ബഹിരാകാശ വാഹനമായ വൊയേജറിലെ നാലു ചെറുറോക്കറ്റുകൾ (ത്രസ്റ്ററുകൾ) നാസ 37 വർഷങ്ങൾക്കുശേഷം വിജയകരമായി പ്രവർത്തിപ്പിച്ചു. ബഹിരാകാശ വാഹനത്തിലെ ആന്റിന ഭൂമിക്ക് അഭിമുഖമായി നിർത്തുന്നതിനും ആവശ്യമെങ്കിൽ ദിശ മാറ്റുന്നതിനുമാണു ത്രസ്റ്ററുകൾ ഉപയോഗിക്കുന്നത്. 1977ൽ വിക്ഷേപിച്ച വൊയേജറിലെ ഈ സംവിധാനം 1980നു ശേഷം പ്രവർത്തിപ്പിച്ചിരുന്നില്ല.
ദീർഘകാലം പ്രവർത്തിപ്പിക്കാത്തതുമൂലം ഇവ നശിച്ചെന്നായിരുന്നു പല ശാസ്ത്രജ്ഞരുടെയും അഭിപ്രായം. എന്നാൽ ശാസ്ത്രലോകത്തിനാകെ സന്തോഷം നൽകി, ഭൂമിയിലെ നിയന്ത്രണകേന്ദ്രത്തിൽനിന്നുള്ള നിർദേശാനുസരണം ഇവ പ്രവർത്തിച്ചു.
ബഹിരാകാശ വാഹനത്തിന്റെ ആന്റിന ഭൂമിയുടെ നേർക്കാക്കുക എന്നതു വളരെ പ്രധാനമാണ്. ആശയവിനിമയം സുഗമമാക്കാനാണിത്.