ഇന്ത്യയിൽ തന്നെ ഏറ്റവുമധികം ആരാധകരുള്ള താരങ്ങളിലൊരാളാണ് മോഹൻലാൽ. ഇഷ്ടതാരത്തെ േനരിൽ കാണാനും അടുത്ത് പരിചയപ്പെടാനുമുള്ള ആഗ്രഹവുമായി നടക്കുന്നവരും നിരവധി. മോഹൻലാലിന് കൊടുക്കാൻ നിധിപോലെ സൂക്ഷിച്ചൊരു സമ്മാനം കൊണ്ടുനടക്കുന്ന ആരാധകനാണ് സഫീർ. കഴിഞ്ഞ 26 വർഷമായി ആ സമ്മാനം സഫീറിന്റെ കയ്യിലുണ്ട്. മോഹൻലാലിനെ ഒന്നുകാണിക്കുക എന്നത് മാത്രമായിരുന്നു സഫീറിന്റെ ആഗ്രഹം.
ഇപ്പോഴിതാ ആ ആഗ്രഹം പൂർത്തിയായിരിക്കുന്നു. നിധിപോലെ കാത്തുസൂക്ഷിച്ച ആ സമ്മാനം സഫീർ തന്റെ പ്രിയതാരത്തിന് നേരിട്ട് നൽകി. മോഹൻലാലിന് ആദ്യമായി ദേശീയ പുരസ്കാരം ലഭിച്ചപ്പോൾ ആ വാര്‍ത്ത വന്ന പത്രമാണ് താരത്തിന് വേണ്ടി ഒരു പോറൽ പോലുമേല്‍ക്കാതെ സൂക്ഷിച്ചിരുന്നത്. മോഹന്‍ലാൽ ഈ പത്രം കാണുകയും സഫീറിനൊപ്പം ചിത്രമെടുക്കുകയും ചെയ്തു.
സഫീറിന്റെ വാക്കുകൾ–‘1992 ഏപ്രിൽ 8. ലാലേട്ടന് മികച്ച നടനുള്ള ആദ്യ നാഷണൽ അവാർഡ് ലഭിച്ച വാർത്ത വന്ന മനോരമ പത്രം. അന്ന് പ്രീഡിഗ്രി വിദ്യാർത്ഥിയായിരുന്ന ഞാൻ കൗതുകത്തിന് എടുത്ത് വെച്ചതാണ് ഈ പേപ്പർ... ഇപ്പോൾ 26 വർഷങ്ങൾ കഴിഞ്ഞിരിക്കുന്നു.
ഈ പേപ്പർ ലാലേട്ടനെ കാണിക്കമെന്ന എന്റെ ഏറെ നാളത്തെ ആഗ്രഹം നടന്നു.... ഇന്നിതാ ലാലേട്ടൻ ആ പേപ്പർ കണ്ടു, ആ പേപ്പർ പിടിച്ച് കൊണ്ട് ഫോട്ടോസ് എടുത്തു. വളരെ വളരെ സന്തോഷം'.
ഖത്തറിൽ ജോലി ചെയ്യുന്ന സഫീർ കൊടുങ്ങല്ലൂർ സ്വദേശിയാണ്.