രാത്രികളിൽ ഇന്നും കേൾക്കുന്ന കുതിരക്കുളമ്പടി; ഇരണിയിൽ കൊട്ടാരം പുനർ ജനിക്കുമ്പോൾ...

കുലശേഖര സാമ്രാജ്യത്തിലെ അവസാന ഭരണാധികാരി മാത്രമല്ല വേണാട് രാജവംശത്തിനു തുടക്കമിട്ടതും അദ്ദേഹം ആണെന്ന് ചരിത്രകാരൻ എ. ശ്രീധരമേനോൻ രേഖപ്പെടുത്തിയിട്ടുണ്ട്. ഇവിടത്തെ വസന്ത മണ്ഡപത്തിലെ ഒറ്റക്കൽ കട്ടിലിൽനിന്ന് അദ്ദേഹം അന്തർധാനം ചെയ്യുകയായിരുന്നത്രേ. കൊല്ലവർഷത്തിനു തുടക്കമിട്ട ഉദയ മാർത്താണ്ഡ വർമയാണ് ഇവിടെനിന്ന് ഉടലോടെ സ്വർഗാരോഹണം പ്രാപിച്ചതെന്ന അഭിപ്രായവുമുണ്ട്. 1459നും 1501നും ഇടയ്ക്കാണ് ഈ കൊട്ടാരം നിർമിച്ചതെന്നും കരുതപ്പെടുന്നു. എന്തായാലും വേണാടു രാജാക്കന്മാരിൽ പലരും 16ാം നൂറ്റാണ്ടുവരെ ഇവിടെ കേന്ദ്രീകരിച്ചു ഭരണം നടത്തിയിരുന്നതായി കരുതുന്നു. ഇവിടെനിന്ന് അഞ്ചു കിലോമീറ്റർ അകലെയുള്ള പദ്മനാഭപുരം കൊട്ടാരം നിർമിക്കുന്നതുവരെയും ഇരണിയൽ വേണാടിന്റെ ഭരണ സിരാകേന്ദ്രമായി തുടർന്നു. 

കൽക്കുളത്തെ കൊട്ടാരത്തിലേക്കു ഭരണം മാറിയെങ്കിലും വേണാട്ടു രാജാക്കന്മാരുടെ ആദ്യ പിൻഗാമി ഇരണിയിൽ രാജകുമാരനായും രണ്ടാമത്തെയാൾ നെയ്യാറ്റിൻകര രാജകുമാരനായും അറിയപ്പെട്ടു. ഉമയമ്മ റാണിയുടെ കാലത്ത് വേണാട്ടിലേക്കു ദത്തെടുത്ത കോട്ടയം കേരള വർമ ഇരണിയൽ രാജകുമാരനായിരുന്നു. ആധുനിക തിരുവിതാംകൂറിന്റെ സൃഷ്ടാവായി അറിയപ്പെടുന്ന അനിഴം തിരുനാൾ മാർത്താണ്ഡ വർമ ഇരണിയൽ രാജകുമാരന്റെയും നെയ്യാറ്റിൻകര രാജകുമാരന്റെയും പദവികൾ ഒരേ സമയം വഹിച്ചിട്ടുണ്ട്. അദ്ദേഹം രാജ്യഭരണം ഏറ്റപ്പോൾ  കൽക്കുളത്തെ വലിയ കോയിക്കൽ കൊട്ടാരത്തിനു പദ്മനാഭപുരം എന്നു പേരിടുകായിരുന്നു. അദ്ദേഹത്തിന്റെ അമ്മാവന്റെ കുടുംബം അക്കാലത്ത് ഇരണിയലിൽ  താമസിച്ചിരുന്നു. മാർത്താണ്ഡവർമയ്ക്കെതിരായ ഉപജാപങ്ങൾക്കും പിന്നീട് ഈ കൊട്ടാരം സാക്ഷ്യം വഹിച്ചതായി കരുതുന്നു.    

