വേട്ടക്കാരുടെ സഹായി പറഞ്ഞതു കേട്ട് ഞെട്ടി: കാട് നിറയെ ‘തല തകർന്ന’ കൊമ്പന്മാർ: കുട്ടിയാനയെ കൊന്നത് തമാശയ്ക്ക്! കേരള ‘പോച്ചറുടെ’ കഥ

പത്തു മാസത്തിനിടെ 20 കാട്ടാനകൾ സംസ്ഥാനത്തെ വനങ്ങളിൽ കൊല്ലപ്പെട്ടു എന്ന ലീഡ് വാർത്തയുമായാണ് 2015 ജൂൺ 29ന് മനോരമ പുറത്തിറങ്ങിയത്. അന്ന് തിരുവനന്തപുരത്ത് ചീഫ് റിപ്പോർട്ടറും ഇപ്പോൾ മലയാള മനോരമ കോഴിക്കോട് ചീഫ് ഓഫ് ബ്യൂറോയുമായ ജയൻ മേനോൻ ആണ് ഈ വാർത്ത പുറത്തു കൊണ്ടു വന്നത്. ഡൽഹിയിലേക്കും കൊൽക്കത്തയിലേക്കും നേപ്പാളിലേക്കും വരെ നീണ്ട അന്വേഷണങ്ങളായിരുന്നു അതിനു പിന്നില്‍. പിന്നീട് സംഭവത്തെപ്പറ്റിയുള്ള സിബിഐ അന്വേഷണത്തിലേക്കും ഈ വാർത്ത നയിച്ചു. 

എന്താണ് യഥാർഥത്തിൽ അന്ന് കേരളത്തിലെ കാടുകളിൽ സംഭവിച്ചത്? എങ്ങനെയാണ് രാജ്യാന്തരബന്ധം വരെയുള്ള ആനക്കൊമ്പു മാഫിയയെ അഴിക്കുള്ളിലാക്കിയത്? മാഫിയയെ രക്ഷിക്കാനുള്ള ശ്രമങ്ങളും അതിനിടെ ഉണ്ടായി. എങ്ങനെയാണ് വനംവകുപ്പും മാഫിയയും തമ്മിലുള്ള ബാന്ധവം തകർക്കാൻ സാധിച്ചത്? ആ പിന്നാമ്പുറക്കഥ ആദ്യമായി പുറത്തു വരികയാണ്. അതിനു പിന്നിൽ പ്രവർത്തിച്ചവരെയും വെളിച്ചത്തേക്കു കൊണ്ടു വരുന്നു മനോരമ ഓൺലൈൻ പ്രീമിയത്തിലൂടെ...

∙ തർക്കത്തിൽനിന്നുയർന്നു വന്ന തെളിവ്

വനത്തിനോടും പരിസ്ഥിതിയോടും ആത്മാർഥതയുള്ള ഒരു ജീവനക്കാരൻ, അവൻ ഏതു തസ്തികയിൽ ജോലി ചെയ്യുന്ന ആളായാലും, മനസ്സു വച്ചാൽ വനം കൊള്ള ഒരു പരിധി വരെ തടയാൻ കഴിയും എന്നതിന്റെ ഏറ്റവും നല്ല ഉദാഹരണമായിരുന്നു ഇടമലയാറിലെ ആനവേട്ട സംഘത്തെ പൂട്ടാൻ കഴിഞ്ഞത്. 2015 ജൂൺ മാസം തുടക്കത്തിൽ അതിരപ്പിള്ളിയിലേയ്ക്കുള്ള ഒരു യാത്രയ്ക്കിടയിലാണ് പെരുമ്പാവൂർ ഫ്ളയിങ് സ്ക്വാഡിലെ ഫോറസ്റ്റർ എൻ.ശിവകുമാർ ആനവേട്ടയുടെ ആദ്യ സൂചനകൾ തരുന്നത്. കാര്യങ്ങൾ ഉറപ്പിക്കാറായിട്ടില്ലെന്നും അന്വേഷണം ആരംഭിച്ചതേ ഉള്ളൂവെന്നും ശിവകുമാർ പറഞ്ഞു. 

ദിവസങ്ങളോളം ഈ വിവരത്തിന്റെ പിന്നാലെയായിരുന്നു പിന്നീട്. തിരുവനന്തപുരത്ത് തിരിച്ചെത്തി, രണ്ടാഴ്ച കഴിഞ്ഞപ്പോൾ ശിവകുമാർ എന്നെ കാണാനായി തലസ്ഥാനത്തേക്കു വന്നു. ഏറെ നിരാശനായിരുന്നു അദ്ദേഹം. ആനവേട്ട നടന്നതിന്റെ പൂർണമായ തെളിവുകളും മൊഴികളും ഉൾപ്പെടെ സംഘടിപ്പിച്ചിട്ടും മൂന്ന് ഉന്നത വനം വകുപ്പ് ഉദ്യോഗസ്ഥർ തന്റെ നിഗമനങ്ങളെ തള്ളിക്കളഞ്ഞു എന്ന വിഷമം ശിവകുമാർ പങ്കിട്ടു. വേട്ടസംഘത്തിനൊപ്പം സഞ്ചരിച്ച്, അവർക്കായി ആഹാരം പാകം ചെയ്തു കൊടുത്തിരുന്ന കളരിക്കുടിയിൽ കുഞ്ഞുമോനിൽനിന്നായിരുന്നു അന്വേഷണത്തിന്റെ തുടക്കം. കുഞ്ഞുമോനും പ്രധാന വേട്ടക്കാരനായ ഐക്കരമറ്റം വാസുവും തമ്മിൽ തർക്കമുണ്ടായതും ഈ മൊഴിയിലേക്കു നയിച്ചതായി ശിവകുമാർ പറഞ്ഞു. 

