സംശയിച്ച നടിയോട് മമ്മൂട്ടി, ‘നതിങ്, ഇറ്റ് ഈസ് പൊളിറ്റിക്സ്’: രണ്ടു തവണ ‘ആത്മഹത്യ’ ചെയ്യാനില്ലെന്ന് സാനു മാഷും

സ്വതന്ത്ര സ്ഥാനാർഥികളുടെ യഥാർഥ വേദന പലപ്പോഴും അവർക്ക് അനുവദിച്ചു കിട്ടുന്ന ചിഹ്നങ്ങളായിരിക്കും. കാരണം സ്വതന്ത്ര സ്ഥാനാർഥിക്ക് സ്വന്തം പേര് മാത്രം വോട്ടറുടെ മനസ്സിൽ പതിപ്പിച്ചാൽ പോരാ, ചിഹ്നം കൂടി പഠിപ്പിക്കണം. ഒരിക്കൽ ലഭിച്ച ചിഹ്നം അടുത്ത തവണ മത്സരിക്കുമ്പോൾ ലഭിക്കുമോ എന്ന ആശങ്കയും സ്വതന്ത്രർക്കുണ്ട്. ചിഹ്നം മാറ്റിയതു മൂലം പരാജയം നേരിട്ടവരും കേരള രാഷ്ട്രീയത്തിലുണ്ട്. മറ്റൊരു കൂട്ടർ പ്രമുഖ രാഷ്ട്രീയ പാർട്ടികളുടെ പിന്തുണയോടെ സ്വതന്ത്രരായി മത്സരിക്കുന്നവരാണ്. ഇവിടെ സ്ഥാനാര്‍ഥിയെ പരിചയപ്പെടുത്തുന്നതിനേക്കാളും പിന്തുണ നൽകുന്ന പാർട്ടി വിയർക്കുന്നത് വോട്ടർമാർക്ക് മുന്നിൽ ചിഹ്നം പരിചയപ്പെടുത്താനാവും. കേരള രാഷ്ട്രീയത്തിൽ നിയമസഭാ, ലോക്സഭാ തിരഞ്ഞെടുപ്പുകളിൽ മത്സരിച്ച സിനിമാ, സാഹിത്യ മേഖലയിലെ പ്രമുഖരായ വ്യക്തികളുടെ ജയപരാജയങ്ങളെ കുറിച്ചും അതിൽ ചിഹ്നങ്ങൾ വഹിച്ച വലിയ പങ്കും വളരെ വലുതാണ്. കൗതുകം നിറഞ്ഞ ആ കഥകളിൽ മമ്മൂട്ടിയും ശോഭനയും കെ. കരുണാകരനും മാധവിക്കുട്ടിയും കടമ്മനിട്ടയും ഒഎൻവിയുമെല്ലാമുണ്ട്. 

∙ ‘ചെണ്ടകൊട്ടി’ കുഞ്ഞുമുഹമ്മദ്

സിനിമാ സംവിധായകൻ എന്ന നിലയിൽ ആദ്യമായി നിയമസഭ കാണാൻ യോഗമുണ്ടായത് പി.ടി. കുഞ്ഞു മുഹമ്മദിനാണ്. 1994ൽ ഗുരുവായൂർ ഉപതിരഞ്ഞെടുപ്പിൽ വിജയിച്ചാണ് അദ്ദേഹം നിയമസഭയിലേക്ക് എത്തിയത്. മുസ്‌ലിം ലീഗിലെ പി.എം. അബൂബക്കറിന്റെ മരണത്തെതുടർന്നാണ് അവിടെ ഉപ തിരഞ്ഞെടുപ്പു വേണ്ടി വന്നത്. മുസ്‍ലിം ലീഗിലെ പിളർപ്പ്, ഇന്ത്യൻ നാഷനൽ ലീഗ്, പിഡിപി എന്നീ പാർട്ടികളുടെ രൂപീകരണം എന്നിവയുടെ പശ്ചാത്തലത്തിലായിരുന്നു ആ തിരഞ്ഞെടുപ്പ്. നിർമാതാവും സംവിധായകനുമായ പി.ടി കുഞ്ഞു മുഹമ്മദിനെ സാംസ്കാരിക മുഖമായിട്ടാണ് സിപിഎം രംഗത്തിറക്കിയത്. അശ്വത്ഥാമാവ്, പുരുഷാർഥം, സ്വരൂപം എന്നീ സിനിമകളുടെ നിർമാതാവായ കുഞ്ഞു മുഹമ്മദ് സംവിധാനം ചെയ്ത ‘ഗർഷോം’ എന്ന സിനിമ അപ്പോഴേക്കു പുറത്തു വന്നിരുന്നു. മുസ്‍ലിം ലീഗിലെ അബ്ദുസ്സമദ് സമദാനി ആയിരുന്നു യുഡിഎഫ് സ്ഥാനാർഥി.