∙ സി.വി. രാമൻപിള്ളയും രാമവർമ  കുലശേഖരനും

കുലശേഖര സാമ്രാജ്യത്തിലെ അവസാനത്തെ പെരുമാളായി കണക്കാക്കപ്പെടുന്ന രാമവർമ കുലശേഖരൻ ഇവിടെനിന്ന് അന്തർധാനം ചെയ്തത് പിൽക്കാലത്ത് ഒട്ടേറെ സാഹിത്യകൃതികളുടെ പ്രമേയമായി. സി.വി. രാമൻപിള്ള രചിച്ച ധർമരാജായെന്ന ചരിത്രാഖ്യായികയിലും ഈ സംഭവത്തെക്കുറിച്ചു പരാമർശമുണ്ട്. ഉടലോടെ സ്വർഗാരോഹണം ചെയ്ത കുലശേഖര ചക്രവർത്തിയാണു താനെന്നു പറഞ്ഞ് ശാന്ത ഹരിപഞ്ചാനൻ കളപ്രാക്കോട്ടു തമ്പിയെ കബളിപ്പിക്കുന്ന രംഗങ്ങളാണ് സി.വി അവതരിപ്പിച്ചിരിക്കുന്നത്. രാത്രികാലങ്ങളിൽ ഇവിടെനിന്നു കുതിരക്കുളമ്പടികൾ കേൾക്കുമായിരുന്നെന്ന കഥ പ്രദേശവാസികൾ പങ്കുവയ്ക്കുന്നു. ഇവിടുത്തെ വസന്ത മണ്ഡപത്തിൽ ഇപ്പോഴും രാമവർമ കുലശേഖരന്റെ  സാന്നിധ്യം ഉള്ളതായി ഇരണിയലുകാർ വിശ്വസിക്കുന്നു. അതിനു ഭാഷാഭേദങ്ങളില്ല. നാട്ടുകാർ ഇപ്പോഴും ഭയ ഭക്തിയോടെയാണ് ഈ പ്രദേശത്തെ കാണുന്നത്. ദിവസവും കട്ടിലിനു സമീപത്തു വിളക്കു തെളിക്കുകയും കട്ടിലിൽ പട്ടുവിരിക്കുകയും ചെയ്യുന്നത് ഈ വിശ്വാസത്തിന്റെ തുടർച്ചയിലാകണം. 

∙ ഉമയമ്മറാണിയുടെ ശാസനം 

വേണാടു കണ്ട ഏറ്റവും ശക്തയായ ഭരണാധികാരികളിലൊരാളാണ് ഉമയമ്മ റാണി. കോട്ടയം കേരള വർമ അവരുടെ കാലത്ത് ഇരണിയൽ രാജകുമാരനായിരുന്നല്ലോ. പുലപ്പേടി, മണ്ണാപ്പേടി തുടങ്ങിയ സവർണ ദുരാചാരങ്ങൾക്ക് ഇരയായി കുടുംബത്തിൽനിന്നു പുറത്തുപോകാൻ വിധിക്കപ്പെട്ട സ്ത്രീകളുടെ കണ്ണീരിന്റെയും ജാതീയമായ ഉച്ചനീചത്വങ്ങളുടെ കഥകളും കൂടിക്കുഴഞ്ഞതായിരുന്നു ഈ കാലം. സവർണ വിഭാഗത്തിലെ സ്ത്രീകൾ ചില ദിവസങ്ങളിൽ പുറത്തിറങ്ങുമ്പോഴാണ് പുലപ്പേടിയും മണ്ണാപ്പേടിയും ചാർത്തി തറവാട്ടിൽ നിന്ന് ഭ്രഷ്ടുകൽപിച്ച് ഒഴിവാക്കിയിരുന്നത്. വീടിനു പുറത്തിറങ്ങുന്ന സ്ത്രീകൾ ഇനി അത്തരം അനാചാരങ്ങൾക്കു വിധേയരാകേണ്ടതില്ലെന്ന ഉമയമ്മറാണിയുടെ ശാസനം അക്കാലത്തെ ഫ്യൂഡൽ സമൂഹത്തെ അസ്വസ്ഥരാക്കി. എന്നാൽ അതിനു വഴങ്ങിക്കൊടുക്കാൻ അവർ തയാറായില്ല. ഉമയമ്മറാണിയുടെ ചരിത്രം സൃഷ്ടിച്ച ആ  വിളംബരത്തിനു സാക്ഷിയായ കഥകളും ഇരണിയൽ കൊട്ടാരത്തിന്റെ മുറ്റത്ത് ഉറങ്ങുന്നു. 

∙ വേലുത്തമ്പിദളവയും നാട്ടുകൂട്ടവും

അനിഴം തിരുനാൾ മാർത്താണ്ഡവർമയുടെ അനന്തരവൻ ധർമരാജാവെന്ന് അറിയപ്പെട്ട കാർത്തികതിരുനാൾ രാമവർമയുടെ കാലമായപ്പോഴേക്കും പദ്മനാഭപുരത്തു നിന്ന് തിരുവിതാംകൂറിന്റെ ആസ്ഥാനം തിരുവനന്തപുരത്തേക്കു മാറ്റി. അതിൽ നാഞ്ചിനാട്ടുകാർക്ക് അസ്വസ്ഥതയുണ്ടായിരുന്നു. അതിനു പരിഹാരമായി അവിടത്തെ നാട്ടുകൂട്ടത്തിന്റെ പ്രതിനിധികൾക്ക് ഏതു നേരവും തിരുവനന്തപുരത്തെത്തി മഹാരാജാവിനെ നേരിട്ടു കണ്ടു പരാതികൾ ബോധ്യപ്പെടുത്താൻ അനുമതി നൽകി. മുരശും കാഹളവും മുഴക്കി  ഈ നാട്ടു പ്രമാണിമാർ എത്തുമ്പോൾ ഊണു കഴിക്കുകയാണെങ്കിൽപോലും അതു നിർത്തിവച്ച് രാജാവ് എണീറ്റു ചെന്നു പരാതികൾ കേൾക്കണമെന്നും വ്യവസ്ഥയുണ്ടായി.

