തീറ്റച്ചെലവ് കുറയ്ക്കാൻ കഴിഞ്ഞത് ഫാമിന്റെ പ്രധാന നേട്ടമെന്നും വക്കച്ചന്റെ വാക്കുകള്‍. ദിവസം 900 കിലോ പുല്ല് വേണം. സ്വന്തമായി ഉൽപാദിപ്പിക്കുന്നതിനാൽ അതിന് ചെലവില്ല. മൂന്നരയേക്കറിൽ സൂപ്പർനേപ്പിയർ ഇനം പുല്ല് കൃഷി ചെയ്തിട്ടുണ്ട്. തൊഴുത്തിൽനിന്നുള്ള മലിനജലവും സ്ലറിയുമാണ് വളമായി ചുവട്ടിൽ എത്തിച്ചു നൽകുന്നത്. സ്പ്രിംഗ്ലർ ഉപയോഗിച്ച് നനയുമുണ്ട്. കൈതപ്പോള വാങ്ങിയാൽ 2000 രൂപയോളം ചെലവുവരും. ആ ചെലവ് ലാഭിക്കാൻ പുൽക്കൃഷിയിലൂടെ സാധിക്കും. 

പുല്ല് കൊടുക്കുമ്പോൾ ഫാറ്റ് കുറവാണെങ്കിലും പാൽ കുടുതലുണ്ടെന്നതാണ് അനുഭവമെന്നും വക്കച്ചൻ. പുല്ലുകൊടുത്തു വളർത്തിയ പശുക്കളുടെ ചാണകത്തിന് ആവശ്യക്കാരുമേറെ. കൃഷിയിടത്തിലെ ഉപയോഗത്തിനുശേഷം 850–900 ചാക്ക് ചാണകം ഒരു വർഷം 150 രൂപ നിരക്കിൽ വിൽക്കുന്നുണ്ട്. കാലിത്തീറ്റ ഒരു ദിവസം 150 കിലോയോളം വേണ്ടിവരുന്നു. അരിഞ്ഞ പുല്ലിനൊപ്പം ടിഎംആർ രീതിയിലാണ് കാലിത്തീറ്റ നൽകുക. പ്രാദേശികമായുള്ള വിൽപനയും ക്ഷീരസംഘത്തിൽ കൊടുക്കുന്നതുമെല്ലാംകൂടി ഒരു ദിവസം 12,700 രൂപയാണ് വക്കച്ചന്റെ ശരാശരി വരുമാനം. 7300 രൂപ ചെലവ് കിഴിച്ചാൽ ശരാശരി 5400 രൂപ പ്രതിദിന ലാഭം. മാസം കണക്കുകൂട്ടിയാൽ 1.62 ലക്ഷം രൂപ പ്രതിമാസ നേട്ടം. 

∙ ചൂടുകുറയ്ക്കാൻ ഫാനും മഴയും; ഫാനായി മാറി വാട്ടർ പമ്പ്

സമീപകാലത്തെ ചൂട് ക്ഷീരകർഷകർക്ക് ഏറെ വെല്ലുവിളികൾ സൃഷ്ടിക്കുന്നുണ്ട്. താപസമ്മർദം മൂലം പശുക്കളുടെ ആരോഗ്യം കുറയുന്നതിനൊപ്പം ഉൽപാദനനഷ്ടം വന്നതാണ് കർഷകർ നേരിട്ട പ്രധാന പ്രശ്നങ്ങൾ. എന്നാൽ, അവയൊക്കെ തരണം ചെയ്യാനുള്ള സംവിധാനം വക്കച്ചന്റെ ഡെയറി ഫാമിലുണ്ട്. രണ്ടു രീതിയിലൂടെയാണ് വക്കച്ചൻ തന്റെ ഫാമിലെ ചൂടു കുറയ്ക്കുന്നത്. മേൽക്കൂരയ്ക്കു മുകളിൽ സ്ഥാപിച്ചിരിക്കുന്ന സ്പ്രിംഗ്ലറുകളും വശങ്ങളിൽ ഉറപ്പിച്ചിരിക്കുന്ന 2 ഫാനുകളുമാണ് ഈ കടമ നിറവേറ്റുന്നത്. 

