നയൻതാരയുടെ സൗന്ദര്യബോധം സംബന്ധിച്ച മാറ്റം വിലയിരുത്തുന്നത് അറ്റ്ലി സംവിധാനം ചെയ്ത ‘രാജറാണി’ക്ക് മുൻപും പിൻപും എന്ന നിലയിലാകുന്നതായിരിക്കും ഉചിതം. ഈ സിനിമയ്ക്ക് മുൻപ് പൊതുവേദികളിലെല്ലാം മോഡേൺ, വെസ്റ്റേൺ, എക്സ്പോസ് വസ്ത്രങ്ങളാണ് നയൻതാര പിന്തുടർന്നിരുന്നത്. ഒരേസമയം നാടനും അതോടൊപ്പംതന്നെ മറുനാടനും! എന്നാൽ ‘രാജറാണി’ക്കു പിന്നാലെ സാരിയിലേക്കു തിരിയുകയായിരുന്നു അവർ. നായകനൊപ്പം മോഡേൺ വസ്ത്രം ധരിച്ച് നൃത്തംചെയ്യുകയും പ്രാധാന്യമില്ലാത്ത വേഷങ്ങൾ ചെയ്തും മുന്നോട്ട് പോയിരുന്ന നയൻതാര, സ്ത്രീപ്രാധാന്യമുള്ള സിനിമകളിലൂടെ രണ്ടാംവരവ് അറിയിച്ചത് ‘രാജറാണി’യിലൂടെയായിരുന്നു.

∙ ‘മെയ്ക്കപ് ദൈവത്തെ പോലെ...’

വളരെ ലളിതമായ അലങ്കാരപ്പണികളുള്ള സാരിയാണ് നയൻതാര കൂടുതലും തിരഞ്ഞെടുക്കുന്നത്. അവർ പങ്കെടുത്തിട്ടുള്ള ചലച്ചിത്ര പുരസ്കാര ചടങ്ങുകൾ പരിശോധിച്ചാൽ ഇക്കാര്യം വ്യക്തമാകും. പുരികവും കണ്ണും ഹൈലൈറ്റ് ചെയ്ത് മിനിമല്‍ മെയ്ക്കപ് പിന്തുടരുന്നതായിരുന്നു രീതി. മെയ്ക്കപ് ജീവിതം പോലെയാണെന്നും. എല്ലായ്പ്പോഴും ഉപയോഗിക്കുന്ന ഒന്നാണെന്നും നടി വെളിപ്പെടുത്തിയിട്ടുണ്ട്. ‘‘സുന്ദരിയാകാനും ഒരു മാറ്റത്തിനു വേണ്ടിയുമാണ് ഒരു വിഭാഗം സ്ത്രീകൾ ഉപയോഗിക്കുന്നതെങ്കിൽ ഞങ്ങൾക്ക് മെയ്ക്കപ് ദൈവമാണ്. സിനിമയിൽ മെയ്ക്കപ് ഇടുന്നതിനു മുൻപ് ഞങ്ങൾ തൊട്ടുതൊഴുതാണ് തുടങ്ങുന്നത്’’– നയൻതാര ഒരു അഭിമുഖത്തിൽ പറഞ്ഞ ഈ വാക്കുകളിൽനിന്നുതന്നെ സൗന്ദര്യവർധക വസ്തുക്കളോടുള്ള അവരുടെ താൽപര്യം വ്യക്തം.

പ്രകൃതിദത്ത വസ്തുക്കളാണ് നടി ചർമസംരക്ഷണത്തിന് തിരഞ്ഞെടുക്കുന്നതെന്ന് നേരത്തേ പറഞ്ഞല്ലോ. അവിടെയും തീരുന്നില്ല. ശരീരത്തിന് ദോഷമില്ലാത്ത തരം വസ്തുക്കൾതന്നെ 9സ്കിന്നിൽ ഉപയോഗിക്കണമെന്ന് അവർക്ക് നിർബന്ധമുണ്ടായിരുന്നു. എല്ലാ തരം ചർമക്കാർക്കും ഉപയോഗിക്കാനും സാധിക്കണം. ചർമത്തിലെ സൂക്ഷ്മങ്ങളായ സുഷിരങ്ങളിലും രോമകൂപങ്ങളിലുമെല്ലാം അടിയുന്നതരം മെയ്ക്കപ് ഉൽപന്നങ്ങൾ വിപണിയിലുണ്ട്. എന്നാൽ 9സ്കിൻ അത്തരത്തിലുള്ളതായിരിക്കില്ലെന്ന് നയൻതാര പറയുന്നു. പാരബെന്നും സൾഫേറ്റും പോലുള്ള രാസവസ്തുക്കളുമില്ല. ഇവ ചർമത്തിന് അലർജിയും മറ്റുമുണ്ടാക്കുന്നതായ പരാതി ഉയർന്നിട്ടുള്ളതാണ്. 