‘‘ഫ്ളയിങ് സ്ക്വാഡ് കുഞ്ഞുമോനെ അന്വേഷിച്ചു നടക്കുമ്പോൾ, അയാൾ മരപ്പാലം ഫോറസ്റ്റ് സ്റ്റേഷനിൽ കസ്റ്റഡിയിൽ ഉണ്ടായിരുന്നു. കസ്റ്റഡിയിൽ എടുത്ത വിവരം ഫ്ളയിങ് സ്ക്വാഡിനെയോ മറ്റോ അറിയിച്ചിട്ടും ഉണ്ടായിരുന്നില്ല. കുഞ്ഞുമോന്റെ മകൻ പറഞ്ഞ വിവരം വച്ചാണ് രണ്ടു വണ്ടികളിലായി ഫ്ളയിങ് സ്ക്വാഡ് മരപ്പാലം സ്റ്റേഷനിൽ എത്തുന്നത്. അവിടെ വച്ചാണ് കുഞ്ഞുമോനെ കണ്ട് മൊഴിയെടുക്കുന്നതും. പറഞ്ഞത് മുഴുവൻ രഹസ്യമായി റിക്കോർഡ് ചെയ്തു’’ ശിവകുമാർ പറഞ്ഞു. ഈ റിക്കോർഡുമായാണ് ശിവകുമാർ തിരുവനന്തപുരത്ത് എന്നെ കാണാൻ വരുന്നത്. അതിനു മുൻപ് മൂന്ന് ഉന്നത വനം വകുപ്പ് ഉദ്യോഗസ്ഥരെ കണ്ട് വിവരങ്ങൾ പറഞ്ഞെങ്കിലും ആരും ഗൗരവമായി എടുത്തില്ലെന്നും ശിവകുമാർ വ്യക്തമാക്കി. 

∙ ‘സസ്പെൻഷൻ കിട്ടുമെന്ന് ഉറപ്പായിരുന്നു’

‘‘ജയനെ കാണാൻ വരുമ്പോൾ എനിക്കു പേടി ഉണ്ടായിരുന്നു. വാർത്ത പുറത്തു വന്നാൽ എനിക്ക് സസ്പെൻഷൻ കിട്ടുമെന്ന് ഉറപ്പാണ്. പോരുന്നതിനു മുൻപ് ഭാര്യയുമായി ഇക്കാര്യം സംസാരിച്ചു. സർവീസ് തീരാൻ ഒന്നര വർഷം കൂടിയേ ബാക്കിയുള്ളൂ. എന്നാലും സാരമില്ല, ഇത്രയും തോന്ന്യാസം നടന്നിട്ട് നമ്മൾ കണ്ണടച്ചിരിക്കുന്നത് ശരിയല്ല എന്നു പറഞ്ഞ് എനിക്ക് ധൈര്യം തന്നത് ഭാര്യയാണ്–’’ ശിവകുമാർ വ്യക്തമാക്കി. റിക്കോർഡ് ചെയ്ത കുഞ്ഞുമോന്റെ മൊഴി ശിവകുമാർ എനിക്കു കൈമാറി. കുഞ്ഞുമോനെ പ്രതിയാക്കി കേസെടുത്തതിന്റെ രേഖകൾ ഞങ്ങൾ പിന്നീടുള്ള ദിവസങ്ങളിൽ സംഘടിപ്പിച്ചു. 

പ്രധാന വേട്ട കഴിഞ്ഞു മടങ്ങുമ്പോൾ തമാശയ്ക്കായി കുട്ടിയാനയെ വെടിവച്ചിട്ടെന്നു പറഞ്ഞ കുഞ്ഞുമോൻ കാട്ടിനകത്ത് ജഡാവശിഷ്ടം കാട്ടിക്കൊടുത്തു. ഈ കേസിൽ കുഞ്ഞുമോനെത്തന്നെ പ്രതിയാക്കി കേസെടുത്ത വനം വകുപ്പ് ഉദ്യോഗസ്ഥർ കൂടുതൽ അന്വേഷണങ്ങൾക്കൊന്നും തുനിഞ്ഞില്ല. കുട്ടിയാനയുടേതല്ല, 12 ആനകളുടെ മസ്തകം തകർത്ത വേട്ടസംഘത്തെ കുറിച്ചാണ് കുഞ്ഞുമോൻ സ്വയം മൊഴി നൽകിയത്. അതെല്ലാം ബധിര കർണങ്ങളിൽ പതിച്ചതു പോലെയായി. കു‍ഞ്ഞുമോന്റെ ദുരനുഭവും യഥാർഥ മൊഴിയും മനോരമയിലൂടെ പുറത്തു വന്നതോടെയാണ് വനം വകുപ്പ് ഉദ്യോഗസ്ഥരുടെ കസേരയ്ക്ക് തീ പിടിച്ചത്.