2008 നവംബർ 14 രാത്രി. ആ സന്തോഷരാവിൽ, അന്നത്തെ ഐഎസ്‌ആർഒ ചെയർമാൻ ഡോ. ജി. മാധവൻ നായർ പ്രഖ്യാപിച്ചു: ,ഇതാ, ചന്ദ്രനെ ഐഎസ്‌ആർഒ ഇന്ത്യയ്‌ക്കു നൽകുന്നു, ഇന്ത്യൻ ത്രിവർണപതാക ചന്ദ്രോപരിതലത്തിൽ എത്തിയിരിക്കുന്നു. ആവേശം ആകാശംമുട്ടിയ സന്തോഷരാത്രിയായിരുന്നു ഇന്ത്യയെ സംബന്ധിച്ചിടത്തോളം അത്.

ചന്ദ്രനിൽ ഇന്ത്യയുടെ ത്രിവർണപതാക പതിക്കുന്നതിനു ദൃക്‌സാക്ഷിയാകാൻ ബെംഗളൂരു പീനിയയിൽ ഇന്ത്യൻ ബഹിരാകാശ ഗവേഷണ സംഘടനയുടെ (ഐഎസ്‌ആർഒ) ടെലിമെട്രി ട്രാക്കിങ് ആൻഡ് കമാൻഡ് നെറ്റ്‌വർക്കിൽ (ഇസ്ട്രാക്) രാജ്യത്തിന്റെ മുൻ പ്രഥമപൗരനും ലോകോത്തര ശാസ്‌ത്രജ്‌ഞനുമായ അന്തരിച്ച ഡോ. എ.പി.ജെ. അബ്‌ദുൽ കലാമും വന്നെത്തിയിരുന്നു. കാരണം, ഇന്ത്യ ചന്ദ്രയാൻ ദൗത്യത്തെക്കുറിച്ച് ആലോചിക്കുമ്പോൾ കലാം മുന്നോട്ടുവച്ച ആശയമായിരുന്നു ഇന്ത്യൻ പതാക നാം ചന്ദ്രോപരിതലത്തിലെത്തിക്കണമെന്നത്. ആ നിർദേശമാണു 2008 നവംബർ 14ന്  ഇന്ത്യൻ ബഹിരാകാശ ശാസ്‌ത്രലോകം അക്ഷരംപ്രതി സാർഥകമാക്കിയത്.

ഡോ. കലാമിനു പുറമേ, ഐഎസ്‌ആർഒ ചെയർമാൻ ഡോ. ജി. മാധവൻ നായർ, ഐഎസ്‌ആർഒ മുൻ ചെയർമാനും ലോകം കണ്ട മികച്ച ഭൗതിക ശാസ്‌ത്രജ്‌ഞരിലൊരാളുമായ പ്രഫ. യു.ആർ. റാവു തുടങ്ങിയവരും ഇസ്ട്രാക്കിലെത്തിയിരുന്നു.  കൂടാതെ, ചന്ദ്രയാൻ–1 ദൗത്യത്തെ യാഥാർഥ്യമാക്കിയവരിലെ മുൻനിരക്കാരായ ഐഎസ്‌ആർഒ ഉപഗ്രഹ കേന്ദ്രം ഡയറക്‌ടർ ടി.കെ. അലക്‌സ്, ചന്ദ്രയാൻ1 മിഷൻ ഡയറക്‌ടർ മയിൽസ്വാമി അണ്ണാദുരൈ, അന്നു തിരുവനന്തപുരത്തെ വിഎസ്എസ്‌സി ഡയറക്ടറും പിന്നീട് ഇസ്രോ ചെയർമാനുമായ  ഡോ.കെ.രാധാകൃഷ്‌ണൻ, പിഎസ്‌എൽവി മിഷൻ ഡയറക്‌ടർ ജോർജ് കോശി, വെഹിക്കിൾ ഡയറക്‌ടർ സി. വേണുഗോപാൽ തുടങ്ങി ഒട്ടേറെ ശാസ്‌ത്രജ്‌ഞരും ഐഎസ്‌ആർഒയിലെ നൂറുകണക്കിനു വിദഗ്‌ധരും സഹായികളും മാധ്യമലോകവുമെല്ലാം ഈ ചരിത്രനേട്ടത്തിന്റെ മാധുര്യമറിയാനെത്തിയിരുന്നു.