ചെണ്ട ചിഹ്നത്തിലാണ് കുഞ്ഞു മുഹമ്മദ് ജനവിധി തേടിയത്. പരമ്പരാഗത ചെണ്ട ആയിരുന്നില്ല. പെരുമ്പറയാണ് തിരഞ്ഞെടുപ്പു കമ്മിഷൻ അനുവദിച്ചത്. മുസ്‍ലിം സമുദായത്തിന്റെ വോട്ട് നിർണായകമായിരുന്ന മണ്ഡലത്തിൽ മതനിരപേക്ഷതയുടെ കൂടി ചിഹ്നമായി ആ ചെണ്ട അവതരിപ്പിക്കപ്പെട്ടു. 2082 വോട്ടുകൾക്കാണ് അദ്ദേഹം വിജയിച്ചത്. പിഡിപി ബിജെപിയെ പിന്തള്ളി മൂന്നാം സ്ഥാനത്തെത്തിയെന്ന സവിശേഷത കൂടി ആ തിരഞ്ഞെടുപ്പിനുണ്ടായിരുന്നു. 

ആ വർഷത്തെ സംസ്ഥാന ചലച്ചിത്ര അവാർഡിൽ മികച്ച നവാഗത സംവിധായകനായി കുഞ്ഞു മുഹമ്മദിനെ തിരഞ്ഞെടുത്തിരുന്നു. തിരഞ്ഞെടുപ്പ് പ്രചാരണങ്ങൾക്കിടയിലാണ് പുരസ്കാരം സമ്മാനിച്ചത്. മൂവാറ്റുപുഴയാണ് ആ ചടങ്ങിനു വേദിയായത്. തിരഞ്ഞെടുപ്പു സമയത്ത് അവാർഡ് കൊടുക്കുന്നതിന്റെ ഔചിത്യത്തെപ്പറ്റിയൊക്കെ ചർച്ചകളുണ്ടായി. എന്നാൽ മുഖ്യമന്ത്രിയായിരുന്ന കെ. കരുണാകരൻ വഴങ്ങിയില്ല. സ്ഥാനാർഥിയായതിനാൽ പി.ടി കുഞ്ഞു മുഹമ്മദിന് വേദിയിൽ ഏറ്റവും പിന്നിലാണ് ഇരിപ്പിടം കിട്ടിയത്. പുരസ്കാരത്തിനു പേരു വിളിച്ചപ്പോൾ നിർത്താത്ത കയ്യടിയായിരുന്നു.

ചലച്ചിത്രതാരങ്ങളായ മമ്മൂട്ടി, ശോഭന എന്നിവരൊക്കെ വേദിയിലുണ്ടായിരുന്നു. കയ്യടിയുടെ അസ്വാഭാവികത ശ്രദ്ധിച്ച ശോഭന മമ്മൂട്ടിയോട് ചോദിച്ചു ‘വാട്ട് ഈസ് ഹാപ്പനിങ്?’ (എന്താണ് സംഭവിക്കുന്നത്?) മമ്മൂട്ടി പറഞ്ഞു: ‘നതിങ്, ഇറ്റ് ഈസ് പൊളിറ്റിക്സ്’( ഒന്നുമില്ല, ഇതൊക്കെ രാഷ്ട്രീയമാണ്). ശോഭനയ്ക്ക് കാര്യം മനസ്സിലായി. അവർ പുഞ്ചിരിച്ചു. 1996ലെ തിരഞ്ഞെടുപ്പിലും ചെണ്ട ചിഹ്നത്തിൽ മത്സരിച്ച് കുഞ്ഞു മുഹമ്മദ് നിയമസഭയിലെത്തി. 

∙ പെരുമ്പറയുടെ തമിഴ്ഗാഥ

ചെണ്ട ചിഹ്നത്തിനും ഒരു തമിഴ്നാട് കഥ അനുബന്ധമായിട്ടുണ്ട്. നടൻ വിജയകാന്തിന്റെ ദേശീയ മറുമലർച്ചി ദ്രാവിഡ മുന്നേറ്റ കഴകം (ഡിഎംഡികെ) ഈ ചിഹ്നം ഔദ്യോഗികമാക്കുന്നതിന് ഒരു ശ്രമം നടത്തിയിരുന്നു. തിരുപ്പൂരിലെ ഒരു വസ്ത്ര വ്യാപാരി അതിനെതിരെ മുന്നോട്ടു വന്നു. തന്റെ ബ്രാൻഡാണ് ആ ചിഹ്നമെന്നും പകർപ്പവകാശമുണ്ടെന്നുമായിരുന്നു അദ്ദേഹത്തിന്റെ വാദം. എന്നാൽ തിരഞ്ഞെടുപ്പു കമ്മിഷൻ അത് അംഗീകരിച്ചില്ല. അങ്ങനെ പെരുമ്പറ ചിഹ്നം ഡിഎംഡികെയ്ക്കു സ്വന്തമായി.

