മാലിന്യം തീർന്നപ്പോൾ ‘സങ്കടപ്പെട്ട’ രാജ്യം; ബ്രഹ്മപുരത്തെ തീയുടെ കാരണക്കാരെ ഫിൻലൻഡ് പഠിപ്പിക്കുന്നത്...

ഫിൻലൻഡ്. ലോകത്തിലെ ഏറ്റവും സന്തോഷമുള്ള ജനം ജീവിക്കുന്ന രാജ്യം. ജീവിക്കുക മാത്രമല്ല, എങ്ങനെ സന്തോഷമായി ജീവിക്കാമെന്നു ‘ക്ലാസെടുത്തു’ കൊടുക്കുകയും ചെയ്തു ഫിൻലൻഡ്. 2023 ജൂണിലാണ് അഞ്ചു ദിവസത്തെ ‘മാസ്റ്റർക്ലാസ് ഓഫ് ഹാപ്പിനസ്’ സംഘടിപ്പിച്ചത്. ‘വിസിറ്റ് ഫിൻലൻഡ്’ എന്ന വെബ്സൈറ്റിൽ റജിസ്റ്റർ ചെയ്ത, തിരഞ്ഞെടുക്കപ്പെട്ട 10 പേർക്കായിരുന്നു ക്ലാസ്. സന്തോഷത്തിൽ മാത്രമല്ല പക്ഷേ, ഫിൻലൻഡ് ‘കഴിവ്’ തെളിയിച്ചിരിക്കുന്നത്. കൃത്യമായ ആസൂത്രണത്തിലൂടെ സ്വന്തം ജീവിതത്തെയും പ്രകൃതിയെയും എങ്ങനെ ഒരുപോലെ പരിപാലിക്കാമെന്നും ഫിൻലന്‍ഡ് കാണിച്ചു തരുന്നു.

ഭൂവിസ്തൃതിയുടെ 70 ശതമാനവും വനങ്ങളാൽ സമ്പന്നമായ രാജ്യമാണ് ഫിൻലൻഡ്‌. ആഗോളനിലവാരവുമായി താരതമ്യം ചെയ്യുമ്പോൾ ശുദ്ധവും മാലിന്യമുക്തവുമായ വനങ്ങൾ, തടാകങ്ങൾ, വായു, കുടിവെള്ളം എന്നിവ ഫിൻലൻഡിന് സ്വന്തം. രാജ്യമെമ്പാടുമുള്ള ടാപ്പുകളിൽനിന്നു ലഭിക്കുന്നത് ശുദ്ധമായ ജലം. പ്രകൃതിസ്നേഹത്തിന്റെ സഹൃദയത്വമാണ് സമൂഹത്തിലാകെ. പണമുണ്ടാക്കുക എന്നതിലപ്പുറം പരിസ്ഥിതിയെ ആഴത്തിൽ സ്നേഹിക്കുന്ന ഒരുപറ്റം ജനങ്ങൾ. അവർക്കിടയിൽ ജീവിക്കുന്ന ഒരു മലയാളി ആ അനുഭവം വിവരിക്കുന്നു. ഫിൻലൻഡ് തലസ്ഥാനമായ ഹെൽസിങ്കിയിൽ ഐടി പ്രഫഷനലായ മലയാളി നവമി ഷാജഹാന്റെ വാക്കുകളിലേക്ക്...

