു തിരിച്ചറിഞ്ഞു തന്നെയാവണം രജനീകാന്ത് രാഷ്ട്രീയ പ്രവേശ തീരുമാനം പിൻവലിച്ചത്.

പുതുതലമുറയ്ക്കു വേണ്ടത്ര ആവേശം പകരാൻ, തിയറ്ററുകളിൽ പഴയ ആരവം സൃഷ്ടിക്കാൻ തനിക്കു കഴിയുന്നില്ലെന്നും തലൈവർ തിരിച്ചറിഞ്ഞിട്ടുണ്ട്. രാഷ്ട്രീയ നീക്കങ്ങൾ ഉപേക്ഷിക്കുന്നുവെന്ന പ്രഖ്യാപനത്തിനു ലഭിച്ച തണുത്ത പ്രതികരണവും രജനിയെ നിരാശപ്പെടുത്തിയിരിക്കണം. (ഏറ്റവും ഒടുവിലെത്തിയ ‘അണ്ണാത്ത’യാകട്ടെ കടുത്ത രജനിരസികർകളെ വരെ മടുപ്പിച്ചു. ‘ജയിലറി’ന്റെ അപ്‌ഡേറ്റുകൾക്കും വലിയ ഓളമുണ്ടാക്കാൻ കഴിയുന്നില്ല. അതേ സമയം, വിജയ്‌യുടെ ലോകേഷ് കനകരാജ് ചിത്രം ‘ലിയോ’യെക്കുറിച്ചു പുറത്തു വരുന്ന ചെറിയ ചെറിയ അപ്‌ഡേറ്റുകൾ പോലും തമിഴകത്തെ ചെറുപ്പക്കാർ ആഘോഷമായി ഏറ്റെടുക്കുന്നുമുണ്ട്).

∙ ‘ഓരോരുത്തർക്കും ഓരോ കാലം’

കാലം മാറിയതു മനസ്സിലാക്കിത്തന്നെയാണു രജനി തീരുമാനം മാറ്റിയതും. ഏതാനും വർഷം മുൻപ് ആരാധകരുമായുള്ള കൂടിക്കാഴ്ചയിൽ രജനി പഴയ രണ്ടു സംഭവങ്ങൾ ഓർത്തു പറഞ്ഞിരുന്നു. ഒന്ന് ശിവാജി ഗണേശനോടൊപ്പം നടത്തിയ ഒരു കോയമ്പത്തൂർ യാത്രയെക്കുറിച്ചാണ്. തൊണ്ണൂറുകളുടെ ആദ്യം. ‘അണ്ണാമലൈ’ സൂപ്പർ ഹിറ്റായി ഓടിക്കൊണ്ടിരിക്കുന്ന നാളുകൾ. കോയമ്പത്തൂരിൽ ഒരു സുഹൃത്തിന്റെ വീട്ടിലെ കല്യാണത്തിൽ പങ്കെടുക്കാൻ ശിവാജിയും രജനിയും ചെന്നൈയിൽനിന്നു വിമാനത്തിൽ പുറപ്പെട്ടു. കോയമ്പത്തൂരിലിറങ്ങി വിമാനത്താവളത്തിൽനിന്നു പുറത്തേക്കു നടക്കുമ്പോൾ അവിടെ വൻജനക്കൂട്ടം.

‘രജനി വാഴ്ക, തലൈവർ വാഴ്ക’ എന്നും വിളിച്ച് ആയിരക്കണക്കിനാളുകൾ പുറത്തു കൂടിനിൽക്കുകയാണ്. രജനിക്കു ചമ്മൽ തോന്നി. അത്രയും വലിയ അഭിനയചക്രവർത്തിയാണ് തന്റെ കൂടെയുള്ളത്. സാക്ഷാൽ നടികർ തിലകം! അദ്ദേഹത്തെ അവഗണിച്ചുകൊണ്ടാണ് ആളുകൾ തന്നെ നോക്കി ആർത്തുവിളിക്കുന്നത്. രജനിയുടെ മുഖത്തെ ജാള്യത കണ്ട് ശിവാജി ചിരിച്ചു. എന്നിട്ടു പറഞ്ഞു: ‘നേരം ടാ. ഉൻ നേരം ടാ. ഇതു നിന്റെ കാലമാണ്. അത് നന്നായി ആസ്വദിക്ക്. എന്റെ കാലത്ത് ഞാനും നന്നായി ആസ്വദിച്ചു. നന്നായി ജോലി ചെയ്തു. ഇനി നിന്റെ നേരമാണ്’.

കുറേ വർഷങ്ങൾക്കു ശേഷം വീണ്ടുമൊരനുഭവം. രജനിക്കു കോയമ്പത്തൂരിലൊന്നു പോണം. ചെന്നൈയിലെ വീട്ടിൽനിന്നു വിമാനത്താവളത്തിലേക്കു പുറപ്പെടാനൊരുങ്ങുമ്പോൾ കോയമ്പത്തൂരിൽനിന്നു ഫോൺ കോൾ: ‘തലൈവർ ഇപ്പോൾ പുറപ്പെടേണ്ട. ഇപ്പോൾ ..... എന്ന നടൻ കോയമ്പത്തൂർ വിമാനത്താവളത്തിൽ വരുന്നുണ്ട്. ആരാധകരുടെ വൻ തിക്കും തിരക്കുമാണ്. തലൈവർ തൽക്കാലം ആ തിക്കും തിരക്കും കഴിഞ്ഞിട്ടു വരുന്നതാണു നല്ലത്’. ആ പഴയ കഥകൾ ഓർത്തുകൊണ്ട് രജനി പറഞ്ഞു: ‘മനുഷ്യരുടെ ഉയർച്ചയ്ക്ക് ഏറ്റവും മുഖ്യം പ്രതിഭയോ കഠിനാധ്വാനമോ അല്ല. നേരവും കാലവുമാണ്. ഓരോരുത്തർക്കും ഓരോ കാലം’.

അന്ന് ആരാധകരോട് അങ്ങനെ പറഞ്ഞെങ്കിലും പിന്നീട് ഏതാനും വർഷം കഴിഞ്ഞ് നേരം തെറ്റിയ നേരത്താണ് രജനി രാഷ്ട്രീയ പാർട്ടി രൂപീകരിക്കാനൊരുങ്ങിയത്. 2021 ജനുവരിയിൽ പാർട്ടി പ്രഖ്യാപനമുണ്ടാകുമെന്ന് ഔദ്യോഗികമായി അറിയിക്കുക വരെ ചെയ്തതാണ്. പക്ഷേ, 2020 ഡിസംബർ 29നു രജനി ട്വിറ്ററിൽ കുറിച്ചു: ‘തമിഴ് മക്കൾ പൊറുക്കുക. ഞാൻ രാഷ്ട്രീയത്തിലേക്കില്ല’. ആരോഗ്യപ്രശ്‌നങ്ങളാണു പിന്മാറ്റത്തിനു കാരണമായി പറഞ്ഞതെങ്കിലും, കാലവും കാണികളും മാറുന്നതു തിരിച്ചറിഞ്ഞുകൊണ്ടുള്ള തീരുമാനമായിരുന്നു അത്.