കരൺ ജോഹർ സംവിധാനം ചെയ്യുന്ന ‘ഏ ദിൽ ഹൈ മുഷ്കിൽ’ എന്ന ചിത്രത്തിന് സെൻസർ ബോർഡ് യുഎ സർട്ടിഫിക്കറ്റ് നൽകി. രൺബീർ കപൂറിനൊപ്പമുള്ള ഐശ്വര്യ റായിയുടെ ചൂടൻ രംഗങ്ങള്‍ സെൻസർ ബോർട്ട് കട്ട് ചെയ്ത് നീക്കി. ഇരുവരുടെയും മൂന്നു ചൂടൻ രംഗങ്ങൾക്കാണ് സെൻസർ ബോർഡ് കത്രികവച്ചത്.
സെൻസർ ബോർഡിന് വേണ്ടിയുള്ള പ്രദർശനത്തിൽ കരൺ ജോഹറും ഒപ്പമുണ്ടായിരുന്നു. ഈ രംഗങ്ങൾ സിനിമയുടെ അഭിഭാജ്യ ഘടകമാണെന്നു പറഞ്ഞിട്ടും അംഗങ്ങൾ ഇത് ഒഴിവാക്കണമെന്ന് ആവശ്യപ്പെടുകയായിരുന്നു. ട്രെയിലറിൽ കാണിക്കുന്ന രംഗങ്ങൾ ഉൾപ്പടെയാണ് നീക്കം ചെയ്തത്.
2012ൽ പുറത്തിറങ്ങിയ സ്റ്റുഡന്റ് ഓഫ് ദ് ഇയറിന് ശേഷം കരൺ സംവിധാനം ചെയ്യുന്ന ചിത്രം കൂടിയാണിത്. പ്രണയത്തിന് പ്രാധാന്യം നൽകി ഒരുക്കിയ സിനിമയിൽ രൺബീർ കപൂർ, ഐശ്വര്യ റായി, ഫവദ് ഖാൻ, അനുഷ്ക ശർമ എന്നിവർ പ്രധാനകഥാപാത്രങ്ങളാകുന്നു.
ഐശ്വര്യയുടെ ഗ്ലാമര്‍ രംഗങ്ങളിൽ അമിതാബ് ബച്ചന് അതൃപ്തി രേഖപ്പെടുത്തിയെന്ന് നേരത്തെ വാർത്ത ഉണ്ടായിരുന്നു. തന്റെ മരുമകൾ അഭിനയിക്കുന്നതിൽ ബിഗ് ബിക്ക് എതിർപ്പില്ലെങ്കിലും ഗ്ലാമറസ് രംഗങ്ങൾ അദ്ദേഹത്തിന് ഉൾക്കൊള്ളാനാകുന്നില്ലെന്നാണ് ബോളിവുഡ് വൃത്തങ്ങൾ പറയുന്നത്. ചിത്രത്തിന്റെ ചില ഭാഗങ്ങൾ എഡിറ്റ് ചെയ്ത് നീക്കണമെന്ന് ബച്ചൻ കരൺ ജോഹറിനോട് നേരിട്ട് ആവശ്യപ്പെട്ടതായും വാർത്ത ഉണ്ടായിരുന്നു. രൺബീറുമൊത്തുള്ള ഐശ്വര്യയുടെ കിടപ്പറ രംഗങ്ങളാണത്രെ ബച്ചനെ ചൂടാക്കിയത്.
ചിത്രത്തിൽ ഷാരൂഖ് ഖാൻ അതിഥി വേഷത്തിൽ എത്തുന്നുണ്ട്. സെപ്റ്റംബർ 9–ന് ചിത്രത്തിന്റെ ട്രെയിലർ പുറത്തു വരും. ചിത്രം ഒക്ടോബർ 28ന് തിയറ്ററുകളിലെത്തും.