സിനിമാ തിയറ്ററുകളിൽ പ്രവർത്തിക്കുന്ന ലഘുഭക്ഷണശാലകൾ ഭക്ഷണസാധനങ്ങൾക്ക് ഇരട്ടിവില ഈടാക്കുന്നതിനെതിരെ നടപടിയെടുക്കാൻ മനുഷ്യാവകാശ കമ്മിഷൻ അധ്യക്ഷൻ ജസ്റ്റിസ് ജെ.ബി. കോശി ഭക്ഷ്യസുരക്ഷാ കമ്മിഷണർക്കു നിർദേശം നൽകി.
വിലവർധനവിനെതിരെ ഭക്ഷ്യസുരക്ഷാ വകുപ്പോ തദ്ദേശ സ്വയംഭരണസ്ഥാപനങ്ങളോ നടപടി സ്വീകരിക്കുന്നില്ല. ഭൂരിഭാഗം തിയറ്ററുകളും എലികളുടെയും മൂട്ടകളുടെയും താവളമാണ്. സീറ്റുകളിൽ അറ്റകുറ്റപ്പണികൾ നടത്താറില്ല. ഫിറ്റ്നസ് ഉറപ്പാക്കാൻ തദ്ദേശ സ്വയംഭരണസ്ഥാപനങ്ങൾ ശ്രമിക്കാറുമില്ല. മനുഷ്യാവകാശ പ്രവർത്തകൻ തമ്പി സുബ്രഹ്മണ്യൻ ഫയൽ ചെയ്ത കേസിലാണു നടപടി.