∙ ഹാട്രിക് തെറ്റിച്ച കുട്ട

 2001ൽ ഗുരുവായൂർ മണ്ഡലത്തിൽ ഹാട്രിക് പരീക്ഷണത്തിന് കുഞ്ഞു മുഹമ്മദ് വീണ്ടുമെത്തി. മുസ‍്‌ലിം ലീഗിലെ പി.കെ.കെ. ബാവയായിരുന്നു യുഡിഎഫ് സ്ഥാനാർഥി. ചെണ്ടതന്നെയാണ് ചിഹ്നമെന്ന പ്രതീക്ഷയി‍ൽ ചുവരെഴുത്തെല്ലാം പുരോഗമിച്ചു. പക്ഷേ തിരഞ്ഞെടുപ്പു കമ്മിഷൻ അത് നിരസിച്ചു. മേഖലയിലെ ഒരു പ്രാദേശിക പാർട്ടി ആ ചിഹ്നം സ്വന്തമാക്കിക്കഴിഞ്ഞിരുന്നു. പ്രചാരണമധ്യത്തിൽ ചിഹ്നം നഷ്ടപ്പെട്ടാൽ എന്തു ചെയ്യും? സമാനമായ മറ്റൊരു ചിഹ്നത്തിന്റെ അന്വേഷണം ചെന്നു നിന്നത് കുട്ടയിലാണ്. പെരുമ്പറയുടെ തോലിളക്കിയാൽ കുട്ടയായി. അതിന്റെ കോലു വളച്ചു വച്ചാൽ കുട്ടയുടെ വാറായി.അതുകൊണ്ട് ചുവരെഴുത്തിൽ ഭേദഗതി എളുപ്പമായിരുന്നു. എന്നാൽ ആ ചിഹ്നം കുഞ്ഞുമുഹമ്മദിന് ഭാഗ്യക്കേടായി. കനത്ത പരാജയത്തോടെ ഹാട്രിക് മോഹത്തിനു തിരശ്ശീല വീണു.

∙ എം.കെ. സാനുവിന്റെ മയിൽ 

സാംസ്കാരിക പ്രവർത്തകനെന്ന പ്രതിച്ഛായയുമായിട്ടാണ് പി.ടി. കുഞ്ഞു മുഹമ്മദ് നിയമസഭയിലേക്ക് എത്തിയത്. എന്നാൽ ഈ മേഖലയിൽനിന്ന് ആദ്യം എംഎൽഎ ആയത് പ്രഫ.എം.കെ. സാനു ആയിരുന്നു. അധ്യാപകനും എഴുത്തുകാരനും പ്രഭാഷകനുമായ അദ്ദേഹം 1987ൽ എറണാകുളത്തുനിന്നാണു വിജയിച്ചത്. സിപിഎം സ്വതന്ത്ര സ്ഥാനാർഥിയായ അദ്ദേഹത്തിനു ലഭിച്ച ചിഹ്നമാകട്ടെ മയിലും . സാനുമാഷിന്റെ മയിലടയാളം 10,032 വോട്ടുകളുടെ ഭൂരിപക്ഷമാണ് സ്വന്തമാക്കിയത്. അടുത്തൊരു അങ്കത്തിന് അദ്ദേഹത്തെ ക്ഷണിച്ചെങ്കിലും ഒരാൾ രണ്ടുതവണ ആത്മഹത്യ ചെയ്യില്ലെന്നു പറഞ്ഞ് അദ്ദേഹം പിൻവാങ്ങി.

∙ ത്രാസുമായി ഒഎൻവി

പ്രഫ.എം.കെ. സാനുവിന്റെ മാതൃക ഒന്നുകൂടി പരീക്ഷിക്കാൻ എൽഡിഎഫ് ശ്രമം നടത്തി. അതിന് അവർ തിരഞ്ഞെടുത്തത് തിരുവനന്തപുരം ലോക്സഭാ മണ്ഡലമായിരുന്നു. കവിയും അധ്യാപകനും ഗാനരചയിതാവുമായ പ്രഫ. ഒ.എ‍ൻ.വി. കുറുപ്പിനെയാണ് അതിനു കണ്ടെത്തിയത്. 1989ൽ സിപിഐ സ്വതന്ത്ര സ്ഥാനാർഥിയായി ത്രാസ് അടയാളത്തിലാണ് അദ്ദേഹം രംഗത്തു വന്നത്. 1965ൽ നാട്ടികയിൽ രാമുകാര്യാട്ട് വിജയിച്ച ത്രാസ്. ഒഎൻവി കുറുപ്പ് എൽഡിഎഫ് സ്ഥാനാർഥിയായി മത്സരിക്കുന്നതിനെപ്പറ്റി അക്കാലത്ത് പത്രപ്രവർത്തകർ അന്നത്തെ മുഖ്യമന്ത്രി കെ.കരുണാകരനോട് പ്രതികരണം ആരാഞ്ഞു. ‘‘അദ്ദേഹം വലിയ ഒരു കവിയാണ്. അദ്ദേഹത്തെ നമുക്ക് ഇവിടെ വേണം.’’ പതിവുശൈലിയിൽ കണ്ണിറുക്കിക്കൊണ്ടു ലീഡർ പറഞ്ഞു. വോട്ടർമാരും അതു ശരിവച്ചിരിക്കണം.  യുഡിഎഫിലെ എ. ചാൾസിനോട് കനത്ത പരാജയമാണ് ഒഎൻവിക്ക് ഏറ്റു വാങ്ങേണ്ടി വന്നത്.