∙ ചന്ദ്രൻ സാക്ഷിയായ ചരിത്രനിമിഷം

‘ഇതാ, ചന്ദ്രനെ ഐഎസ്‌ആർഒ ഇന്ത്യയ്‌ക്കു നൽകുന്നു, ഇന്ത്യൻ ത്രിവർണപതാക ചന്ദ്രോപരിതലത്തിലെത്തിയിരിക്കുന്നു’ എന്ന മാധവൻ നായരുടെ പ്രഖ്യാപനം ആ നിമിഷങ്ങളിൽ കരഘോഷങ്ങളോടെയാണു നൂറുകണക്കിനു സദസ്യർ സ്വീകരിച്ചത്. മുൻനിശ്‌ചയിച്ചതു പ്രകാരംഅന്നു രാത്രി 8.06ന് തന്നെ ചന്ദ്രയാൻ1 ഉപഗ്രഹത്തിൽനിന്നു മൂൺ ഇംപാക്‌ട് പ്രോബ് (എംഐപി) വേർപെടുത്താൻ ശാസ്‌ത്രജ്‌ഞർക്കായി.

25 മിനിറ്റുകൊണ്ടാണ് ഈ പേടകം ചന്ദ്രോപരിതലത്തിൽ ഇടിച്ചിറങ്ങിയത്. ചന്ദ്രന്റെ ദക്ഷിണധ്രുവത്തിലാണ് എംഐപി പതിച്ചത്. കണക്കുകൂട്ടി നിശ്‌ചയിക്കപ്പെട്ട സ്‌ഥലത്തിനു തൊട്ടടുത്തുതന്നെ ഈ പേടകം എത്തിക്കാൻ സാധിച്ചു. ചന്ദ്രനും നമ്മളോടു നന്നായി സഹകരിച്ചെന്നുകൂടി  മാധവൻ നായർ പറഞ്ഞപ്പോൾ സദസ്സു കരഘോഷം മുഴക്കി. 

അപ്പോഴേക്കും ചന്ദ്രയാനിലെ ടെറയ്‌ൻ മാപ്പിങ് ക്യാമറ മികച്ച വ്യക്‌തതയുള്ള ചിത്രം ഭൂമിയിലേക്ക് അയച്ചുതുടങ്ങിയിരുന്നു. ആ ചിത്രം അന്ന് ഐഎസ്ആർഒ ലോകത്തിനുമുന്നിൽ അഭിമാനത്തോടെ അവതരിപ്പിച്ചു.  പിറ്റേന്നുതന്നെ ചന്ദ്രയാൻ1ലെ കൂടുതൽ ക്യാമറകളും യന്ത്രസംവിധാനങ്ങളും സ്വിച്ച് ഓൺ ചെയ്യപ്പെട്ടു. ചന്ദ്രോപരിതലത്തിലേക്കു മനുഷ്യനിർമിത വസ്‌തു എത്തിച്ച നാലു രാജ്യങ്ങളിലൊന്നായി  2008 നവംബർ 14ന് ഇന്ത്യ.

ചന്ദ്രയാൻ1 ഉപഗ്രഹത്തിൽ അയച്ച മൂൺ ഇംപാക്‌ട് പ്രോബ് (എംഐപി) ചന്ദ്രോപരിതലത്തിലെത്തിച്ചതോടെയാണു യുഎസിനും സോവിയറ്റ് യൂണിയനും ഫ്രാൻസിനും ശേഷം ആ സ്‌ഥാനം ഇന്ത്യയ്‌ക്കു സ്വന്തമായത്. സ്വന്തം നിലയിൽ വസ്‌തു അയച്ച രാജ്യങ്ങളുടെ കണക്കെടുത്താൽ മൂന്നാം സ്‌ഥാനമാണ് ഇന്ത്യയ്‌ക്ക്. കാരണം, ഫ്രാൻസ് അവരുടേതായ വസ്‌തു ചന്ദ്രോപരിതലത്തിലെത്തിച്ചതു യുഎസിന്റെ ചന്ദ്രയാത്രാ പദ്ധതിയുടെ ഭാഗമായാണ്. 

