ജൂണിൽ ‘ദളപതി’ക്ക് 50; ലക്ഷ്യം ആ 20–30% വോട്ട്? പരാജയമാകുമോ വിജയ്? രാഷ്ട്രീയത്തിൽ ‘തിരക്കഥ’ മുഖ്യം ബിഗിലേ!

നിലവിൽ എടപ്പാടിയാണ് പാർട്ടി ജനറൽ സെക്രട്ടറി. എംജിആറും ജയലളിതയുമായി താരതമ്യം ചെയ്യുമ്പോൾ എടപ്പാടിയുടെ കാലം ഒരു ‘ലോ ബജറ്റ്’ ചിത്രം മാത്രം. ഡിഎംകെയാകട്ടെ എം.കെ.സ്റ്റാലിനു കീഴിൽ അതിന്റെ പ്രതാപകാലത്തെ അനുസ്മരിപ്പിക്കുംവിധം ശക്തമാണ്. സംഘപരിവാറിനെതിരായ ശക്തമായ നിലപാടുകളിലൂടെ ഉദയനിധി സ്റ്റാലിൻ പാർട്ടിയുടെ തലപ്പത്തേയ്ക്കുള്ള വരവറിയിച്ചിരിക്കുന്നു. അതിശക്തമായി ഡിഎംകെയെ വെല്ലുവിളിക്കാനുള്ള കരുത്ത് വിജയ്‌ക്കുണ്ടെന്ന് തെളിഞ്ഞാൽ ഡിഎംകെ വിരുദ്ധ വോട്ടുകൾ അദ്ദേഹത്തിലേക്കു പോകും. അങ്ങനെയെങ്കിൽ, എംജിആറിന്റെ വരവോടെ കോൺഗ്രസ് ദുർബലമായതു പോലെ അണ്ണാഡിഎംകെ അപ്രസക്തമാകും.വിജയ്–കമൽ സഖ്യത്തിലൂടെ തമിഴകത്തൊരു പുതിയ രാഷ്ട്രീയ ബദലിനുള്ള സാധ്യതകളും തള്ളിക്കളയാനാകില്ല.

∙ പിന്നിലാരുണ്ട്, അതിലറിയാം തലവര

രാഷ്ട്രീയ കരുനീക്കങ്ങളുമായി പിന്നണിയിലാരുണ്ട് എന്നതും വിജയ്‌യുടെ രാഷ്ട്രീയ ജീവിതത്തിന്റെ ഗതി നിർണയിക്കും. ഡിഎംകെ വിട്ട് അണ്ണാഡിഎംകെ രൂപീകരിച്ചപ്പോൾ എംജിആറിനു കരുത്തായി ആർ.എം.വീരപ്പനെന്ന കിടയറ്റ രാഷ്ട്രീയ ചാണക്യനുണ്ടായിരുന്നു. എംജിആർ രസികർ മൻട്രങ്ങളെ പാർട്ടി ഘടകങ്ങളാക്കി മാറ്റുന്നതിലും സംഘടന കെട്ടിപ്പടുക്കുന്നതിനും വീരപ്പൻ വഹിച്ച പങ്ക് വളരെ വലുതാണ്. കരുണാനിധിക്കൊപ്പം ഡിഎംകെയുടെ നേതൃനിരയിലുണ്ടായിരുന്ന വലിയ സംഘം നേതാക്കളും എംജിആറിനു വഴിയൊരുക്കാൻ കൂടെയുണ്ടായിരുന്നു.

എംജിആറിനൊപ്പം പ്രവർത്തിച്ച ഒരു നിര നേതാക്കളാണ് രാഷ്ട്രീയ ജീവിതത്തിന്റെ ആദ്യ കാലത്ത് ജയലളിതയ്ക്ക് തുണയായി നിന്നത്. പിന്നീട് തോഴിയായെത്തിയ ശശികലയുടെ മണ്ണാർകുടി കുടുംബം പിന്നണിയിലിരുന്ന് ജയയ്ക്കായി ചരടുവലിച്ചു. ഒട്ടേറെ ചീത്തപ്പേരുണ്ടാക്കിയെങ്കിലും അണ്ണാഡിഎംകെയുടെ സംഘടനാ സംവിധാനത്തെ ഏറെക്കാലം ചലിപ്പിച്ചത് ശശികലയുടെ കുടുംബമായിരുന്നു. ശശികലയുടെ ഭർത്താവ് നടരാജന്റെ ചാണക്യ ബുദ്ധിയും ജയലളിതയ്ക്ക് രാഷ്ട്രീയത്തിലെ ചുഴികളും മലരുകളും കടക്കാൻ തുണയായി.

