ദഹനം സുഗമമായി നടക്കാൻ പച്ചക്കറികൾ പ്രത്യേകിച്ച് നാരുള്ള പച്ചക്കറികൾ കഴിക്കുന്നതു നല്ലതു തന്നെ. എന്നാൽ അവ വേവിച്ച് കഴിക്കണമെന്നു മാത്രം. അമിതഭാരം കുറയ്ക്കാനും പച്ചക്കറിയുടെ ഗുണങ്ങൾ നഷ്ടപ്പെടാതിരിക്കാനും ഡയറ്റിന്റെ ഭാഗമായി മിക്കവരും വേവിക്കാതെ പച്ചക്കറികൾ വെറുതെ കഴിക്കുന്ന പതിവുണ്ട്. എന്നാൽ ദഹനപ്രശ്നമുള്ളവർക്ക് ആ അവസ്ഥ കൂടാനെ ഇതുപകരിക്കൂ.
പാകം ചെയ്തു കഴിക്കുന്നതിന്റെ ഗുണങ്ങൾ
∙ പാകം ചെയ്ത പച്ചക്കറി ദഹിക്കാനെളുപ്പമാണ്. അതുപോലെ തന്നെ മാംസാഹാരങ്ങൾ പെട്ടെന്ന് ദഹിക്കാനും പാകം ചെയ്യണ്ടത് ആവശ്യമാണ്.
∙ പച്ചക്കറികൾ ആവിയിൽ വേവിക്കുകയോ മൈക്രോവേവിൽ പാകം ചെയ്യുകയോ ചെയ്താൽ വെള്ളത്തിൽ വേവിക്കുമ്പോഴുള്ള അത്രയും ഗുണം നഷ്ടപ്പെടില്ല. ഇത്തരത്തിൽ പാകം ചെയ്യുമ്പോൾ പച്ചക്കറികളിലെ ആന്റി ഓക്സിഡന്റ്സ് നഷ്ടപ്പെടില്ല എന്നതാണു കാരണം.
∙ പച്ചക്കറികളിലെ വിഷാംശങ്ങൾ നശിപ്പിക്കാൻ അവ പാകം ചെയ്തു കഴിക്കുന്നതാണ് നല്ലത്. തക്കാളി ,കൂൺ, റാഗി എന്നിവ വെറുതെ കഴിക്കുന്നതിനേക്കാൾ നല്ലത് അവ പാകം ചെയ്തു കഴിക്കുന്നതാണ്.