∙ ക്യൂബ് 

ചലിക്കുന്ന സ്റ്റേജും കസേരകളുമുള്ള ക്യൂബിൽ 125 പേർക്കിരിക്കാം. മ്യൂസിക് ഷോ, സ്റ്റാൻഡപ് കോമഡി തുടങ്ങിയ ചെറിയ ഷോകൾ നടത്താനുള്ളതാണ് ഈ സ്റ്റേജ്. ഇവിടെ വിഐപി ബോക്സുകളില്ല. 

∙ സ്റ്റുഡിയോ തീയറ്റർ 

250 പേർക്കിരിക്കാവുന്ന സ്റ്റുഡിയോ തീയറ്ററിൽ ടെക്നോളജിയുടെ വിസ്മയം കാണാം. ടെലിസ്കോപിങ് സീറ്റിങ് സിസ്റ്റമാണ് ഏറ്റവും വലിയ പ്രത്യേകത. സൗണ്ട് സിസ്റ്റം, ലൈറ്റിങ് ഒക്കെ ലോകോത്തരം. ഇവിടെയും വിഐപി ബോക്സുകളില്ല. 

∙ ആർട്ട് ഹൗസ് 

കൾചറൽ സെന്ററിലെ കലാകാരന്മാർക്ക് ഏറ്റവും പ്രിയപ്പെട്ട ഇടമാണ് ആർട്ട് ഹൗസ്. 4 നിലകളിലായി 16,000 ചതുരശ്ര അടി വിസ്തൃതിയിലാണ് ആർട്ട് ഹൗസ് ഒരുക്കിയിരിക്കുന്നത്. അടുത്തിടെ നടന്ന സംഘം എക്സിബിഷനിൽ 5 ഇന്ത്യൻ കലാകാരന്മാരുടെയും 5 വിദേശ കലാകാരന്മാരുടെയും ചിത്രങ്ങളുടെ പ്രദർശനമാണ് ഒരേ സമയം നടന്നത്. പെയിന്റിങ്, ഹാൻഡിക്രാഫ്റ്റ് ഉൾപ്പെടെ ഏതുതരം എക്സിബിഷനും ഇവിടെ നടത്താം. 

എക്സിബിഷനുകൾക്കു പുറമേ ഇന്റീരിയർ ഡിസൈന്റെ ഭാഗമായി ചെയ്തിരിക്കുന്ന പെയിന്റിങ്ങുകൾ പോലും നോക്കിനിൽക്കാനുണ്ട്. രഖീബ് ഷോ വരച്ച കൃഷ്ണനും രാധയും എന്ന പെയിന്റിങ് ഇതിന് ഉദാഹരണമാണ്. വൻ തുക മുടക്കി അംബാനി കുടുംബം സ്വന്തമാക്കിയ ആ പെയിന്റിങ് ഇന്ന് ആർട്ട് ഹൗസിന് അലങ്കാരമാണ്. തിമിംഗലത്തിന്റെ ഹൃദയം എങ്ങനെയിരിക്കുമെന്ന് ആരെങ്കിലും ചിന്തിച്ചിട്ടുണ്ടോ. അതും ആർട്ട് രൂപത്തിൽ ആവിഷ്കരിച്ചിട്ടുണ്ട് ഇവിടെ. ആർട്ടിസ്റ്റ് ഭാരതി ഖേർ ഫൈബർ ഗ്ലാസിലാണ് ഇത് ഒരുക്കിയിരിക്കുന്നത്. ഇതിൽ കാണുന്ന ചുവന്ന കുത്തുകൾ നെറ്റിയിൽ തൊടുന്ന ബിന്ദി കൊണ്ടാണ് അലങ്കരിച്ചിരിക്കുന്നത്. 

∙ ഇന്ത്യ ഇൻ ഫാഷൻ 

കശ്മീരി, പശ്മിന, കാഞ്ചീപുരം തുടങ്ങി പട്ടിന്റെ ഓരോ ഡിസൈനുകൾക്കു പിന്നിലുമുള്ള മാസങ്ങളുടെ അധ്വാനം നിത കണ്ടറിഞ്ഞിട്ടുണ്ട്. അതുകൊണ്ടുതന്നെ ഏത് അവസരത്തിലും ഇന്ത്യയിൽ നെയ്ത സാരിയണിയാനാണ് അവർ ആഗ്രഹിക്കുന്നത്. അതുവഴി ആ നെയ്ത്തുകാരുടെ നിശ്ശബ്ദ ബ്രാൻഡ് അംബാസഡർ ആയി മാറുന്നതുപോലെ. നിത മുകേഷ് അംബാനി കൾചറൽ സെന്ററിലെ ഫാഷൻ ലോകം പക്ഷേ ഇന്ത്യൻ‌ ഡിസൈനിൽ ഒതുങ്ങുന്നില്ല. ലോകോത്തര ഫാഷൻ ഡിസൈനർമാരുടെ ഡിസൈനുകളുമായി സാധാരണക്കാർക്കു മുതൽ സെലിബ്രിറ്റികൾക്കു വരെ ഫാഷന്റെ അദ്ഭുതലോകം കാട്ടിത്തരികയാണ് ഇവിടെ. 