മേൽക്കൂര നനയുന്നതിനൊപ്പം തൊഴുത്തിന്റെ 20 അടി ചുറ്റളവിൽ വെള്ളം വീഴത്തക്കവിധത്തിൽ 5 സ്പ്രിംഗ്ലറാണ് തൊഴുത്തിനു മുകളിൽ ഉറപ്പിച്ചിരിക്കുന്നത്. ഈ രീതിയിൽ ചെയ്യുമ്പോൾ തൊഴുത്തിനുള്ളിൽ എപ്പോഴും തണുത്ത അന്തരീക്ഷമുണ്ടാകും. മേൽക്കൂരമാത്രം നനയുന്ന രീതിയാണെങ്കിൽ ഷെഡ്ഡിനുള്ളിലെ ചൂട് അതിവേഗം ഉയരുന്ന സ്ഥിതിയാണുള്ളതെന്ന് വക്കച്ചൻ. ദിവസം 5–6 തവണ ഈ സംവിധാനം പ്രവർത്തിപ്പിക്കുന്നു. അതുപോലെത്തന്നെ ചെലവുകുറഞ്ഞ ഫാൻ എടുത്തു പറയേണ്ടതാണ്. 

വലിയ വിലയുള്ള ഫാനുകളാണ് പല ഫാമുകളിലും ഉപയോഗിക്കുന്നതെങ്കിൽ വക്കച്ചന്റെ ഫാമിൽ ഉപയോഗിക്കുന്നത് അര എച്ച്പിയുടെ 2 വാട്ടർമോട്ടറുകളാണ്. വെള്ളം പമ്പ് ചെയ്യുന്ന ഭാഗം മുറിച്ചുമാറ്റി പകരം മോട്ടറിൽ നിലവാരുമള്ള ലീഫ് ഉറപ്പിച്ചിരിക്കുന്നു. ഏകദേശം 3500 രൂപ ചെലവിൽ ഫാൻ നിർമാണം പൂർത്തിയാകും. സാധാരണ സീലിങ് ഫാനുകൾക്ക് ആർപിഎം കുറവായതുകൊണ്ടുതന്നെ വേണ്ട പ്രയോജനം ലഭിക്കില്ല. എന്നാൽ, ഈ മോട്ടർഫാനിന് ആർപിഎം 2500 ആണ്. അതുകൊണ്ടുതന്നെ അതിവേഗത്തിൽ കറങ്ങുന്നതിനാൽ ഉള്ളിലേക്ക് തണുത്ത വായു കടത്തിവിടുകയും ചെയ്യുന്നു. ഉറപ്പുള്ള സ്റ്റാൻഡിൽ പ്രത്യേക പുറംകവചവും നൽകിമാത്രമേ ഇത് ഉപയോഗിക്കാൻ കഴിയൂവെന്നും വക്കച്ചൻ. 

∙ വളവും വരുമാനവുമായി ഇറച്ചിക്കോഴി

ഇറച്ചിക്കോഴിഫാമുകളും വക്കച്ചന്റെ കൃഷിയിടത്തിലുണ്ട്. 2 കർഷകർ പാട്ടത്തിനാണ് ഇവിടെ കോഴിഫാം  ചെയ്യുന്നത്. പത്തു വർഷത്തെ പാട്ടക്കരാറിൽ കർഷകർ സ്വന്തമായി ഷെഡ് നിർമിച്ച് കോഴികളെ വളർത്തുന്നു. നിലവിൽ 20,000ന് അടുത്ത് കോഴികൾ റബർത്തോട്ടത്തിലെ ഷെഡ്ഡുകളിലുണ്ട്. കിലോയ്ക്ക് 80 പൈസ നിരക്കിൽ വക്കച്ചന് ലഭിക്കുന്നു. ഒപ്പം കൃഷിയിടത്തിലേക്കാവശ്യമായ കോഴിവളവും.

