വാഹനാപകടക്കേസിൽ നടൻ സൽമാൻ ഖാനെതിരെ സിബിഐ അന്വേഷണം ആവശ്യപ്പെട്ടു സമർപ്പിച്ച പൊതുതാൽപര്യ ഹർജി സുപ്രീംകോടതി തള്ളി. മുംബൈയിൽ 2002 സെപ്റ്റംബർ 28ന് സൽമാൻ ഓടിച്ച കാറിടിച്ച് ഒരാൾ മരിച്ചുവെന്ന കേസിൽ സൽമാൻ പൊലീസിനെയും നിയമ വ്യവസ്ഥയെയും സ്വാധീനിച്ചാണ് അനുകൂലമായ വിധി സമ്പാദിച്ചതെന്ന് ആരോപിച്ച് അഭിഭാഷകനായ എം.എൽ. ശർമ നൽകിയ ഹർജിയാണ് ജസ്റ്റിസ് ജെ.എസ്. ശേഖർ, ആർ. ഭാനുമതി എന്നിവരുൾപ്പെട്ട ബെഞ്ച് തള്ളിയത്.
സെഷൻസ് കോടതി സൽമാൻ കുറ്റക്കാരനാണെന്നു വിധിച്ചിരുന്നെങ്കിലും പിന്നീട് ഹൈക്കോടതി സൽമാനെ വിട്ടയച്ചു. ഇതിനെതിരെ മഹാരാഷ്ട്ര സർക്കാരും കൊല്ലപ്പെട്ടയാളുടെ ബന്ധുക്കളും നൽകിയ അപ്പീലിൽ ഇതേ ബെഞ്ചാണ് പരിഗണിക്കുന്നത്.