2021ൽ ഒരു ഗോൾ പോലും വഴങ്ങാതെ ഇറ്റലിയുടെ കുതിപ്പ്; ഇറ്റാലിയൻ വീരഗാഥ!

റോം ∙ ഈ വർഷം ഇതുവരെ കളിച്ചത് 7 മത്സരങ്ങൾ, ഏഴിലും ജയം. അടിച്ചത് 31 ഗോളുകൾ, വഴങ്ങിയത് 0! യൂറോ കപ്പ് ഫുട്ബോളിൽ തുടരെ 2-ാം ജയത്തോടെ പ്രീ ക്വാർട്ടറിലെത്തിയ റോബർട്ടോ മാൻചീനിയുടെ ഇറ്റലിയുടെ കളിക്കണക്കുകളാണിത്. നോക്കൗട്ടിലെത്തുന്ന ആദ്യ ടീം എന്നതു മാത്രമല്ല ഇപ്പോൾ ഇറ്റലിക്കുള്ള വിശേഷണം.

കിരീടത്തിലേക്കുവരെ ആ കുതിപ്പു നീണ്ടേക്കാം എന്ന് എല്ലാവരും പറഞ്ഞു തുടങ്ങിയിരിക്കുന്നു. അതിനു ചരിത്രത്തിന്റെ പിൻബലവുമുണ്ട്. 1984ൽ ഫ്രാൻസും 1996ൽ ജർമനിയുമാണു യൂറോയിലെ ആദ്യ 2 കളികളും ഒരു ഗോൾ പോലും വഴങ്ങാതെ 2 ഗോൾ മാർജിനിൽ ജയിച്ചത്. 2 ടീമും കപ്പ് നേടി.

യൂറോയിലെ ഉദ്ഘാടന മത്സരത്തിൽ തുർക്കിയെ 3-0നു തോൽപിച്ച ഇറ്റലി ബുധനാഴ്ച രാത്രി സ്വിറ്റ്സർലൻഡിനെയും അതേ സ്കോറിനാണു വീഴ്ത്തിയത്. മാനുവൽ ലൊകാറ്റെല്ലി (26, 53), സീറോ ഇമ്മൊബിലെ (89) എന്നിവരാണ് ഇറ്റലിയുടെ ഗോളുകൾ നേടിയത്. 6 പോയിന്റോടെ ഗ്രൂപ്പ് എയിൽനിന്നു നോക്കൗട്ടും ഉറപ്പിച്ചു. ഞായറാഴ്ച നടക്കുന്ന ഇറ്റലി-വെയ്ൽസ് മത്സരം ഗ്രൂപ്പ് ജേതാക്കളെ തീരുമാനിക്കുന്നതിൽ നിർണായകമാകും.

English Summary: EURO 2020: Italy qualify for pre quarter