∙ രുചിയുടെ പര്യായമായി മോനൂസ് ഐസ്ക്രീം

പാലുൽപാദനത്തിനൊപ്പം മൂല്യവർധിത ഉൽപന്നങ്ങളിലും വക്കച്ചൻ ശ്രദ്ധിക്കൂന്നു. 5 രുചികളിലായി ‘മോനൂസ്’ ബ്രാൻഡിൽ ഐസ്ക്രീം വിപണിയിൽ എത്തിക്കുന്നു. പാലിൽനിന്ന് മറ്റു മൂല്യവർധിത ഉൽപന്നങ്ങൾ തയാറാക്കാൻ ശ്രമിച്ചാൽ അവശിഷ്ടമായി നഷ്ടപ്പെടാറാണു പതിവ്. എന്നാൽ, ഐസ്ക്രീമിൽ പാൽ പൂർണമായും ഉപയോഗിക്കാമെന്ന നേട്ടമുണ്ട്. ‌മാസം 350–450 ലീറ്റർ ഐസ്ക്രീം വിൽക്കുന്നുണ്ട്. ഓർഡർ അനുസരിച്ച് ആവശ്യക്കാർക്ക് നൽകാറുമുണ്ട്. 

ഐസ്ക്രീം നിർമാണത്തിന് മാസം 275 ലീറ്ററോളം പാൽ എടുക്കുന്നു. നിലവിൽ ഇലഞ്ഞിയിൽ മാത്രമാണ് മോനൂസ് ഐസ്ക്രീം ലഭ്യമാകുക. ഭാവിയിൽ സാഹചര്യം ഒത്തുവന്നാൽ വിപുലീകരിക്കാനും വക്കച്ചനു പദ്ധതിയുണ്ട്. ഒരു ലീറ്റർ ഐസ്ക്രീമിൽനിന്ന് 100 രൂപ ലാഭം വരാറുണ്ട്. ഇടനിലക്കാരില്ലാതെ വിൽക്കാൻ കഴിയുന്നതാണ് ഈ നേട്ടത്തിനു പിന്നിലെന്ന് വക്കച്ചൻ പറയുന്നു. അമ്മ വത്സയ്ക്കും ഭാര്യ നിസ് എലിസബത്തിനും ഇളയ സഹോദരി ആൻമേരിക്കുമാണ് ഐസ്ക്രീം നിർമാണത്തിന്റെ ചുമതല. 

മൂത്ത സഹോദരി മോളു റോസ് മേരി സ്വിറ്റ്സർലൻഡിൽനിന്ന് അയച്ചു നൽകുന്ന കൂട്ടാണ് ഐസ്ക്രീമിന് ഉപയോഗിക്കുന്നത്. ഒന്നിടവിട്ട ദിവസങ്ങളിൽ നിർമാണം. ഒരു ലീറ്റർ, അര ലീറ്റർ പാക്കിൽ പുറത്തിറക്കുന്നു. ഫാമിലെ കരിക്കിൽനിന്നുള്ള ടെൻഡർ കോക്കനട്ട്, വനില, ബട്ടർസ്കോച്ച്, സ്ട്രോബെറി, ബ്ലൂബെറി എന്നിവ നിലവിൽ വിപണിയിലെത്തിക്കുന്നു. ഡിലൈറ്റ് എന്ന പുതിയ രുചികൂടി ജൂൺ മുതൽ വിപണിയിലെത്തും.

∙ മികച്ച വിളവേകി കൊക്കോയും കമുകും തെങ്ങും

2.5 ഏക്കറിലെ 350 കൊക്കോയിൽനിന്ന് വർഷം മൂന്നു ലക്ഷം രൂപയോളം വരുമാനം ലഭിക്കുന്നു. പരിപ്പ് ഉണക്കിയാണ് വിൽപന. കാഡ്ബറീസ് കമ്പനി നേരിട്ട് വീട്ടിലെത്തി എടുക്കുന്നതിനാൽ വിൽപനപ്രതിസന്ധിയില്ല. മാസം 25,000 രൂപയുടെ കച്ചവടം നടക്കുന്നുണ്ട്. 1.5 ഏക്കറിൽ ഏകവിള രീതിയിലും ശേഷിക്കുന്നിടത്ത് കമുകിന് ഇടവിളയായുമാണ് കൊക്കോക്കൃഷി. ഏകവിളയായുള്ളിടത്ത് 14 അടി അകലത്തിലാണ് കൊക്കോ നട്ടിരിക്കുന്നത്. 