∙ അറിയുക, അവരാണ് അമ്പിളിമാമനെ പിടിച്ചുതന്നവർ

മാനത്തു മോഹിപ്പിച്ചുനിന്ന അമ്പിളിമാമനെ ഭാരതീയരുടെ കൈക്കുമ്പിളിലേക്കു ശാസ്‌ത്രലോകം എത്തിച്ചുതന്നപ്പോൾ അതിനു നിമിത്തമായത് രണ്ടു മലയാളികളുടെ നായകത്വം. ചന്ദ്രനെയും കീഴടക്കാം എന്ന ആശയം രൂപപ്പെടുന്ന കാലത്ത് ഐഎസ്‌ആർഒയുടെ ചെയർമാനായിരുന്ന ഡോ. കെ.കസ്‌തൂരിരംഗനും ചന്ദ്രയാൻ പദ്ധതി യാഥാർഥ്യമാക്കിയ ചെയർമാൻ ഡോ. ജി. മാധവൻനായരും. രണ്ടു കേരള കേസരികൾ. ഇന്ത്യയുടെ ബഹിരാകാശ ഗവേഷണ വിഹായസ്സിലെ പൂർണചന്ദ്രന്മാർ. 

ചന്ദ്രയാത്രാ പദ്ധതിയുടെ വിജയവുമായി അന്യഗ്രഹ പര്യവേഷണ ദൗത്യങ്ങൾക്ക് ഇന്ത്യ തുടക്കംകുറിക്കുമ്പോൾ ആ ആശയം ഉടലെടുത്ത ചിന്തയായി നമുക്കു മുന്നിലെത്തുന്ന മുഖം കൊച്ചി സ്വദേശിയുടേതാണ്. ലോകം ഏറെ ആദരവോടെ നോക്കിക്കാണുന്ന ഭൗതിക ശാസ്‌ത്രജ്‌ഞൻ കൊച്ചി സ്വദേശിയായ ഡോ.കെ.കസ്‌തൂരിരംഗന്റെ മുഖം.

ഐഎസ്‌ആർഒ ചെയർമാനെന്ന നിലയിൽ ചന്ദ്രയാൻ-1 പദ്ധതി വിജയയാഥാർഥ്യമാക്കാൻ ചുക്കാൻ പിടിക്കുകയും പിന്നീടു ചന്ദ്രയാൻ-2 പദ്ധതിയെക്കുറിച്ചും ചന്ദ്രനിലേക്കു മനുഷ്യനെ അയയ്‌ക്കുന്ന ഇന്ത്യൻ ദൗത്യത്തെക്കുറിച്ചും സംസാരിക്കുകയും ചെയ്യുന്ന തിരുവനന്തപുരം നെയ്യാറ്റിൻകര സ്വദേശി ഡോ. ജി. മാധവൻനായരാണിവരിൽ രണ്ടാമൻ.

കൊച്ചിയിൽ ചിറ്റൂർ റോഡിലെ സമൂഹത്ത് മഠത്തിൽ കൃഷ്‌ണസ്വാമിയുടെയും വിശാലാക്ഷിയുടെയും മകായി 1940 ഒക്‌ടോബർ 24നാണ് ഡോ.കസ്തൂരിരംഗന്റെ ജനനം.  വെറും രണ്ടു വയസ്സുള്ളപ്പോൾ പെറ്റമ്മയുടെ മരണം സൃഷ്‌ടിച്ച പ്രതിസന്ധിയിൽ തളരാതെ മുന്നേറിയ വ്യക്തിയാണദ്ദേഹം.