∙ വ്യാജരേഖയിൽ പഴുതായി പിഴവുകൾ

ഈ മാസം 5ന് കോഴിക്കോട് വിമാനത്താവളത്തിലെത്തിയ കോഴിക്കോട് സ്വദേശിയായ കാരിയറിന്റെ പേരിൽ ഉള്ളതടക്കം സമാന രീതിയിലുള്ള ഒട്ടേറെ വ്യാജരേഖകൾ കസ്റ്റംസിനു ലഭിച്ചിട്ടുണ്ട്. ഇയാളിൽ നിന്ന് 1.171 കിലോ ഗ്രാം സ്വർണമിശ്രിതമുള്ള 4 കാപ്സ്യൂളുകൾ പിടിച്ചെടുത്തതായും കോഴിക്കോട് വിമാനത്താവളത്തിലെ കസ്റ്റംസ് അസിസ്റ്റന്റ് കമ്മിഷണറുടെ ഓഫിസിൽ ഹാജരാകണമെന്നുമാണ് ഈ വ്യാജരേഖയിൽ പറയുന്നത്. എന്നാൽ, എത്തേണ്ട തീയതിയോ സമയമോ പറഞ്ഞിട്ടില്ല.

ഹാജരാകേണ്ട തീയതിയും സമയവും നൽകാതെ കുറ്റാരോപിതർക്കു കസ്റ്റംസ് സമൻസ് നൽകാറില്ല. മാത്രമല്ല, സമൻസിന്റെ ഏറ്റവും മുകളിൽ ഹിന്ദിയിൽ എയർ കസ്റ്റംസ് കണ്ണൂർ രാജ്യാന്തര വിമാനത്താവളം എന്നും തൊട്ടുതാഴെ ഇംഗ്ലിഷിൽ എയർ കസ്റ്റംസ് കോഴിക്കോട് ഇന്റർനാഷനൽ എയർപോർട്ട് എന്നുമാണുള്ളത്. ഓഫിസ് കോംപ്ലക്സിന്റെ പേരിലും പിശകുണ്ട്. സീൽ അടക്കമുള്ള വ്യാജരേഖയിൽ, ഒപ്പിട്ട ഓഫിസർ കോഴിക്കോട് വിമാനത്താവളത്തിൽ ജോലി ചെയ്യുന്നില്ല.

അതേസമയം, പേരാമ്പ്ര സ്വദേശി, വ്യാജ സമൻസിൽ പറയുന്ന വിമാനത്തിൽ കോഴിക്കോട് വിമാനത്താവളത്തിൽ ഇറങ്ങിയതായി കസ്റ്റംസ് കണ്ടെത്തിയിട്ടുണ്ട്. കസ്റ്റംസ് സമൻസിൽ നിർബന്ധമായി വേണ്ട ഡോക്യുമെന്റ് ഐഡന്റിഫിക്കേഷൻ നമ്പറും (ഡിഐഎൻ ഇല്ല. അതേസമയം, ഡിഐഎൻ അടക്കമുള്ള വ്യാജ സമൻസുകളും വ്യാപകമാണെന്ന് കസ്റ്റംസ് ഉദ്യോഗസ്ഥർ പറയുന്നു. വാചകങ്ങൾ, യഥാർഥ കസ്റ്റംസ് സമൻസിന് സമാനമാണ്. തങ്ങളുടെ സീൽ അടക്കമാണു വ്യാജ സമൻസ് എന്നതിനാൽ, ഇക്കാര്യം കസ്റ്റംസ് ഗൗരവത്തിലെടുത്തിട്ടുണ്ട്.

∙ പൊറുക്കില്ല, ‘ചതിയിലെ വഞ്ചന’

തുടക്കത്തിലൊന്നും കള്ളക്കടത്തു സംഘങ്ങൾക്കു ഡമ്മി കാപ്സ്യൂളുകളും വ്യാജരേഖയും വഴിയുള്ള കാരിയർമാരുടെ ചതി മനസ്സിലായിരുന്നില്ല. അടിച്ചുമാറ്റൽ ആവർത്തിച്ചതും രേഖകളിലെ പൊരുത്തക്കേടുകളുമൊക്കെയാണ് അവർക്കു സംശയമുണ്ടാക്കിയത്. ചതിച്ച കാരിയർമാരെ കള്ളക്കടത്തു സംഘങ്ങൾ കൈകാര്യം ചെയ്യുന്നതു വർധിച്ചിട്ടുണ്ട്.

‘പൊട്ടിക്കൽ’ സംഘങ്ങളുടെ സഹായം ഇക്കാര്യത്തിൽ ഏജന്റുമാർക്കും കാരിയർമാർക്കും ലഭിക്കുന്നതായും കള്ളക്കടത്തു സംഘങ്ങളും കസ്റ്റംസും സംശയിക്കുന്നുണ്ട്. കാരിയർമാരെ വിമാനത്താവളത്തിൽ നിന്നു തട്ടിക്കൊണ്ടുപോയി സ്വർണം തട്ടിക്കൊണ്ടുപോകുന്ന സംഭവങ്ങൾ അടുത്തിടെ കുറഞ്ഞിരുന്നു. അടിച്ചുമാറ്റുന്ന സ്വർണത്തിന്റെ പങ്കു പറ്റി, രഹസ്യമായി കാരിയർമാരെ ഇപ്പോൾ ഇവർ സഹായിക്കുന്നതായാണു സംശയം.

