ഏറെക്കാലമായി ഡയർ വസ്ത്രങ്ങൾക്കു വേണ്ടിയുള്ള കരകൗശല േവലകൾ ചെയ്തിരുന്നത് മുംബൈയിലെ ‘ചാണക്യ’ എന്ന ആർട് ആൻഡ് ക്രാഫ്റ്റ് സ്കൂളിലെ സ്ത്രീകളാണ്. സ്ത്രീകളുടെ അതിജീവനം ലക്ഷ്യമിട്ട് കരകൗശല വിദ്യയിലൂടെ അവരെ സ്വയംപര്യാപ്തരാക്കുന്ന സ്ഥാപനമായ ‘ചാണക്യ’യുമായി നേരിട്ട് പാർട്ണർഷിപ് പ്രഖ്യാപിച്ചാണ് ഇക്കുറി ഡയർ ഇവിടെയെത്തിയത്. വളരുന്ന ഇന്ത്യൻ വിപണിയെ സ്വാധീനിക്കുന്നതിനൊപ്പം രാജ്യാന്തര ഉപഭോക്താക്കൾക്കു മുന്നിൽ ‘ആഗോളമുഖം’ സ്വീകരിക്കുകയെന്ന ലക്ഷ്യവും ഇതിനു പിന്നിലുണ്ട്.

ലക്ഷുറി ഫാഷന്റെ ആഗോള ഹബ്ബായുള്ള ഇന്ത്യയുടെ ഈ വളർച്ച തുടങ്ങിയിട്ട് അൽപകാലമായി. കോവിഡ് ലോക്ഡൗൺ കാലത്തും ലക്ഷുറി ബ്രാൻഡ് വിപണിയെ താങ്ങിനിർത്തിയത് ദക്ഷിണേഷ്യൻ രാജ്യങ്ങളായിരുന്നു. ഇന്ത്യയിൽ ഈ രംഗത്ത് ഇനിയുമേറെ വളർച്ച കൈവരിക്കാനാകുമെന്ന് അവർക്കുറപ്പുണ്ട്. എന്നാൽ ബ്രാൻഡുകളുടെ ഇന്ത്യൻ പ്രണയത്തിനു പിന്നിൽ ഇതു മാത്രമല്ല കാര്യം. 

∙ ഉയരുന്ന ജനസംഖ്യ; വളരുന്ന വിപണി

കെ–പോപിലൂടെ ലോകമെങ്ങും സ്വാധീനശക്തിയായി െപട്ടെന്നുള്ള വളർച്ച നേടിയ ദക്ഷിണ കൊറിയൻ സംസ്കാരം, ഇന്ത്യയ്ക്കു മുന്നിൽ പുതിയൊരു വികസന മാതൃക തുറന്നിടുകയാണെന്നാണ് വിപണിയിലെ മാറ്റങ്ങൾ പഠിക്കുന്ന സ്ഥാപനങ്ങൾ വിശ്വസിക്കുന്നത്. അങ്ങനെ സംഭവിക്കുകയാണെങ്കിൽ ഇന്ത്യൻ താരങ്ങൾക്ക് രാജ്യാന്തര മാർക്കറ്റിൽ വലിയ സ്വാധീനം ചെലുത്താനാകും. ഇന്ത്യൻ താരങ്ങളുമായി തങ്ങളുടെ ഉപഭോക്താക്കൾക്കു പെട്ടെന്ന് താദാത്മ്യം പ്രാപിക്കാൻ കഴിയുന്നുവെന്ന വിലയിരുത്തലിലാണ് രാജ്യാന്തര ഫാഷൻ ബ്രാൻഡുകൾ.

ആഗോള ലക്ഷുറി ബ്രാൻഡായ ഡയർ ഫാഷൻ ഷോയുമായി മുംബൈയിലെത്തിയതുതന്നെ വളർന്നുകൊണ്ടിരിക്കുന്ന ഇന്ത്യൻ വിപണിയുടെ വളർച്ചാ സാധ്യതയ്ക്ക് രാജ്യാന്തര ഭീമന്മാർ നൽകുന്ന പ്രാധാന്യത്തിനു തെളിവാണ്. ലോകത്തിലെ വളരുന്ന സമ്പദ്‍വ്യവസ്ഥകളിലൊന്നായി ഇന്ത്യയെ നേരത്തേ തന്നെ അവർ നോട്ടമിട്ടതാണ്. ജർമനിയെയും ജപ്പാനെയും പിന്തള്ളി അടുത്ത ദശകത്തിൽ ലോകത്തെ മൂന്നാമത്തെ വലിയ സമ്പദ്‍വ്യവസ്ഥയായേക്കും എന്ന പ്രതീക്ഷയാണ് ഇന്ത്യയ്ക്കുള്ളത്. 