∙ പഴമയെ പുൽകുന്നവർ

അജ്ഞാതരായവർ  ഉപയോഗിച്ചിരുന്ന വസ്ത്രം ധരിക്കുക! ഒരുപക്ഷേ മലയാളികളിൽ പലരും നെറ്റിചുളിച്ചേക്കും. ദുരിതാശ്വസ സഹായം തേടി വീട്ടിലേക്കു വരുന്നവർക്ക് പഴയ വസ്ത്രം കൊടുത്താണ് മലയാളിക്കു ശീലം. എന്നാൽ പഴയതു വീണ്ടും ഉപയോഗിക്കുന്നത് ദുരഭിമാനായി കാണാത്തവരാണ് ഫിൻലൻഡിലുള്ളത്. ഏറ്റക്കുറച്ചിലുകളില്ലാതെ, ആബാലവൃദ്ധം ജനങ്ങളും ഇത് പ്രയോജനപ്പെടുത്തുന്നു. പിറന്നു വീഴുന്ന കുഞ്ഞിനു പോലും പഴയ തൊട്ടിൽ ഉപയോഗിക്കുന്ന രീതിയുണ്ട്. കുട്ടികളെ കിടത്തിക്കൊണ്ടു പോകാനുള്ള ചെറിയ വാഹനവും (പ്രാം) മറ്റുള്ളവർ ഉപയോഗിച്ചത് ഉപയോഗിക്കാറുണ്ടിവിടെ.

പഴയ തുണിത്തരങ്ങളുടെ വിൽപനയും വിപുലമാണ് ഫിൻലൻഡിൽ. എല്ലാ ഋതുകാലങ്ങളും അനുഭവവേദ്യമായ രാജ്യമായതിനാൽ അതിന് അനുയോജ്യമായ പലവിധ വേഷവിധാനങ്ങളുടെ ആവശ്യകതയുണ്ട്. സമ്പാദ്യത്തിന്റെ നല്ല ഭാഗവും മഞ്ഞിൽ ധരിക്കാനുള്ള ജാക്കറ്റുകൾക്കും ഷൂസുകൾക്കും ചെലവഴിക്കേണ്ടിവരും. പഴയവ വിറ്റഴിക്കാനും വാങ്ങാനും ഒട്ടേറെ വെബ്സൈറ്റുകളും സമൂഹമാധ്യമങ്ങളിൽ പല ഗ്രൂപ്പുകളും സജീവമാണ്. പഴയ  തുണിത്തരങ്ങളും മറ്റും നിശ്ചിതസ്ഥലത്ത് നിക്ഷേപിക്കാൻ ഓരോ രണ്ടു കിലോമീറ്റർ ചുറ്റളവിലും നഗരങ്ങളിൽ സംവിധാനവുമുണ്ട്.

വീട്ടുസാമഗ്രികൾ, ഫർണിച്ചറുകൾ, ഷൂസുകൾ, ചെരുപ്പുകൾ, കുട്ടികളുടെ പ്രാമുകൾ, സ്കേറ്റിങ്– സ്കീയിങ് തുടങ്ങിയ കായിക വിനോദങ്ങൾക്കുള്ള സാമഗ്രികൾ തുടങ്ങിയവയെല്ലാം സജീവമായി പഴയ മാർക്കറ്റിൽ വിറ്റഴിക്കാറുണ്ട്. ഈ സംവിധാനം സാമ്പത്തിക ലാഭത്തിലേക്കും നയിക്കുന്നു. ലോകത്തിലെ ആദ്യത്തെ സെക്കൻഡ് ഹാൻഡ് (പുനരുപയോഗിക്കാവുന്ന വസ്തുക്കളുടെ) വിപണന കേന്ദ്രം ഫിൻലൻഡ്‌ വ്യോമയാന സ്ഥാപനമായ ഫിന്നാവിയയും മറ്റൊരു  ഫിന്നിഷ് സ്ഥാപനമായ റിലോവും സംയോജിതമായി ഹെൽസിങ്കി വിമാനത്താവളത്തിൽ പ്രവർത്തിപ്പിക്കുന്നു. 