കാർത്തിക തിരുനാളിന്റെ അനന്തരവൻ അവിട്ടം തിരുനാൾ ബാലരാമവർമ കാലമായപ്പോഴേക്കും ജയന്തൻ ശങ്കരൻ നമ്പൂതിരിപ്പാടായിരുന്നു ദിവാൻ. അദ്ദേഹം ഏർപ്പെടുത്തിയ നികുതി പരിഷ്കരണങ്ങൾക്കെതിരെ നാട്ടുകൂട്ടത്തിന് ശക്തമായഅമർഷം ഉണ്ടായിരുന്നു. അന്യായമായ നികുതി പരിഷ്കാരങ്ങൾക്കെതിരെ വേലായുധൻ തമ്പിയെന്ന ചെറുപ്പക്കാരന്റെ നേതൃത്വത്തിലെ നാട്ടുകൂട്ടം കൂടിയത് ഇരണിയൽ കൊട്ടാരത്തിന്റെ മുറ്റത്താണ്. പിന്നീട് വലിയൊരു സംഘം നാട്ടുകാർ അദ്ദേഹത്തിന്റെ നേതൃത്വത്തിൽ കാൽനടയായി തിരുവനന്തപുരത്തേക്കു പുറപ്പെട്ടു. ആ യാത്രയെ സ്വീകരിക്കാൻ സ്ത്രീകളുൾപ്പെടെയുള്ള വൻ സംഘമാണ് അണിനിരന്നത്. നാട്ടുകൂട്ടത്തെ നയിച്ച വേലായുധൻ തമ്പിയാണ് പിൽക്കാലത്ത് വേലുത്തമ്പിദളവയായി പ്രസിദ്ധനായത്.

∙ ഇരണിയൽ ചമ്പാവ്, നേരിയത്, കരുപ്പെട്ടി

സമ്പന്നമായ കാർഷിക സംസ്കാരത്തിന്റെയും നെയ്ത്തിന്റെയും ഓർമകൾ കൂടി നിറയുന്നതാണ് ഇരണിയലിന്റെ ചരിത്രം. ഇവിടുത്തെ പാടങ്ങളിൽ വിളഞ്ഞിരുന്ന ഇരണിയൽ ചമ്പാവരി വളരെ സ്വാദിഷ്ടമായിരുന്നത്രേ. ഇവിടെ നെയ്തിരുന്ന  നേർമയുള്ള ഇരണിയൽ പട്ടും പ്രസിദ്ധമായിരുന്നു. രാജാക്കന്മാ‍ർ അധികാരം ഏൽക്കുമ്പോൾ അണിയുന്ന തലപ്പാവി‍നായി പ്രത്യേക നേര്യത് ഇവിടുത്തെ തറികളിൽ  നെയ്യുമായിരുന്നു. പനകളുടെ നാടുകൂടിയായിരുന്നു ഇത്. ഇവിടെ നിർമിച്ചിരുന്ന കരുപ്പെട്ടിക്കും വിപണിയിൽ വളരെയേറെ പ്രീതിയുണ്ടായിരുന്നു. കൊട്ടാരം കാടുകയറിയപ്പോൾ ഓർമയായത് ഈ പൈതൃകങ്ങൾ കൂടിയാണ്. വീതി കൂടിയ കസവുകരയുള്ള മൃദുലമായ പാവ് മുണ്ടുകളാണ് ഇരണിയലിൽ നെയ്തിരുന്നത്. വിദേശത്തേക്കു പോലും അവ കയറ്റി അയയ്ക്കുമായിരുന്നു. പിൽക്കാലത്ത് അവിടുത്തെ നെയ്ത്തുകാർ തിരുവനന്തപുരത്തെ ബാലരാമപുരം ഉൾപ്പെടെ കേരളത്തിന്റെ പല ഭാഗത്തേക്കും കുടിയേറി കൈത്തറി ഗ്രാമങ്ങൾ തുറന്നു. അതോടെ ഇരണിയലിലെ നെയ്ത്തിന്റെ സംസ്കൃതിയും വിസ്മൃതിയിലേക്കു വഴിമാറുകയായിരുന്നു.

English Summary: Strengthening the Kerala-Tamil Nadu Bond; Story of Restoration of Eraniel Palace