സംശയം തോന്നി കള്ളക്കടത്തു സംഘങ്ങൾ തേടിയെത്തിയാൽ, സംരക്ഷണം നൽകാമെന്നതാണു പൊട്ടിക്കൽ സംഘങ്ങളുടെ ഉറപ്പ്. പൊട്ടിക്കൽ സംഘങ്ങൾ തന്നെ ഏർപ്പാടാക്കുന്ന ഏജന്റുമാരാണു കള്ളക്കടത്ത് സംഘങ്ങൾക്കു കാരിയർമാരെ നൽകുന്നത്. പല കാരിയർമാർക്കും പൊട്ടിക്കൽ സംഘങ്ങളുമായി നിലവിൽ അടുത്ത ബന്ധവുമുണ്ട്. ഇവയാണ് ഈ സംശയത്തെ ബലപ്പെടുത്തുന്നത്.

∙ ഒറ്റിന്റെ ഒരു കഥ കൂടി

2 മാസം മുൻപ് കോഴിക്കോട് വിമാനത്താവളത്തിൽ ജിദ്ദയിൽ നിന്നുള്ള 3 യാത്രക്കാരെ 3 കിലോ ഗ്രാമിനടുത്തു സ്വർണവുമായി കസ്റ്റംസ് പിടികൂടിയിരുന്നു. കാരിയർമാർ പിടിയിലായ അതേസമയത്തു തന്നെ വിമാനത്താവളത്തിനു പുറത്ത് ഒരു സംഘം ഗുണ്ടകളെ കരിപ്പൂർ പൊലീസും പിടികൂടി. അന്വേഷണത്തിൽ, 2 സംഭവങ്ങളും തമ്മിൽ ബന്ധമുണ്ടെന്നു കണ്ടെത്തി. പിടിയിലായ കാരിയർമാരിൽ ഒരാൾ ഏർപ്പാടാക്കിയതായിരുന്നു ഗുണ്ടകളെ.

മറ്റു 2 കാരിയർമാരുടെ കയ്യിൽ ഒരു കിലോഗ്രാം വീതം സ്വർണമുണ്ടെന്നും അവരെ തട്ടിക്കൊണ്ടുപോകണമെന്നും നാട്ടിലെ ഗുണ്ടാസംഘത്തോടു പറഞ്ഞത്, ഈ മൂന്നാമനായിരുന്നു. അതേസമയം, തന്റെ കയ്യിൽ ഒരു കിലോഗ്രാം സ്വർണമുണ്ടെന്ന കാര്യം ഇയാൾ മറച്ചുവയ്ക്കുകയും ചെയ്തു. 20 ലക്ഷം രൂപ ഇയാൾക്കു നൽകാമെന്നായിരുന്നു ഗുണ്ടാ സംഘത്തിന്റെ വാഗ്ദാനം. അതേസമയം, 3 കാരിയർമാരെയും രഹസ്യവിവരത്തിന്റെ അടിസ്ഥാനത്തിൽ വിമാനത്താവളത്തിൽ വച്ച് കസ്റ്റംസ് പിടികൂടിയതോടെ പദ്ധതി പാളി.

∙ കാരിയർമാരെ കിട്ടാനില്ല, പ്രതിഫലം ഒരു ലക്ഷത്തിനടുത്ത്

വിശ്വസ്തരായ കാരിയർമാരെ കിട്ടാനില്ലാതായതോടെ, കാരിയർമാരുടെ പ്രതിഫലം കുത്തനെ കൂട്ടിയിരിക്കുകയാണ്. ഒരു ലക്ഷം രൂപയും വിമാന ടിക്കറ്റുമാണ് സൗദിയിൽ നിന്നു സ്വർണം കടത്താൻ കാരിയർാർക്കു നിലവിൽ ലഭിക്കുന്നത്.

കടുത്ത നിയന്ത്രണങ്ങളുള്ളതിനാൽ, സൗദിയിൽ നിന്നു സ്വർണം കടത്തുന്നതിനു കാരിയർമാർക്ക് നേരത്തെ തന്നെ ഉയർന്ന പ്രതിഫലമുണ്ടായിരുന്നു. യുഎഇയിൽ നിന്നു കടത്തുന്ന കാരിയർമാരുടെ നിരക്കിലും വർധനയുണ്ട്. മുൻപ് 60,000 രൂപയായിരുന്നത് ഇപ്പോൾ 70,000 രൂപയായി. കുറച്ച് വർഷങ്ങൾക്ക് മുൻപ് ഇത് 50,000 രൂപയും വിമാന ടിക്കറ്റുമായിരുന്നു.

വിദേശത്തേക്കു പണം അയയ്ക്കുന്നതിലെ കർശന നിയന്ത്രണങ്ങൾ കാരണം, സൗദിയിലെ മലയാളി ഹവാല ഇടപാടുകാർ ദുബായിലേക്കോ നാട്ടിലേക്കോ ഹവാല പണം അയയ്ക്കുന്നതിനു പകരം കേരളത്തിലേക്കു സ്വർണം കടത്തുകയാണെന്നും വിവരമുണ്ട്.

English summary: Dummy Capsules, Fake Summons; Fraud of the Faithful has Become a Headache for the Gold Smuggling Gangs.