ഐക്യരാഷ്ട്ര സംഘടനയുടെ റിപ്പോർട്ട് അനുസരിച്ച് ചൈനയുടെ ജനസംഖ്യയെ ഇന്ത്യ മറികടക്കുക കൂടി ചെയ്തതോടെ, വിപണി ഭീമൻമാർക്ക് ഇന്ത്യയുടെ ആകർഷണീയത തള്ളിക്കളയാൻ കഴിയാതായി. ഇന്ത്യൻ ജനസംഖ്യയുടെ 66 മുതൽ 100 ദശലക്ഷം വരെ മധ്യവർഗക്കാർ ആണെന്ന കണക്കുകൂട്ടലും വിപണി വളർച്ചയുടെ സാധ്യതകളാണ് അവർക്കു മുന്നിൽ തുറന്നിടുന്നത്. ഈ വർഷം ‘ആപ്പിൾ’ ഇന്ത്യയിലെ ആദ്യത്തെ സ്റ്റോർ മുംബൈയിൽ തുറന്നതും ലക്ഷുറിയുടെ ‘ബ്രൈറ്റ് സ്പോട്’ തേടിത്തന്നെയാണ്.

∙ ‘ഗ്ലോബൽ ഇന്ത്യൻ’ 

ഇന്ത്യയിലെ വിപണി മാത്രമല്ല, ‘ഗ്ലോബൽ ഇന്ത്യൻ’ എന്ന പുതിയൊരു വിപണിയുടെ വളർച്ചാ സാധ്യതകൾ തേടിയാണ് രാജ്യാന്തര കമ്പനികളുടെ വിപണന തന്ത്രങ്ങൾ. 2020ലെ യുഎൻ റിപ്പോർട്ടനുസരിച്ച് ലോകത്തെ ഏറ്റവും വലിയ പ്രവാസി സമൂഹം ഇന്ത്യക്കാരാണ്. ഏതാണ്ട് 1.8  കോടി ഇന്ത്യക്കാരാണ് വിവിധ വിദേശരാജ്യങ്ങളിൽ താമസിക്കുന്നത്. ലക്ഷുറി ബ്രാൻഡുകൾ സ്റ്റോറുകൾ തുറക്കാൻ മത്സരിക്കുന്ന യുഎഇയിൽ മാത്രം 35 ലക്ഷം ഇന്ത്യക്കാരുണ്ട്. ഈ വിഭാഗത്തിൽ ബ്രാൻഡുകൾ കൂടുതലായി ശ്രദ്ധകേന്ദ്രീകരിക്കുകയാണിപ്പോൾ.

പ്രവാസി ഇന്ത്യാക്കാരുടേതു മാത്രമായുള്ള ‘ലക്ഷുറി ചെലവിടൽ’ കണക്കാക്കുക എളുപ്പമല്ലെങ്കിലും ബ്രാൻഡുകളുടെ വിൽപന തന്ത്രങ്ങളിൽ ഒഴിവാക്കാനാകാത്ത സാന്നിധ്യമായി ഇവരുണ്ട്. ഇന്ത്യൻ ഡിസൈനർമാരുമായുള്ള പങ്കാളിത്തവും ഇന്ത്യൻ പ്രചോദിത ‘കാപ്സ്യൂൾ’ കലക്‌ഷനുകൾ അവതരിപ്പിക്കലും മാത്രമായി ‘ഗ്ലോബൽ ഇന്ത്യൻ’ വിപണിയെ വശത്താക്കാനാകുമെന്ന് ബ്രാൻഡുകൾ കരുതുന്നില്ല. അതേസമയം, ആഗോള മുഖമായി ഇന്ത്യൻതാരങ്ങളെത്തുന്നത് സ്വീകാര്യത വർധിപ്പിക്കുമെന്ന് അവർ കരുതുന്നു. ‘ഗ്ലോബൽ’ ഉപഭോക്താവിനെ ആദരിക്കുകയും അവർക്കു മൂല്യം കൽപ്പിക്കുകയും ചെയ്യുന്നത് ‘ലാഭകര’മാകും എന്ന പ്രതീക്ഷയിലാണ് ലക്ഷുറി ബ്രാൻഡുകൾ.

English Summary: Why are the World's Luxury Fashion Brands Focusing on India?