ഇതിനെല്ലാം ഉപരിയായി ‘ക്രുവൽറ്റി ഫ്രീ’യാണ് ഉൽപന്നം. അതായത്, മൃഗങ്ങളിൽ പരീക്ഷണം നടത്തിയല്ല 9 സ്കിൻ ഉൽപന്നങ്ങളൊന്നും ഒരുക്കുന്നത്. ഇതെല്ലാം കമ്പനി പരസ്യത്തിൽ ഉൾപ്പെടുത്തിയ കാര്യങ്ങളാണെങ്കിലും ഒരു കാര്യം വ്യക്തം. വെറുതെ എന്തെങ്കിലും വിറ്റുപോകാനല്ല 9സ്കിൻ ബ്രാൻഡ് നയൻതാര ഒരുക്കിയിരിക്കുന്നത്. മറിച്ച്, അതുമായി ബന്ധപ്പെട്ട് വേണ്ടതും വേണ്ടാത്തതുമായ കാര്യങ്ങളെക്കുറിച്ചെല്ലാം വ്യക്തമായി മനസ്സിലാക്കിയാണ്. നയൻതാരയെപ്പറ്റി ഭർത്താവും നിർമാതാവുമായ വിഘ്നേശ് പറഞ്ഞ കാര്യങ്ങൾ ശ്രദ്ധിക്കുക:

‘താൻ ചെയ്യുന്ന ഒരു കാര്യം ശരിയാണെന്ന് ഉറപ്പുണ്ടെങ്കിൽ മാത്രമേ നയൻതാര അതിനു വേണ്ടി നിലകൊള്ളാറുള്ളൂ. സിനിമയുടെ കാര്യത്തിലാണെങ്കിലും എന്തെങ്കിലും ഉൽപന്നം പ്രമോട്ട് ചെയ്യുന്ന കാര്യത്തിലാണെങ്കിലും. സ്വന്തം സിനിമതന്നെ നയൻതാര പ്രമോട്ട് ചെയ്യാത്ത ഒട്ടേറെ അവസരങ്ങളുണ്ട്. ആ സിനിമ നല്ലതാണെങ്കിൽ അതിന് പ്രമോഷന്റെ ആവശ്യമില്ലെന്നാണ് അവരുടെ പക്ഷം. അതാണ് നയൻ താരയുടെ മനസ്സ് പറയുന്നത്. അതേ അവർ അനുസരിക്കൂ. 

9സ്കിന്നിന്റെ ആശയം വന്നപ്പോഴും നയൻതാര അതിന്റെ ഒരു ബ്രാൻഡ് അംബാസഡറായി മാത്രം നില്‍ക്കുമെന്നാണു കരുതിയത്. അല്ലെങ്കിൽ അതിനെപ്പറ്റി കുറച്ച് സംസാരിക്കും, കുറച്ച് ചിത്രങ്ങളെടുക്കും, ഉൽപന്നത്തിന്റെ ബ്രാൻഡിങ് ഏറ്റെടുക്കും എന്നൊക്കെയും കരുതി. പക്ഷേ സംഭവിച്ചത് മറ്റൊന്നാണ്. ഉൽപന്നത്തിന്റെ ഡിസൈൻ, കുപ്പിയുടെ സൈസ്, പേരെഴുതാൻ ഏതു തരം ഫോണ്ടാണ് ഉപയോഗിക്കുന്നത്, പാക്കേജിങ് എങ്ങനെയാണ് ഇതെല്ലാം ചോദിച്ചറിഞ്ഞു. ഉൽപന്നങ്ങൾ സ്വയം പരീക്ഷിക്കുകയും ചെയ്തു. ഒരുൽപന്നം പുറത്തിറക്കുന്നവർ എന്ന നിലയ്ക്ക് ഞങ്ങളുടെ സംഘത്തിന് അത് വലിയ പ്രചോദനമായിരുന്നു’’. ചെറിയ കാര്യങ്ങളിൽപോലും നയൻതാരയ്ക്കുള്ള ആത്മസമർപ്പണമാണ് തന്നെ അവരിലേക്ക് അടുപ്പിച്ചതെന്നും വിഘ്നേശ് പറയുന്നു. നയന്‍സിന്റെയും വിഘ്നേശിന്റെയും പ്രണയവിവാഹമായിരുന്നു. 

∙ ‘ജവാനു’ വേണ്ടിയായിരുന്നില്ല ആ വരവ്!

ഇന്നത്തെ താരങ്ങളും ഇന്നലത്തെ താരങ്ങളുമെല്ലാം ഇൻസ്റ്റഗ്രാമിൽ അക്കൗണ്ടുണ്ടാക്കി നിറഞ്ഞാടുമ്പോൾ എല്ലാവരും അന്വേഷിച്ച ഒരാളുണ്ടായിരുന്നു. എവിടെ നയൻതാര? 2023 ഓഗസ്റ്റ് 31നാണ് നയന്‍താര സ്വന്തമായി ഇൻസ്റ്റഗ്രാം അക്കൗണ്ടുണ്ടാക്കുന്നത്. മക്കളായ ഉലകിന്റെയും ഉയിരിന്റെയുമൊപ്പം ഒരു റീലായിരുന്നു ആദ്യം പോസ്റ്റ് ചെയ്തത്. കൂളിങ് ഗ്ലാസ് ധരിച്ച് രണ്ടു മക്കളെയും എടുത്തുകൊണ്ട് ‘മാസ് ലുക്കി’ൽ നടന്നുവരുന്ന വിഡിയോയായിരുന്നു അത്. ‘നാൻ വന്തിട്ടേന്ന് സൊല്ല്’ എന്നായിരുന്നു ക്യാപ്ഷൻ.