എംജിആറിനും ജയലളിതയ്ക്കും ശേഷം ഒരു പരിധിവരെ രാഷ്ട്രീയത്തിൽ വിജയിച്ച സിനിമാ താരം വിജയകാന്താണ്. നിയമസഭയിലെ പ്രതിപക്ഷ നേതൃപദവി വരെയെത്താൻ അദ്ദേഹത്തിനായി. വിജയകാന്ത് ഡിഎംഡികെ രൂപീകരിക്കുമ്പോൾ കൂട്ടിന് മുൻ മന്ത്രി പൻറുട്ടി എസ്.രാമചന്ദ്രൻ ഉൾപ്പെടെയുള്ളവരുണ്ടായിരുന്നു. എംജിആർ രസികർ മൻട്രത്തെ പോലെ വിജയ്ക്ക് വിജയ് മക്കൾ ഇയക്കമുണ്ട്. ഡിഎംകെയിൽ ദീർഘകാലം പ്രവർത്തിച്ച അനുഭവ സമ്പത്തും പരിചയ സമ്പന്നരായ നേതാക്കളും രസികർ മൻട്രത്തെ രാഷ്ട്രീയ പാർട്ടിയാക്കി മാറ്റിയെടുക്കാൻ എംജിആറിനെ സഹായിച്ചിരുന്നു. തമിഴ്നാട്ടിലാകെ വേരുകളുള്ള വിജയ് മക്കൾ ഇയക്കത്തെ രാഷ്ട്രീയ പാർട്ടിയുടെ ചിട്ടവട്ടത്തിലേക്കു കൊണ്ടുവരാനുള്ള ശ്രമം വിജയിക്കുമോയെന്നു പക്ഷേ കാലം തെളിയിക്കും.

∙ അന്തർമുഖനിൽനിന്ന് ആൾക്കൂട്ടത്തിലേയ്ക്ക്...

സ്ക്രീനിൽ അടിച്ചമർത്തപ്പെട്ടവന്റെ നായകനായി നിറഞ്ഞു നിൽക്കുന്ന വിജയ് ജീവിതത്തിൽ നാണം കുണുങ്ങിയായ, തന്നിലേക്കു ചുരുങ്ങാൻ ശ്രമിക്കുന്ന അന്തർമുഖനാണ്. എംജിആറിന്റെയോ ജയലളിതയുടെയും കമൽഹാസന്റെയോ വ്യക്തിപ്രഭാവം വിജയ്ക്ക് അവകാശപ്പെടാനില്ല. ആൾക്കൂട്ടങ്ങളെ ഇളക്കി മറിക്കുന്ന തലൈവരാകാൻ വിജയ്‌ക്ക് എത്രമാത്രം കഴിയുമെന്ന ചോദ്യം ഇപ്പോൾതന്നെ ഉയർന്നു തുടങ്ങിയിട്ടുണ്ട്. എന്നാൽ, ഏഴൈ തോഴനായിരുന്ന എംജിആറിനെപ്പോലെ, സ്ക്രീനിനു പുറത്തും കാരുണ്യവാനായ നായകന്റെ പ്രതിച്ഛായയുണ്ട് വിജയ്ക്ക്.

1973ൽ ഡിണ്ടിഗൽ ലോക്സഭാ സീറ്റിലേക്കു നടന്ന ഉപതിരഞ്ഞെടുപ്പ് തമിഴ്നാട് രാഷ്ട്രീയത്തിലെ നിർണായക വഴിത്തിരിവാണ്. അണ്ണാഡിഎംകെ രണ്ടില ചിഹ്നത്തിൽ മത്സരിച്ച ആദ്യ തിരഞ്ഞെടുപ്പ്. ഡിഎംകെയുടെ സിറ്റിങ് സ്ഥാനാർഥി അന്തരിച്ച ഒഴിവിലേയ്ക്കായിരുന്നു ഉപതിരഞ്ഞെുപ്പ്. എംജിആർ വെറും സിനിമാക്കാരനാണെന്നും തിരയിലെ വേലയൊന്നും രാഷ്ട്രീയത്തിൽ ചെലവാകില്ലെന്നുമായിരുന്നു ഡിഎംകെ പ്രചാരണം. വോട്ടെണ്ണിത്തുടങ്ങി ആദ്യഘട്ടം മുതൽ അണ്ണാഡിഎംകെ സ്ഥാനാർഥി മായാ തേവർ മുന്നിട്ടു നിന്നു. ഒരു ഘട്ടമെത്തിയപ്പോൾ അണ്ണാഡിഎംകെ വിജയം ഉറപ്പിച്ചു.

വോട്ടെണ്ണൽ കേന്ദ്രത്തിൽനിന്ന് നിരാശനായി ഇറങ്ങിവന്ന ഡിഎംകെ നേതാവ് മുരശൊലി മാരനോട് പ്രവർത്തകരിലൊരാൾ ചോദിച്ചു. ‘‘വോട്ടെണ്ണൽ എന്താകും?’’.അധികം വൈകാതെ ജയലളിത തമിഴ്നാടിന്റെ മുഖ്യമന്ത്രിയാകുമെന്നായിരുന്നു നീരസത്തോടെയുള്ള മാരന്റെ മറുപടി. എംജിആറിന്റെ പാർട്ടിക്ക് ജനം നൽകിയ അംഗീകാരത്തെ പരിഹസിക്കാനാണ് മാരൻ ഉദ്ദേശിച്ചതെങ്കിലും അധികം വൈകാതെ ആ പറച്ചിൽ സത്യമായി. അതുകൊണ്ട്, തമിഴ്നാടാണ് ദേശം, രാഷ്ട്രീയമാണ് കളി, സിനിമയാണ് ആയുധം. ഒന്നുമേ ശൊല്ല മുടിയാത്.