ഏകദേശം ഒന്നേകാൽ ഏക്കറിലെ കമുകിൽനിന്ന് 1500 കിലോ പാക്ക് കഴിഞ്ഞ വർഷം ലഭിച്ചു. 55 രൂപ വച്ച് വില കിട്ടി. മിച്ചം വരുന്നവ കൊട്ടടയ്ക്ക ആയിട്ടും വിൽക്കുന്നുണ്ട്. മോഹിത് നഗർ ഇനമാണ് നട്ടിരിക്കുക. മാത്രമല്ല, കമുകിൽ മുഴുവൻ തിപ്പലിയിൽ വളർത്തിയ കൊടി ഇട്ടിട്ടുമുണ്ട്. മൂന്നരയേക്കർ നെൽപാടമുണ്ട്. വർഷം 2 കൃഷി. ഐആർ 5 ഇനം ചെയ്യുന്നു. ഇടയ്ക്ക് പാലക്കാടൻ മട്ടയും ചെയ്യാറുണ്ട്. വീട്ടാവശ്യത്തിന് എടുത്തശേഷം സപ്ലൈക്കോയ്ക്ക് കൊടുക്കുന്നു. കച്ചി റോൾ ആക്കി വിൽക്കുന്നു. 

വർഷങ്ങളായി നെൽക്കൃഷി തുടരുന്നുണ്ടെങ്കിലും കഴിഞ്ഞ വർഷം നിലം പാട്ടത്തിനു നൽകിയിരിക്കുകയായിരുന്നു. ഇത്തവണ വീണ്ടും സ്വന്തമായി കൃഷി ചെയ്യാനുള്ള തയാറെടുപ്പിലാണ് വക്കച്ചൻ. മൂന്നരയേക്കർ നെൽപാടത്തിന് സമീപം 250ൽപ്പരം തെങ്ങുണ്ട്. എണ്ണയാട്ടി മോനൂസ് കോക്കനട്ട് ഓയിൽ എന്ന പേരിൽ കിലോ 200 രൂപ നിരക്കിൽ വിൽക്കുന്നു. വർഷത്തിൽ ഒന്ന് എന്ന രീതിയിൽ ആണ് കൊപ്രയാട്ട്. ചിരട്ട കിലോ 2 രൂപ നിരക്കിൽ ബേക്കറികൾക്ക് കൊടുക്കും. ചകിരി ഷീറ്റ് പുകയ്ക്കാൻ എടുക്കുന്നു. 70 തൈത്തെങ്ങിന്റെ കരിക്ക് വെട്ടി ഐസ്ക്രീമിലേക്ക് എടുക്കുന്നു. മാസം 200 കരിക്കോളം ഐസ്ക്രീമിനായി എടുക്കുന്നുണ്ട്. തെങ്ങിന് ഇടവിളയായി 50 സെന്റ് സ്ഥലത്ത് ജാതിയും നട്ടിരിക്കുന്നു. കൂടാതെ 13 ഇനം മാവുൾപ്പെടെ ഒട്ടേറെ ഫലവൃക്ഷങ്ങളുണ്ട്

∙ മാലിന്യസംസ്കരണത്തിനൊപ്പം പാചകവാതകവും

ഡെയറിഫാമിന്റെ ഭാഗമായി നിർമിച്ച 6 ക്യുബിക് മീറ്റർ വലുപ്പമുള്ള ബോവർ ഗ്യാസ് പ്ലാന്റിൽനിന്ന് വീട്ടിലേക്കാവശ്യമായ പാചകവാതകം ലഭിക്കുന്നുവെന്ന് വക്കച്ചൻ. കൂടാതെ തൊഴിലാളികൾ ഉപയോഗിക്കുന്നതും ഈ പാചകവാതകം തന്നെ. നേരത്തേ വീട്ടാവശ്യത്തിന് ഒന്നര കുറ്റിയും തൊഴിലാളികൾക്ക് ഒരു കുറ്റിയും പാചകവാതകം ഓരോ മാസവും വേണ്ടിവന്നിരുന്ന സ്ഥാനത്താണ് ബോവർ ഗ്യാസിലൂടെയുള്ള ലാഭം.

വക്കച്ചന്റെ ഫോൺ: 95629 83198

English Summary: Walking through the 'Wonder Farm' of Monu Varghese Mammen- Video