തലൈവരും കലൈഞ്ജറും, ഉലകനായകനും ഇളയദളപതിയുമൊക്കെ തമിഴകത്തുണ്ടെങ്കിലും കോളിവുഡിന്റെ 'തല' അജിത്താണ്. സിക്സ് പായ്ക്കോ എയിറ്റ് പായ്ക്കോ ഇല്ലെങ്കിലും, ചറപറയുള്ള പഞ്ച് ഡയലോഗുകളോ, ത്രസിപ്പിക്കുന്ന ആക്ഷനോ അത്ര കണ്ട് ഇല്ലെങ്കിലും നര കയറിയ ആ തലയോടും നിഷ്കളങ്കമായ പുഞ്ചിരിയോടും വാലും തലയുമില്ലാത്ത ഒരു പ്രത്യേക സ്നേഹം ആരാധകര്‍ക്കുണ്ട്.
മോട്ടോര്‍ മെക്കാനിക്കായി ജീവിതം തുടങ്ങി, സഹനട വേഷങ്ങളിലൂടെ അഭിനയരംഗത്തെത്തി ഒടുവില്‍ അവിടെ മുടിചൂടാമന്നനായ അജിത് കുമാര്‍. ഫോര്‍മുലാ വണ്‍ മത്സരത്തില്‍ പങ്കെടുത്തിട്ടുള്ള ഒരേയൊരു ഇന്ത്യന്‍ ചലച്ചിത്ര താരം. മലയാളികളുടെ എക്കാലത്തേയും പ്രിയപ്പെട്ട നായികമാരിലൊരാളായ ശാലിനിയുടെ ഭര്‍ത്താവ്. 1995-ല്‍ ആരംഭിച്ച അഭിനയ സപര്യ 55 ചിത്രങ്ങള്‍ പിന്നിട്ട് 56-ാമത്തേതില്‍ എത്തി നില്‍ക്കുമ്പോള്‍ ആരാധകര്‍ക്ക് 'തല' വെറും ഒരു താരമല്ല. മറിച്ച് അവരിലൊരാളാണ്. താരജാടകളേതുമില്ലാത്ത താരങ്ങളില്‍ താരം. ഒരു ഫെയ്സ്ബുക്ക് പേജോ, വെബ്സൈറ്റോ പോലുമില്ലെങ്കിലും സോഷ്യല്‍ മീഡിയകളിലും 'തല' പൊങ്ങിത്തന്നെ നില്‍ക്കുന്നു.
ഇൌ ഇഷ്ടത്തിനു അങ്ങനെ പ്രത്യേകിച്ച് കാരണങ്ങളില്ല. രജനി ഫാന്‍സും, വിജയ് ഫാന്‍സും അങ്ങനെ ആരാധകര്‍ പലവിധമുണ്ടെങ്കിലും ഇവര്‍ക്കെല്ലാം തലയെ ഇഷ്ടമാണ്. 'തല'യെ ആരാധകര്‍ നെഞ്ചിലേറ്റി സ്നേഹിക്കുമ്പോള്‍ അത് ഒരു സിനിമാതാരത്തോടുള്ള അന്ധമായ ആരാധനയല്ല. മറിച്ച് അജിത് കുമാര്‍ എന്ന പച്ചമനുഷ്യനോടുള്ള ബഹുമാനമാണ്.