ഈ ‘പുനചംക്രമണ സംസ്കാരത്തെ’ ഇവിടെ ഒരു ജനപ്രിയ കഫേയുമായും സംയോജിപ്പിച്ചിരിക്കുന്നു. ആഡംബര ബ്രാൻഡുകൾ, പ്രീമിയം ഫാഷൻ ലേബലുകൾ, ഗുണനിലവാരമുള്ള ഫിന്നിഷ് ഡിസൈനുകൾ  എന്നിവ ഉൾപ്പെടെയുള്ള സെക്കൻഡ് ഹാൻഡ് വസ്ത്രങ്ങളും അനുബന്ധ സാമഗ്രികളും ഇവിടെ വാങ്ങുവാനും വിൽക്കുവാനും അവസരമുണ്ട്. വിൽപനയ്ക്ക് മുൻകൂറായി നിശ്ചിത സ്ഥലം ബുക്ക് ചെയ്യേണ്ടതുണ്ട്. ലോകത്തിൽ  ആദ്യമായാണ് ഒരു വിമാനത്താവളത്തിൽ ഇപ്രകാരം സെക്കൻഡ് ഹാൻഡ് ആശയത്തിലൂന്നിയ വിപണന ശാലയുള്ളത്.

∙ പാഠം ഒന്ന്: മാലിന്യസംസ്കരണം

ആദ്യാക്ഷരം പഠിക്കുന്നത് ഏഴാമത്തെ വയസ്സിലാണെങ്കിലും ചെറുപ്രായത്തിൽ മാലിന്യ സംസ്കരണത്തിന്റെയും പ്രകൃതിസ്നേഹത്തിന്റെയും പാഠങ്ങൾ കുട്ടികൾ കരസ്ഥമാക്കുന്നു. മാലിന്യം തരംതിരിക്കുന്നതിനും നിക്ഷേപിക്കുന്നതിനും നഴ്‌സറി സ്കൂളുകളിൽ പരിശീലനം നൽകാറുണ്ട്. ആഴ്ചയിൽ ഒരിക്കൽ  കുട്ടികൾ അധ്യാപകരുമൊത്തു പ്രകൃതിയെ അടുത്തറിയുന്ന യാത്രകൾ നടത്തുന്നു. വീടുകളിൽ നിക്ഷേപിക്കുന്ന ജൈവമാലിന്യങ്ങളുടെ കണക്കുകൾ കുട്ടികൾ കളികളിലൂടെ ശേഖരിക്കാറുണ്ട്.  ഭക്ഷണസാധനങ്ങൾ പാഴാക്കുന്ന അനാവശ്യ പ്രവണത തടയാൻ പ്രായോഗിക പരിജ്ഞാനത്തിലൂടെ ഇവർക്ക് സാധിക്കുന്നു.  ജനിതകത്തിൽ അലിഞ്ഞു ചേർന്ന ചില നല്ല പാഠങ്ങൾ! 

∙ ഉറവിടത്തിൽ  മാലിന്യം തരംതിരിക്കൽ

പൊതുജനം വീടുകളിലും സ്ഥാപനങ്ങളിലും മാലിന്യങ്ങൾ വേർതിരിച്ചു നിക്ഷേപിക്കുന്നതാണ് ഫിൻലൻഡിലെ രീതി. പ്ലാസ്റ്റിക്, കടലാസ്, കാർഡ്ബോർഡ്, ലോഹവസ്തുക്കൾ, കുപ്പി, ജൈവമാലിന്യങ്ങൾ എന്നിവ  പ്രത്യേകം സഞ്ചികളിൽ വേർതിരിക്കുന്നു. ഓരോ പാർപ്പിടസമുച്ചയങ്ങളിലും സജ്ജീകരിച്ചിരിക്കുന്ന മാലിന്യക്കുട്ടകളിൽ ആയിരിക്കും നിക്ഷേപിക്കേണ്ടത്. ഈ മാലിന്യങ്ങൾ വലിയ വാഹനങ്ങളിൽ ‘റീസൈക്ലിങ് സെന്ററുകളിൽ’ എത്തിക്കുന്നു. വഴിയോരങ്ങളിലും ഷോപ്പിങ് മാളുകളിലും മാലിന്യക്കുട്ടകൾ സ്ഥാപിച്ചിട്ടുണ്ട്.