ഇന്ത്യാ സന്ദർശനത്തിനിടെ അമേരിക്കൻ മുൻ പ്രഥമവനിത മിഷേൽ ഒബാമ ധരിച്ച, നയിം ഖാൻ ഡിസൈൻ ചെയ്ത ആ വേഷം ഒരിക്കൽക്കൂടി ഡിസൈൻ ചെയ്ത് ഇവിടെ പ്രദർശനത്തിനു വച്ചിട്ടുണ്ട്. കോടിക്കണക്കിനു രൂപ വില വരുന്ന ഇഷ അംബാനിയുടെ വിവാഹ വസ്ത്രം– പ്രശസ്ത ഡിസൈനർ വലന്റിനോ ഡിസൈൻ ചെയ്തിട്ടുള്ള ഒരേയൊരു ലഹംഗ. അതും ഇവിടെയെത്തിയാൽ കാണാം. രാഹുൽ മിശ്ര, സബ്യസാബ്ചി, മനീഷ് മൽഹോത്ര തുടങ്ങിയ ഇന്ത്യൻ ഡിസൈനർമാരുടെ ലോകപ്രശസ്ത ഡിസൈനുകൾ ഡിസ്പ്ലേയിലുണ്ട്. ഷനേൽ, ക്രിസ്റ്റ്യൻ ഡയോർ, വൈഎസ്എൽ തുടങ്ങി ലോകോത്തര ബ്രാൻഡുകളുടെ കലക്‌ഷനുമുണ്ട്. 199 രൂപയാണു പ്രവേശനഫീസ്. ഫാഷൻ കോഴ്സ് പഠിക്കുന്ന വിദ്യാർഥികൾക്കാകട്ടെ പ്രവേശനം സൗജന്യവും.

∙ ഇനിയും വരുമോ?

‘‘എന്നാ ഇനി അടുത്ത കൾചറൽ സെന്റർ തുറക്കുന്നത്?’’ എൻഎംഎസിസിയുടെ ഉദ്ഘാടന ദിനം മുതൽക്കേ നിത അംബാനി കേൾക്കുന്ന ചോദ്യമാണിത്. മുംബൈയിൽ മാത്രം ഒതുങ്ങാതെ ഇന്ത്യയിലെ മറ്റു നഗരങ്ങളിലും ഇത്തരമൊരു കൾചറൽ സെന്റർ വേണമെന്നാണ് പലരുടെയും ആവശ്യം. നിത അംബാനിയുടെ ഉടമസ്ഥതയിലുള്ള മുംബൈ ഇന്ത്യൻസ് ക്രിക്കറ്റ് ടീമിനെ വാർത്തെടുത്ത അതേ നിലപാടാണ് നിത കൾചറൽ സെന്ററിന്റെ കാര്യത്തിലും സ്വീകരിച്ചിരിക്കുന്നത്. 

ട്വന്റി 20 ക്രിക്കറ്റ് ആവേശം എങ്ങും നിറഞ്ഞതോടെ ഇന്ത്യയിലെ ഗ്രാമങ്ങളും ബാറ്റേന്തിത്തുടങ്ങി. ഗ്രാമങ്ങളിൽനിന്ന് ക്രിക്കറ്റ് താരങ്ങൾ ഉദിച്ചുയരും പോലെ കലാകാരന്മാരും ഉദിച്ചുയരട്ടെ. 

ഇനിയൊരു ഗ്രാൻഡ് തീയറ്റർ തുറക്കുന്നതിനെക്കുറിച്ച് നിതയുടെ മനസ്സിൽ ചിന്തയില്ല. അതേസമയം 125 പേർക്കിരിക്കാവുന്ന ക്യൂബിന്റെയും 250 പേർക്കിരിക്കാവുന്ന സ്റ്റുഡിയോ തീയറ്ററിന്റെയും മോഡലിൽ ആർട്ട് ഹൗസുകൾ ഭാവിയിൽ മറ്റു നഗരങ്ങളിൽ തുറക്കും. ഇന്ത്യയിലെ വളർന്നുവരുന്ന കലാകാരന്മാർക്ക് മികച്ച പരിശീലനക്കളരിയാകട്ടെ അവയൊക്കെ. 

∙ നിത ബിസിയാ...

നിത അംബാനി ദിവസവും 45 മിനിറ്റ് നൃത്തം ചെയ്യും. ആ സമയം നിതയുടെ ഫോൺ സ്വിച്ച് ഓഫ് ആയിരിക്കും. പക്ഷേ കൾചറൽ സെന്ററിന്റെ ജോലികൾ കാരണം കഴിഞ്ഞ 2 വർഷമായി ഫോൺ സ്വിച്ച് ഓഫ് ചെയ്തു വയ്ക്കാൻ കഴിയുന്നില്ല. ലോകമെങ്ങുമുള്ള കലാകാരന്മാരുടെ വിളികൾ എത്തുമ്പോൾ ആ ഫോൺ ഇനിയങ്ങോട്ട് ഓഫ് ചെയ്തുവയ്ക്കാൻ കഴിയുമെന്നു തോന്നുന്നുമില്ല!

English Summary: Beauty and Grace Meet Culture and Art Inside the Nita Mukesh Ambani Cultural Centre in Mumbai